Luuka 1
1
Amamenyu agilongola
1Kwave mwɨmɨkiwa Tiofilo:
Avaanu vongosu vavɨgile ikulongwi tsa Yɨɨsʉ Kɨlɨsiti#1:1 Kɨlɨsiti litaawa mu nzovele jya Kɨyunaani, mu Kɨebulaniya viita Mesiya. Amataawa aga kwʉ kʉta ʉmuunu ʉvɨ ahalilwe nʉ Ngʉlʉve nʉ kʉbakwa amafuta ave Nkʉlʉdeeva. ndʉwʉ tsyavombiike kwawe. 2Vavɨgile ikulongwi itsi ndʉwʉ twavʉʉlilwe na valya avaalolile na miiho ga veene na vavombi avaatsilʉmbɨlɨlaga ʉkʉhʉma pa vʉtengʉlɨlo wa tsyene. 3Lɨno, ʉlwakʉva ndyolye vʉnonu ʉwajɨlweli wa kulongwi tsa Yɨɨsʉ ʉkʉhʉma pa vʉtengʉlɨlo, ndɨweene lʉnonu najyʉne ndɨkʉvɨgɨle aga gooni mu lʉvaatɨko, ʉve Tiofilo vɨ mwɨmɨkiwa 4pakʉta ʉvʉmanye ʉwajɨlweli wa kulongwi tsyoni itsʉ ʉmanyisiiwe.
Amalago ga kulongwi tsa kʉholwa ʉYohana ʉMwotsi
5Isigono isyʉ ʉHelode aale nkʉlʉdeeva mu mpandʉlʉ#1:5 Mpandʉlʉ Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. gwa Yuuda, aalepwo ʉnteeketsi mpamato ʉvɨ aatambʉlwagwa Zakaliya, ʉkʉhʉma mu kɨpʉga kya vateeketsi ɨkya Abiya. Ʉnʼdala va Zakaliya aatambʉlwagwa vɨ Elizabeti. Ʉjwa aahʉmile mu kɨkolo kya vateeketsi ɨkya Aloni.#1:5 Aloni Ɨmba ikulongwi tsa muunu ʉjʉ kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. 6ɄZakaliya nʉ Elizabeti vaale vagolosu pamiiho ga Ngʉlʉve, vaakongile vʉnonu indagɨlo ni simiilitso tsyoni tsa Ntwa ʉNgʉlʉve. 7Avaanu ava vaale vʉvʉle ʉmwana, ʉlwakʉva ʉElizabeti aale nʼgʉmba, ikange vaale vagogolo.
8-9Lwalepwo ʉlʉvaatɨko kʉ vateeketsi lwa kʉvomba imbombo mu Vʉtaamo ʉVʉvalatse wa Ngʉlʉve.#1:8-9 Vʉtaamo ʉVʉvalatse wa Ngʉlʉve Ʉvʉganulu wa vʉtaamo ʉvʉ kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. Ɨkɨgono kɨpamato, mu lʉvaatɨko ʉlwa gʉkasika ʉnsɨkɨ gwa kɨpʉga kya Abiya ʉkʉvomba ɨmbombo jya vʉteeketsi Pavʉvalatse apo. Pwʉ vakalagʉlɨla mu sigelelo sya veene,#1:8-9 Vakalagʉlɨla mu sigelelo sya veene AVayahudi wʉ vinogwa ʉkʉhala ʉmuunu mpamato mu kɨpʉga, vaavɨgaga amataawa ga vaanu avo mu tʉganga, nʉ kʉtʉvɨɨka twoni mu likopo. Valɨkʉjʉtsɨlɨngʼania siitso ɨlikopo ɨlyo ʉkʉsikila ʉpwʉ akaganga kapamato kihʉma nʉ kʉgwa paasi. Ʉmuunu ʉvɨ akaganga akanya litaawa lya mwene kilongola ʉkʉhʉma, vɨ aaveetsaga ahalilwe. akahalwa ʉZakaliya pakʉta iingile pa Vʉtaamo ʉVʉvalatse ʉwa wa Ntwa ʉNgʉlʉve, anyianye pa kɨteekelelo isiinu isyʉ sipela ʉlʉnuusi ʉlʉnonu. 10Wʉ alɨ mu nʼgati inyianya, avaanu vongosu vaale mu lʉvɨgo lwa tembile valɨkwɨsaja.
