Mataayo 20

Ɨkɨhwananitso kya vavombi mu gʉnda gwa mizabibu

1“ɄLʉdeeva lwa Kʉkyanya lʉhwaniine nʉ mwenekɨlɨmɨla kya mizabibu mpamato. Ʉmuunu ʉjwa aalaavile pavʉsiku, akalʉta kulonda avavombi va kʉvomba ɨmbombo mu kɨlɨmɨla kya mwene. 2Akavavona avaanu avaalondaga amalɨmo, akɨɨdɨngʼana navo ʉkʉvahomba nʉ jyʉnge ʉlʉhombo lwa kɨgono kɨpamato,#20:2 Ʉlʉhombo lwa kɨgono kɨpamato Mu Kɨyunaani jɨvɨgilwe dinali. Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. pwʉ akavahɨlɨka kʉ kɨlɨmɨla kya mwene. 3Wʉ kasiike akavalɨlo ka daatu pavʉsiku, ikange akahʉma pa nyumba jya mwene, akagendela pa soko, akavavona avaanu avange vɨmile apo kɨtsila mbombo. 4Akavavʉʉla akata, ‘Najyʉnyie mubɨhage kuvomba ɨmbombo mu kɨlɨmɨla kyango kya mizabibu. Ʉne jʉndikʉvahomba ʉlʉhombo ʉlʉvanogye.’ 5Avo naveene vakɨɨdɨkɨla, vakalʉta. Ʉmwenekɨlɨmɨla ʉjwa akagaha vʉle vʉle pamuunyi pagati nʉ wʉ ɨlitsʉva lɨpɨndwɨke, akavahɨlɨka avaanu avange mu kɨlɨmɨla kya mwene ɨkyo. 6Ikange, wʉ lɨlɨ pa kʉseema ɨlitsʉva, akahʉma kʉnzi kʉ nyumba jya mwene, akalʉta pa soko, akavavona avaanu avange vɨmile apo. Akavavʉʉtsa akata, ‘Kɨki ʉnyie mulɨndile apa ɨkɨgono kyoni kɨtsila mbombo?’ 7Pwʉ aveene vakamwanda vakata, ‘Natukʉmbona ʉmuunu ʉva kʉtʉpa ɨmbombo.’ Ʉmwene akavavʉʉla akata, ‘Najyʉnyie mubɨhage kuvomba ɨmbombo mu kɨlɨmɨla kyango kya mizabibu.’

8“Kʉmihe, ʉmwenekɨlɨmɨla kya mizabibu ʉjwa akambʉʉla ʉvɨ ɨɨmɨɨlɨlaga ɨmbombo jya mwene akata, ‘Vɨɨlange avavombi vooni pakʉta ʉvahombe ʉlʉhombo lwa veene. Wʉ vukʉvahomba, ʉtengʉle na vavombi ʉwʉ vakiitsile kʉ vʉmalɨlo nʉ kʉmalɨla kʉ valya avakiitsile pa vʉtengʉlɨlo.’ 9Pwʉ avavombi valya ʉwʉ viitsile wʉ ɨlitsʉva lɨlɨ pa kʉseema, nʉ jyʉnge akʉʉpɨlɨla indalama tsa lʉhombo lwa kɨgono kɨpamato. 10Avavombi avatatsi wʉ vahegelye pa kwʉpɨlɨla ʉlʉhombo, valɨkʉhʉʉvɨla ʉkʉta vikwʉpɨlɨla ʉlʉhombo ʉlʉlʉtɨɨlye pa lʉhombo lwa vajyavo avakiitsile kʉ vʉmalɨlo. Lɨno naveene vʉvʉle vʉle, nʉ jyʉnge akahombwa ʉlʉhombo lwa kɨgono kɨpamato. 11Wʉ vʉpɨlye, vakatengʉla ʉkwɨlwenga valɨkʉta, 12‘Avaanu va kʉ vʉmalɨlo valya, vavombile ɨmbombo kʉ kavalɨlo kapamato vʉvʉle, pwʉ kɨki ʉtʉpye ʉlʉhombo ʉlʉlɨngʼiine na veene, wʉ ʉwe ɨkɨgono kyoni tʉlɨndile mu lʉtsʉva tuvomba ɨmbombo ɨmala?’ 13Ʉmwenekɨlɨmɨla ʉjwa akamwanda mpamato mu vaanu avo akata, ‘Gwe mmanyaani vango, nandɨkʉsyovili ɨkɨveetsaga. Ndeeti, natʉkɨɨdɨngʼane ʉlʉhombo lwa kɨgono kɨpamato? 14Toola indalama tsyako, ʉhege apa! Ʉne ndɨlamwe ʉkʉmmomba ʉmuunu ʉjʉ ʉva kʉ vʉmalɨlo ʉlʉhombo ʉlʉlɨngʼiine nʉ lwave. 15Ndeeti, nandɨlɨ nʉ vʉvopolwa wa kʉsivombela isiinu syango ndʉwʉ ndinogwa? Evo ʉlɨ nɨ kɨvini ʉlwakʉva ndɨlɨ mwipa siitso kʉ vange?’ ” 16ɄYɨɨsʉ akatsova ikange akata, “Pwʉ avaanu va kʉnsana valaava va mbʉlongolo na vaanu va mbʉlongolo valaava va kʉnsana.”

