Maliko 5

ɄYɨɨsʉ iponia ʉmuunu ʉnya mepo imbiivi

(Mataayo 8:28-34; Luuka 8:26-39)

1ɄYɨɨsʉ na vakongi va mwene vaasiike ɨmwambo ɨjya nyanza ɨjya Galilaya, kʉ kɨlʉnga ɨkya Vagelasi. 2Wʉ ikile mu waato, ʉmuunu ʉnya mepo imbiivi ʉvɨ aahʉmile kʉ vʉguli, akiitsa kukwagana nave. 3Ʉmuunu ʉjwa aataamaga kʉ vʉguli, ikange naalepwo ʉmuunu ʉnya maka ʉva kʉta ankʉnge ikange, ndajɨve nɨ minyololo. 4Aakʉngilwe kakongosu ni pɨngo nɨ minyololo, napeene alɨkʉgɨdumulania. Pange avepwo ʉvɨ aandemile. 5Isigono syoni, pamuunyi na pakɨlo, ʉmuunu ʉjʉ alɨkʉtaama kʉ vʉguli na kʉ sidugala. Ʉkwa alɨkʉkoola nʉ kwɨlematsa na maganga.

6Wʉ ambwene ʉYɨɨsʉ kʉvʉtale, akannyilila nʉ kʉsugama. 7Akakoola akata, “Gwe Yɨɨsʉ Mwana va Ngʉlʉve ʉNdʉti va syoni, ndɨlɨvʉki ʉne kwave? Kʉ litaawa lya Ngʉlʉve, ndikʉkʉdoova ʉleke ʉkʉmmelela ʉvʉkʉvɨlwa!” 8Aagatsovile ago ʉlwakʉva ʉYɨɨsʉ aambʉʉlile akata, “Nyɨ mepo imbiivi, hʉmi mu muunu ʉjʉ.”

9Pwʉ ʉYɨɨsʉ akambʉʉtsa akata, “Ɨlitaawa lyako veeve veeni?” Namwene akaanda akata, “Neene Legioni,#5:9 Legioni Ɨkɨ kyale kɨpʉga kya Kɨlooma kya vatengaligoha. Ɨkɨpʉga ɨkɨ kyaveetsaga na vasikali avaelufu vadatu (3,000) ʉkʉsikila avaelufu ntanato (6,000) ndee. ʉlwakʉva tʉlɨ vongosu.” 10Imepo imbiivi itso tsikasimiilitsa siitso kwa Yɨɨsʉ, tsikata, “Siwo, ʉlatʉswɨmaga mu kɨlʉnga ɨkɨ.”

11Lyalepwo ɨlipʉga livaha lya ngʉbe lɨlɨkʉlya mu kɨdugala. 12Pwʉ imepo imbiivi itso tsikansiima ʉYɨɨsʉ tsikata, “Ʉtʉhɨlɨke twingile mu nʼgati mu ngʉbe tsilya.” 13ɄYɨɨsʉ akɨɨdɨka. Pwʉ baaho imepo imbiivi tsikahʉma mu muunu ʉjwa, tsikatsikwingila mu ngʉbe. Pwʉ ingʉbe tsikiika tsinyila mu lʉgenge, tsikɨtaaga mu nyanza, tsikadwiviila. Ɨmbalɨlo jya ngʉbe itso jyahegelye kʉ elufu ivɨlɨ (2,000).

14Avadɨɨmi va ngʉbe vakanyila, vakalʉta kʉ vʉtsenge na kʉ matsumbe, vakava vipanga gooni ʉgwʉ vaagaweene. Avaanu vakahʉma nʉ kʉbɨha kwilola galya agaavombiike. 15Vakatsisika ʉpwʉ aale ʉYɨɨsʉ, vakambona ʉmuunu ʉlya ʉvɨ aale ni mepo imbiivi ataamile, aswalile vʉnonu, alɨ nʉ lʉhala lwa mwene lwoni. Pwʉ lʉkaviitsila ʉlʉdwado. 16Valya vooni avaalolile ʉgwʉ aavombile ʉYɨɨsʉ, vakavavʉʉla avaanu avange agaambonekye ʉnya mepo imbiivi ni kulongwi itsa ngʉbe. 17Pwʉ vakatengʉla ʉkʉnsiima ʉkʉta ahege mu kɨlʉnga kya veene.

