Mbombo tsa Vapositili 8

Avɨɨdɨki vikʉvɨlwa nʉ kʉhamba

1-2ɄSauli aaweene vavombile vʉnonu ʉkʉmʼbuda ʉSitefano. Ʉnsɨkɨ nʼdebe ʉgwakongile, avaanu ʉwʉ vaamwɨdɨkaga ʉNgʉlʉve vakansɨɨla ʉSitefano. Ʉnsɨkɨ gwa kʉndɨlɨla ʉSitefano, avaanu avo vaalɨlaga kʉ lwoveelo.

Ɨkɨgono kɨɨkyo ɨkyʉ vaamʼbudile ʉSitefano, ʉvʉkʉvɨlwa ʉvʉlʉti vʉkatengʉla kʉ mpelela gwa Yelusalemu. Avɨɨdɨki avo vakatengʉla ʉkʉnyilila ʉkwonu ʉkʉnge mu Yuuda, na kʉ Samaliya. Avapositili veene wʉ vaasigye mu Yelusalemu. 3ɄSauli namwene akatengʉla ʉkʉgʉnanga ʉmpelela. Alɨkwingila mu nyumba tsa vaanu, alɨkʉviibata nʉ kʉvagilimya avɨɨdɨki, avagoosi na vadala, alɨkʉvakʉnga mu kɨkʉngwa.

ɄFilipo ilʉmbɨlɨla mu Samaliya

4Avɨɨdɨki avo wʉ vahambile, vakatengʉla ʉkʉpʉlɨsa ɨLivangɨli kʉ vaanu mwoni mwoni. 5ɄFilipo#8:5 ɄFilipo Ʉmuunu ʉjʉ aale mpamato mu valya avatangɨli lekelakʉpamato (7) ʉwʉ ikulongwi tsa veene tsivɨgilwe mu kɨtabu kya Mbombo tsa Vapositili 6:5. namwene akalʉta kʉ vʉtsenge vʉpamato wa kʉ Samaliya, akatengʉla ʉkʉlʉmbɨlɨla ikulongwi tsa Kɨlɨsiti kʉ vaanu va vʉtsenge ʉwa. 6Wʉ vapʉliike amamenyu ga Filipo, nʉ kʉsivona isidego isyʉ aavombaga, avaanu valɨkʉmpʉlɨhɨtsa siitso. 7Alɨkʉswɨma imepo imbiivi mu vaanu vongosu, natsyene tsilɨkʉhʉma kʉnʉ tsikwoveela. Alɨkʉvaponia vongosu ʉwʉ vaasugujwike ɨmihana, nʉ wʉ vaale valema isilʉnde. 8Pwʉ mu vʉtsenge ʉwa kʉkava nʉ lʉhekelo siitso.

ɄPetulo ikʉntanila ʉSimoni ʉmmavi

9Mu vʉtsenge wa Samaliya ʉwa, aalepwo ʉmuunu mpamato ʉvɨ aale immavi, ɨlitaawa lya mwene aatambʉlwagwa Simoni. Alɨkʉvapelela avaanu vooni, mu vʉtsenge ʉwa nʉ mpandʉlʉ gwoni ʉgwa Samaliya, ʉkʉdega pa sidego sya vʉhavi isyʉ aavombaga, ikange ɨɨnʼginiaga ʉkʉta ʉmwene muunu mbaha. 10Avaanu vooni, avaanu avibedwa na vɨɨmɨkiwa, valɨkʉmpʉlɨhɨtsa, kʉnʉ viita, “Ʉmuunu ʉjʉ ʉNgʉlʉve ampye amaka agitambʉlwa Maka Malʉti.” 11Avaanu valɨkʉmpʉlɨhɨtsa ʉlwakʉva isigono syongosu alɨkʉvapelela ʉkʉdega pa mbombo tsa mwene itsa vʉhavi.

12Lɨno ʉFilipo wʉ ikʉvalʉmbɨlɨla ɨLivangɨli lya Lʉdeeva lwa Ngʉlʉve, nʉ kʉta ʉYɨɨsʉ vɨ Mesiya, valɨkwɨdɨka, avagoosi na vadala, valɨkwotsiwa. 13ɄSimoni namwene akamwɨdɨka ʉYɨɨsʉ, akootsiwa, akatengʉla ʉkʉnkonga ʉFilipo ʉkʉveetsaga. Wʉ ikʉsivona isidego isivaha isyʉ ʉFilipo aavombaga, alɨkʉdega.

