Mbombo tsa Vapositili 9

ɄSauli ikwʉpɨlɨla ʉvʉpoki

(Mbombo tsa Vapositili 22:6-16; 26:12-18)

1Ʉnsɨkɨ ʉgwa, ʉSauli aagendelelaga ʉkʉvadwatsa avakongi va Ntwa ʉYɨɨsʉ, ʉwʉ navɨɨlekelwe ʉkʉnkonga ʉNtwa ʉYɨɨsʉ, alɨkʉta vaale vibudwa. Akalʉta kʉ nteeketsi ʉmbaha, 2akanʼdoova ampe ikalata tsa kʉmbɨɨka amanyikike kʉ vavaha va masinagogi agaale mu vʉtsenge wa Damesiki. Ikalata itso tsyampeetsaga ʉvʉtavʉlɨlwa ʉkʉta vooni avikonga ɨNzɨla jya Ntwa ʉYɨɨsʉ ʉwʉ jiikʉvavona, vave vagoosi evo vadala, avakʉnge nʉ kʉvahɨlɨka kʉ Yelusalemu.

3Pwʉ ʉSauli akatengʉla ʉlʉgendo lwa kʉbɨha kʉ Damesiki. Wʉ ahegelye ʉkʉsika pa vʉtsenge ʉwa, akakenyemuka ɨlilangamuli ɨlikali ʉkʉhʉma kʉkyanya likʉmmulika ʉmwene imbasu tsyoni. 4Akagwa paasi, akapʉlɨka ɨlimenyu likʉmbʉʉla liita, “Gwe Sauli! Gwe Sauli! Kɨki vukʉmmelela ʉvʉkʉvɨlwa?” 5ɄSauli akavʉʉtsa akata, “Gwe mbaha, ʉve veeve veeni?” Akaanda akata, “Ʉne neene Yɨɨsʉ, ndɨ vukʉmmelela ʉvʉkʉvɨlwa. 6Lɨno ɨma! Wiingile mu vʉtsenge. Ʉmwa mwale ʉmuunu ʉvɨ jiikʉkʉvʉʉla ɨkyʉ ʉnogye ʉkʉvomba.”

7Avagoosi ʉwʉ vaagendiinie nʉ Sauli vakɨɨma, vakatsilingala, valɨkʉdega ʉlwakʉva naveene vaapʉliike ɨlimenyu ɨlyo, lɨno navaambone ʉmuunu ʉvaatsovaga. 8Pwʉ ʉSauli akɨɨma, akɨvona nilola, nʉpwʉ jɨngave amiiho gaale mabungule. Avanine vakamwibatɨlɨla ɨkɨvoko nʉ kʉndongotsa, vakammɨlɨka mu Damesiki. 9Mu sigono sidatu nalɨkʉlola, nalɨkʉlya, pange kʉnywa ɨkɨɨnu ɨkɨveetsaga.

10Mu Damesiki ʉmwa aalemwo ʉnkongi mpamato va Ntwa ʉYɨɨsʉ, ɨlitaawa lya mwene aale vɨ Ananiya. ɄNtwa ʉYɨɨsʉ akamwɨlanga ʉAnaniya mu mbonekelo akata, “Gwe Ananiya!” Ʉmwene akaanda akata, “Ʉne ndɨlɨ apa Ntwa.” 11ɄNtwa akambʉʉla akata, “Ʉbɨhe kʉ nyumba jya Yuuda ɨjɨlɨ mu lʉkɨndɨ lwa nyumba ʉlutambʉlwa Lʉgolosu, ʉkavʉʉtse mulya ʉmuunu va kʉ vʉtsenge wa Taso, ɨlitaawa lya mwene vɨ Sauli. Ʉnsɨkɨ ʉgʉ ʉmuunu ʉjwa ikɨsaja kwa Ngʉlʉve, 12ikange atsiweene imbonekelo. Mu mbonekelo itso, ambwene ʉmuunu ʉvɨ itambʉlwa Ananiya ikwingila mu nyumba ʉmwʉ alɨmwo, ikʉmbɨɨkɨla isivoko, pakʉta atengʉle ʉkʉlola ikange.”

