Mataayo 25

Ɨkɨhwananitso kya vahɨnza kɨtsigo

1Pwʉ ʉYɨɨsʉ akavavʉʉla avakongi va mwene akata, “Mu nsɨkɨ ʉgwa ʉLʉdeeva lwa Kʉkyanya lʉlalɨngʼaanitswa nɨ kɨhwananitso kya vahɨnza kɨtsigo (10) ʉwʉ vaagegile inyaale tsa veene nʉ kʉbɨha kukʉmwʉpɨlɨla ʉntegʉlanʼdala. 2Vahaano mu vahɨnza avo kɨtsigo, vaale vanya lʉhala na vange vahaano vaale vapelwa. 3Avapelwa valya, vaagegile inyaale tsa veene kɨtsila kʉgega amafuta ga nyaale agange ga kwongeletsa mu nyaale tsa veene. 4Lɨno avanya lʉhala vahaano valya vaagegile amafuta mu sikongʼolo paninie ni nyaale tsa veene. 5Wʉ ʉntegʉlanʼdala atsilɨndye ʉkwitsa, itʉlʉ tsikaviibata avahɨnza valya vooni kɨtsigo. Vakagoneelela itʉlʉ. 6Lɨno pakɨlogati, avaanu vakɨɨlanga vakata, ‘Mwe! Sisimuki, ʉntegʉlanʼdala ikwitsa! Hʉmagi ngʼaningʼaani, tʉbɨhe tʉkamwʉpɨlɨle.’ 7Baaho avahɨnza valya vooni vakasisimuka nʉ kʉtsitetengʼania inyaale tsa veene.

8“Avahɨnza valya avapelwa, vakadoova kʉ valya avanya lʉhala vakata, ‘Tudoova mutʉpe amafuta madebe ʉlwakʉva inyaale tsiitu tsitsima.’ 9Avanya lʉhala valya vakavaanda vakata, ‘Baako, natukʉvapi ʉlwakʉva amafuta ʉgwʉ tʉlɨ nago, nagikwɨla napadebe ʉkʉgavana, ʉwe paninie nʉʉnyie. Lʉnonu mubɨhe ʉkwʉ vigʉtsa pakʉta mukɨgʉlɨle.’

10“Pwʉ avahɨnza valya avapelwa vakalʉta kwigʉla amafuta. Wʉ valʉtile, kʉmbele, ʉntegʉlanʼdala akasika. Avahɨnza valya avanya lʉhala, ʉwʉ vɨɨtetengʼiinie, vakiingila paninie nʉ ntegʉlanʼdala mu nyumba ʉmwʉ ʉvʉtegʉlanie waavombekelaga. Pwʉ ʉndyango gʉkadɨndwa. 11Kʉ vʉmalɨlo, avapelwa valya vakakilivuka nʉ kʉvona ʉndyango gʉdɨndilwe. Pwʉ vakɨɨma kʉnzi nʉ kwɨlanga, vakata, ‘Gwe ntwa! Gwe ntwa! Tudoova ʉtʉdɨndʉlɨle ʉndyango!’ 12Lɨno ʉntegʉlanʼdala akavaanda akata, ‘Tsa jɨlweli ndikʉvavʉʉla ʉkʉta, nandɨvamanyili ʉnyie!’ ”

13Pwʉ ʉYɨɨsʉ akavavʉʉla avakongi va mwene akata, “Lɨno mutaamage miiho ʉlwakʉva namukɨmanyili ɨkɨgono pange ʉnsɨkɨ ʉgwʉ ʉne ndɨ Mwana va Muunu ndɨliitsa.”