ɄYɨɨsʉ itsova ʉlwa daatu ʉkʉta jiibudwa

(Maliko 10:32-34; Luuka 18:31-34)

17Ɨkɨgono kɨpamato ʉYɨɨsʉ na vakongi va mwene vaalʉtaga kʉ Yelusalemu. Wʉ valɨ mu nzɨla, akavatoola avakongi valya kɨtsigo na vavɨlɨ (12), akalʉta navo apoonu ʉpwʉ vaatsiiva veene. Akavavʉʉla akata, 18“Lola, twilʉta kʉ Yelusalemu. Ʉkwene ʉkwa, ʉMwana va Muunu itsihendamwa nʉ kʉhɨlɨkwa kʉ vavaha va vateeketsi na vamanyisi va ndagɨlo. Avo vitsikʉmmɨga ʉkʉta abudwe, 19nʉ kʉnsupulila kʉ vaanu avatava Vayahudi. Avo vitsikʉnʼjejevʉla, vitsikʉntova ni sikoti nʉ kʉntovelela pa kɨdamingʼanie. Napeene, pa kɨgono ɨkya daatu, jiitsʉʉka.”

Avaana va Zebedayo vilonda ʉwɨɨmɨkiwa

(Maliko 10:35-45)

20Ɨkɨgono kɨpamato, ʉvanyina va Yakobo nʉ Yohana, avaana va Zebedayo, akabɨha kwa Yɨɨsʉ paninie na vaswambe avo. Akasugama pavʉlongolo pa Yɨɨsʉ, akanʼdoova antange kɨlya ɨkyʉ idoova. 21ɄYɨɨsʉ akambʉʉtsa akata, “Vunogwa ndɨkʉtange kɨki?” Pwʉ ʉmwene akamwanda akata, “Ndidoova ʉvatavʉle avaana vango ava vavɨlɨ, viitse vave valongotsi paninie nʉʉve mu Lʉdeeva lwako, impamato iitse ataame kʉ kɨvoko kyako ɨkya kʉndyo, ʉjyʉnge kʉ kɨvoko kyako ɨkya kʉngʼɨgɨ.” 22ɄYɨɨsʉ akaanda akata, “Namukɨmanyili ɨkyʉ mudoova! Ndeeti, jʉmuweesa ʉkʉnywela ɨkɨnywelo kya vʉkʉvɨlwa ʉvʉlʉti#20:22 Ʉkʉnywela ɨkɨnywelo kya vʉkʉvɨlwa ʉvʉlʉti kwʉ kʉta ʉkwɨdɨka ʉkʉkʉvɨlwa ndʉwʉ ʉYɨɨsʉ ilotsa kukʉvɨlwa. ɨkyʉ ndɨpya ndinywela ʉne?” Vakamwanda vakata, “Eena, tuweesa.” 23ɄYɨɨsʉ akavavʉʉla akata, “Tsa jɨlweli, ɨkɨkongʼolo ɨkyʉ ndɨpya ndinywela, jʉmunywela. Lɨno, ɨkulongwi jya kʉtaama kʉ kɨvoko kyango ɨkya kʉndyo evo ɨkya kʉngʼɨgɨ nambombo jyango ʉkʉvatavʉla ʉnyie. ɄDaada mwene vɨ alavapa avaanu ʉwʉ avanotsehiitse.”

