Valooma 1
1
Ʉlʉpembetso
1Ɨkalata ɨjɨ jɨhʉmile kwane ndɨ Paulo, ndɨ ndɨlɨ mbanda va Mesiya ʉYɨɨsʉ. Ʉmwene aannyɨlangile ndɨve mpositili,#Mbombo tsa Vapositili 9:15 nʉ kʉnnyomola ndɨpʉlɨsaage ɨLivangɨli ʉkʉhʉma kwa Ngʉlʉve. 2ƗLivangɨli ɨlyo, lyʉ lyene ʉNgʉlʉve aatʉhʉʉviitse mu Vʉvɨge ʉVʉvalatse, ʉkʉhʉma katale, kʉ nzɨla jya vanyamalago va mwene. 3Itso tsʉ kulongwi tsa Mwana va mwene ʉvɨ kɨvʉmuunu ihʉma mu kɨkolo kya nkʉlʉdeeva ʉDavʉdi. 4Ʉjwa vɨ mwene ʉvɨ ʉNgʉlʉve aantsʉʉsiitse, kʉ maka ga Mepo ʉMbalatse va mwene. Kʉ nzɨla ɨjyo, aavoniitse ʉkʉta ʉYɨɨsʉ Mwana va Ngʉlʉve ʉNyamaka Gooni. Ʉjwa vɨ Ntwa viitu ʉYɨɨsʉ Kɨlɨsiti. 5Ʉkʉgendela ʉmwene, ʉNgʉlʉve aannyʉngʉkye ʉne, akambɨɨka ndɨve mpositili. Aavombile ewo pakʉta ndɨvɨɨlangage avaanu vooni avatava Vayahudi, vamwɨdɨke ʉNtwa ʉYɨɨsʉ nʉ kʉkonga itsa vʉnogwe wa mwene pakʉta ɨlitaawa lya mwene lɨginiwaagwe. 6Ʉnyie najyʉnyie mulɨ mu kɨpʉga kɨpamato kya vaanu valya avɨɨlangilwe vave vaanu va Yɨɨsʉ Kɨlɨsiti.
7Pwʉ lɨno, ndikʉvavɨgɨla ʉnyie nyɨ vɨɨdɨkivajyango nyɨ vooni, nyɨ mulɨ mu Looma, nyɨ ʉNgʉlʉve avaganile siitso, avɨɨlangile pakʉta muve vaanu va mwene jɨlweli.
Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu na kʉ Ntwa ʉYɨɨsʉ Kɨlɨsiti, siveetsage nʉʉnyie.
ɄPaulo isaaga ʉkʉvʉgendela ʉvʉtsenge wa Looma
8Ɨlitatsi, ʉkʉgendela mwa Yɨɨsʉ Kɨlɨsiti ndikʉnsaana ʉNgʉlʉve pa kulongwi tsyanyie nyɨ vooni, manya ikulongwi tsa lwɨdɨko lwinyo tsimanyikiike mu kɨlʉnga kyoni. 9ɄNgʉlʉve ʉvɨ ndikʉmbombela kʉ numbula jyango jyoni, wʉ ndikʉvalʉmbɨlɨla avaanu avange ɨLivangɨli lya Mwana va mwene, alʉmanyile ʉmwʉ ndikʉvadoovela ʉnyie ʉnsɨkɨ gwoni. 10Ndikʉnʼdoova ʉmwene ʉkʉta, anganogwe, lɨno kʉ vʉmalɨlo, aame ɨndwela jya kwitsa kukʉvavona ʉnyie. 11Manya ndɨsʉʉkilwe siitso ʉkʉvavona, pakʉta ndɨvape ɨkɨɨnu kya kʉnywilitsa inumbula tsiinyo, 12kwʉ kʉta, ʉlwɨdɨko lwanyie lʉnnywilitsaage ʉne, nʉ lwɨdɨko lwane lʉvanywilitsaage ʉnyie.
