Maliko Ikulongwi itsilongola
Ikulongwi itsilongola
Ʉmbɨgi va kɨtabu ɨkɨ vɨ Maliko. ɄMaliko ʉjʉ aale mu kɨpʉga kya Vakɨlɨsiti avatatsi avaataamaga mu Yelusalemu (Mbombo tsa Vapositili 12:12). Ikulongwi itsʉ aavɨgile mu kɨtabu ɨkɨ aatsimanyile vʉnonu pakʉva ʉmwene aatʉngɨtsaniaga na valʉmbɨlɨli ava: ʉPaulo (Mbombo tsa Vapositili 13:1-13), ʉBalinaba (Mbombo tsa Vapositili 15:36-41) nʉ Petulo (1 Petulo 5:13). ɄMaliko naale inninie mu vapositili.
ɄMaliko, aavavɨgye ɨkɨtabu ɨkɨ aVakɨlɨsiti va kʉ vʉtsenge wa kʉ Looma mu mwaka inninie mu myaka ɨgya sitsigo ntanato na gɨhaano (65) ʉkʉsika kʉ sitsigo lekelakʉpamato (70) Waholilwe ʉYɨɨsʉ Kɨlɨsiti. Ʉvʉsumbe wa mwene waale ʉkʉvanywilitsa aVakɨlɨsiti avo mu lwɨdɨko ʉlwakʉva ʉnsɨkɨ ʉgwa aVakɨlɨsiti avo vaakʉvɨlwagwa. ɄMaliko aanogwagwa ʉkʉvavʉʉla ʉkʉta, ndʉwʉ ʉYɨɨsʉ wambwene ʉvʉkʉvɨlwa ʉkʉsikila ʉpwʉ iiswa, vʉvʉle vʉle naveene vukʉviitsilaga ʉvʉkʉvɨlwa. Ʉvʉsumbe ʉvʉnge wa kʉvavɨgɨla waale wa kʉvavonia ʉkʉta ʉYɨɨsʉ vɨ Mesiya ʉvɨ vaampʉlɨkɨlaga.
Ʉkʉtengʉla ʉndyango ʉntatsi ʉkʉsikila ʉgwa nnaana (8), ikwoleletsa isidego isyʉ ʉYɨɨsʉ aavombile pa vʉnogwe wa kʉvavʉʉla ʉwʉ aavavɨgɨlaga ʉkʉta ʉYɨɨsʉ vɨ veeni. Ʉkʉkongana nɨɨlyo ʉPetulo aatye, “Ʉve veeve Kɨlɨsiti” (8:29). Nʉ kʉtengʉla ʉndyango ʉgwa budikakʉpamato (9) ʉkʉsika kʉ vʉmalɨlo wa kɨtabu ɨkɨ ʉMaliko ikwoleletsa itsʉ ʉYɨɨsʉ aatsovile itsa kʉswa kwa mwene. Piitsi tsyoni ʉmbɨgi aanogilwe avaanu valʉmanye ʉkʉta ʉYɨɨsʉ vɨ Mesiya ʉvɨ aakʉviilwe nʉ kʉswa pa vʉnogwe wa kʉvapoka avaanu va mwene. Ndʉwʉ ʉYɨɨsʉ jyʉmwene aatye,
“Manya najyʉne ndɨ Mwana va Muunu nanditsili kuvombelwa, ʉne nditsile kukʉvavombela avaanu nʉ kwɨhʉmya ʉwʉʉmi wango ʉkʉta ndɨvapoke avaanu vongosu.” (10:45)
Namwene ʉnsikali va Kɨlooma aatsovile akata, “Tsa jɨlweli, ʉmuunu ʉjʉ akaale Mwana va Ngʉlʉve!” (15:39)
Currently Selected:
Maliko Ikulongwi itsilongola: zga
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.