11Pwʉ ʉnsuungʼwa va Ntwa ʉNgʉlʉve akambonekela ʉZakaliya. Ʉnsuungʼwa ʉjwa ɨɨmile ʉlʉvasu lwa kʉndyo lwa kɨteekelelo kɨlya. 12ɄZakaliya wʉ ikʉmbona ʉnsuungʼwa ʉjwa, lʉkambona ʉlʉdwado ʉlʉlʉti. 13Pwʉ ʉnsuungʼwa akambʉʉla akata, “Ʉladwadaga Zakaliya, ʉNgʉlʉve apʉliike ʉlʉdoovo lwako, ʉnʼdala vaako ʉElizabeti jiikʉkʉholela ʉmwana. Nʉʉve jʉmpeetsage ʉmwana ʉjwa ɨlitaawa ɨlɨ Yohana. 14Apo jʉwiiva nʉ lʉhekelo, ikange avaanu vongosu jʉviiva nʉ lʉhekelo apya aholilwe, 15ʉlwakʉva jiiva nʉ vʉtwa ʉkʉhʉma kʉ Ntwa ʉNgʉlʉve. Ʉjwa aleke ʉkʉnywa ɨkɨveetsaga ɨkyʉ kigaatsa, ikange amaka ga Mepo ʉMbalatse gapiiva nʉ mwene ʉkʉhʉma ʉnsɨkɨ wʉ iiva mu litumbu lya vanyina. 16Jiikʉvakilivula aVaisilahɨli vongosu kʉ Ntwa ʉNgʉlʉve va veene. 17Ʉjwa jiilongola kʉ Ntwa, jiiva na maka nɨ numbula jya kʉnkonga ʉNgʉlʉve ndʉwʉ aale ʉnyamalago ʉEliya.#1:17 Eliya AVayahudi vaahʉʉvɨlaga ʉkʉta aliitsa ʉlwa vɨɨlɨ ʉnyamalago ʉEliya, kunotsa ʉwiitsilo wa Kɨlɨsiti (Malaki 3:1; 4:5-6). Jiikʉvasajania avahotsi na vaana va veene, ikange jiikʉvaandʉla avaanu avagalo vave nʉ lʉhala lwa kʉmwɨdɨka ʉNgʉlʉve nʉ kʉvalɨngʼaania avaanu vamwʉpɨlɨle ʉNtwa.”
18Pwʉ ʉZakaliya akatsova kʉ nsuungʼwa akata, “Kɨɨnu kɨki ɨkikʉmbɨɨka ʉne ndɨlʉmanye ʉkʉta amamenyu aga ga lweli? Lola, ʉne nʉ nʼdala vango isigono silʉtile.” 19Ʉnsɨkɨ wʉ atsovile ɨlyo, ʉnsuungʼwa akambʉʉla akata, “Ʉne neene Gabulieli, ndɨ ndikwɨma pamiiho ga Ngʉlʉve, ʉjwa vɨ mwene ʉvɨ ansuungʼile kukʉkʉvʉʉla ɨkulongwi ɨjɨ ɨnonu. 20Lɨno, ʉlwakʉva nawɨɨdiiki ʉgwʉ ndɨkʉvʉʉlile, wiiva kɨnuunu. Nʉkatsovage ʉkʉsika ɨkɨgono ʉpwʉ galaava gihʉmɨla aga. Tsa jɨlweli, aga galahʉmɨla wʉ gʉsiike ʉnsɨkɨ gwa geene!”
