Maliko 6

ɄYɨɨsʉ ibeelwa na vaanu va kʉ myave kʉ Nazaleti

(Mataayo 13:53-58; Luuka 4:16-30)

1ɄYɨɨsʉ paninie na vakongi va mwene akahega ʉkʉ, akabɨha kʉ vʉtsenge ʉwa kʉ myave. 2Wʉ kɨsiike ɨkɨgono kya Sabato, akatengʉla ʉkʉmanyiisa mu lisinagogi. Avaanu avongosu avaampʉlɨhiitse, vakadega nʉ kʉvʉʉtsania valɨkʉta, “Ʉmuunu ʉjʉ, agaweene ndaku amamenyu aga? Lʉhala lʉki ʉlwʉ apeevilwe ʉjʉ? Agaweene ndaku amaka ga kʉvomba isidego isivaha ndiisi? 3Ndeeti, ʉjʉ navyʉlya ʉnselemala, ʉnswambe va Maliyamu, na vanunaave nawʉ va Yakobo, ʉYose, ʉYuuda nʉ Simoni? Ndeeti, avahaatsave navitaama baaha nʉʉwe?” Pwʉ vakalemwa ʉkʉmwɨdɨka, vakamʼbeela lwoni.

4ɄYɨɨsʉ akavavʉʉla akata, “Ʉnyamalago ikwɨmɨkiwa ʉkʉveetsaga, kwene nikwɨmɨkiwa kʉ vʉtsenge wa kʉ myave, kʉ valʉkololwe na vaanu va mu nyumba jya mwene.” 5Wʉ aweene navikʉmwɨdɨka, naavombe isidego isiveetsaga ʉkwa kʉ Nazaleti, peene akavavɨɨkɨla isivoko avatamu vaninie, akavaponia. 6Aadegile siitso ʉpwʉ navaamwɨdɨke ʉmwene.

ɄYɨɨsʉ ikʉvasuungʼa avapositili

(Mataayo 10:5-15; Luuka 9:1-6)

Pwʉ ʉYɨɨsʉ akahega, alɨkʉtsʉngʉʉla mu matsumbe nʉ kʉmanyiisa avaanu. 7Akavɨɨlanga avapositili va mwene kɨtsigo na vavɨlɨ (12), akavapa amaka ga kʉswɨma imepo imbiivi. Akavasuungʼa vavɨlɨ vavɨlɨ, 8akata, “Mu nzɨla muleke ʉkʉgega ɨmbopo ɨjɨveetsaga, ndagʉve nkate, ʉnsuku ni ndalama. Mugegage lwene ʉlʉbɨkɨ lwa kwɨkolela, 9ikange muswale isilaatu, muleke ʉkʉva nɨ misabwa ɨgya kwandʉlania.” 10Akoongeletsa akata, “Ɨnyumba jya vaanu ɨjyʉ vikʉvambɨlɨla, mwingilage nʉ kʉtaama muumwa ʉkʉsika ʉpwʉ mwihega mu vʉtsenge ʉwa. 11Apoonu apaveetsaga ʉpwʉ avaanu jʉvibeela ʉkʉvʉʉpɨlɨla nʉ kʉvapʉlɨhɨtsa, wʉ mwihega mukungʼuunage ʉlʉsumbe ʉlʉlɨ mu silʉnde siinyo, kɨve kyʉ kɨmanyilo kya vʉviivi ʉwʉ vavombile.”#6:11 Mukungʼuunage ʉlʉsumbe Ʉvʉganulu wa mamenyu ʉkʉkungʼuuna ʉlʉsumbe lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ.

12Pwʉ vakahega, valɨkʉlʉmbɨlɨla mwoni mwoni ʉkʉta avaanu vapele imbiivi. 13Valɨkʉswɨma imepo imbiivi tsi nyongosu, nʉ kʉvabaka amafuta avatamu vongosu, pwʉ avatamu avo valɨkʉpona.

