Mataayo 24

ɄYɨɨsʉ itsova ikulongwi tsa kʉmamulwa ɨtembile

(Maliko 13:1-2; Luuka 21:5-6)

1ɄYɨɨsʉ wʉ ihega pa tembile, avakongi va mwene vakamwitsila pakʉta vambonie ɨtembile ni nyumba itsinge itsijɨtsʉngʉtye. 2ɄYɨɨsʉ akavavʉʉla akata, “Mukʉgavona gooni aga? Tsa jɨlweli ndikʉvavʉʉla ʉkʉta, nalɨkʉli ɨliganga ɨlyʉ lɨlasigala pakyanya pa lɨnge. Amaganga gooni ago galamamulwa!”

ɄYɨɨsʉ iganula ikulongwi tsa vʉsililo wa kɨlʉnga

(Maliko 13:3-13; Luuka 21:7-19)

3ɄYɨɨsʉ aatogile kʉ kɨdugala kya Mizeituni, akatsiiva palya. Wʉ atsiige palya, avakongi va mwene vakamwitsila kwita vɨjyekele nave. Vakambʉʉtsa vakata, “Tudoova ʉtʉvʉʉle, galahʉmɨla ndali gooni ago ʉgwʉ ʉkatsovaga? Ikange, kɨɨnu kɨki ɨkɨlatʉvonia ʉkʉta ʉkwitsa kwave nʉ vʉsililo wa kɨlʉnga vʉhegelye?” 4ɄYɨɨsʉ aavaandile akata, “Mutaamage miiho, aleke ʉmuunu ʉvaveetsaga ʉkʉvasyova! 5Lola, valiitsaga avaanu vongosu nʉ kwɨvɨɨka neene, valateetsaga, ‘Ʉne neene Kɨlɨsiti!’ Naveene valavatekeletsaaga avaanu vongosu. 6Ʉnsɨkɨ ʉgwa mulapʉlɨkaga ikulongwi tsa magoha ni vuguuvugu tsa magoha. Mwitse mwɨlekelwe ʉkʉdwada ʉlwakʉva ago wɨgane wa Ngʉlʉve giitse gahʉmɨle taasi, wʉ ʉvʉsililo wa kɨlʉnga vʉpitsiige vʉkaanale ʉkwitsa. 7Ikange avaanu va kɨlʉnga kɨpamato valalwitsaga na vaanu va kɨlʉnga ɨkɨnge, nʉ lʉdeeva lʉpamato lʉlalwitsaga nʉ lʉdeeva ʉlʉnge. Kɨlahʉmɨlaga ɨkɨlindima kʉnʉ na kʉnʉ, nɨ nzala jɨlagwitsaga. 8Ago gooni galaava ndʉ vʉtengʉlʉ wa lʉvavo lwa kʉholwa ʉmwana. 9Ʉnsɨkɨ ʉgwa, avaanu va sivʉmbʉkʉ syoni valavasʉʉla ʉnyie, valavabeelaga, valavapelelaga ʉvʉkʉvɨlwa nʉ kʉvabuda ʉlwakʉva mukʉngʼonga ʉne. 10Pwʉ ʉnsɨkɨ ʉgwa, avaanu vongosu valɨlekelwa ʉkʉngʼonga ʉne. Valahendamanaga nʉ kʉsʉʉlana vaveene kwa veene. 11Pa nsɨkɨ ʉgwa, valahʉmɨlaga avanyamalago vongosu va vʉnuasi nʉ kʉvatekeletsa avaanu vongosu. 12Ikange, avaanu vongosu valɨlekelwa ʉkʉvagana avange ʉlwakʉva imbiivi tsilaava tsyongelye siitso. 13Lɨno, ʉmuunu ʉvaveetsaga ʉvalaava ikɨjʉmɨɨlɨtsa ʉkʉsika kʉ vʉmalɨlo, vɨ ʉNgʉlʉve alampoka. 14Ikange ɨLivangɨli lya Lʉdeeva lwa Kʉkyanya lɨlalʉmbɨlɨlwagwa mu kɨlʉnga kyoni pakʉta vʉve wooleletsi kʉ vaanu va sivʉmbʉkʉ syoni. Pwʉ kʉ nsɨkɨ ʉgwa ʉvʉsililo wa kɨlʉnga vʉliitsa.