Ɨkɨhwananitso kya vavombi vadatu

(Luuka 19:11-27)

14ɄYɨɨsʉ akagendelela ʉkʉtsova akata, “Ikange, ʉLʉdeeva lwa Kʉkyanya lʉlalɨngʼaanitswa nɨ kɨhwananitso kya muunu ʉvɨ aalʉtile kʉ kɨlʉnga kya kʉvʉtale. Wʉ akaanale ʉkʉhega, aavɨɨlangile avavombi va mwene, akavagavania ɨkyʉma kya mwene kyoni pakʉta vɨtsuluusaage. 15Aavapeetsaga ɨkyʉma avavombi avo ʉkʉkongana nʉ lwɨkupilo lwa muunu nʉ muunu mu mbombo jya vʉtsuluusi. Aampye ʉmbombi ʉvaatalile italanta ihaano, ʉva vɨɨlɨ, akampa italanta ivɨlɨ nʉ va daatu akampa ɨtalanta#25:15 Ɨmba ʉvʉganulu wa talanta kwa Mataayo 18:24. mamato, pwʉ ʉmwene akahega.

16“Baaho, ʉmbombi ʉvɨ ʉmbaha va mwene aampye italanta ihaano, akalʉta natso mu kwɨtsuluusa nʉ kʉkava itsinge ihaano. 17Vʉvʉle vʉle, namwene ʉmbombi ʉlya ʉvɨ ʉmbaha va mwene aampye italanta ivɨlɨ, akalʉta natso mu kwɨtsuluusa nʉ kʉkava itsinge ivɨlɨ. 18Lɨno ʉmbombi ʉlya ʉvɨ ʉmbaha va mwene aampye ɨtalanta mamato, akalʉta, akajava ɨliguli, akasɨɨla ɨtalanta ɨjyo.

19“Wʉ ʉnsɨkɨ ntale gʉlʉtɨngʼiinie, ʉmbaha va veene akakilivuka ʉkwʉ aalʉtile. Pwʉ akavɨɨlanga avavombi va mwene valya pakʉta vambʉʉle ʉmwʉ vavombye ɨkyʉma kya mwene. 20Ʉmbombi ʉlya ʉvɨ ʉʉpɨlye italanta ihaano, akiitsa ni talanta itsinge ihaano nʉ kʉmbʉʉla ʉmbaha va mwene akata, ‘Gwe ntwa, waamye italanta ihaano pakʉta ndyɨtsuluusaage, lola, ndɨkavile italanta itsinge ihaano itsi.’ 21Ʉmbaha va mwene akambʉʉla akata, ‘Ʉvombile vʉnonu siitso, ʉve vɨ mbombi ʉnnonu ikange vɨ mmʉʉgʉ! Lɨno ʉlwakʉva ʉkaale mmʉʉgʉ kʉ siinu sidebe isyʉ ndɨkakʉpye, ndikʉkʉvɨɨka ʉve mwɨmɨɨlɨtsi va kyʉma kyongosu. Itsaga tʉhekelage paninie.’

22“Ʉmbombi ʉlya ʉvɨ ʉʉpɨlye italanta ivɨlɨ, namwene akiitsa ni talanta itsinge ivɨlɨ nʉ kʉmbʉʉla ʉmbaha va mwene akata, ‘Gwe ntwa, waamye italanta ivɨlɨ pakʉta ndyɨtsuluusaage, lola, ndɨkavile italanta itsinge ivɨlɨ itsi.’ 23Ʉmbaha va mwene akambʉʉla akata, ‘Ʉvombile vʉnonu siitso, ʉve vɨ mbombi ʉnnonu ikange vɨ mmʉʉgʉ! Lɨno ʉlwakʉva ʉkaale mmʉʉgʉ kʉ siinu sidebe isyʉ ndɨkakʉpye, ndikʉkʉvɨɨka ʉve mwɨmɨɨlɨtsi va kyʉma kyongosu. Itsaga tʉhekelage paninie.’

