Maliko 7

Ʉkʉkonga inyiiho tsa vanyienya

(Mataayo 15:1-20)

1Ɨkɨgono kɨpamato, aVafalisayo na vamanyisi va ndagɨlo vaninie, avaahʉmile kʉ Yelusalemu, vakalʉndamana ʉpwʉ aale ʉYɨɨsʉ. 2Vakavavona avange avakongi va Yɨɨsʉ, viilya ɨkyakʉlya kɨtsila kwɨvalatsa amavoko. Pa kʉgaha ewo avakongi navaakongane nʉ lwiho lwa ndagɨlo tsa Vayahudi, 3manya aVafalisayo na Vayahudi vooni, naviilya ɨkyakʉlya kɨtsila kʉpuguha isivoko#7:3 Naviilya ɨkyakʉlya kɨtsila kʉpuguha isivoko Wʉ gʉsiike ʉnsɨkɨ gwa kʉlya, aVayahudi vaale nʉ lwiho lwa kʉtala ʉkwɨvalatsa kʉ nzɨla jya kʉpuguha isivoko pwʉ vatengʉle ʉkʉlya ɨkyakʉlya. Ʉmuunu ʉvaalitsaga ɨkyakʉlya kɨtsila kʉpuguha isivoko aavalɨlwagwa innangi va nyiiho tsa veene. ʉkʉsika ʉpwʉ sidugile isiganza ndʉwʉ tsilɨwo inyiiho tsa vanyienya va veene. 4Kange wʉ vahʉmile kʉ soko, naviilya isiinu isiveetsaga kɨtsila kwɨvalatsa.#7:4 Kɨtsila kwɨvalatsa AVayahudi vaale nʉ lwiho ʉlʉ pakʉva kʉ soko vaaganaga na vaanu avalɨ pongosu. Avange vaale va sivʉmbʉkʉ isitava sya Vayahudi. Apo aVayahudi valɨkʉvona vɨkoleliinie. Vikʉtsikonga ni nyiiho itsinge nyongosu ndi tsa kʉsuka isikombe, isivya, ni sikongʼolo isya kyʉma.

5Pwʉ valya aVafalisayo na vamanyisi va ndagɨlo vakambʉʉtsa ʉYɨɨsʉ vakata, “Kɨki avakongi vaako navikonga inyiiho tsa vanyienya viitu? Aveene viilya wʉ vɨkoleliinie amavoko!”

6ɄYɨɨsʉ akavaanda akata, “Ʉnyie mulɨ vanuasi! Ʉnyamalago ʉYesaya aatsovile amalago ga lweli gaanyie, ʉpwʉ aavɨgile akata,

‘ɄNgʉlʉve iita, “Avaanu ava vikʉnnyɨmɨka kʉ mamenyu geene,

inumbula tsa veene, baako, tsilɨ kʉtale nʉʉne.

7Ʉkwɨsaja kwa veene,

vikɨgatatsa vʉvʉle,

pakʉva itsʉ vimanyiisa,

ndagɨlo tsa vʉnogwe wa vaanu.” ’#Yesaya 29:13”

8ɄYɨɨsʉ akoongeletsa ʉkʉtsova akata, “Ʉnyie mukʉtsileka indagɨlo tsa Ngʉlʉve, mukwibata inyiiho tsa vaanu.