Isigono isilaava sya vʉkʉvɨlwa ʉvʉlʉti

(Maliko 13:14-23; Luuka 21:20-24)

15“Mu nsɨkɨ ʉgwa mulambona ʉntavangwa ʉvileeta ʉvʉvejangi,#Danieli 9:27; 11:31; 12:11 ɨmile apoonu apavalatse ʉpwʉ nanogiili ʉkwɨma. Ʉntavangwa ʉjwa vɨ aatsovilwe nʉ nyamalago ʉDanieli. Ʉmuunu ʉvaveetsaga ʉvɨ ikwɨmba amamenyu aga, alʉmanye ʉmwʉ gitsovela. 16Lɨno avaanu vooni ʉwʉ vitaama mu kɨlʉnga ɨkya Yuuda, viitse vakɨmbɨlɨlage kʉ sidugala. 17Namwene ʉmuunu ʉvɨ alaava kʉkyanya kʉ nyumba, iitse aleke ʉkwika paasi nʉ kwingila mu nyumba pakʉta atoole isiinu sya mwene. 18Vʉvʉle vʉle, ʉmuunu ʉvɨ alaava pa kɨlɨmɨla, iitse aleke ʉkʉkilivuka kʉ nyumba kutoola ɨlikoti lya mwene. 19Vasue vʉvʉle avadala ʉwʉ valaava nʉ vʉtsito nʉ wʉ valoosaaga mu sigono isyo!#24:19 Vasue vʉvʉle avadala ʉwʉ valaava nʉ vʉtsito nʉ wʉ valoosaaga kwʉ kʉta jɨlaava kʉtalamu kʉ veene ʉkʉnyila ʉvʉkʉvɨlwa ʉvʉlʉti ʉvʉliitsa pakʉta vɨɨpoke. Lola, avange valoosaaga avaana na vange valaava nʉ vʉtsito. 20Pwʉ mudoovage kwa Ngʉlʉve pakʉta ʉkʉnyila kwinyo kwitse kʉleke ʉkʉhʉmɨla mu nsɨkɨ ʉmbiivi gwa ngʼaala ɨngʼali pange mu kɨgono kya Sabato.#24:20 Mu nsɨkɨ ʉmbiivi gwa ngʼaala ɨngʼali pange mu kɨgono kya Sabato kwʉ kʉta jɨlaava kʉtalamu siitso ʉnsɨkɨ gwa ngʼaala ɨngʼali avaanu ʉkʉgenda kulonda ɨkyakʉlya na pa kʉgona. Ʉkʉkongana ni ndagɨlo tsa Vayahudi navaatavʉlɨlwe ʉkʉgenda ʉlʉgendo ʉlʉlʉtɨɨlye ʉvʉtale wa kilomita mamato mu kɨgono kya Sabato. Avaanu vaatavʉliilwe ʉkʉleka ʉkʉkonga ʉlʉlagɨlo ʉlʉ vangave vikɨpoka ʉwʉʉmi mu nsɨkɨ gwa vʉpala. Apa ʉYɨɨsʉ itsova ikulongwi tsa vaanu avaasimiilitsaaga ʉkʉkonga ʉlʉlagɨlo lwa Sabato ndagʉve nsɨkɨ gwa vʉpala. 21Lola, mu sigono isyo, avaanu valaava mu vʉkʉvɨlwa ʉvʉlʉti ʉwʉ navʉgelili ʉkʉvoneka lʉsiku ʉkʉhʉma ʉNgʉlʉve apelage ɨkɨlʉnga ʉkʉsika ɨleelo. Ikange ʉvʉkʉvɨlwa ʉwa navʉliitse vʉvoneke lʉsiku. 22Aale ʉNgʉlʉve aleke ʉkʉlamula ʉkʉta isigono isyo isya vʉkʉvɨlwa sive sidebe, jyale jiiva nakʉli ʉmuunu ʉvɨ aale ipona. Lɨno kʉ nongwa jya vahalwa va mwene, ʉNgʉlʉve alavɨɨka isigono isyo sive sidebe.