Ɨmango jya kʉbudwa kwa Yohana ʉMwotsi

(Mataayo 14:1-12; Luuka 9:7-9)

14Ʉnkʉlʉdeeva ʉHelode#6:14 Ʉnkʉlʉdeeva ʉHelode Ʉjʉ aatambʉlwagwa Helode Antipa. Aale nswambe va Helode ʉMbaha. Ʉjʉ vɨ aalondile ʉkʉmʼbuda ʉYɨɨsʉ wʉ nʼdebe. ɄAntipa aale nkʉlʉdeeva mu vʉtwa wa Valooma. Aalongwitse ʉlʉvasu ʉlwa kʉ Galilaya na kʉ Peleya ʉkʉhʉma mu mwaka ʉgwa nni Wanaholilwi ʉYɨɨsʉ Kɨlɨsiti ʉkʉsikila mu mwaka ʉgwa sitsigo sidatu na budikakʉpamato (39) Waholilwe ʉYɨɨsʉ Kɨlɨsiti. aapʉliike itsyavombaga ʉYɨɨsʉ, ʉlwakʉva avaanu vooni vaatsitsovaga itsyavombaga ʉYɨɨsʉ. Avaanu valɨkʉganaania pa kulongwi tsa Yɨɨsʉ, avange valɨkʉta, “Ʉjʉ vɨ Yohana ʉMwotsi, atsʉʉkile ʉkʉhʉma kʉ vaswe, kyʉ mene alɨ na maka ga kʉvomba isidego.” 15Avange valɨkʉta, “Ʉmuunu ʉjʉ vɨ nyamalago ʉEliya#6:15 ɄEliya Ʉvʉganulu wa Eliya lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. akiliwiike.” Avange valɨkʉta, “Ʉjʉ nyamalago nda valya avanyamalago ava katale.”

16ɄHelode wʉ agapʉliike ago akata, “Ʉjʉ vɨ Yohana ʉvɨ ʉne ndyahʉmiitse ʉlʉlagɨlo ʉkʉta agɨdwe ʉntwe, atsʉʉkile.” 17Aga gaahʉmye ewo ʉnsɨkɨ gʉlya ʉpwʉ ʉHelode aasuungʼile avaanu vakamwibate ʉYohana nʉ kʉnʼdɨndɨla kʉ kɨkʉngwa. Aavombile ewo pa kulongwi jya Helodiya ʉvɨ pa vʉtengʉlɨlo aale inʼdala va nnunaave ʉFilipo. Ʉmwene aapokile ʉHelodiya ʉjʉ, ave inʼdala va mwene. 18Wʉ ikʉtsivona itsi, ʉYohana alɨkʉmbʉʉla ʉHelode alɨkʉta, “Ʉve ʉpokile ʉnʼdala va lʉkololwo, ɨkɨɨnu ɨkyʉ natʉtavʉliilwi nʉ lʉlagɨlo lwa Ngʉlʉve.”

19Pwʉ ʉHelodiya akambiipila siitso ʉYohana, alɨkʉlonda ɨnzɨla jya kʉmʼbuda, akalemwa, 20ʉlwakʉva ʉHelode aanʼdwadaga ʉYohana. Aalʉmanyile ʉkʉta, ʉjwa muunu inʼgolosu ikange imbalatse, pwʉ alɨkʉmpoka. Ʉmwene aanogwagwa ʉkʉmpʉlɨhɨtsa ʉYohana, nʉpwʉ jɨngave wʉ ampʉlɨhiitse, aasʉsʉvalaga siitso.

21Lola, kʉmbele gʉkiitsa ʉnsɨkɨ ʉgwa Helodiya ʉkʉvomba itsʉ aanogwagwa. Itsi tsyavombiike pa litsʉva ɨlya lʉhekelo lwa kʉkʉmbʉka ʉkʉholwa ʉnkʉlʉdeeva ʉHelode. Ʉnkʉlʉdeeva ʉjʉ akavavombela ʉlʉhekelo avanzagɨla va kɨtaamo kya mwene, avavaha va vasikali na valongotsi va mu Galilaya. 22Pwʉ ʉmwalɨve va Helodiya akiingila, akanema, akammovosa siitso ʉHelode paninie na vahenza va mwene. Ʉnkʉlʉdeeva akambʉʉla ʉmmɨnza ʉlya akata, “Ʉndoove ɨkɨɨnu ɨkɨveetsaga ɨkyʉ vunogwa, ʉne ndikʉkʉpa.” 23Kange akɨjyɨga akata, “Ndikʉkʉpa ɨkɨɨnu ɨkɨveetsaga ɨkyʉ vudoova! Ndiita, ndalʉve lʉdeeva lwango ndikʉkʉgavɨla pagati.”

24Pwʉ ʉmwalɨve akahʉma akambʉʉtsa ʉvanyina akata, “Ndɨdoove kɨɨnu kɨki?” Ʉvanyina akamwanda akata, “Bɨhaga ʉkadoove ʉntwe gwa Yohana ʉMwotsi.” 25Ʉmwana akankilivukila ʉnkʉlʉdeeva kya ngʼaningʼaani, akatsova akata, “Ndidoova ʉʉme lɨlɨno lɨno mu libeseni ʉntwe gwa Yohana ʉMwotsi.”