21Ʉnsɨkɨ ʉgwa avaanu valya ʉwʉ vaale mu lʉvɨgo, vakava vikʉmpʉlɨkɨla ʉZakaliya kʉnʉ videga, ʉlwakʉva aalɨndye ʉkʉhʉma kʉ Vʉtaamo ʉVʉvalatse wa Ngʉlʉve. 22Wʉ ahʉmile, aalemilwe ʉkʉtsova na veene. Baaho vakalʉmanya ʉkʉta, kʉlɨ kɨɨnu kɨhʉmye wʉ alɨ mu Vʉtaamo ʉVʉvalatse wa Ngʉlʉve. Ʉmwene akava ikʉvavʉʉla kʉ nzɨla jya sivoko, aalemwagwa ʉkʉtsova. 23Wʉ sisilile isigono sya mwene isya kʉvomba imbombo tsa vʉteeketsi, akavuja kʉ nyumba.
24Kʉmbele, ʉElizabeti, ʉnʼdala va mwene, akava nya vʉtsito. Pwʉ akɨjengʉla, akatsiga mu nyumba ɨmyetsi gɨhaano. Alɨkwɨtsosanza jyʉmwene alɨkʉta, 25“Ɨlɨ lyʉ lyene ʉNtwa ʉNgʉlʉve ambombye ʉne, ambwene nʉ kʉnnyetsehetsa isoni pamiiho ga vaanu.”
Amalago ga kulongwi tsa kʉholwa ʉKɨlɨsiti
26Wʉ gʉsiike ʉmwetsi gwa ntanato (6) mu vʉtsito wa Elizabeti, ʉNgʉlʉve akansuungʼa ʉnsuungʼwa ʉGabulieli kʉ litsumbe lya kʉ Nazaleti, ɨlyʉ lyale mu mpandʉlʉ gwa Galilaya, 27kʉ mmɨnza ʉvɨ aatambʉlwagwa Maliyamu. Ʉmmɨnza ʉjwa aale mu ndagani nʉ Yusufu ʉvaahʉmile mu kɨkolo kya nkʉlʉdeeva ʉDavʉdi.#1:27 Davʉdi Ikulongwi tsa Davʉdi ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. 28Ʉnsuungʼwa wʉ asiike kwa Maliyamu akata, “Ndikʉkʉsaamusa ʉve vɨ ʉpeevilwe ʉlʉhʉngʉ, ʉNtwa ʉNgʉlʉve alɨ nʉʉve.”
29ɄMaliyamu wʉ apʉliike amamenyu ago, akakenyemuka siitso, alɨkwɨvʉʉtsa alɨkʉta, “Ɨsaavo ɨjɨ, kwʉ kʉta kɨki?” 30Pwʉ ʉnsuungʼwa akata, “Maliyamu, ʉleke ʉkʉdwada, ʉlwakʉva ʉNgʉlʉve akʉhʉngʉkye. 31Lola, jʉwiiva nʉ vʉtsito, jʉwihola ʉmwana ʉnʼdɨɨmi. Ʉmwana ʉjwa jʉmpeetsage ɨlitaawa ɨlɨ Yɨɨsʉ. 32Ʉmwene ʉjwa jiiva mwɨmɨkiwa, ikange jiitambʉlwagwa Mwana va Ngʉlʉve ʉNdʉti va syoni. ɄNtwa ʉNgʉlʉve jiikʉmpa ʉvʉtavʉlɨlwa wa vʉkʉlʉdeeva, ndʉwʉ aale ʉkʉkʉʉje, ʉnkʉlʉdeeva ʉDavʉdi. 33Jiiva nkʉlʉdeeva va Vaisilahɨli#1:33 Nkʉlʉdeeva va Vaisilahɨli Mu Kɨyunaani jɨvɨgilwe jiilongolelaga ɨnyumba jya Yakobo. sikutsooni, ikange ʉLʉdeeva lwa mwene nalʉlaave nʉ vʉsililo.”#2 Samweli 7:13, 16; Danieli 7:14; Yesaya 9:7