9“Kange ʉnyie mwipaga kɨlʉhala indagɨlo tsa Ngʉlʉve pakʉta mutsiibatage inyiiho tsiinyo! 10Leka ndɨhwananie ʉgwʉ aalagye ʉMoose nʉ gwʉ muvomba ʉnyie. Ʉmwene aavapye ʉnyie ʉlʉlagɨlo ʉkʉhʉma kwa Ngʉlʉve ʉlwakʉta: ‘Ʉmwɨmɨkage ʉdadaajo nʉ jyʉva vaako.’#Kʉhʉma 20:12; Simiilitso tsa Ndagɨlo 5:16 Ikange, ‘ʉmuunu ʉvaveetsaga ʉvɨ ikootola kwa dadaaje evo kwa vanyina abudwagwe.’#Kʉhʉma 21:17; Valawi 20:9 11Lɨno ʉnyie, mumanyiisa mwita, ‘Ʉmuunu alɨ nawo ʉvʉtavʉlɨlwa wa kʉmbʉʉla ʉdadaaje evo ʉvanyina ʉkʉta, “Ʉlʉtangɨlo ʉlʉkaale lwa kʉkʉpa ʉve, lɨno lwiva Kolibani,” ’ kwʉ kʉta ɨkɨɨnu kɨvɨɨkilwe kya kʉmpa ʉNgʉlʉve. 12Lola, pa kʉmanyiisa ewo, ʉnyie mukʉmbɨɨka ʉmuunu ɨlekelwe lwoni ʉkʉmpa ʉlʉtangɨlo ʉdadaaje evo ʉvanyina. 13Kʉ nzɨla ɨjyo mwibeda ɨlimenyu lya Ngʉlʉve kʉ nongwa itsa kʉkonga inyiiho tsiinyo itsʉ mukwʉpɨngʼana. Ikange muvomba imbombo nyongosu itsihwaniine niitsi.”

14ɄYɨɨsʉ akakyɨlanga ɨkɨpʉga kya vaanu kʉ mwene ikange akata, “Mummʉlɨhɨtse nyɨ vooni, nʉ kʉtsimanya itsi. 15Nakɨkʉli ɨkɨɨnu ɨkihʉma kʉnzi kʉ muunu ɨkyʉ kikʉmpelela ave inkolelanie wʉ kingye mu mwene. Isyene isihʉma mu nʼgati syʉ syene sikʉmpelela ʉmuunu ave inkolelanie. 16Ʉmuunu ʉvɨ ipʉlɨka, vɨ apʉlɨkage!”#7:16 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.

17Wʉ akɨlekile ɨkɨpʉga kya vaanu nʉ kwingila mu nyumba, avakongi va mwene vakambʉʉtsa ɨkulongwi ɨjya kɨhwananitso ɨkyo. 18Namwene akavavʉʉtsa akata, “Ndeeti, najyʉnyie namutsimanyili itsi? Namulʉmanyili ʉkʉta ɨkɨɨnu ɨkɨveetsaga ɨkɨlɨ kʉnzi kɨngiingile mu muunu nakikumpelela ave inkolelanie? 19Ʉmuunu angalye ɨkyakʉlya nakikʉmwingila mu numbula jya mwene, ɨkyene kikwingila mu litumbu, kʉmbele kitaagwa kʉ tsoo.” (Pa kʉtsova ewo, asivaliitse isyakʉlya syoni.)

20ɄYɨɨsʉ akoongeletsa ʉkʉtsova akata, “Ɨkihʉma mu nʼgati mu muunu kyʉ kyene kikʉmpelela ʉmuunu ave inkolelanie, 21manya ʉkʉhʉma mu nʼgati mu numbula jya muunu gihʉma amasaago amaviivi aga: ʉvʉmalaja, ʉvʉhɨɨtsi, ʉvʉbudi, 22ʉvʉligu, ʉmwojo, ʉvʉgalo, ʉvʉsyovi, ʉvʉpʉmu, ɨgiila, amadʉsi, amatingo nʉ vʉpelwa. 23Amaviivi ago gooni gihʉma mu numbula jya muunu. Ago gwʉ geene gikʉmpelela ave inkolelanie.”

Ʉlwɨdɨko lwa nʼdala ʉvɨ alɨ kʉnzi kʉ kɨvʉmbʉkʉ kya Vayahudi

(Mataayo 15:21-28)

24ɄYɨɨsʉ akahega ʉpwʉ aale, akabɨha kʉ kɨlʉnga ɨkya kʉ Tilo. Akiingila mu nyumba mamato, ikange naanogwe ʉkʉta ʉmuunu ʉvaveetsaga alʉmanye, napeene akalemwa ʉkwɨsiha. 25-26Ʉkwene ʉkwa, aalekwo ʉnʼdala mpamato ʉvɨ aale nʉ mwalɨve ʉnya mepo ɨmbiivi. Ʉnʼdala ʉlya naale Nʼyahudi, ɨkɨvʉmbʉkʉ kya mwene kyale kya Vafoinike. Wʉ apʉliike ikulongwi tsa Yɨɨsʉ, pwʉ akiitsa, akabɨɨlʉka kʉ silʉnde sya mwene. Akanʼdoova ʉYɨɨsʉ ahetse ɨmepo ɨmbiivi kʉ mwalɨve.

