Mataayo 28

Ʉkʉtsʉʉka kwa Yɨɨsʉ

(Maliko 16:1-10; Luuka 24:1-12; Yohana 20:1-10)

1Pwʉ ɨkɨgono kya Sabato kɨkalʉtɨngʼania. Pavʉsiku wʉ kʉpitsiige kutandaalʉka, mu kɨgono kya Pamulʉngʉ, ʉMaliyamu Magadalena paninie nʉ Maliyamu ʉjyʉnge, vakalʉta kwilola ʉvʉguli vʉlya. 2Lola, ɨkɨlindima ɨkɨvaha kɨkalʉtɨngʼania. Ʉnsuungʼwa va Ntwa akiika ʉkʉhʉma kʉkyanya, akahegelela pa vʉguli, akabɨɨlʉsa ɨliganga lɨlya kʉ lʉkanzi nʉ kʉtaamila. 3Ʉnsuungʼwa ʉjwa aangʼaalaga ndʉ lʉmuli lwa nzasi, nɨ misabwa gya mwene gyale mivalasu siitso. 4Avasikali avo wʉ vikʉmbona ʉnsuungʼwa ʉjwa vakadwada siitso, vakava nda vaswe. 5Ʉnsuungʼwa ʉjwa akavavʉʉla avadala avo akata, “Muleke ʉkʉdwada! Ndɨlʉmanyile ʉkʉta mwitsile kukʉndonda ʉYɨɨsʉ, ʉvɨ vakantovelye pa kɨdamingʼanie. 6Napali apa, atsʉʉkile ʉkʉhʉma kʉ vaswe, ndʉwʉ akavavʉʉliige. Itsagi mulole ʉpwʉ vakanʼgoniitse. 7Lɨno mubɨhage ngʼaningʼaani, mukavavʉʉle avakongi va mwene ʉkʉta, ‘Atsʉʉkile ʉkʉhʉma kʉ vaswe kange avalongwe ʉkʉbɨha kʉ kɨlʉnga kya Galilaya. Ʉkwa kwʉ kwene mutsikʉmbona.’ Muleke ʉkʉsaamwa ʉgwʉ ndɨvavʉʉlile!”

8Pwʉ avadala avo, vakahega ngʼaningʼaani pa vʉguli kʉ lʉdwado ʉlʉhangile nʉ lʉhekelo ʉlʉvaha. Vakanyila ʉkʉbɨha kukʉvavʉʉla avakongi va Yɨɨsʉ ndʉwʉ ʉnsuungʼwa ʉjwa avavʉʉlile. 9Wʉ vilʉta kukʉvavʉʉla avakongi va mwene, lola, ʉYɨɨsʉ akaaganila na vadala avo, akavasaamusa, “Mapembelo!” Pwʉ vakahegelela kwa Yɨɨsʉ, vakɨsaja kʉ mwene kʉ nzɨla jya kʉmwibata isilʉnde sya mwene. 10ɄYɨɨsʉ akavavʉʉla akata, “Muleke ʉkʉdwada. Bɨhagi mukavavʉʉle avalʉkololwango,#28:10 Avalʉkololwango ɄYɨɨsʉ apa ikʉvatsova avakongi va mwene. valʉte kʉ Galilaya, kwʉ vitsikʉmbona ʉne.”

Avasikali vitsova ʉvʉnuasi

11Lɨno wʉ avadala avo valɨ mu nzɨla vigenda, vaninie mu vasikali avaaloleelaga ʉvʉguli wa Yɨɨsʉ, naveene vakava vibɨha kʉ vʉtsenge wa Yelusalemu. Vakatsisika nʉ kʉvavʉʉla avavaha va vateeketsi gooni ʉgwʉ gaavombiike.

12Avavaha va vateeketsi valya, vakalʉndamana paninie na vanzagɨla va Vayahudi. Vakɨtsosanza nʉ kʉlamula ʉkʉta vavape indalama nyongosu tsa kʉvatemeka avasikali avo. 13Vakavavʉʉla vakata, “Ɨngave ʉmuunu ʉvaveetsaga ikʉvavʉʉtsa ikulongwi itsihʉmye muteetsage, ‘Avakongi va Yɨɨsʉ viitsile, vahɨɨtsile ʉnsimba gwa mwene pakɨlo, wʉ tʉgoneelye itʉlʉ.’ 14Ɨngave ʉPilato apipʉlɨka ago, jʉtwitsova nave pakʉta muleke ʉkwingila mu vʉpala.” 15Pwʉ avasikali vakʉʉpɨlɨla indalama itso nʉ kʉtsova kʉ vaanu ndʉwʉ vaavʉʉlilwe na valongotsi va Vayahudi. Ikulongwi itso tsikavaala siitso kʉ Vayahudi, ikange vapitsiige vipanga najɨ ɨleelo.

Ʉlʉlagɨlo lwa kʉvalʉmbɨlɨla avaanu va sivʉmbʉkʉ syoni

(Maliko 16:14-18; Luuka 24:36-49; Yohana 20:19-23; Mbombo tsa Vapositili 1:6-9)

16Avakongi va Yɨɨsʉ kɨtsigo nʉ mpamato (11) vakalʉta kʉ Galilaya, kʉ kɨdugala ɨkyʉ ʉYɨɨsʉ aavalagye. 17Wʉ vambwene, vakɨsaja kʉ mwene. Lɨno vaninie mu vakongi avo, pɨlɨvasinaana ʉkʉta vɨ Yɨɨsʉ. 18Pwʉ ʉYɨɨsʉ akahegelela, akavavʉʉla avakongi va mwene akata, “ɄNgʉlʉve amye ʉvʉtavʉlɨlwa wooni wa kʉkyanya nʉ wa pa kɨlʉnga. 19Lɨno, lʉtagi kʉ vaanu va sivʉmbʉkʉ syoni nʉ kʉvaandʉla vave vakongi vango. Mukavombage ewo kʉ nzɨla jya kʉvootsa nʉ jyʉnge mu litaawa lya Daada, nɨ lya Nswambe nɨ lya Mepo ʉMbalatse. 20Mukavamanyiisaage ʉkʉkonga gooni ʉgwʉ ndɨvalagye ʉnyie. Nʉʉne ndiiva paninie nʉʉnyie isigono syoni, ʉkʉsika kʉ vʉsililo wa kɨlʉnga.”

Currently Selected:

Mataayo 28: zga

Highlight

Copy