JUAN 19

1Were ptzoo Pilat mdad bydihñ Jesúz. 2No bzaa soldad to coron-guiahtz no bdziib yâmeu ihqy Jesúz, no bguhtz yâme leeme to lar-morad, 3no ra yâme leeme:

―¡Nehx zehty xṞeiy meññ-Isṟael!

No luxu rgahp yâme lo me.

4Gyzac byruu Pilat, ra leeyâme:

―¡Lâ güieꞌ! Zidnon mpyquie-rieꞌ stziuꞌ, lehdy güieꞌ laꞌd nehx rdzialaꞌ mbehty doḻ lguia me.

5Byruu Jesúz, ba nu coron-guiahtz ihqy me, no ba nutz me to lar-morad. Were ra Pilat leeyâme:

―¡Neꞌ zu mpyquie-bidno laꞌd lee!

6Hor-xjefy yahc bahl no meññ-rahp yahc ruꞌ idoró bwieꞌ yâme Jesúz, pquee yâme riedz, ne yâme:

―¡Pquee leeme lo cruzy! ¡Pquee leeme lo cruzy!

Ra Pilat leeyâme:

―Lâ tziyno leeme, lâ yquee leeme lo cruzy laꞌd, porni naa nehx rdzialaꞌ mbehty doḻ lguia me.

7Meññ-Isṟael ra yâme Pilat:

―Noꞌ rahp noꞌ to leiy, no ni ne dleiy noꞌ la, rahp me de ni gaty me porni ne me Xiiñ Dioz leeme.

8Hor-bieññ Pilat nirieꞌ, ma bydzie me. 9Gyzac güyuꞌ me leññ palacy, no ra me Jesúz:

―¿Dxu meññ lii?

Per Jesúz nehx gu leeme mbehty.

10Ra Pilat leeme:

―¿Nehx racladzyiꞌ csaꞌy lo dtiidzaꞌ la? ¿Nehx nanniꞌ la, naa beeiy nqueen lii lo cruzy, no zegahc beeiy nislaan lii?

11Were ra Jesúz leeme:

―Mbehty nehx beeiy ntzooy naa, bâḻ dac gybaa byruu diidz; no leewe, dxu bidno naa loꞌy, ma xroꞌ guîlquie rahp.

12Glohdy hor-wé byo Pilat xnahc guislaa me Jesúz; per meññ-Isṟael rquee yâme riedz, gaya yâme Pilat:

―¡Bâḻ guislaay leeme, nehx xmígüiꞌ emperador-Cézr! ¡Gyre dxu ne lee nac ṟeiy, rruu yâme contr emperador-Cézr!

13Ru bieññ Pilat günii yâme ze, ptzoo me mdad byruu Jesúz stziuꞌ, no bicchie me ru rtzoo me guîlguxtisy, to ru le De Guie, ni rnii lo didz-hebreu Gabata. 14Dze-wé nacu dze-rzaa yâme gyre ni yquihñ yâme lo lni-Pascü, beeiy ribygue. Were ra Pilat meññ-Isṟael:

―¡Neꞌ zu xṟeiy laꞌd!

15Per meññ-Isṟael rquee yâme riedz, ne yâme:

―¡Gaty me! ¡Gaty me! ¡Pquee leeme lo cruzy!

Ra Pilat leeyâme:

―¿Yqueen xṞeiy laꞌd lo cruzy la?

Ra xjefy bahl yahc leeme:

―Noꞌ nehx rahp noꞌ zrieñ ṟeiy; nunzy Cézr, wé we dṟeiy noꞌ.

16No luxu bdee Pilat Jesúz lehdy gaty me lo cruzy, no ziyno soldad yahc leeme.

Pquee yâme Jesúz lo cruzy

(Mt. 27:32-44; Mr. 15:21-32; Lc. 23:26-43)

17Byruu Jesúz de uga, ziyno me cruzy ni yquee yâme leeme lo, no za me ru le Xilgar Calaver, ni rnii lo didz-hebreu Gólgota. 18Uga pquee yâme leeme lo cruzy, no pquee yâme schohp meññ lo zrieñ cruzy coo ru queꞌ me, to gá lad to yâme. 19Ihqy cruzy ru queꞌ me, queꞌ letrer ni ptzoo Pilat mdad güyaa, no neu: JESÚZ NI NAC MEÑÑ-NASARET, XṞEIY MEÑÑ-ISṞAEL. 20Xtahl meññ-Isṟael biiḻy leeu, porni gahsh ruꞌ guiedzy pquee yâme Jesúz lo cruzy, no letr ni bzaa yâme ihqy cruzy, güyaau no didz-hebreu, didz-latíṉ, no didz-griegü. 21No leewe xjefy yahc xbahl meññ-Isṟael ra yâme Pilat:

―Di gzaayu, “xṞeiy meññ-Isṟael”; mazyg bzaau, “Leeme ne nac me xṞeiy meññ-Isṟael.”

22Ra Pilat leeyâme:

―Ni ba bzan, ba nehx beeiy gydzeeu.