27ɄYɨɨsʉ akambʉʉla akata, “Valeke avaana viigute taasi ʉlwakʉva nalʉnonu ʉkʉtoola ɨkyakʉlya kya vaana nʉ kʉtsilahɨla imbwa.”#7:27 Imbwa AVayahudi vɨɨvonaga aveene wʉ vanogye siitso pamiiho ga Ngʉlʉve. Avaanu avange avatava Vayahudi vaavavonaga navanogiili kɨɨnu. Valɨkʉta mbwa. ɄYɨɨsʉ ihwanania ipange aVayahudi evo avakongi va mwene, na vaana. Avatava Vayahudi ihwanania ni mbwa. Ʉvʉsumbe wa Yɨɨsʉ nawaale wa kʉnʼdʉka ʉnʼdala ʉlya, ʉmwene aanogilwe ʉkʉnʼgela ʉlwɨdɨko lwa mwene. 28Namwene akamwanda akata, “Eena wʉ jɨlɨwo Ntwa, lɨno natsyene imbwa itsilɨ paasi pa meesa tsiilya amasigalɨlo ga kyakʉlya kya vaana.” 29ɄYɨɨsʉ akambʉʉla akata, “Kʉ nongwa jya limenyu ɨlyo ɨlyʉ wandile, vujaga kʉ nyumba. Ɨmepo ɨmbiivi jɨhegile mu mwalɨvo.” 30Akahega nʉ kʉvuja kʉ nyumba. Wʉ atsisiike, akambona ʉmwalɨve agonile pa kɨtanda, najyene ɨmepo ɨmbiivi jɨhegile.

ɄYɨɨsʉ ikʉmponia ʉmuunu ʉvɨ atsivye ikange nitsova

31ɄYɨɨsʉ akahega mu kɨlʉnga kya Tilo, akalʉtɨngʼania kʉ Sidoni ʉkʉgendela kʉ nyanza ɨjya Galilaya, akatsisika mu kɨlʉnga kya kʉ Dekapoli. 32Ʉkwa vakandeetela ʉmuunu ʉvatsivye ikange ʉvɨ nitsova, vakanʼdoova ambɨɨkɨle amavoko ʉkʉta apone.

33Pwʉ ʉYɨɨsʉ akammetsa pa kɨpʉga kya vaanu, akabeha amati nʉ kʉmwabaasa ʉlʉlimi, akiingitsa isikonze mu mbʉlʉkʉtʉ tsa muunu ʉlya, 34akalola kʉkyanya akakeeka ʉmwʉja gwa lʉvavo, akambʉʉla akata, “Efata.” Kwʉ kʉta, “Dɨndʉka.” 35Ʉnsɨkɨ gʉʉgwa imbʉlʉkʉtʉ tsikadɨndʉka, nalwene ʉlʉlimi lwa mwene lʉkadɨndʉka, akatengʉla ʉkʉtsova vʉnonu.

36ɄYɨɨsʉ akavapavɨla avaanu avaalepwo ʉkʉta, valeke ʉkʉmbʉʉla ʉmuunu ʉvaveetsaga ikulongwi itsi. Napeene, ɨmisɨkɨ gyoni ɨgyʉ aavapavɨlaga, aveene valɨkʉgimba ʉkʉvavʉʉla avaanu ikulongwi tsa mwene. 37Pwʉ avaanu vakadega ʉkʉlʉtɨɨlɨla, vakata, “Imbombo tsyoni itsyavombile nonu lweli! Naveene avatsivye avapelye ʉkʉta vapʉlɨkage, ʉwʉ navitsova ʉkʉta vatsovage.”

Currently Selected:

Maliko 7: zga

Highlight

Copy