Luuka Ikulongwi itsilongola
Ikulongwi itsilongola
Ɨkɨtabu ɨkɨ kyavɨgilwe nʉ Luuka. Ʉkʉkongana nɨ mivɨgɨle nɨ mitsovele ɨgɨlɨ mu kɨtabu ɨkɨ, jivoneka ʉkʉta ʉLuuka ʉjwa aale Nʼyunaani. Ikange ʉmuunu ʉjʉ vɨ mwene aavɨgile ɨkɨtabu kya Mbombo tsa Vapositili (Luuka 1:1-4; Mbombo tsa Vapositili 1:1). ɄLuuka naale inninie mu vapositili va Yɨɨsʉ. Isitabu isi sivɨlɨ aambɨgye ʉmuunu ʉvɨ aatambʉlwagwa Tiofilo. Ʉwooleletsi vuvonia ʉkʉta ʉLuuka aavombile ɨmbombo jya kʉlʉmbɨlɨla ɨLivangɨli paninie nʉ Paulo (ɨmba Vakolosai 4:14; 2 Timoti 4:11; Filimoni 24). Ikange jivoneka ʉkʉta ʉLuuka aavɨgile ɨkɨtabu ɨkɨ mu mwaka gwa sitsigo innaana (80) Waholilwe ʉYɨɨsʉ Kɨlɨsiti.
Ʉvʉsumbe wa Luuka wa kʉvɨga ɨkɨtabu ɨkɨ waale wa kʉvonia imanyiiso tsa Yɨɨsʉ Kɨlɨsiti, paninie nʉ vʉpoki ʉwʉ ʉYɨɨsʉ aavagegye avaanu vooni, aVayahudi na vatava Vayahudi. Ivonia itsi wʉ iganula ʉmwʉ kɨveelye ɨkɨkolo kya Yɨɨsʉ ʉkʉtengʉla pa Yɨɨsʉ ʉkʉkilivuka kʉnsana ʉkʉsika kwa Adamu, ʉvɨ aale vɨ muunu ʉntatsi ʉkʉpelwa nʉ Ngʉlʉve. Ikange ʉmbɨgi ʉjʉ ivonia ʉmwʉ ʉYɨɨsʉ aavɨɨkye ʉntɨma avaanu ʉwʉ vaabedwagwa nda Vasamaliya, avasangʉtsi va songo, avagatsu, avadala na vange ʉwʉ navaale Vayahudi.
ɄLuuka aavɨgile ikulongwi nyongosu pa kʉvonia ʉkʉta ɨLivangɨli lya Yɨɨsʉ Kɨlɨsiti lyavakɨnziitse avaanu vooni. Ikulongwi nyongosu itsʉ tsivonia ʉvʉsumbe ʉvʉ, avavɨgi avange ndʉ Mataayo, ʉMaliko nʉ Yohana navavɨgili. Mu kulongwi itso mwile ikulongwi tsa nʼdala ʉntulanongwa ʉvɨ aamʼbakile ʉYɨɨsʉ amafuta (7:36-50), ɨkɨhwananitso kya Nsamaliya ʉnya kɨsa (10:30-37), ɨkulongwi jya mwana ʉnʼjagi (15:11-32), ɨkɨhwananitso kya mmosu nʉ nʼgatsu ʉLazalo (16:19-31) nɨ kulongwi jya nsangʉtsi va songo ʉZakayo (18:9-14).
Currently Selected:
Luuka Ikulongwi itsilongola: zga
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.