34ɄMaliyamu akambʉʉtsa ʉnsuungʼwa akata, “Ʉne nandɨmmanyili ʉnʼgoosi, lɨno ɨlɨ liveetsaga ndeeti?” 35Ʉnsuungʼwa akamwanda akata, “ɄMepo ʉMbalatse jiikʉkwitsila, nageene amaka ga Ngʉlʉve ʉNdʉti va syoni jʉgikʉkʉgubikila ndʉ mwɨtsɨɨtsɨ. Pwʉ ʉmwana ʉvɨ jiiholwa jiiva imbalatse, jiitambʉlwagwa Mwana va Ngʉlʉve. 36Lola! Namwene ʉlʉkololwo ʉElizabeti mu vʉgogolo wa mwene alɨ nʉ vʉtsito wa mwana ʉnʼdɨɨmi. Lɨno, ʉgʉ mwetsi gwa ntanato (6), kʉ mwene ʉvɨ vaamwɨlangaga nʼgʉmba, 37manya nakɨkʉli ɨkyʉ kɨndemile ʉNgʉlʉve.” 38ɄMaliyamu akata, “Lola, ʉne ndɨlɨ mbanda va Ntwa ʉNgʉlʉve, jɨveetsage ndavʉle kwane ndʉwʉ ʉtsovile.” Pwʉ ʉnsuungʼwa akahega, akandeka.
ɄMaliyamu ilʉta kukʉnsaamusa ʉElizabeti
39Wʉ silʉtɨngʼiinie isigono sidebe, ʉMaliyamu akahega alɨkʉlʉta ngʼaningʼaani kʉ vʉtsenge vʉpamato ʉwʉ waale mu kɨlʉnga ɨkya sidugala ɨkya Yuuda. 40Ʉkwa akatsikwingila mu nyumba jya Zakaliya, akansaamusa ʉElizabeti. 41ɄElizabeti wʉ apʉliike ɨsaavo jya Maliyamu, ʉmwana akakina mu nʼgati mu litumbu lya mwene. Pwʉ amaka ga Mepo ʉMbalatse gakamwitsila ʉElizabeti, 42akatengʉla ʉkʉtsova kʉ maka akata, “Ʉlɨ nʼgatalʉsu ʉve ʉkʉlʉtɨɨlɨla avadala vooni, ikange inʼgatalʉsu najyʉ mwana ʉvɨ jʉwihola. 43Ʉne neene veeni ʉpwʉ namwene ʉvanyina va Ntwa vango itsile kwane? 44Lola, ʉnsɨkɨ wʉ ndipʉlɨka ɨsaavo jyako, ʉmwana ʉnsyele mu litumbu lyango, akinile kʉ lʉhekelo. 45Ʉlɨ nʼgatalʉsu ʉve vɨ wɨdiike ʉkʉta ago ʉgwʉ ʉNtwa ʉNgʉlʉve atsovile kwave, gapivombeka.”
Ʉlwɨmbo lwa Maliyamu lwa kʉnʼginia ʉNtwa ʉNgʉlʉve
46Pwʉ ʉMaliyamu akata,
“Ndikʉnʼginia ʉNtwa ʉNgʉlʉve,
kʉ numbula jyango jyoni.
47Ɨnumbula jyango jɨlɨ nʉ lʉhekelo
mwa Ngʉlʉve ʉMpoki vango,
48ʉlwakʉva avʉweene ʉvʉlemwa
wa mbanda va mwene.
Lola, ʉkʉhʉma lɨno avaanu va sivʉmbʉkʉ syoni,
jʉvikʉnnyɨlangaga ʉne ʉkʉta ndɨlɨ nʼgatalʉsu.
