Marcos 16
16
Jatz anq'in Jesús kyxol kyimni
Mateo 28.1-10; Lucas 24.1-12; Juan 20.1-10
1Tb'ajlenxitzun ju q'ij te ojlab'l, xi' Mariy aj Magdala, tuk'ix Mariy ttxu' Jacobo, tuk'ix Salomé; e je'x laq'olte tk'ok'jal t-sem tib' tu'n kyxi' q'olte ti'j t-ximlal Jesús. 2Primxix kyxi' tuj tnejel q'ij te seman, e pon ttzi pantyón otoq jawil q'ij. 3Ex in kyma'n kyxolx:
—¿Alkye k'elel q'inte ju ab'j ttzi pantyón tu'n qokx? Che chi.
4Ex tej kylonte, o kyil otoq tz'el q'i'n ju ab'j ttzi pantyón, ex aju ab'j lu ma'xix. 5Tejtzun kyokx tuj pantyón, o kyil q'uql jun ku'xun tuj b'anq'ab'aj, tok jun t-ẍjo'w saq; ex b'i'x e jaw sek'paj xu'j. 6Atzunte ku'xun xi tma'n kye:
—Mi'n che jaw sek'paje; in che jyone ti'j Jesús aj Nazaret, aju jaw q'o'n twitz crus. Mi a'l tzalu, ma jaw anq'in. Kyke'yintze jatum kub' q'o'n. 7Ex kyxi'ye, kymanxe kye t-xnaq'tzb'en ex te Pedro, kxel nej Jesús kywitze tuj Galilea; atzun k'okel kyke'yine ik tza'n xi tma'n kyeye.
8Atzun kye xu'j b'i'x e je'tz oq tuj pantyón, tu'nju otoq che tzaj lu'lun tu'n tchi ex otoq che sek'paj. Mi jun yol xi kyma'n kye xjal, porke in che xob'toq.
Kub' tyek'un tib' Jesús twitz Mariy aj Magdala
Juan 20.11-18
9Tejtzun tjaw anq'in Jesús primxix tuj tnejel q'ij te seman, tnejelxix kub' tyek'un tib' twitz Mariy aj Magdala, aju otoq che etz wuq ju'ẍ tuj tanmi tu'n Jesús. 10Xi'tzun Mariy, xi tma'n kye qeju otoq che ten tuk'il Jesús, in che b'isuntoq ex in che oq'. 11Tejtzun kyb'inte qe jlu qa otoq jaw anq'in Jesús ex qa otoq til Mariy, minti' xi kyoksla'n tyol.
Kub' tyek'un tib' Jesús kywitz kab'e t-xnaq'tzb'en
Lucas 24.13-35
12Ex te yajxi ch'intl kub' tyek'un tib' Jesús tuj juntl tumel kywitz kab'e t-xnaq'tzb'en in che b'ettoq, kyja' kyxi' tuj kojb'il. 13E je'xtzun qe jlu, xi kyma'n kye txqantl; ikx minti' xi kyb'i'n kyyol.
Xi tma'n Jesús kye apostol tu'n kyxi' pakb'al
Mateo 28.16-20; Lucas 24.36-49; Juan 20.19-23
14Te mankb'ilxitzun, kub' tyek'un tib' Jesús ax kywitz qeju junlaj t-xnaq'tzb'en in che wa'ntoq ti'j mes; e b'aj ilin tu'n Jesús tu'nju minti' xi kyoksla'n ex tu'nju kyuwix kyanmi, ex tu'nju minti' xi kyoksla'n kyyol qeju o ke'yin te, qa otoq jatz anq'in Jesús. 15Xi tma'n Jesús kye:
—Kyxi'ye tuj tkyaqil twitz tx'otx', kypakb'anxe tqanil kolb'il kye kykyaqil xjal. 16Alkye ma tz'okslan ex ma b'yan, ok kletel; atzun teju minti' ma tz'okslan, kb'el t-sentens. 17Ex aqeju che okslal, che b'antel qe señ lu kyu'n: K'ajb'el nb'iye kyu'n tu'n kyetz qe ju'ẍ tuj kyanmi xjal; ex ok che yolil tuj junxitl yol; 18qa ma jaw kytzyu'n qe lob'aj, ex qa ma txi kyk'a'n jun venen, minti' kb'ajel kyi'j; kb'el kyq'o'n kyq'ab' kyib'aj yab', ex che b'anixel qe yab' kyu'n.
Xi q'i'n Jesús tuj kya'j
Lucas 24.50-53
19Tb'ajlenxitzun yolin Qajaw Jesús kyuk'il, jax q'i'n tuj kya'j, ex kub' qe' ttxlaj Dios tuj b'anq'ab'aj. 20Atzun kye t-xnaq'tzb'en e je'x, xi kypakb'a'n tqanil kolb'il tuj tkyaqil lugar; ax Qajaw onil kye, in tkyuwsa'nxix ju yol kyu'n qe señ in b'ant kyu'n. Ikxwitju.
Currently Selected:
Marcos 16: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