13Mwe vɨɨdɨkivajyango, ndinogwa mulʉmanye ʉkʉta, ndɨkasaagɨlɨlaga siitso ʉkwitsa kukʉvavona ʉnyie. Lɨno, ndɨpitsiige ndisigwa ʉkʉsikila ʉnsɨkɨ ʉgʉ. Ndinogwa ndiitse ndɨpʉlɨse ɨLivangɨli ɨlyo kwanyie, pakʉta ndɨvakwege avaanu vamwɨdɨke ʉNtwa ʉYɨɨsʉ, ndʉwʉ ndɨvombile kʉ vaanu avange avatava Vayahudi. 14Lola, ʉNgʉlʉve andagye ndɨpʉlɨsaage ɨLivangɨli kʉ vaanu vooni, kʉ Vayunaani na kʉ vatava Vayunaani,#1:14 Kʉ Vayunaani na kʉ vatava Vayunaani Ʉnsɨkɨ ʉpwʉ jyavɨgilwe ɨkalata ɨjɨ, ɨnzovele jya Vayunaani ni nyiiho tsa veene syamanyikiike mu silʉnga syongosu. Avaanu avaakɨmanyile ʉkʉtsova ɨnzovele ɨjɨ vaavabedaga avaanu vooni ʉwʉ navaakɨmanye ʉkʉtsova ɨKɨyunaani nʉ kʉvomba galya agikongana ni nyiiho itso. kʉ vamanyi na kʉ vatava vamanyi. 15Ɨkɨ kyʉ kɨmmelye ʉne gʉnogage siitso ʉkwitsa kukʉvalʉmbɨlɨla ɨLivangɨli ɨlyo ʉnyie nyɨ vaanu va kʉ Looma.
Amaka ga Livangɨli
16ƗLivangɨli ɨlyo gwʉ maka ga Ngʉlʉve ga kʉvapoka avaanu vooni avikʉmwɨdɨka ʉYɨɨsʉ, ʉkʉtengʉlɨla kʉ Vayahudi ʉkʉsika kʉ vaanu avatava Vayahudi. Apo ʉne nandivona soni napadebe ʉkʉlɨpʉlɨsa. 17ƗLivangɨli ɨlyo livonia pavʉvalasu ʉmwʉ ʉNgʉlʉve ikʉvavalɨla avaanu ʉvʉgolosu. Avaanu vivalɨlwa ʉvʉgolosu kʉ nzɨla jya lwɨdɨko lwene, ndʉwʉ ʉVʉvɨge ʉVʉvalatse wiita, “Ʉmuunu ʉvɨ ʉlwɨdɨko lʉmpelye ʉvʉgolosu, iiva nʉ wʉʉmi.”#Habakuki 2:4#1:17 Ʉmuunu ʉvɨ ʉlwɨdɨko lʉmpelye ʉvʉgolosu, iiva nʉ wʉʉmi Ʉvʉganulu ʉvʉnge kwʉ kʉta ʉmuunu ʉnʼgolosu itaamaga mu lwɨdɨko.
ɄNgʉlʉve ikʉvapa avaanu ʉlʉvʉngʉ kʉ nongwa jya mbiivi tsa veene
18ɄNgʉlʉve jyʉmwene ikʉvavonia pavʉvalasu ʉkʉta ikʉvapa ʉlʉvʉngʉ avaanu avikʉmʼbeela, nʉ wʉ kʉ nzɨla jya vʉviivi wa veene, vikʉvʉbeela ʉwajɨlweli wa mwene. 19Pange nakwʉ kʉta navalʉmanyili ɨkɨveetsaga pa kulongwi tsa Ngʉlʉve, baako. Lola, galya ʉgwʉ gakaale ga kʉmanyikika galɨ pavʉvalasu, ʉlwakʉva ʉNgʉlʉve jyʉmwene aagavoniitse kʉ vaanu. 20Pa vʉtengʉlɨlo wa kɨlʉnga, ʉNgʉlʉve aapelile isiinu syoni. Pwʉ ʉkʉhʉma ʉnsɨkɨ ʉgwa na kʉ nzɨla jya siinu isyo, avaanu viweesa ʉkʉlʉmanya ʉmwʉ ʉNgʉlʉve aveelye, nʉpwʉ jɨngave navikʉmbona. Isiinu isyʉ aapelile sivonia ʉkʉta ʉNgʉlʉve alɨ na maka gooni, ikange ʉjwa vɨ Ngʉlʉve mwene, nakʉli ʉjyʉnge. Ɨkɨ kyʉ mene avaanu naviweesi ʉkʉdaja ʉkʉta navammanyili ʉNgʉlʉve. 21Lola, aveene vammanyile ʉNgʉlʉve ʉmwʉ aveelye, napeene navikʉnʼginia pange kʉnsaana ndʉwʉ anogelanie. Apeene, aveene valɨ na masaago amaviivi, nʉ lʉhala lwa veene lʉvye vʉtsimu weene. 22Aveene vikɨginia viita wʉ vanya lʉhala, hʉmbe vatsimu. 23Vɨɨlekiilwe ʉkwɨsaja kwa Ngʉlʉve ʉvɨ alɨkwo sikutsooni, vikɨsaja kʉ sihwani sya mingʉlʉve isihwaniine na vaanu, isinge isihwaniine ni sikanu, isinge isihwaniine ni sidege ni sikanu isikwavaadɨka paasi, nʉpwʉ jɨngave isipeliwa isyo syoni siiswa.