24“Kʉ vʉmalɨlo, akiitsa ʉmbombi ʉlya ʉvɨ ʉʉpɨlye ɨtalanta mamato. Akambʉʉla ʉmbaha va mwene akata, ‘Gwe ntwa, ndyalʉmanyile ʉkʉta ʉve ʉlɨ ntalamu siitso. Ʉve ʉlɨ ndʉ muunu ʉvɨ ibena ʉpwʉ navyalili, ikange ilʉndamania ʉpwʉ nakahasɨlɨngʼanie. 25Ndyadwadile ʉkʉta ndɨgela ndijatsa ɨkyʉma kyako, pwʉ ndyalʉtile ndɨkasiha mu mmanga. Lɨno, toola ɨtalanta jyako ɨjɨ.’ 26Ʉmbaha va mwene akamwanda akata, ‘Ʉve vɨ mbombi ʉmbiivi ikange vɨ mwolo! Ʉngave waalʉmanyile ʉkʉta ʉne ndibena isiinu ʉpwʉ nandyavyale, ndiita ʉkʉlʉndamania ʉpwʉ nandyahasɨlɨngʼanie, 27lɨno kɨki nawaavɨɨke ɨtalanta jyango kʉ vaanu avikwolosa#25:27 Kʉ vaanu avikwolosa Ʉkwa kwʉ avaanu vongosu vivɨɨka indalama tsa veene, ʉkʉta kʉmbele viitse vatoole paninie ni ndalama itsyongelye. pakʉta wʉ ndikilivuka, ndiitse ndɨtoole ɨtalanta jyango paninie nɨ kya pakyanya ɨkyongelye?’ 28Pwʉ ʉmbaha va mwene akalagɨla akata, ‘Tooli ɨtalanta ɨjyo, impi ʉmbombi ʉlya ʉvɨ alɨ ni talanta kɨtsigo (10).’

29“Lola, ʉmuunu ʉvaveetsaga ʉvɨ ivombela ɨmbombo ɨkyʉ ndɨmpye, ndikʉmwongeletsaaga nakɨ kɨnge, namwene iveetsaga nasyo syongosu. Lɨno ʉmuunu ʉvaveetsaga ʉvɨ nivombela ɨmbombo ɨkɨdebe ɨkyʉ ndɨmpye, nakɨ kɨdebe ɨkyʉ alɨ nakyo, nakyene ndɨlapoka. 30Ʉmbombi ʉjʉ ʉvɨ nammʉʉgʉ, ntaagi kʉnzi ʉkʉlɨ ngʼiisi ʉkwʉ ilɨlaga nʉ kʉgadʉtsa amiino kʉ nongwa jya lʉvavo ʉlʉlʉti.”

Ʉvʉhɨgi wa vaanu vooni

31ɄYɨɨsʉ akagendelela ʉkʉvavʉʉla avakongi va mwene akata, “Ʉnsɨkɨ ʉne ndɨ Mwana va Muunu ndɨlaava ndikwitsa mu wɨɨmɨkiwa wango paninie na vasuungʼwa vooni, pwʉ ndɨlataama mu kɨtaamilo kyango kya wɨɨmɨkiwa. 32Avasuungʼwa va Ngʉlʉve valavalʉndamania avaanu va sivʉmbʉkʉ syoni pavʉlongolo paane. Nʉʉne ndɨlavalekengʼania avagolosu na vatulanongwa ndʉwʉ ʉnʼdɨɨmi ilekengʼania ingʼolo ni mene. 33Ndɨlavavɨɨka avagolosu ʉlʉvasu lwango lwa kʉndyo na vatulanongwa ʉlʉvasu lwango lwa kʉngʼɨgɨ.