23Bylux pquee soldad Jesúz lo cruzy, cuaꞌ yâme shab me, ptzoo yâmeu tahp cuib, to cuibu par to gá soldad. No zegahc cuaꞌ yâme shab me ni ruhtz me xtziguia, no gumm güyaau no tohzy lar-nter xtâ guia no xtâ lo yu la, 24leewe ra saꞌ soldad yahc:

―Nehx stzulaꞌy nó leeu, mazyg güieꞌ nó dxu rahp suert, wé we ycaꞌ leeu.

No mod-wé guhc ni rnii lo Guehtzy ru queꞌ xtiidz Dioz, ru neu: “Güdiiz yâme dshabaꞌ, no güloo yâme suert dxu ycaꞌ cad tohbyu.”#19:24 Sal. 22:18 Leewe ni ptzoo soldad yahc ze.

25Gahsh ru queꞌ Jesúz lo cruzy, zu xmam me, no baḻ xmam me, no Maríe tziahl Cleofas, no Maríe-Magdalen. 26Ru bwieꞌ Jesúz ru zu xmam me, no coo xmam me zu to xmeññ me ni ndzi me lee, ra me xmam me:

―Mam, wé zu xiiñiꞌ.

27No luxu ra me mpyquie-nac xmeññ me lee:

―Wé zu xmamiꞌ.

Glohdy dze-wé zia xmam Jesúz xiryuꞌ mpyquie-caḻ, ni nac xmeññ Jesúz lee.

Ni guhty Jesúz

(Mt. 27:45-56; Mr. 15:33-41; Lc. 23:44-49)

28Jesúz nann me gyre ni nac diidz gac ba guhcu, no lehdy gac ni rnii lo Guehtzy ru queꞌ xtiidz Dioz, were günii me:

―Rzaagydadzyaꞌ.

29Caꞌ yâme to csiht, nu vinagyr leññu. Gülunihs yâme to sponj lo vinagyr, no pquee yâmeu ihqy to yahg ni le hisop, no bistzihñ yâmeu ruꞌ me ru queꞌ me lo cruzy. 30No byluxz güee me vinagyr, ne me:

―Gyreu ba bylux.

No bgaaḻ ihqy me, no guhty gahc me.

Gülezy soldad lanz coo leññ Jesúz

31Dze-wé nacu dze-rzaa yâme gyre ni yquihñ yâme lo lni-Pascü, no ba sulo dze-risladzy meññ-Isṟael, no nacu to dzé ni ma nda; leewe xjefy yahc bahl nehx racladzy yâme guiaꞌn xcuerp meññ-rieꞌ yahc lo cruzy. Were günab yâme Pilat cshahl me xmeññ me dziglaꞌy nieꞌ meññ-queꞌ yahc lo cruzy no glety yâme lee. 32Were güya soldad, gülaꞌy nieꞌ meññ-queꞌ lo cruzy gyrop coo ru queꞌ Jesúz, nier nieꞌ to me, were nieꞌ sto me. 33Hor-bydziñgahsh soldad ru queꞌ Jesúz, bwieꞌ yâme ba guhty me, ba di nlaꞌy yâme nieꞌ me.

34Per to lahd gahc soldad gülezy lanz coo leññ Jesúz, no lo hor-wé byruu rieñu no nzeꞌ. 35Ni bwieꞌ nirieꞌ gadee diidz ni guhc, no ni rnii me ni uli we leeu; no nann me ni uli ni rnii me lehdy gylíladzy laꞌd zegahc. 36Nirieꞌ yahc guhcu ze, lehdy gac ni rnii lo Guehtzy ru queꞌ xtiidz Dioz, ru neu: “Nehx gülaꞌy yâme mbehty xdziht me.”#19:36 Ex. 12:46; Nm. 9:12; Sal. 34:20 37No sto lad lo gahc Guehtzy ru queꞌ xtiidz Dioz neu: “Güieꞌ yâme ni ptedyqueꞌ yâme lanz lee.”#19:37 Zac. 12:10

Ni bygaꞌdzy Jesúz

(Mt. 27:57-61; Mr. 15:42-47; Lc. 23:50-56)

38Bylux gyre nirieꞌ, to mpyquie ni le José, no xguiedzy me le Arimatea, ra me Pilat bâḻ beeiy ndee ñahz glety me xcuerp Jesúz. José naꞌ, zegahc‑e xmeññ Jesúz leeme, per ngaꞌdzy porni rdzie me meññ-Isṟael; no Pilat bdee ñahz José güya biglety xcuerp Jesúz. 39Zegahc bydzihñ Nicodem, bidno beeiy treint kil ni nixye ni güyaa no mirra no nutzu áloe. Nicodem, leeme ni güya ru nu Jesúz to guiaal. 40No mod-wé José no Nicodem pchaḻ yâme xcuerp Jesúz no lahr ni güluꞌ yâme ni nixye lee, mod-rtzoo gahc meññ-Isṟael ru ba dziycaꞌdzy yâme mînguty. 41Gahsh ru pquee yâme Jesúz lo cruzy nu to lyu, no leññ lyu-caḻ nu to baa ni leer bydahñ no ndruhty dgueññ igaꞌdzyu. 42Uga pcaꞌdzy yâme xcuerp Jesúz, porni gahshu, no porni guhcu dze-rzaa yâme gyre ni yquihñ dze-risladzy meññ-Isṟael, no ba sulou.

Currently Selected:

JUAN 19: zpg

Highlight

Copy