14Avapositili avaasigye mu Yelusalemu, wʉ vapʉliike ʉkʉta avaanu va kʉ Samaliya naveene valyɨdiike ɨlimenyu lya Ngʉlʉve, vakavasuungʼa ʉPetulo nʉ Yohana ʉkʉ. 15Wʉ vasiike, vakavadoovela avaanu valya ʉkʉta naveene vamwʉpɨlɨle ʉMepo ʉMbalatse, 16manya naavepwo ʉmuunu ʉvaveetsaga pagati pa veene ʉvɨ ʉMepo aamwitsye, apeene vootsiwaagwa mu litaawa lya Ntwa ʉYɨɨsʉ lyene. 17ɄPetulo nʉ Yohana vaavavɨɨkɨlaga isivoko sya lʉsajo, pwʉ naveene vaamwʉpɨlɨlaga ʉMepo ʉMbalatse.

18ɄSimoni wʉ aweene ʉkʉta avaanu valya vʉpɨlye ʉMepo ʉMbalatse kʉ nzɨla jya kʉvɨɨkɨlwa isivoko#8:18 Kʉ nzɨla jya kʉvɨɨkɨlwa isivoko Ʉlwiho ʉlʉ kɨmanyilo ɨkivonia ʉkʉta ʉmuunu ʉvivombelwa ɨlyo asajilwe nʉ kwʉpɨlɨlwa nʉ Ngʉlʉve. na vapositili, akagela ʉkʉvapa indalama ʉPetulo nʉ Yohana, akavavʉʉla akata, 19“Amaka ago, muume najyʉne, pakʉta ʉmuunu ʉvaveetsaga ʉvɨ ndikʉmbɨɨkɨla isivoko, namwene ʉpɨlɨlage ʉMepo ʉMbalatse.”

20ɄPetulo akamwanda akata, “Ʉve paninie ni ndalama tsyako, woongomele! Vusaaga ʉkʉta jʉwigʉla ɨkɨkʉngɨlwa kya Ngʉlʉve ni ndalama! 21ɄNgʉlʉve nakʉpiili ʉvʉtavʉlɨlwa wa kʉva paninie nʉʉwe mu mbombo ɨjɨ ɨjʉtuvomba ʉwe, ʉlwakʉva itsʉ vusaaga mu numbula jyako mbiivi pamiiho ga mwene. 22Ʉlaate ʉvʉtulanongwa waako ʉwa, ʉsiime ɨkɨsa kʉ Ntwa, pakʉta pangave poonu, akʉsyɨkɨle amasaago amaviivi ga mu numbula jyako, 23manya ndɨweene ʉkʉta ʉlɨ nɨ kɨvini ɨkɨvaha siitso, ikange imbiivi tsyako tsikwibiite.” 24ɄSimoni akamwanda akata, “Ʉnyie munsiimile ɨkɨsa kʉ Ntwa, pakʉta lɨleke ʉkʉnnyitsila nɨ lipamato mwago ʉgwʉ mutsovile!”

25Wʉ ʉPetulo nʉ Yohana vooleliitse nʉ kʉlʉmbɨlɨla ikulongwi tsa Ntwa ʉYɨɨsʉ ʉkʉ, vakatengʉla ʉlʉgendo lwa kʉkilivuka kʉ Yelusalemu. Mu nzɨla valɨkʉlʉmbɨlɨla ɨLivangɨli mu matsumbe mongosu ga kʉ Samaliya.

ɄFilipo itsova nʉ mbaha va kʉ Efiopiya

26Ɨkɨgono kɨpamato ʉnsuungʼwa va Ntwa ʉNgʉlʉve akambʉʉla ʉFilipo akata, “Ʉbɨhage ʉlʉvasu lwa Kʉsika ʉkʉgendela ɨnzɨla jɨlya ɨjyʉ jihʉma kʉ Yelusalemu jikwika kʉ Gaza.” Ɨnzɨla ɨjɨ jyagendye mu lʉkɨnga. 27Pwʉ ʉFilipo akahega, akatengʉla ʉkʉgenda mu nzɨla ɨjyo. Akaaganila nʉ mbaha mpamato va kɨlʉnga kya kʉ Efiopiya ʉvɨ aale nsule.#8:27 Nsule Ʉjʉ aale nʼgoosi ʉvɨ vaasulile aleke ʉkʉhola avaana. Vaambombile ewo pa kulongwi jya vʉvombeli wa mwene wa wɨɨmɨɨlɨtsi mu nyumba jya nkʉlʉdeeva ʉnʼdala. Ʉmuunu ʉjwa aale mwɨmɨɨlɨtsi mbaha va kyʉma kyoni kya Kandake, ʉnkʉlʉdeeva ʉnʼdala va kʉ Efiopiya. Ʉmbaha ʉjwa aalʉtile kʉ Yelusalemu kukɨsaja kwa Ngʉlʉve. 28Wʉ ivuja kʉ nyumba, aataamile pa ligeleti#8:28 Ligeleti Ɨkɨ kyale kɨgendelo kya maguludumu gavɨlɨ ɨkyakwegwagwa ni falaasi. Kyale na maka ga kʉpɨmba avaanu vavɨlɨ evo vadatu paninie nʉ muunu ʉvaakɨlongotsaaga. lya mwene ɨlyakwegwagwa ni sidɨɨmo, alɨkwɨmba amamenyu mu kɨtabu kya nyamalago ʉYesaya.

