Valooma 2

ɄNgʉlʉve alavahɨga avaanu vooni kɨtsila kʉtengelela

1Pwʉ lɨno, ʉve vɨ nʼjyango vɨ Nʼyahudi, vɨ wiiva wihɨga avaanu avange, nʉkagele napadebe ʉkwɨtetela pamiiho ga Ngʉlʉve, ndajɨve ʉlɨ veeni. Lola, wʉ vukʉmmɨga ʉnnino, pwʉ ʉlʉmanye ʉkʉta vukɨhɨga jyʉve, manya imbiivi tsa mwene itso tsʉ vuvomba najyʉve. 2Lɨno, tʉlʉmanyile ʉkʉta ʉvʉhɨgi wa Ngʉlʉve wa jɨlweli kʉ vaanu avivomba imbombo imbiivi ndiitso. 3Lɨno, ʉve vɨ nʼjyango, vɨ wihɨga ʉnnino wʉ kʉnʉ najyʉve vuvomba imbiivi itso, ʉleke ʉkʉsaaga ʉkʉta ʉNgʉlʉve alakʉleka kɨtsila kʉkʉhɨga. 4ɄNgʉlʉve innonu manya ikʉkʉkolela ɨkɨsa ɨkɨlʉti, nakʉpiili ʉlʉvʉngʉ na kapamato. Apeene ʉve vuvonia ʉkʉta wibeda itso. Pwʉ kɨki navukʉlʉmanya ʉkʉta, ʉwiipa ʉwivomba kwave ikʉkʉvombela pakʉta ʉlaate imbiivi tsyako? 5Lɨno, ʉlwakʉva ʉlɨ nɨ numbula ɨnya matingo ikange najikwɨdɨka ʉkʉta ʉlɨ ni mbiivi, vukɨvɨɨkɨla ʉlʉvʉngʉ kʉ kɨgono ɨkyʉ ʉNgʉlʉve alavomba ʉvʉhɨgi wa mwene ʉvʉgolosu.

6Ɨkɨgono ɨkyo ʉNgʉlʉve alammomba nʉ jyʉnge ʉkʉkongana ni mbombo tsa mwene.#Zabuli 62:12 7Ʉmwene alavapa ʉwʉʉmi wa sikutsooni valya avikɨjʉmɨɨlɨtsa ʉkʉvomba inonu, manya vilonda ʉlʉginio, ʉwɨɨmɨkiwa nʉ wʉʉmi ʉvʉnavunangɨka. 8Lɨno, avanya mwojo nʉ wʉ navikonga ʉwajɨlweli, ikange vivomba imbiivi, ʉNgʉlʉve alavaviipila nʉ kʉvapa ʉlʉvʉngʉ. 9Avaanu vooni avivomba imbombo imbiivi, lʉlaviitsila ʉlʉgatatso nʉ vʉkʉvɨlwa, ʉkʉtengʉlɨla kʉ Vayahudi ʉkʉsika kʉ vaanu avatava Vayahudi. 10Vooni avivomba inonu, ʉNgʉlʉve alavapa ʉlʉginio, ʉwɨɨmɨkiwa nʉ lʉnotsehetso, ʉkʉtengʉlɨla kʉ Vayahudi ʉkʉsika kʉ vaanu avatava Vayahudi. 11Lola, ʉNgʉlʉve nitengelela ʉmuunu ʉvaveetsaga.

12Avaanu avatava Vayahudi avivomba imbiivi valongometswa, nʉpwʉ jɨngave navatsimanyili indagɨlo tsa Moose.#2:12 Indagɨlo tsa Moose Itsi tsʉ ndagɨlo itsʉ ʉNgʉlʉve aavapye aVaisilahɨli mu lʉkɨnga kʉ nzɨla jya Moose. AVayahudi naveene avatsimanyile indagɨlo itso, vangavombe imbiivi, valahɨgwa ʉkʉkongana ni ndagɨlo itso. 13Valahɨgwa ʉlwakʉva ʉNgʉlʉve nikʉmbalɨla ʉvʉgolosu ʉmuunu pa kulongwi jya kʉpʉlɨka indagɨlo tsa Moose kwene, apeene ikʉmbalɨla ʉvʉgolosu ʉmuunu ʉlwakʉva ivomba galya ʉgwʉ indagɨlo tsitsova. 14Kʉ lʉvasu lwa vaanu avatava Vayahudi, avo navatsimanyili indagɨlo itso. Napeene, vangavombe ʉkʉkongana na masaago ga veene agalɨngʼiine nʉ mwʉ tsitsovela indagɨlo tsa Moose, apo jivonia ʉkʉta mu numbula tsa veene vakʉmanyile ʉkʉvomba itsinogelanie. 15Avaanu avo ʉmwʉ vaveelye, jivonia ʉkʉta ɨkitsigilwa mu ndagɨlo, kɨvɨgilwe mu numbula tsa veene. Kwʉ kʉta amasaago ga veene, ʉnsɨkɨ ʉgʉnge gikʉvahɨga, ikange ʉnsɨkɨ ʉgʉnge gikʉvavonia ʉkʉta vivomba itsinogelanie. 16Wʉ tsilaava pa nsɨkɨ gwa vʉhɨgi, ʉpwʉ ʉNgʉlʉve, kʉ nzɨla jya Mesiya ʉYɨɨsʉ, alahɨga avaanu nakʉ kʉ masaago ga veene ga kʉvʉtiitu. ƗLivangɨli ɨlyʉ ndipʉlɨsa wʉ liita.

