Mbombo tsa Vapositili 3

ɄPetulo iponia ʉmuunu ʉvasugujwike isilʉnde

1Ɨkɨgono kɨpamato ʉPetulo nʉ Yohana vaalʉtaga kukɨsaja kʉ tembile pa kavalɨlo ka budikakʉpamato (9) ka pamuunyi.#3:1 Pa kavalɨlo ka budikakʉpamato (9) ka pamuunyi AVayahudi vaale nʉ lwiho lwa kʉlʉta kukɨsaja kʉ tembile kavɨlɨ mu kɨgono. Vaalʉtaga pavʉsiku na pamuunyi pa kavalɨlo ako ka budikakʉpamato. 2Aalepwo ʉmuunu mpamato ʉvɨ aale indema ʉkʉhʉma ʉvʉholwa wa mwene. Kakongosu alɨkʉpɨmbwa na vaanu, valɨkʉmbɨɨka pawiipi nʉ ndyango ʉgwatambʉlwagwa Ndyango ʉNnonu. Apo aadoovaga indalama kʉ muunu ʉvaveetsaga ʉvɨ iingilaga mu lʉvɨgo lwa tembile.

3Ʉmuunu ʉjwa, wʉ ikʉvavona ʉPetulo nʉ Yohana vikwingila mu lʉvɨgo lwa tembile, akavadoova indalama. 4Pwʉ ʉPetulo nʉ Yohana vakandola kʉ lwʉtsi. ɄPetulo akambʉʉla akata, “Lola kwawe!” 5Ʉmuunu ʉlya akavalola, akava nʉ lʉhʉʉvɨlo ʉkʉta valɨ nɨ kɨɨnu kya kʉmpa.

6ɄPetulo akambʉʉla akata, “Ʉne nandɨlɨ natso indalama, lɨno ɨkyʉ ndɨlɨ nakyo kyʉ kyene ndikʉkʉpa. Ndikʉkʉvʉʉla mu litaawa lya Yɨɨsʉ Kɨlɨsiti va kʉ Nazaleti, ɨma ʉgendage!” 7Pwʉ ʉPetulo akamwibata ʉmuunu ʉlya ɨkɨvoko kya kʉndyo, akamwɨmya. Baaho inzajo ni sibʉtsʉ sya silʉnde sya muunu ʉjwa sikakava amaka. 8Akɨɨma ngʼaningʼaani, akatengʉla ʉkʉgenda jyʉmwene. Akiingila mu lʉvɨgo lwa tembile paninie nʉ Petulo nʉ Yohana, alɨkʉgenda kʉnʉ ikima nʉ kʉnʼginia ʉNgʉlʉve. 9Avaanu vooni vakambona ʉmuunu ʉjwa wʉ igenda jyʉmwene nʉ kʉnʼginia ʉNgʉlʉve. 10Vakammanya ʉkʉta vɨ ʉlya ʉvɨ akataamaga pa ndyango gwa lʉvɨgo lwa tembile ʉgwatambʉlwagwa Ndyango ʉNnonu, alɨkʉdoova isiinu palya. Vooni vakadega siitso pa lɨlya ɨlyavombiike kʉ mwene.

ɄPetulo ikʉvavʉʉla avaanu ikulongwi tsa Yɨɨsʉ

11Ʉnsɨkɨ ʉgwa, ʉmuunu ʉlya akava ikʉvakonga ʉPetulo nʉ Yohana. Avaanu vooni vakava videga siitso, vakaviitsila vinyila apoonu apaatambʉlwagwa Lyeve lya Solomoni.#3:11 Lyeve lya Solomoni Apa paale poonu apaswɨke mu lʉvɨgo lwa tembile ʉpwʉ avaanu vaalʉtɨngʼaniaga evo vaataamaga wʉ vipʉlɨhɨtsa imanyiiso, paale kʉnzi kʉ Vʉtaamo ʉVʉvalatse wa Ngʉlʉve. 12ɄPetulo wʉ avaweene avaanu avo, akavavʉʉla akata, “Nyɨ vagoosi ʉnyie nyɨ Vaisilahɨli, kɨki ɨlɨ likʉvakenyemula? Kɨki mukʉtʉlola siitso? Mwita ipange ʉmuunu ʉjʉ tʉmponiitse kʉ maka giitu ʉwe, evo ʉlwakʉva ʉwe tʉlɨ vagolosu pamiiho ga Ngʉlʉve? 13Baako! ɄNgʉlʉve va vanyienya viitu, ʉAbulahamu, ʉIsaka nʉ Yakobo, amwɨmiike ʉmbombi va mwene ʉYɨɨsʉ kʉ nzɨla jya kʉmponia ʉmuunu ʉjʉ. ɄYɨɨsʉ ʉjwa vɨ mwene ʉvɨ ʉnyie mwansupulye kʉ valʉgʉ pakʉta vamʼbude. Nʉpwʉ jɨngave ʉPilato#3:13 ɄPilato Ʉvʉganulu wa Pilato lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. aalamwe ʉkʉta ambopole ʉYɨɨsʉ, ʉnyie mwabeelile, 14mukadoova ʉkʉta ʉmʼbudi vɨ mwene avopolwe! Mukamʼbeela ʉYɨɨsʉ ʉMbalatse, ikange ʉNʼgolosu.#Yesaya 53 15Nʉpwʉ jɨngave ʉmwene vɨ kɨdwivudwivu kya wʉʉmi, ʉnyie mukamʼbuda. Napeene, ʉNgʉlʉve akantsʉʉsa mu vaswe, nʉʉwe weewe vooleletsi va kulongwi tsa kʉtsʉʉka kwa mwene. 16Lɨno mulʉmanye vʉnonu ʉkʉta ʉmuunu ʉjʉ ʉvɨ mukʉmbona apa ikange mummanyile, akavile amaka kʉ nzɨla jya kʉva nʉ lwɨdɨko mu litaawa lya Yɨɨsʉ. Ɨlitaawa ɨlyo ɨlya Yɨɨsʉ, paninie nʉ kʉva nʉ lwɨdɨko kʉ mwene, syʉ syene simponiitse avye nnonu, ndʉwʉ mukʉmbona nyɨ vooni. 17Valʉkololwango, ago gooni, ʉnyie na vavaha viinyo mwavombye mu vʉtsimu. 18Lɨno ʉNgʉlʉve kʉ nzɨla ɨjɨ aavombile kɨlya ɨkyʉ aatsovile ʉkʉgendela kʉ vanyamalago va mwene vooni, ʉkʉta ʉKɨlɨsiti va mwene alakʉvɨlwa.