13ɄAnaniya akamwanda akata, “Gwe Ntwa, avaanu vongosu vambʉʉlile ʉmwʉ ʉSauli ʉjwa avavombye imbiivi avaanu vaako kʉ Yelusalemu! 14Lɨno alɨ apa, apeevilwe ʉvʉtavʉlɨlwa na vavaha va vateeketsi ʉkʉta avakʉnge vooni avidoova ʉvʉsyɨkɨlo wa mbiivi tsa veene nʉ kʉlɨhʉʉvɨla ɨlitaawa lya Ntwa ʉNgʉlʉve.” 15Ʉmwene ʉNtwa akambʉʉla ʉAnaniya akata, “Ʉve bɨhaga! Ʉmuunu ʉjwa, ndɨmmalile ʉkʉta ave mbombi vango, akannyɨmɨle pa kʉlɨpʉlɨsa ɨlitaawa lyango kʉ valya avatava Vaisilahɨli, kʉ vakʉlʉdeeva va veene, ikange nakʉ kʉ veene aVaisilahɨli. 16Ʉne neene jʉndikʉmbonia ʉwɨgane wa Ngʉlʉve ʉmwʉ vʉveelye pa kʉkʉvɨlwa pa kulongwi jya litaawa lyango.”

17Pwʉ ʉAnaniya akalʉta akiingila mu nyumba ʉmwʉ aale ʉSauli. Akambɨɨkɨla isivoko, akambʉʉla akata, “Lʉkololwango Sauli, ʉNtwa ʉYɨɨsʉ ansuungʼile kwave, pakʉta ʉtengʉle ʉkʉlola, ʉdɨtsiwe amaka ga Mepo ʉMbalatse. ɄYɨɨsʉ ʉjwa vɨ mwene akakʉvonekye mu nzɨla wʉ vukwitsa kʉnʉ.” 18Baaho isiinu isivyʉta mavʉvʉlʉ sikalagala ʉkʉhʉma mu miiho ga Sauli, akatengʉla ʉkʉlola, akɨɨma, akootsiwa. 19Pwʉ akalya ɨkyakʉlya, akava na maka ikange.

ɄSauli ikʉmbombela ʉNtwa ʉYɨɨsʉ kʉ Damesiki

ɄSauli akataama isigono sidebe mu vʉtsenge wa Damesiki paninie na vakongi va Ntwa ʉYɨɨsʉ va mu vʉtsenge ʉwa. 20Mumu sigono isyo, kɨtsila kʉsuvalɨla akatengʉla ʉkʉlʉta mu masinagogi kukʉvalʉmbɨlɨla avaanu ikulongwi tsa Yɨɨsʉ, alɨkʉta, “Ʉjwa vɨ Mwana va Ngʉlʉve.” 21Avaanu vooni ʉwʉ vaapʉlɨhɨtsaaga amamenyu ʉgwʉ aalʉmbɨlɨlaga ago, valɨkʉdega siitso. Valɨkʉvʉʉtsania valɨkʉta, “Ndeeti, ʉmuunu ʉjʉ, navɨ mwene ʉlya ʉvɨ akavapelelaga ʉvʉkʉvɨlwa avaanu ʉwʉ valɨhʉʉvɨliige ɨlitaawa ɨlɨ ʉkʉ kʉ Yelusalemu? Ndeeti, ʉjʉ nitsili kʉnʉ pakʉta aviibate avaanu ndaavo pa Damesiki apa nʉ kʉvahɨlɨka kʉ vavaha va vateeketsi?” 22Napeene, ʉSauli akagendelela siitso ʉkʉva na maka pa kʉlʉmbɨlɨla. Kʉ Vayahudi ʉwʉ vaataamaga kʉ Damesiki alɨkʉvavonia ʉwajɨlweli ʉkʉta ʉYɨɨsʉ vɨ Kɨlɨsiti, valɨkʉlemwa ɨlya kʉkaanika.