34“Pwʉ ʉne ndɨ Nkʉlʉdeeva, ndɨlavavʉʉla avaanu valya ʉwʉ valɨ ʉlʉvasu lwango lwa kʉndyo, ndɨlaata, ‘Itsagi, ʉnyie nyɨ ʉDaada avasajile. Ingilagi mu Lʉdeeva ʉlwʉ ʉNgʉlʉve aavanotsehiitse ʉkʉhʉma ʉnsɨkɨ ipela ɨkɨlʉnga, 35manya ʉpwʉ ndyale nɨ nzala, mwamye ɨkyakʉlya, ʉpwʉ ndyale nɨ kyʉmɨlwa, mwamye amagasi ga kʉnywa, ikange wʉ ndɨlɨ mmenza, mwannyambɨlye mu nyumba tsiinyo. 36Ʉnsɨkɨ ndɨsuuliike, mwanswaliitse ɨmisabwa. Ʉnsɨkɨ ndɨlɨ ntamu, mwitsile kukʉndola. Ʉnsɨkɨ ndɨkʉngilwe, mwiitsile kukʉmbona.’ 37Pwʉ avaanu avagolosu valavʉʉtsa valaata, ‘Gwe Ntwa, gwʉ nsɨkɨ gʉlɨku ʉgwʉ twakʉweene ʉlɨ nɨ nzala, tʉkakʉpa ɨkyakʉlya? Evo twakʉweene ʉlɨ nɨ kyʉmɨlwa, tʉkakʉpa amagasi ga kʉnywa? 38Ikange, gwʉ nsɨkɨ gʉlɨku wʉ ʉlɨ mmenza, twakwambɨlye mu nyumba tsiitu? Evo wʉ tukʉkʉvona ʉsuuliike, tʉkakʉswalɨtsa ɨmisabwa? 39Ikange, gwʉ nsɨkɨ gʉlɨku wʉ ʉlɨ ntamu, twiitsile kukʉkʉlola, evo wʉ ʉkʉngilwe twiitsile kukʉkʉvona?’ 40Pwʉ ʉne ndɨ Nkʉlʉdeeva, ndɨlavaanda ndɨlaata, ‘Tsa jɨlweli ndikʉvavʉʉla ʉkʉta, ɨkɨveetsaga ɨkyʉ mwambombye ʉmuunu va paasi mpamato mu valʉkololwango ava, mwambombelaga ʉne.’

41“Baaho ndɨlavavʉʉla valya ʉwʉ valɨ ʉlʉvasu lwango lwa kʉngʼɨgɨ, ndɨlaata, ‘Hegi paane, ʉnyie nyɨ ʉNgʉlʉve avakootwe! Mubɨhage kʉ mwoto gwa sikutsooni ʉgwʉ ʉNgʉlʉve annotsehiitse ʉSetano na vasuungʼwa va mwene, 42manya ʉpwʉ ndyale nɨ nzala, namwame ɨkyakʉlya, wʉ ndɨlɨ nɨ kyʉmɨlwa, namwame amagasi ga kʉnywa. 43Wʉ ndɨlɨ mmenza, namwannyambɨlɨle mu nyumba tsiinyo, wʉ ndɨsuuliike, namwanswalɨtse ɨmisabwa. Ikange, wʉ ndɨlɨ ntamu, namwitse kukʉndola, evo wʉ ndɨkʉngilwe, namwitse kukʉmbona.’ 44Naveene valambʉʉtsa, valaata, ‘Gwe Ntwa, gwʉ nsɨkɨ gʉlɨku ʉgwʉ ɨnzala jyakʉvavile, evo waale nɨ kyʉmɨlwa, evo waale mmenza, evo waasuuliike, evo waale ntamu, evo waakʉngilwe, nʉʉwe natwakʉtange?’ 45Najyʉne ndɨlavaanda ndɨlaata, ‘Tsa jɨlweli ndikʉvavʉʉla ʉkʉta, pa kʉleka ʉkʉntanga mpamato mu vaanu avibedwa ava, namwannangage ʉne.’

46“Pwʉ avatulanongwa avo valahega nʉ kʉbɨha kʉ vʉhɨgi wa sikutsooni, avagolosu valiingila mu wʉʉmi wa sikutsooni.”

Currently Selected:

Mataayo 25: zga

Highlight

Copy