49ɄNtwa ʉNgʉlʉve ʉNyamaka Gooni
ambombye itsa kʉdega,
ɨlitaawa lya mwene livalatse.
50Ɨkɨsa kya mwene kya sikutsooni,
kʉ vooni ʉwʉ vikʉnʼdwada.
51Ɨkɨvoko kya mwene ɨkɨnya maka,
kɨvombile ɨmbombo ɨmbaha,
avalɨ nʉ lwɨginio mu numbula tsa veene,
avahaasiitse.
52Avahetsiitse avakʉlʉdeeva mu sitaamilo sya veene,
avɨɨmiike avikɨlemwa.
53Avapye avanya nzala isiinu isinonu,
avamosu avaswɨmile valʉtage amavoko geene.
54Avatangile avavombi va mwene aVaisilahɨli,
ʉkʉkʉmbʉhɨtsa ʉlwɨdɨngʼano lwa mwene ʉlwa kʉvakolela ɨkɨsa,
55ndʉwʉ aatsovile kʉ vakʉkʉjiitu,
ʉAbulahamu#1:55 Abulahamu Ikulongwi tsa Abulahamu ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. nɨ kɨvʉmbʉkʉ kya mwene kyoni ɨmisɨkɨ gyoni.”#1 Samweli 2:1-10
56ɄMaliyamu akataama nʉ Elizabeti ɨmyetsi nda gɨdatu, kʉmbele akavuja kʉ myavaavo.
Ʉkʉholwa kwa Yohana ʉMwotsi
57Ʉnsɨkɨ gwa Elizabeti gwa kʉhola ʉmwana gʉkasika, pwʉ akahola ʉmwana ʉnʼdɨɨmi. 58Avambʉtsengelanile na valʉkololwe wʉ vapʉliike ʉkʉta ʉNtwa ʉNgʉlʉve ankolye ɨkɨsa ʉElizabeti, vakava nʉ lʉhekelo paninie nʉ mwene.
59Ɨkɨgono ɨkya nnaana (8) ʉkʉhʉma aholwagwe ʉmwana, vakalʉndamana kʉmbombela ʉlwiho lwa kʉtahili#1:59 Kʉtahili Ʉvʉganulu wa limenyu ʉkʉtahili lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉkʉkongana ni ndagɨlo tsa Ngʉlʉve kʉ Vayahudi. Pwʉ vakava vinogwa ʉkʉmpa ʉmwana ɨlitaawa lya dadaaje, ɨlɨ Zakaliya. 60Apeene ʉvanyina va mwana akavavʉʉla akata, “Baako, jiitambʉlwagwa vɨ Yohana.” 61Aveene vakamwanda vakata, “Mu kɨkolo kyako nakʉli ʉmuunu ʉnya litaawa ɨlyo.” 62Pwʉ vakambʉʉtsa ʉdadaaje va mwana ʉkʉta ikʉmpa ʉmwana ɨlitaawa ɨlɨ veeni. 63ɄZakaliya akadoova ɨkɨbavo kya kʉvɨga, akavɨga ndee, “Ɨlitaawa lya mwene jiiva vɨ Yohana.” Avaanu vooni vakadega. 64Baaho ʉlʉlimi lwa mwene lʉkadɨndʉka, akatengʉla ʉkʉtsova nʉ kʉnʼginia ʉNgʉlʉve. 65Apo vooni avambʉtsengelanile nʉ Zakaliya, vakatengʉla ʉkʉnʼdwada ʉNgʉlʉve. Ikulongwi itsi tsikavaala mu kɨlʉnga kyoni ɨkya sidugala ɨkya Yuuda. 66Avaanu vooni ʉwʉ vaapʉliike, valɨkʉsaaga mu numbula tsa veene valɨkʉta, “Ʉmwana ʉjʉ jiiva ndeeti?” Valɨkʉsaaga ɨlyo, ʉlwakʉva vaalʉmanyile ʉkʉta ʉNtwa ʉNgʉlʉve alɨ nʉ mwene.