23Wʉ gʉlʉtɨngʼiinie ʉnsɨkɨ ntale,#9:23 Ʉnsɨkɨ ntale Ʉnsɨkɨ ʉgutsowa apa gwʉ gʉlya ʉgwʉ ʉPaulo wʉ amalile ʉkʉmwɨdɨka ʉYɨɨsʉ, aataamile mu Damesiki, akatsitaama kʉ Alabiya nʉ kʉkilivuka ikange kutaama kʉ Damesiki. Ʉkʉhanza paninie ʉvʉtaamo ʉwa wooni waale ɨmyaka gɨdatu. aVayahudi avo vakɨɨdɨngʼana ʉkʉta vamʼbude. 24Valɨkʉnʼgokela pa milyango gya vʉtsenge vʉlya pakɨlo na pamuunyi, pakʉta vamʼbude. Lɨno ikulongwi tsa lisaago ɨlyo ɨlya kʉmʼbuda tsikansikila ʉSauli. 25Pakɨlo avakongi va mwene vakambɨɨka mu kɨtʉndʉ ɨkɨvaha ɨkyakʉngilwe nɨ milegehe, vakammʉmɨhɨtsa pa ndwelo ɨjyale kʉkyanya mu lʉvɨgo lwa maganga lwa vʉtsenge ʉmwʉ vaale, vakamwisa kʉnzi kʉ lʉvɨgo.

ɄSauli ilʉta kʉ Yelusalemu

26Kʉmbele, ʉSauli akalʉta kʉ Yelusalemu, alɨkʉgela ʉkwɨhanza kʉ vakongi va Yɨɨsʉ. Lɨno vooni valɨkʉnʼdwada, ʉlwakʉva navɨɨdɨke ʉkʉta lweli avye nkongi va Yɨɨsʉ. 27Pwʉ ʉBalinaba akammɨlɨka ʉSauli kʉ vapositili. Akavavʉʉla ʉmwʉ ʉSauli akambonie ʉNtwa mu nzɨla jya kʉbɨha kʉ Damesiki, nɨ lya kʉta ʉNtwa akatsovile nave. Kange akavavʉʉla ʉmwʉ ʉSauli akavalʉmbɨlye avaanu vʉʉkʉ ikulongwi tsa Yɨɨsʉ kʉ maka gooni.

28Pwʉ ʉSauli akava paninie na vapositili. Alɨkʉtsʉngʉʉla mu Yelusalemu, kʉnʉ ikʉvalʉmbɨlɨla avaanu ikulongwi tsa Ntwa kʉ maka gooni. 29Alɨkʉtsova nʉ kʉkaningʼana na Vayahudi vaninie ʉwʉ vaatsovaga ɨnzovele jya Kɨyunaani pa kulongwi jya Yɨɨsʉ. Lɨno naveene valɨkʉlonda ʉkʉta vamʼbude. 30Pwʉ avɨɨdɨki va Yɨɨsʉ vakagamanya amasaago ago, vakambɨkɨlɨtsa, vakansikitsa mu vʉtsenge wa Kaisaliya, vakandeka alʉtage kʉ myave kʉ Taso.

31Mu sigono isyo, ʉmpelela gʉkava nʉ lʉnotsehetso kwoni kʉ Yuuda, kʉ Galilaya, na kʉ Samaliya. ɄMepo ʉMbalatse alɨkʉvadʉlʉsa mu lwɨdɨko nʉ kʉvatanga avɨɨdɨki. Pwʉ valɨkʉnʼdwada ʉNtwa ʉYɨɨsʉ, ikange ɨmbalɨlo jya veene jɨlɨkwongelela siitso.