19“Lɨno mulaate imbiivi tsiinyo, munkilivukile ʉNgʉlʉve, pakʉta avasyɨkɨle imbiivi tsiinyo itso. 20Kʉ nzɨla ɨjyo ʉNtwa ʉNgʉlʉve jiiva paninie nʉʉnyie pakʉta avagatalʉse nʉ kʉvasuungʼila ikange ʉKɨlɨsiti ʉvɨ aahalilwe ʉkʉhʉma katale pa kulongwi jyanyie. Ʉmuunu ʉjwa vɨ Kɨlɨsiti ʉYɨɨsʉ. 21Wɨgane wa Ngʉlʉve ʉkʉta ʉYɨɨsʉ atsige kʉ kʉkyanya ʉkʉsikila pa nsɨkɨ ʉgwʉ ʉNgʉlʉve alasyandʉla isiinu syoni sive sipya, ndʉwʉ aatsovile ʉkʉhʉma katale kʉ nzɨla jya vanyamalago va mwene avavalatse.

22“Ɨkɨ kyʉ mene ʉnyamalago va katale ʉMoose aatsovile akata ndee, ‘Pagati paanyie, ʉNtwa ʉNgʉlʉve viinyo alavahalɨla ʉnyamalago ndʉʉne ʉkʉhʉma mu lʉkolo lwinyo. Amamenyu gooni ʉgwʉ ʉnyamalago va mwene ʉjwa alavavʉʉla, mwitse mugapʉlɨkage vʉnonu. 23Ʉmuunu ʉvaveetsaga ʉvɨ alabeela ʉkʉmpʉlɨhɨtsa ʉnyamalago ʉjwa, ʉNgʉlʉve alammetsa lwoni mu vaanu va mwene nʉ kʉmwongometsa.’#Simiilitso tsa Ndagɨlo 18:15, 18-19 24Ikulongwi itsʉ tsivombeka mu sigono sya lɨno, avanyamalago vooni naveene vaatsitsovile, ʉkʉtengʉla kʉ nyamalago ʉSamweli na valya avaakongile. 25Ago ʉgwʉ ʉNgʉlʉve aatsovile kʉ nzɨla jya vanyamalago avo, ʉnyie nyienye mukʉgʉʉpɨlɨla. Ikange ʉlwɨdɨngʼano#3:25 Ʉlwɨdɨngʼano Ʉvʉganulu wa limenyu lwɨdɨngʼano lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉlwʉ aavɨɨkile na vanyienya viinyo, nalwene ʉnyie mulwʉpɨlye. Wʉ ivɨɨka ʉlwɨdɨngʼano, ʉNgʉlʉve aambʉʉlile ʉkʉkʉjiitu ʉAbulahamu#3:25 Abulahamu Ʉvʉganulu wa litaawa ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉkʉta, ‘Kʉ nzɨla jya muunu va kɨkolo kyako, mwʉ avaanu va sivʉmbʉkʉ syoni valasajiwa.’#Vʉtengʉlɨlo 12:3; 22:18; 26:4 26Pwʉ ʉnsɨkɨ ʉgwʉ ʉNgʉlʉve aamwomwe#3:26 Aamwomwe Ʉvʉganulu ʉvʉnge wa limenyu ɨlɨ kwʉ kʉta ʉNgʉlʉve aantsʉʉsiitse ʉYɨɨsʉ. ʉmbombi va mwene ʉYɨɨsʉ, aansuungʼile kwanyie taasi, pakʉta avasaje wʉ ikʉnkilivula mpamato mpamato mwanyie ʉkʉhʉma mu mbiivi tsiinyo.”

Currently Selected:

Mbombo tsa Vapositili 3: zga

Highlight

Copy