18ɄYɨɨsʉ wʉ itoga mu waato, ʉmuunu ʉvɨ aammʉmiitse imepo imbiivi akanʼdoova vabɨhage paninie. 19ɄYɨɨsʉ akamʼbeetsa akata, “Vujaga kʉ miinyo, kʉ vaanu va kɨvʉmbʉkʉ kyako, ʉkavavʉʉlanitsaage tsyoni itsʉ ʉNtwa ʉNgʉlʉve akʉvombye nʉ kʉkʉkolela ɨkɨsa.” 20Lola, ʉmuunu ʉlya akabɨha kʉ Dekapoli,#5:20 Dekapoli Ɨlitaawa ɨlɨ kwʉ kʉta ʉvʉtsenge kɨtsigo (10). alɨkʉpanga tsyoni itsʉ ʉYɨɨsʉ ambombye. Pwʉ avaanu vooni wʉ vipʉlɨka, valɨkʉdega.

ɄYɨɨsʉ itsʉʉsa ʉmwalɨve va Yailo nʉ kʉmponia ʉnʼdala mpamato

(Mataayo 9:18-26; Luuka 8:40-56)

21ɄYɨɨsʉ na vakongi va mwene vakalovoka ɨnyanza. Wʉ valowiike ɨmwambo ɨjyɨnge ɨjya nyanza, ɨkɨpʉga ɨkɨvaha kya vaanu kɨkalʉndamana pa lʉkanzi pa nyanza ʉpwʉ aale ʉYɨɨsʉ. 22Apeene apo akiitsa ʉmbaha va lisinagogi ʉvɨ aatambʉlwagwa Yailo. Wʉ ambwene ʉYɨɨsʉ, akahegelela, akɨtaaga pa silʉnde sya Yɨɨsʉ. 23Akansiima akata, “Ʉmwalɨvango ʉnʼdebe, gupʉʉga. Siwo ndɨpelile tʉvʉʉke, ʉkambɨɨkɨle isivoko ʉkʉta apone, ave mwʉmi.” 24Pwʉ ʉYɨɨsʉ akahega paninie nʉ mwene, nakyene ɨkɨpʉga ɨkɨvaha kya vaanu kɨlɨkʉnkonga nʉ kʉntsʉngʉtɨla.

25Lola, baaho aalepwo ʉnʼdala ʉvɨ aale kwimali#5:25 Ʉnʼdala ʉvɨ aale kwimali natavʉlɨlwe ʉkwɨhanza mu kɨpʉga kya vaanu nakʉ kʉmwibata ʉmuunu ʉjyʉnge. Ʉnʼdala ʉjʉ aale va kʉgʉngʉla, manya aalamile ikange najyʉ muunu ʉvɨ aamwabaasaaga namwene aamwambʉhitsaaga ʉvʉlami. Lola Valawi 15:25-33. kʉ nsɨkɨ gwa myaka kɨtsigo na gɨvɨlɨ (12). 26Ʉnʼdala ʉjwa aagatatsiiwe siitso, alɨkʉgenda mu vaganga vongosu, alɨkʉtaaga ɨkyʉma kyongosu mu kʉjavɨla, kɨtsila kʉvʉmbʉla kɨɨnu, napeene ʉkʉgatatsiwa kʉkagimba.