26Ʉnkʉlʉdeeva akasʉsʉvala siitso wʉ ipʉlɨka itso. Paninie nʉ lʉsʉsʉvalo lwa mwene, aalemilwe ʉkʉmʼbeelela pakʉva ɨɨjyɨgile pavʉlongolo pa vahenza. 27Pwʉ ʉnkʉlʉdeeva akansuungʼa ʉnsikali abɨhe akadumule nʉ kʉgʉleeta ʉntwe gwa Yohana. Ʉnsikali akabɨha mu kɨkʉngwa akadumula ʉntwe gwa Yohana. 28Akagega ʉntwe ʉgwa mu libeseni, akampa ʉmmɨnza, namwene ʉmmɨnza akampa ʉvanyina. 29Avakongi va Yohana, wʉ vapʉliike ɨkulongwi ɨjyo, vakalʉta kutoola ʉnsimba nʉ kʉsɨɨla mu vʉguli.

ɄYɨɨsʉ iliisa avaanu vongosu siitso

(Mataayo 14:13-21; Luuka 9:10-17; Yohana 6:1-14)

30Lola, avapositili valya vakalʉndamana ʉpwʉ aale ʉYɨɨsʉ, vakampangɨla gooni ʉgwʉ vatsivombile nʉ kʉmanyiisa ʉkwʉ akavasuungʼile. 31Ʉnsɨkɨ ʉgwa avaanu vongosu valɨkwitsa nʉ kʉhega, pwʉ ʉYɨɨsʉ na vakongi va mwene gʉkajaga nagʉ nsɨkɨ ʉgwa kʉlya ɨkyakʉlya. Akavavʉʉla akata, “Tʉvʉʉke twɨ veene apoonu pavʉtiitu, tʉkagatalʉke padebe.” 32Pwʉ vakɨtoga mu waato vakahega palya, akabɨha apoonu apatsila vaanu.

33Napeene, avaanu vongosu vaambwene ʉYɨɨsʉ na vakongi va mwene wʉ vihega, vakavamanya. Pwʉ avaanu vakahʉma mu vʉtsenge ʉvʉlɨ pongosu, vakavanyilila ʉkwʉ vaabɨhaga, vakatsikʉvatalɨla ʉkʉsika. 34ɄYɨɨsʉ na vakongi va mwene wʉ vasiike kʉ lʉkanzimbale lwa nyanza, vakiika mu waato. ɄYɨɨsʉ akakɨvona ɨkɨpʉga ɨkɨvaha kya vaanu kikʉmpʉlɨkɨla, akavakolela ɨkɨsa, ʉlwakʉva vaale ndi ngʼolo itsivʉla inʼdɨɨmi. Pwʉ akatengʉla ʉkʉvamanyiisa ikulongwi nyongosu.

35Kʉmihe, avakongi va Yɨɨsʉ vakiitsa, vakambʉʉla vakata, “Apoonu apa ʉpwʉ tʉlɨpwo lʉkɨnga, ikange wiihwa. 36Lʉnonu ʉvatavʉle avaanu ava vabɨhe mu vʉtsenge na mu matsumbe ga pawiipi, vakɨgʉlɨle isyakʉlya.”

37Ʉmwene ʉYɨɨsʉ akavaanda akata, “Muvape ʉnyie ɨkyakʉlya.” Aveene vakaanda vakata, “Patʉnogye ʉwe tʉve ni dinali ɨmileevʉlʉ gɨvɨlɨ (200)#6:37 Dinali Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. itsa kʉkwɨla ʉkʉgʉla ɨmikate gya kʉlya avaanu ava vooni.”

38ɄYɨɨsʉ akavavʉʉtsa akata, “Mulɨ nagyo ɨmikate gɨlɨngi? Lʉtagi mukalole.” Wʉ vatsilolile vakambʉʉla vakata, “Tʉlɨ nagyo ɨmikate gɨhaano ni somba ivɨlɨ.”