24Avakongi avange kɨtsigo (10) wʉ vagapʉliike ago, vakavaviipila avanamuunu avo vavɨlɨ. 25Pwʉ ʉYɨɨsʉ akavɨɨlanga avakongi va mwene vooni, akavavʉʉla akata, “Mulʉmanyile ʉkʉta avalongotsi va mu kɨlʉnga vivonia ʉvʉtwa wa veene, nʉ kʉvalongotsa avaanu kʉ maka. 26Napanogiili ʉnyie ʉkʉvomba ewo, apeene ʉmuunu ʉvaveetsaga ʉvɨ inogwa ʉkʉva indongotsi pagati paanyie, vɨ aveetsage imbombi viinyo. 27Ikange, ʉmuunu ʉvaveetsaga ʉvɨ inogwa ʉkʉva kʉvʉlongolo kwanyie, vɨ aveetsage mbanda#20:27 Aveetsage mbanda Ɨkɨtsovo ɨkɨ kitsova ikulongwi tsa muunu ʉvivomba ɨmbombo kʉ ntwa va mwene kɨtsila kʉhombwa ɨkɨveetsaga kʉ mbombo ɨjyavombile. Kʉ nzɨla ɨjɨ, ʉwe patʉnogye ʉkʉvavombela avaanu avange kɨtsila kʉtsigila ʉlʉhombo. Ɨngave tukʉvavombela avaanu avange ewo, apo twiva tukʉmbombela ʉNgʉlʉve (Mataayo 10:40; 22:37-40; Yohana 15:9-17). viinyo, 28ndʉwʉ najyʉne ndɨ Mwana va Muunu nanditsili kuvombelwa, nditsile kukʉvavombela avaanu nʉ kwɨhʉmya ʉwʉʉmi wango ʉkʉta ndɨvapoke avaanu vongosu.”

ɄYɨɨsʉ ikʉvaponia avabosu vavɨlɨ

(Maliko 10:46-52; Luuka 18:35-43)

29ɄYɨɨsʉ na vakongi va mwene vakasika mu vʉtsenge ʉwaatambʉlwagwa Yeliko. Kʉmbele vakahega mu vʉtsenge ʉwa nɨ kɨpʉga ɨkɨvaha kya vaanu kɨlɨkʉnkonga. 30Avabosu vavɨlɨ vaataamile kʉ lʉkanzimbale lwa nzɨla ɨjyʉ ʉYɨɨsʉ aagendye. Wʉ vapʉliike ʉkʉta vɨ Yɨɨsʉ ilʉtɨngʼania, vakooveela vakata, “Gwe Ntwa, Mwana va nkʉlʉdeeva ʉDavʉdi,#Mataayo 9:27 tudoova ʉtʉkolele ɨkɨsa!” 31Avaanu va kɨpʉga ɨkyo vakavatanila pakʉta vanuunale, lɨno aveene vakagendelela ʉkwɨlanga valɨkʉta, “Gwe Ntwa, Mwana va nkʉlʉdeeva ʉDavʉdi, tudoova ʉtʉkolele ɨkɨsa!” 32ɄYɨɨsʉ akɨɨma, akavɨɨlanga nʉ kʉvavʉʉtsa akata, “Munogwa ndɨvavombele kɨki?” 33Vakamwanda vakata, “Gwe Ntwa, tudoova ʉtʉponie amiiho, tʉlolage.” 34Pwʉ ʉYɨɨsʉ akavakolela ɨkɨsa, akavaabaasa amiiho ga veene. Ʉnsɨkɨ gʉʉgwa, amiiho ga veene gakapona, vakatengʉla ʉkʉlola, vakankonga ʉYɨɨsʉ.

Currently Selected:

Mataayo 20: zga

Highlight

Copy