27-28Wʉ apʉliike ikulongwi tsa Yɨɨsʉ, alɨkʉsaaga mu numbula alɨkʉta, “Ndɨngaabaase ndagʉve nsabwa gwa mwene, ndipona.” Pwʉ akapyenyelʉka mu kɨpʉga kya vaanu, akahegelela kʉnsana nʉ kwabaasa ʉnsabwa gwa Yɨɨsʉ. 29Ʉnsɨkɨ gʉʉgwa ɨlimali lya mwene likʉʉma, akɨpʉlɨka aponile kʉ vʉtamu ʉwʉ aale nawo. 30Ikange ʉnsɨkɨ gʉʉgwa ʉYɨɨsʉ akɨvona mu mmana gwa mwene amaka gahʉmile, gamponiitse ʉmuunu. Akagalamuka kʉnsana, akavalola avaanu akata, “Veeni ʉvɨ abaasiitse ʉnsabwa gwango?” 31Avakongi va mwene vakamwanda vakata, “Kɨki vuvʉʉtsa ʉmuunu ʉvɨ akwabaasiitse? Navukʉvavona avaanu avongosu ava avakʉtsʉngʉtye?” 32Ʉmwene ʉYɨɨsʉ alɨkʉloleesa ambone ʉmuunu ʉvɨ avombile itso. 33Ʉnʼdala ʉlya wʉ ikʉtsivona itsivombiike kʉ mwene, lwambwene ʉlʉdwado#5:33 Lwambwene ʉlʉdwado pakʉva aamwabaasiitse ʉYɨɨsʉ nʉ kʉmbɨɨka ave ɨkoleliinie nʉ kʉta ʉYɨɨsʉ aatsimanyile itsʉ ʉmwene aatsivombile. nʉ kʉtetema. Akahegelela kwa Yɨɨsʉ, akasugama pavʉlongolo pa mwene, akambʉʉla ʉwajɨlweli wooni. 34ɄYɨɨsʉ akambʉʉla akata, “Mwalɨvango, ʉNgʉlʉve akʉponiitse kʉ nzɨla jya lwɨdɨko lwako. Bɨhaga nʉ lʉnotsehetso, ʉponile ʉvʉtamu waako.”

35Lola, ʉYɨɨsʉ wʉ itsova, vakiitsa avaanu ʉkʉhʉma kʉ nyumba jya Yailo, ʉmbaha ʉlya va lisinagogi, vakata, “Ʉmwalɨvo atʉlekile, leka ʉkʉnʼgatatsa ʉMmanyisi.” 36Ʉmwene ʉYɨɨsʉ wʉ apʉliike ɨlimenyu ɨlyo, akambʉʉla ʉYailo akata, “Ʉve ʉladwadaga, apeene ʉnnyɨdɨkage ʉne.”

37ɄYɨɨsʉ akavatoola ʉPetulo, ʉYakobo nʉ nnunaave ʉYohana, naantavʉle ʉmuunu ʉjyʉnge ʉkʉkongana nave. 38Vakagenda, vakatsisika mu nyumba jya Yailo. ɄYɨɨsʉ akavavona avaanu vikwoveela nʉ kʉlɨla siitso, 39akiingila mu nyumba akavavʉʉtsa, akata, “Kɨki mukwoveela nʉ kʉlɨla? Ʉmwana naswili, agoneelye vʉvʉle.” 40Avaanu valya vakatengʉla ʉkʉmmeka ʉYɨɨsʉ. Ʉmwene akavahʉmya panzi vooni, akantoola ʉdadaaje nʉ vanyina va mwana ʉjwa, paninie na vakongi va mwene, vakiingila apoonu ʉpwʉ gwale ʉnsimba. 41Pwʉ ʉYɨɨsʉ akamwibata ɨkɨvoko akata, “Talita, kʉmi.” Kwʉ kʉta, “Vɨ mmɨnza ʉve, ndikʉkʉvʉʉla ndiita sisimuka!”

42Ʉnsɨkɨ gʉʉgwa ʉmmɨnza, ʉvɨ aale nɨ myaka kɨtsigo na gɨvɨlɨ, akɨɨma nʉ kʉtengʉla ʉkʉgenda. Avaanu avaalolile ago vakadega siitso. 43ɄYɨɨsʉ akavabeetsa siitso akata valeke ʉkʉmbʉʉla ʉmuunu ʉjyʉnge ɨkulongwi ɨjyo. Akavavʉʉla vampe ʉmwana ʉjwa ɨkyakʉlya.

Currently Selected:

Maliko 5: zga

Highlight

Copy