29Pwʉ ʉMepo ʉMbalatse akambʉʉla ʉFilipo akata, “Ʉbɨhage ngʼaningʼaani ʉlɨkonge ɨligeleti lɨlya, ʉkalɨsikile.” 30Pwʉ ʉFilipo akalɨnyilila, akalɨsikila. Akampʉlɨka ʉmbaha ʉjwa ikwɨmba amamenyu mu kɨtabu kya nyamalago ʉYesaya. Akambʉʉtsa akata, “Amamenyu ago ʉgwʉ vukwɨmba, ndeeti, vukʉkɨmanya ɨkyʉ gitsova?” 31Akamwanda akata, “Ndikʉgamanyaga ndeeti ɨngave nakʉli ʉmuunu va kʉmmanyiisa ɨkitsowa mu mamenyu aga?” Akanʼdoova ʉFilipo ʉkʉta iingile ʉmwa mu ligeleti lya mwene, vataame paninie. 32ɄVʉvɨge ʉVʉvalatse ʉwʉ ʉmbaha ʉlya ɨɨmbaga, waateetsaga,

“Vaandongwitse ʉta ngʼolo ɨjyʉ vilʉta kuhɨnza.

Akatsiga kɨnuunu, ʉta kyana kya ngʼolo ɨkyʉ kinuunala,

wʉ vikeeta ʉlwage lwa kyene.

33Vakankinila,

vakata ʉkʉleka ʉkʉmmɨgɨla mu vʉgolosu.

Nakʉli ʉmuunu va kʉpanga ikulongwi tsa vaana va mwene,

ʉlwakʉva vaamʼbudile, akajatsiwa mu kɨlʉnga ɨkɨ,

wʉ alɨ vʉvʉle ʉmwana ʉvaveetsaga.”#Yesaya 53:7-8

34Pwʉ ʉmbaha ʉlya akambʉʉla ʉFilipo akata, “Amamenyu ago ʉgwʉ ʉnyamalago aatsovile, gitsova ikulongwi tsyani? Ndidoova ʉmbʉʉle. Ndeeti, gitsova ikulongwi tsa mwene, evo ikulongwi tsa muunu ʉjyʉnge?” 35Pwʉ ʉFilipo akatengʉlɨla mu mamenyu ago ga Vʉvɨge ʉVʉvalatse ʉkʉlʉmbɨlɨla amamenyu ga Livangɨli lya Yɨɨsʉ.

36Wʉ vapitsiige vigenda mu nzɨla, vakasika apoonu apaale na magasi. Ʉmbaha ʉlya akambʉʉla ʉFilipo akata, “Lola! Amagasi aga apa. Kɨɨnu kɨki kikʉnsiga ndɨleke ʉkwotsiwa?” 37ɄFilipo akamwanda akata, “Ʉngamwɨdɨke ʉYɨɨsʉ Kɨlɨsiti nɨ numbula jyako jyoni, vukwotsiwa.” Ʉmbaha ʉlya akamwanda akata, “Ndikwɨdɨka ʉkʉta ʉYɨɨsʉ Kɨlɨsiti vɨ Mwana va Ngʉlʉve.”#8:37 Mwana va Ngʉlʉve Ʉvʉganulu wa mamenyu aga lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. #8:37 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ. 38Pwʉ ʉmbaha ʉjwa akɨɨmya ɨligeleti, vakiika, vakiingila mu magasi, ʉFilipo akamwotsa. 39Wʉ vahʉmile mu magasi, baaho ʉMepo va Ntwa ʉNgʉlʉve#1 Vakʉlʉdeeva 18:12; 2 Vakʉlʉdeeva 2:16 akantoola ʉFilipo. Ʉmbaha ʉlya naambone ikange, akagendelela nʉ lʉgendo kʉnʉ ahowiike siitso. 40ɄFilipo namwene akɨvona alɨ mu vʉtsenge wa Azoto. Alɨkʉvalʉmbɨlɨla avaanu ɨLivangɨli ʉkwa na mu vʉtsenge wooni wa mu nzɨla, ʉkʉsikila ʉpwʉ itsisika mu vʉtsenge wa Kaisaliya.

Currently Selected:

Mbombo tsa Vapositili 8: zga

Highlight

Copy