Pa kʉkava ʉvʉgolosu aVayahudi valeke ʉkʉhʉʉvɨla indagɨlo tsa Moose pange ʉkʉtahiliwa

17Apo, ʉve vɨ vukɨjɨlanga ʉlɨ Nʼyahudi jɨlweli, vuhʉʉvɨla ʉkʉkava ʉvʉgolosu kʉ nzɨla jya kʉkonga indagɨlo, ikange vukɨginia wiita ʉve ʉlɨ muunu va Ngʉlʉve. 18Kʉ nongwa jya kʉmanyiisiwa indagɨlo, vukɨvona ʉgamanyile galya ʉgwʉ inogwa ʉNgʉlʉve nʉ kʉhala galya aganogelanie. 19Ʉkʉkongana naago, ʉve vukɨvona ʉnogelanie ʉkʉvalongotsa avaanu avatava Vayahudi, ʉngata muunu ʉvilongotsa avabosu, evo ʉngata nyaale ɨjikʉvamulikila avaanu mu ngʼiisi. 20Ikange, vukɨvona ʉlɨ mmanyisi va vaana na vaanu ʉwʉ navavʉmanyili ʉwajɨlweli wa Ngʉlʉve, manya indagɨlo tsyako tsikʉkʉvʉʉla ikulongwi tsa lʉhala lwoni nʉ vʉmanyi wa jɨlweli. 21Ʉve jyʉve vukʉvamanyiisa avange, lɨno navuvomba galya ʉgwʉ witsova! Ʉve vukʉvalʉmbɨlɨla avange, wiita, “Ʉlahɨɨtsaga,” lɨno kɨki ʉve jyʉve ʉlɨ mmɨɨtsi? 22Ʉve vukʉvavʉʉla avaanu wiita, “Ʉlaligupaga,” lɨno kɨki ʉve jyʉve vuligupa? Ikange, vuweesa ndeeti ʉkʉvaviipila avikɨsaja kʉ sihwani sya mingʉlʉve, wʉ ʉve jyʉve vuhɨɨtsa isiinu ʉkʉhʉma mu nyumba tsa kwɨsajɨla kʉ sihwani sya mingʉlʉve? 23Ʉve vɨ vukɨginia wiita ʉtsimanyile indagɨlo tsa Ngʉlʉve, vukʉnkotsa isoni ʉNgʉlʉve wʉ vudeenya indagɨlo tsa mwene. 24Pwʉ lɨno, aga galɨngʼiine nʉ Vʉvɨge ʉVʉvalatse ʉwiita, “Kʉ nongwa jya mbombo imbiivi itsʉ muvomba ʉnyie, ɨlitaawa lya Ngʉlʉve lidʉkwa na vaanu avatava Vayahudi.”#Yesaya 52:5; Ezekieli 36:20, 22

25Kʉ lʉvasu lwa kʉtahiliwa, ʉkwa kʉlɨ nʉ lʉvʉmbʉlɨlo kwave, peene ɨngave vukonga ʉmwʉ tsitsovela indagɨlo. Ʉngadeenye indagɨlo, ʉkʉtahiliwa kwave kwiva kʉvʉla lʉvʉmbʉlɨlo ʉlʉveetsaga, ikange ʉve wiiva ndʉ muunu ʉvɨ natahiliiwi. 26Pwʉ lɨno, ʉmuunu ʉvɨ natahiliiwi angakonge ʉmwʉ tsitsovela indagɨlo, ʉNgʉlʉve jiikʉmwɨdɨkɨla ndʉ muunu ʉvatahiliiwe. 27Ikange ʉmuunu ʉvɨ natahiliiwi, ʉvikonga ʉmwʉ tsitsovela indagɨlo, imbombo tsa mwene jʉtsikʉkʉhɨga ʉkʉta ʉve vɨ Nʼyahudi ʉlɨ ntulanongwa. Jiiva ewo ʉlwakʉva ʉve vɨ Nʼyahudi ʉtahiliiwe, ikange ʉlɨ natso indagɨlo, lɨno vukʉtsideenya indagɨlo itso. 28Lola, nakwʉ kʉta ʉmuunu ʉvaveetsaga ʉvaholilwe Nʼyahudi iiva muunu va Ngʉlʉve, ikange ʉmuunu niiva muunu va Ngʉlʉve ʉkʉhʉmana nʉ kʉtahiliwa mu mmana. 29Baako! Ʉmuunu va Ngʉlʉve vɨ ʉlya ʉvɨ, mu numbula jya mwene, mwɨdɨhɨtsi kwa Ngʉlʉve. Nakwene ʉkʉtahiliwa kwa jɨlweli kwʉ kʉnotsiwa kwa numbula ʉkuvombwa nʉ Mepo ʉMbalatse, najiiva kʉ nzɨla jya kʉkonga indagɨlo. ɄNgʉlʉve jyʉmwene vɨ ikʉnʼginiaga ʉmuunu ndʉʉjwa, najɨkaave vikʉnʼginiaga avaanu veene.#Simiilitso tsa Ndagɨlo 30:6

Currently Selected:

Valooma 2: zga

Highlight

Copy