23“Lɨno mu nsɨkɨ ʉgwa, ɨngave ʉmuunu ikʉvavʉʉla iita, ‘Lola, ʉKɨlɨsiti alɨ apa,’ evo ‘Alɨ ʉkʉ!’ mulagelaga ʉkʉmwɨdɨka. 24Lola, valiitsa avaanu avanuasi ʉwʉ nʉ jyʉnge alɨtsovaga ʉkʉta vɨ Kɨlɨsiti evo vɨ nyamalago. Valavombaga isidego isivaha pakʉta vavasyove, pangave poonu nava vahalwa va Ngʉlʉve. 25Mutaamage miiho ʉlwakʉva ndɨvapavye itso wʉ tsikaanale ʉkʉhʉmɨla. 26Lɨno ɨngave avaanu vikʉvavʉʉla viita, ‘Lola, ʉYɨɨsʉ alɨ kʉ lʉkɨnga!’ mwitse mwɨlekelwe ʉkʉlʉta kwilola. Evo vikʉvavʉʉla viita, ‘Lola, alɨ kʉnʉ mu kɨjumba!’ mwitse mwɨlekelwe ʉkwɨdɨka. 27Ʉkwitsa kwane ndɨ Mwana va Muunu kʉlaava kwa kʉkenyemula ndʉwʉ ɨnzasi jimulika Kʉvʉhʉmo wa Litsʉva, akavalɨlo kaako jivoneka nakʉ Kʉvʉseemo wa Litsʉva. 28Lola, apoonu apalɨ kɨtuuve, pwʉ peene ingasimula tsilʉndamana paninie.#24:28 Apalɨ kɨtuuve, pwʉ peene ingasimula tsilʉndamana Ɨkɨtsovo ɨkɨ kwʉ kʉta ʉYɨɨsʉ alaava ikwitsa mu wɨɨmɨkiwa wa mwene, ʉmuunu nʉ muunu alambona ndʉwʉ ʉmuunu ikʉtsivona ingasimula tsilʉndamiine paninie ikʉlʉmanya ʉkʉta palɨ kɨtuuve. Ʉvʉganulu ʉvʉnge wa mamenyu aga wiita wʉ mukagovona ago, mulʉmanye ʉkʉta ʉnsɨkɨ gʉsiike ʉgwa kwongometswa kwa vʉtsenge wa Yelusalemu.

Ikulongwi tsa kwitsa ʉMwana va Muunu

(Maliko 13:24-27; Luuka 21:25-28)

29“Ʉnsɨkɨ gʉʉgwa, wʉ silʉtɨngʼiinie isigono isyo sya vʉkʉvɨlwa,

‘ɄNgʉlʉve alahambʉla ɨlitsʉva lɨve ngʼiisi,

ʉmwetsi nagʉlamulikage ikange,

ni nondwe natsyene tsilagwitsaga paasi.

ɄNgʉlʉve alajʉtsaania amaka ga kʉkyanya.’#Yesaya 13:10; 34:4; Yoeli 2:10

30“Ʉnsɨkɨ ʉgwa ɨkɨmanyilo kya Mwana va Muunu kɨlavoneka kʉkyanya, na vaanu va sivʉmbʉkʉ syoni valatengʉla ʉkʉlɨla nʉ kʉdwada. Ʉnsɨkɨ ʉpwʉ ʉMwana va Muunu aliitsa, avaanu vooni valambona mu mavɨngo wʉ ikwitsa na maka nʉ wɨɨmɨkiwa ʉvʉlʉti. 31Pwʉ alavasuungʼa avasuungʼwa va mwene, wʉ ɨngalape jikuuta siitso, valʉte vavalʉndamanie avahalwa va Ngʉlʉve, ʉkʉhʉma mu mbasu tsyoni inni tsa kɨlʉnga, ʉkʉhʉma kʉ vʉsililo vʉpamato wa vʉtandaatse ʉkʉsika kʉ vʉsililo ʉvʉnge.”

Ɨkɨhwananitso kya nkʉjʉ

(Maliko 13:28-31; Luuka 21:29-33)

32ɄYɨɨsʉ aagendelye ʉkʉtsova akata, “Lɨno mumanyile ɨkɨhwananitso kya libɨkɨ ɨlikʉjʉ. Ʉnsɨkɨ ʉgwʉ isamba tsitengʉla ʉkʉlemba nʉ kʉvɨɨka amaani amapya, mukʉlʉmanya ʉkʉta ɨkɨsuku kɨhegelye. 33Najyʉnyie vʉvʉle vʉle, mulaava mukʉtsivona itso tsyoni tsivombeka, mwitse mulʉmanyilage ngʼaani ʉkʉta ʉkwitsa kwa Mwana va Muunu kʉhegelye. 34Tsa jɨlweli ndikʉvavʉʉla ndiita, ɨkɨvʉmbʉkʉ ɨkɨ nakɨkalʉtɨngʼanie wʉ aga gooni nagavombiiki. 35Ʉvʉtandaatse nɨ kɨlʉnga silajaga, apeene amamenyu gango nagalajage lʉsiku.

