ENgero 30
30
Aguli ebiyatumwire
1Binu niibyo ebibono byʼAguli, omutaane wa Yake; obukwenda obuyawaire niibwo bunu:
Yabuwaire oItiyeeri,
era oItiyeeri nʼoBbukali.
2“Mazima ninze akirirayo nakimo obusirusiru omu bantu
era mbulamu akabuntu.
3Tinjegangaku amalabuki,
waire okumanya oKibbumba oyo oMutukulye.
4Naani eyaabireku omwigulu, era nʼaika ansi?
Naani eyabbuuniireku empewo omu ngaloye?
Naani eyasibiireku amaizi omu kizwalokye?
Naani eyateekerewo ensalo eyʼekyalo?
Eriinalye niiye onaani, nʼeriina lyʼomutaane niiye onaani?
Aale onkobere owoobba omaite.”
5“Nabuli kibono kya Kibbumba kyʼamazima;
niiye engabo yʼabo abairukira egyali okusuna obukuumi.
6Oku bibonobye, tiwayongerangaku ebibyo,
kaisi tiyakunenya nʼakakasa ngʼobwoli mubbeyi.”
Okusaba oKibbumba enkabi
7“Oo Kibbumba nkusaba ebintu bibiri,
tiwabinjima nga nkaali okufa.
8Tiwaganya nimba nʼokalebule nʼokubbeyanga;
tiwampanga obudoobi, waire obusuni,
neye ongabirirenge ebyokulya ebineetaaga.
9Nga tikiikyo, amo-so nimba na bibitiriri ino ni nakwegaana
ni nkoba nti, ‘OMusengwa-so niiye onaani?’
Ooba ni mba mudoobi ni ntuuka nʼokwibba,
ni nswaza eriinalyo Kibbumba wange.”
10“Tiwatumulanga ebyakalebule oku muweererya eeri omusengwawe,
amo-so nʼakulaama, ni kikukwata.”
11“Waliwo abatumula ebisongolye oku baitewaabwe,
era nga tibasabira abamawaabwe enkabi;
12waliwo abeebona nga balongoole,
neye nga tibabatukulyanga okuzwa omu bucaafu bwʼebibbibibbi byabwe;
13waliwo abo abeebona bonkani,
era ni baseega bati niibo bonkani abaliwo;
14waliwo abo abali nʼamaino amoogi ooti mpiima,
nʼensaya gyabwe giri ooti girimu bwambe,
okumalawo abadoobi oku kyalo,
era okumalawo abadamba omu bantu.”
15“Omunasa guli nʼabaala baagwo babiri,
baceera bati, ‘Ompe! Ompe!’
“Waliwo ebintu bisatu ebitaikuta enaku gyonagyona,”
dala biri bina ebitamatira,
16ebyo niibyo e magombe, omukali omugumba,
ekyalo ekikalu ekikandiire amaizi,
nʼomusyo, igwo etigukoba guti, “Kimala.”
17“Amaiso gʼoyo anyooma oiteeye,
era oyo agaana okuwulira omaaye,
ebinankololo byʼomu kiinamo byaligatoolamu,
era ensega ni gigalya.”
18“Ebintu bisatu ebyankayire okutegeera,
dala biri bina ebintamaite:
19Enzira ya kokomi omwibbanga,
enzira ya mpiri okwibbaale,
enzira yʼeryato oku nyanza,
nʼengeri omusaiza nʼomukali egibatuuka omu mukago!”
20“Enu niiyo enkola yʼomukali omulendi:
Amala okwenda ni yeenaguca,
kaisi nʼakoba ati, ‘Mpaawo kibbikibbi ekinkolereku.’ ”
21“Waliwo ebintu bisatu ebitukutya ekyalo,
biri bina ebikitayezya okugumira,
22omugalama owaasuuka kabaka,
nʼomusirusiru owaabba nʼebyokulya ebingi;
23omukali eyadibire owaasuna obufumbo,
nʼomugalama omukali okusikira omusengwawe omukali.”
Ebiwuuka ebyʼamalabuki
24“Oku kyalo kuliku ebintu bina ebityayi,
neye biri na malabuki mangi ino:
25Enkababe giri nʼamaani matono,
neye gyebisira ebyokulya okweisana.
26Enapowo gyona tigyamaani,
neye gyeyombekera ekisito kyabwe omu mabbaale.
27Enzige gibula okabaka,
neye gikumbira aamo mu bibbula.
28Onankibbobbo oyezya okumukwata nʼengalo;
neye abba paka nʼomu mbiri gyʼabakabaka.
29“Waliwo ebintu bisatu ebikumba nʼosiima,
dala biri bina ebitambulira omu lusimbo:
30Ompologoma akirira nakimo amaani omu bisolo,
mpaawo gondi ogwatya;
31onkoko ompanguzi, nʼombuli ompanya,
nʼokabaka ali nʼamajeege nga gamweruguuliriirye.
32“Owoobbanga okolere ekyʼobusirusiru ni weekudumbalya,
ooba nʼoseega okukola ekibbikibbi,
osirikanga nʼoseega;
33olwʼokubba okusunda amata ngʼowekuleeta amakita,
nʼokumigirirya enindo ngʼowekuleeta omusaaye,
kale kityo nʼokutanula obusungu, niiye ewekuleeta enyombo.”
Currently Selected:
ENgero 30: GWR
Highlight
Share
Copy
Want to have your highlights saved across all your devices? Sign up or sign in
© 2017, Wycliffe BibLe Translators, Inc., All rights reserved.