24Kʉ nongwa ɨjyo ʉNgʉlʉve aavapye ʉlʉvʉngʉ lwa kʉvaleka vavombelanilage imbombo tsa soni kʉ nzɨla jya mihana gya veene, wʉ vikonga ʉvʉnogwe ʉvʉviivi wa numbula tsa veene. 25Vɨɨlekiilwe ʉkwɨdɨka ʉwajɨlweli wa Ngʉlʉve, valɨkʉkonga ʉvʉnuasi ʉwa. Valɨkʉsivombela imbombo isipeliwa nʉ kwɨsaja kʉ syene, vɨɨlekiilwe ʉkʉvomba itso kʉ Mpeli ʉvɨ anogelanie ʉkʉginiwa sikutsooni! Ameni.
26Pwʉ ʉNgʉlʉve aavalekile vavombage imbombo tsa veene imbiivi itsa soni ndʉwʉ vinogwa. Kwʉ kʉta, avadala vɨɨlekiilwe ʉkʉvombela ɨmihana gya veene ndʉwʉ vaapelilwe, apeene vikʉgɨvombela ʉmwʉ nagɨpeleliilwi.#1:26 Vikʉgɨvombela ʉmwʉ nagɨpeleliilwi Ʉvʉganulu ʉvʉnge wa mamenyu aga wiita avadala vitoolana vaveene. 27Vʉvʉle vʉle nava vagoosi naveene, vɨɨlekiilwe ʉkʉvombela ɨmihana gya veene ndʉwʉ vaapelilwe, kwʉ kʉta, ʉnʼgoosi nʉ nʼdala. Apeene valɨkʉnogwanwa vaveene kwa veene. Valɨkʉvomba itsa soni itsa kʉtoolana vaveene. Ʉkʉhʉmana nɨɨlyo, vɨɨhalye vaveene ʉlʉvʉngʉ ʉlwahwaniine ni mbombo tsa veene itso imbiivi.
28Lɨno, ndʉwʉ avaanu avo vaabeelile ʉvʉmanyi wa jɨlweli wa kulongwi tsa Ngʉlʉve, ʉNgʉlʉve namwene aavalekile vakongage amasaago ga veene amaviivi. Pwʉ valɨkʉvomba imbombo itsʉ natsinogiili ʉkʉvombwa. 29Vaadɨgile ʉvʉgalo ʉvʉlɨ pongosu, valɨkʉvomba imbiivi itsilɨ pongosu, ikange vaale nʉ mwojo gwa siinu syoni isiviivi. Avaanu avalɨ ndaavo valɨ nɨ kɨvini, vinogwa imbatsa, ʉvʉnuasi, ʉvʉsongelengʼanie nʉ vʉbudi. Avaanu avo vaheesi, 30ikange vanya madʉsi, vikʉnʼgilila ʉNgʉlʉve, navivɨɨkɨla ʉntɨma itsa vajyavo, ikange vaanu va lwɨjɨmɨko nʉ lwɨginio. Ʉnsɨkɨ gwoni vilonda inzɨla iimya tsa kʉvomba imbiivi. Navikʉvapʉlɨka avahotsi va veene, 31vaanu vatsimu, navivomba ʉkʉkongana nʉ lwɨdɨngʼano lwa veene, vatsila lʉgano pange kɨsa. 32Avaanu avo vatsimanyile vʉnonu indagɨlo tsa Ngʉlʉve ʉkʉta, ʉmuunu angavombe imbombo imbiivi ndiitsi, tsikʉmpelela ʉvʉswe wa sikutsooni. Napeene navivɨɨkɨla ʉntɨma itso! Vatsiige vivomba imbiivi kɨtsila kʉdwada kɨɨnu, ikange vikʉvahovokela avivomba imbombo imbiivi ndiitso.
Currently Selected:
Valooma 1: zga
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