Nakʉli ʉvɨ akɨmanyile ɨkɨgono kya vʉsililo

(Maliko 13:32-37; Luuka 17:26-30, 34-36)

36“Lɨno ikulongwi tsa kɨgono nʉ nsɨkɨ ʉpwʉ ʉMwana va Muunu aliitsa, nakʉli ʉmuunu ʉvɨ alʉmanyile, vave wʉ vasuungʼwa va kʉkyanya, pange vɨ Mwana, apeene mwene ʉDaada vɨ alʉmanyile. 37Ndʉwʉ jyale mu sigono sya Nwaka, wʉ jɨlaava ʉkwitsa kwa Mwana va Muunu. 38Mu sigono isyo, wʉ ʉlwongometso nalʉsiiki, avaanu vaalitsaga nʉ kʉnywa, vaategʉlaga nʉ kʉtegʉlwa ʉkʉsika pa kɨgono ɨkyʉ ʉNwaka iingye mu ngalava. 39Avaanu avo navaalʉmanye ɨkiitsaga kʉ veene ʉkʉsika ʉpwʉ ʉlwongometso lukʉvoongometsa vooni. Ewo wʉ jɨlaava ʉkwitsa kwa Mwana va Muunu. 40Ʉnsɨkɨ ʉgwa avaanu vavɨlɨ valaava pa kʉlɨma, ʉnsuungʼwa va Ngʉlʉve alantoola mpamato nʉ kʉndeka mpamato. 41Ikange avadala vavɨlɨ valaava pa kʉheveta, mpamato alatoolwa ʉjyʉnge alasigatswa. 42Pwʉ mutaamage miiho ʉlwakʉva namukɨmanyili ɨkɨgono ɨkyo ɨkyʉ ʉNtwa viinyo aliitsa. 43Lɨno mulʉmanye vʉnonu ʉkʉta ɨkaale jɨve ʉmwenenyumba agʉmanyile ʉnsɨkɨ ʉgwʉ ʉndyasi ikwitsa, pwʉ akaale iiva miiho pakʉta ansige ʉndyasi aleke ʉkʉmamula ɨnyumba jya mwene. 44Pa kulongwi ɨjɨ najyʉnyie, mutaamage mwɨsaawe, manya ʉMwana va Muunu, aliitsa ʉnsɨkɨ ʉgwʉ namuhʉʉvɨla.”

Ɨkɨhwananitso kya mbanda ʉmmʉʉgʉ

(Luuka 12:41-48)

45ɄYɨɨsʉ akavavʉʉtsa akata, “Ʉmbanda ʉmmʉʉgʉ, ʉnya lʉhala vyalɨku? Vyʉla ʉvɨ ʉmbaha va mwene ambɨɨkile ave mwɨmɨɨlɨtsi va vavanda avange mu nyumba jya mwene pakʉta ave ikʉvapa ɨkyakʉlya kʉ nsɨkɨ ʉgʉnogelanie. 46Inʼgatalʉsu ʉmbanda ʉlya ʉvɨ ɨngave ʉmbaha va mwene ikilivuka ʉkwʉ aalʉtile, ivona ivomba ndʉwʉ aandagye. 47Tsa jɨlweli ndikʉvavʉʉla ʉkʉta, ʉmbaha va mwene jiikʉmbɨɨka ʉmbanda ʉjwa ɨɨmɨɨlɨlage isiinu sya mwene syoni. 48Lɨno, ʉmbanda ʉjwa angave imbiivi, jiisaaga mu numbula jya mwene iita, ‘Ʉmbaha vango itsilɨndɨla ʉkʉkilivuka.’ 49Apo itengʉla ʉkʉvatova avavandavanine, ʉkʉlya nʉ kʉnywa paninie na vagaatsi. 50Lola, ʉmbaha va mwene ʉjwa jiikilivuka mu kɨgono na mu nsɨkɨ ʉgwʉ ʉmbanda va mwene nakahʉʉvɨle. 51Pwʉ ʉmbaha ʉjwa jiikʉmpa ʉlʉvʉngʉ ʉlʉlʉti, pa kʉvomba ewo iiva amanziitse kʉ vatava vɨɨdɨki. Ʉkwa kwʉ kwene avaanu avo valalɨlaga nʉ kʉgadʉtsa amiino kʉ nongwa jya lʉvavo ʉlʉlʉti ʉlʉlavavona.”

Currently Selected:

Mataayo 24: zga

Highlight

Copy