Ʉlwɨmbo lwa Zakaliya lwa kʉnʼginia ʉNtwa ʉNgʉlʉve
67Pwʉ amaka ga Mepo ʉMbalatse gakamwitsila ʉZakaliya, ʉdadaaje va mwana. Pwʉ akatengʉla ʉkʉtsova amalago akata,
68“Aginiwaagwe ʉNtwa ʉNgʉlʉve va Vaisilahɨli,
ʉlwakʉva itsile nʉ kʉvavopola avaanu va mwene.
69Atʉpye ʉMpoki ʉnya maka,#1:69 ɄMpoki ʉnya maka Mu Kɨyunaani pavɨgilwe ʉlʉsʉga lwa vʉpoki. Mu Vʉvɨge ʉVʉvalatse ʉlʉsʉga lwa kɨkanu kyʉ kɨhwananitso kya muunu ʉnya maka mongosu.
ʉkʉhʉma mu kɨkolo kya mbombi va mwene ʉDavʉdi,#1 Samweli 2:10; Zabuli 18:2; 132:17
70ndʉwʉ ʉNgʉlʉve aatsovile ʉkʉhʉma katale,
kʉ nzɨla jya vanyamalago va mwene avavalatse ʉkʉta,
71alatʉpoka kʉ valʉgʉ viitu,
nʉ kʉhʉma mu sivoko sya vaanu vooni ʉwʉ vatʉsʉʉlile.#Zabuli 106:10
72ɄNgʉlʉve avoniitse ɨkɨsa ndʉwʉ aavahʉʉviitse avanyienya viitu,
ikʉmbʉhɨtsa isigono syoni ʉlwɨdɨngʼano lwa mwene ʉlʉvalatse.#Zabuli 105:8; 106:45; Vʉtengʉlɨlo 17:7; Valawi 26:42
73Ɨɨjyɨgile kʉ nyienya viitu ʉAbulahamu ʉkʉta,
ikʉtʉpeetsaga ʉlʉhʉngʉ ʉwe,
74pakʉta atʉpoke mu sivoko sya valʉgʉ viitu,
tʉmbombelage ʉmwene kɨtsila kʉva nʉ lʉdwado,
75mu vʉvalatse na mu vʉgolosu isigono syoni isya wʉʉmi wiitu.
76Lɨno ʉve mwana vango,
vukwɨlangwagwa nyamalago va Ngʉlʉve ʉNdʉti va syoni,
pakʉva jʉvulongolaga kʉ Ntwa pakʉta, ʉnnotsehetse ʉmwene ɨnzɨla.#Malaki 3:1; Mataayo 3:3
77Lola, vukʉvavʉʉlaga avaanu va mwene ʉkʉta,
vikwʉpɨlɨla ʉvʉpoki, wʉ ʉNgʉlʉve ikʉvasyɨkɨla imbiivi tsa veene.#Yelemiya 31:34
78Lola, ʉNgʉlʉve viitu vɨ nya kɨsa kwawe,
ʉlʉmuli lwa mwene ʉkʉhʉma kʉkyanya, lʉhegelye kukʉtʉmulikila.#Mbalɨlo 24:17; Yesaya 60:1-2; Malaki 4:2
79Lukʉvamulikila ʉwʉ valɨ mu ngʼiisi jya vʉhɨgi wa vʉswe.#Yesaya 9:1-2
Kange jiikʉtʉlongolela mu nzɨla jya lʉnotsehetso.”
80ɄYohana akakʉla, akoongelela amaka ga Mepo ʉMbalatse. Alɨkʉtaama kʉ lʉkɨnga ʉkʉsika ʉnsɨkɨ ʉgwʉ akavoneka kʉ Vaisilahɨli.
Currently Selected:
Luuka 1: zga
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