39Pwʉ ʉYɨɨsʉ akavavʉʉla avakongi va mwene akata, “Muvataamye avaanu sipʉga sipʉga pa lʉhamba.” 40Vakavataamya avaanu sipʉga sipʉga, apa ʉndeevʉlʉ mpamato (100) gwa vaanu, apange isitsigo sihaano (50). 41ɄYɨɨsʉ akatoola ɨmikate gɨhaano gɨlya ni somba itso ivɨlɨ, akalola kʉkyanya, akasaana kwa Ngʉlʉve, akamenyulania, alɨkʉvapa avakongi va mwene vavagavɨlage avaanu. Wʉ akagaha vʉle vʉle kʉ somba ivɨlɨ, tsilɨkʉgavɨlwa kʉ vooni. 42Avaanu vooni vakalya, vakiiguta. 43Avakongi vakalʉndamania amasigalɨlo ga mikate ni somba, vakadɨtsa isitʉndʉ kɨtsigo na sivɨlɨ (12). 44Na valya avaalie ɨmikate ni somba vaale vongosu siitso, avagoosi veene vaale avaelufu vahaano (5,000).

ɄYɨɨsʉ igenda pakyanya pa magasi

(Mataayo 14:22-33; Yohana 6:15-21)

45Ʉnsɨkɨ gʉʉgwa ʉYɨɨsʉ akavalagɨla avakongi va mwene ʉkʉta, vatoge mu waato valongolage ʉkʉbɨha kʉ vʉtsenge ʉwa kʉ Betisaida. Ʉvʉtsenge ʉvʉ waale kʉ mwambo kʉ nyanza. Baaho ʉmwene akava ikɨlaga kʉ vaanu avaale pa lʉlʉndamano. 46Wʉ amalile ʉkwɨlaga, ʉYɨɨsʉ akatoga kʉ kɨdugala kukɨsaja.

47Wʉ vʉhue, ʉwaato vʉkava vʉsiike pagati pa nyanza. Ʉnsɨkɨ ʉgwa ʉYɨɨsʉ aatsiige mwene kʉ kɨlʉnga ɨkɨlagasu. 48Kʉmbele, akavavona avakongi va mwene vagagiilwe nʉ nkuluguuto, valɨkʉlemwa ʉkʉvʉhɨlɨka ʉwaato kʉvʉlongolo, pakʉva ʉnkuluguuto gwale mbaha, gwahʉmile kʉvʉlongolo kʉ veene. Ʉnsɨkɨ wʉ tsivɨka ingʼʉkʉ, ʉYɨɨsʉ akalʉta kʉ vakongi va mwene kʉnʉ igenda pakyanya pa nyanza. Aanogwagwa agende pawiipi avoneke kʉ veene. 49Aveene wʉ vambwene igenda pakyanya pa nyanza, vakata lisyʉka, vakakoola. 50Vooni wʉ vambwene, vakadwada siitso.

Pwʉ ʉYɨɨsʉ akavavʉʉla akata, “Mwɨkangatse, ʉne neene, muleke ʉkʉdwada.” 51Pwʉ akɨtoga mu waato ʉmwʉ vaale. Baaho ʉnkuluguuto ʉgwa gʉkalitama, vakadega siitso. 52Paninie nɨɨlyo, nʉpwʉ jɨngave vakɨweene nakɨ kɨdego kya mikate, inumbula tsa veene tsyale nzito ʉkʉmwɨdɨka ʉYɨɨsʉ.

ɄYɨɨsʉ ikʉvaponia avatamu kʉ Genesaleti

(Mataayo 14:34-36)

53ɄYɨɨsʉ na vakongi va mwene wʉ valowiike ɨnyanza jya Galilaya, vakasika mu kɨlʉnga ɨkya Genesaleti, vakɨɨmya ʉwaato, vakiisa ɨkyɨmɨhɨtso kya waato. 54Akasɨkɨ kaako wʉ vahʉmile mu waato, avaanu vakammanya ʉYɨɨsʉ. 55Valɨkʉnyila mwoni mwoni mu kɨlʉnga kɨlya, valɨkʉtsipɨmba avatamu mu mateesu, valɨkʉvahɨlɨka ʉkʉveetsaga ʉkwʉ vaapʉlɨkaga ʉkʉta kwalɨkwo ʉYɨɨsʉ. 56Mwoni ʉmwʉ aabɨhaga ʉYɨɨsʉ, jɨve mu matsumbe, mu vʉtsenge, evo mu silɨmɨla, avaanu valɨkʉvavɨɨka avatamu mu sivanza ʉmwʉ vigʉtsɨhɨtsa isiinu. Valɨkʉnʼdoova ʉYɨɨsʉ avatavʉle avatamu ʉkwabaasa kwene ʉvʉsivilo wa nsabwa gwa mwene. Pwʉ vooni ʉwʉ vaabaasiitse vakapona.

Currently Selected:

Maliko 6: zga

Highlight

Copy