ɄAineya ʉvɨ aasugujwike isilʉnde ikwʉpɨlɨla ʉvʉpoki

32Mu nsɨkɨ ʉgwa, ʉPetulo alɨkʉgenda kʉnʉ na kʉnʉ, akasika na mu vʉtsenge wa Lida, pakʉta avagendele avɨɨdɨki va Ngʉlʉve avaataamaga ʉkwa. 33Mu vʉtsenge ʉwa, akambona ʉmuunu ʉvɨ aasugujwike isilʉnde, ɨlitaawa lya mwene aale vɨ Aineya. Aagonaga pa liteesu kʉ nsɨkɨ gwa myaka innaana (8). 34ɄPetulo akambʉʉla akata, “Gwe Aineya, ʉYɨɨsʉ Kɨlɨsiti akʉponiitse. Ɨma! Gonza jyʉve ɨliteesu lyako.” Baaho ʉAineya akɨɨma. 35Avaanu avaataamaga mu vʉtsenge wa Lida, na mu lʉbindi lwa Saloni, wʉ vambwene ʉAineya igenda, vooni vakamwɨdɨka ʉNtwa.

ɄPetulo ikʉntsʉʉsa ʉDokasi

36Mu vʉtsenge wa kʉ Yafa aalemwo ʉnʼdala mpamato, ʉnkongi va Yɨɨsʉ, ɨlitaawa lya mwene aatambʉlwagwa Tabita (mu nzovele jya Kɨyunaani, vɨ Dokasi).#9:36 Tabita Ɨlitaawa ɨlɨ lya mu nzovele jya Kɨalameo. Lɨɨlyo ɨlyo, mu nzovele jya Kɨyunaani viita Dokasi. Amataawa gwʉ gavɨlɨ ga kɨkanu ɨkyʉ twɨ Vakɨnga twita nyalʉtsi. ɄDokasi alɨkʉvatanga avagatsu nʉ kʉvomba imbombo itsinge inonu. 37Mu sigono isyo, ʉDokasi akatamwa, akaswa. Avaanu vakagwotsa ʉnsimba gwa mwene, vakagʉgonia mu kɨjumba kya kʉkyanya mu golofa. 38Ʉnsɨkɨ ʉgwa avakongi va Yɨɨsʉ vakapʉlɨka ʉkʉta ʉPetulo alɨ muumulya mu vʉtsenge wa Lida. Ʉvʉtsenge ʉwa waale pawiipi nʉ vʉtsenge wa veene wa kʉ Yafa. Pwʉ vakavasuungʼa kʉ mwene avalʉme vavɨlɨ. Avaanu ʉwʉ vaavasuungʼile vakansiima ʉPetulo vakata, “Siwo tukʉkʉdoova wiitse kwawe, ʉleke ʉkʉsuvalɨla!”

39Pwʉ ʉPetulo akalʉta paninie navo. Wʉ vasiike kʉ Yafa, vakammɨlɨka mu kɨjumba ʉmwʉ gwale ʉnsimba. Avadala avaswɨle vooni ʉwʉ vaswɨlilwe na vagoosi va veene vakalʉndamana pa mwene kʉnʉ vilɨla. Vakambonia amagwanda, nɨ misabwa ɨgɨnge ɨgyʉ ʉDokasi aahonile wʉ mwʉmi.

40ɄPetulo akavahʉmya vooni kʉnzi, akasugama, akanʼdoova ʉNgʉlʉve. Pwʉ akagʉlola ʉnsimba gʉlya akata, “Ʉve Tabita, inamuka!” ɄDokasi akabungula amiiho. Wʉ ambwene ʉPetulo, akiinamuka, akataama. 41ɄPetulo akamwibata ɨkɨvoko, akamwɨmya. Akavɨɨlanga avaswɨle valya, na vaanu avange avaamwɨdɨkaga ʉNgʉlʉve, akavavonia ʉDokasi ʉkʉta mwʉmi. 42Ikulongwi itso tsikavaala mu vʉtsenge wooni wa kʉ Yafa. Avaanu vongosu vakamwɨdɨka ʉNtwa ʉYɨɨsʉ. 43ɄPetulo akatsiga kʉʉkwa kʉ Yafa isigono syongosu, alɨkʉtaama mu nyumba jya muunu mpamato ʉvaatambʉlwagwa Simoni, ʉvaale nyukangʉvʉ.

Currently Selected:

Mbombo tsa Vapositili 9: zga

Highlight

Copy