LOS HECHOS 4
4
Pedro tén han Juan kélnaklo nápakta'awo' kelwese'e
1Apkelwokmek axta apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak aptakmelcheso tegma appagkanamap, tén han ma'a énxet'ák Saduceos, cham'a apkeltennásegkaxa axta makham énxet'ák Pedro tén han Juan. 2Apkellókek axta xa énxet'ák nak, hakte apkelxekmósek axta énxet'ák Pedro tén han Juan ma'a apxátekhágwayam axta Jesús, ektaha magkenatcheso eyámnaksoho apnakxétekhágwayam ma'a apkeletsapma axta. 3Apkelmákpek axta Pedro tén han Juan. Kélxatmeyk axta sẽlpextétamakxa ekwokmoho mók ekhem, hakte taxnakmek axta m'a. 4Apxámok axta eyke énxet apteme melya'áseyam, cham'a énxet'ák ektaha axta apháxenmo apkeltenneykha; Keto' cinco mil axta apwokmók apxámokma énxet'ák ektaha axta melya'áseyam.
5Mók ekhem axta entahak apchaknákxo apkelámha apmonye'e énxet'ák judíos tegma apwányam Jerusalén, axta anhan ma'a apkelámha apmonye'e nak kélakneykekxexa, tén han ma'a énxet'ák ektaha axta apkelxekmóso ektémakxa segánamakxa. 6Apheyk axta nahan énxet apkemha apmonye apkelmaxnéseso Dios énxet'ák apagkok ma'a apwesey axta Anás, Caifás axta anhan aphak ma'a, tén han ma'a Juan, Alejandro axta anhan, axta anhan apháha apyókxoho m'a ektaha axta apteme apnámokkok énxet apkelámha apmonye'e nak apkelmaxnéseso Dios énxet'ák apagkok. 7Apkeltamhok axta kólnaklók Pedro tén han Juan nepyeseksa xa énxet'ák nak. Aptahak axta nahan apkelmaxneyeyncha'a s'e:
—¿Yaksak eñama ekmowána xa, yaksak nahan ekwesey eñama xa kéllana exchek kéxegke xama aksok?
8Aptahak axta Pedro apchátegmowágko yetlo apláneyo apwáxok Espíritu Santo s'e:
—Enxet'ák apkelámha apmonye'e nak nepyeseksa apnámokkok, tén han ma'a apkelámha apmonye'e nak kélakneykekxexa: 9Ẽlmaxneyáha kéxegke m'a ektahakxa nak ektakmela kéltemésesakxa apháxamap, yakwayam enxoho kólya'ásegwomhok ektahakxa kéltakmelcheseyam. 10Nenxénchek negko'o kélnápakta'awo' kéxegke yakwayam enxoho elya'ásegwomhok apyókxoho énxet'ák Israel, aptaha aptakmelwayam eñama Jesucristo apkeñama Nazaret apwesey xa énxet apha nak se'e kélnápakta'awo' kéxegke, cham'a Jesucristo kélyepetchesa axta kéxegke aksok ektegyéso, cham'a apxátekhásekmo axta nahan Dios. 11Cháxa Jesús aptaha nak meteymog kélyamasma axta kéxegke kéltaha nak kéllané tegma, wánxa agkok, meteymog kélmámenyého kólmaha eyke aptamhakxa' kaxwo'.#Sal 118.22. 12Méko pók énxet ekyetna m'a nelwagkásamáxche teyp nak,#Jn 14.6. hakte axta hegmeyásak negko'o Dios pók énxet yakwayam hẽlwagkasek teyp keso náxop.
13Xama axta apkelwet'a ektahakxa axta megyeseykekxa apkeltenneykha Pedro, tén han Juan, apkelya'ásegwokmek axta aptaha énxet meyke apkelmopwancha'a tén han meyke kélxekmóso, pelakkasek axta nahan apkelwet'a xa énxet'ák nak, xénwokmek axta nahan apwáxók aptaha Jesús apkeltámeséyak. 14Apheyk axta anhan nepyeseksa énxet'ák ma'a énxet ektaha axta kéltakmelcheseyam, ékeso eñamakxa megkalepwagko axta exének ektaha megkamámnaksoho m'a ektahakxa axta. 15Kéltamhok axta elántépok neyseksa apchakneykekxa énxet Pedro tén han Juan, keñe axta apkelpakhetcháseykpoho xa énxet'ák nak. 16Aptahak axta apkelpakmeta s'e:
—¿Háxko sat antemésesek xa apkánet énxet nak? Apyókxoho énxet'ák apheykha tegma apwányam Jerusalén apkelya'ásegkohok apkelánegko aksok sempelakkaso agweta' xa énxet'ák nak, magwanchek anxének ektaha ekmowána amya'a. 17Agmések sat nempeywa ekyennakte yakwayam enxoho ólyegwakkasek xa apkánet nak, yakwayam enxoho melenxanmohok apkeltenneykha Jesús apwesey, hakte móltamhok kapayhekxak xa amya'a nak.
18Kéláneyáha axta xa apkánet nak, kéltamhok axta anhan meltennaha amya'a ekxeyenma nak Jesús apwesey. 19Wánxa agkok, aptahak axta apkelátegmowágko Pedro tén han Juan se'e:
—Kólyekpelkoho kélagko' kéxegke: ¿Payhawoya antehek nelyaheykekxoho kéxegke yakwayam eykhe antehek nelyaheykekxoho m'a Dios? 20Magwanchek negko'o ólwátesók nenxeyenma m'a aksok negwetaya nak, tén han ma'a nenlegaya nak.
21Kélmések axta kélpeywa ekyennakte Pedro tén han Juan, wánxa agkok, kélchexeykxék axta eyke. Axta elya'ásegkok yakwánxa etnahagkok ellegásesagkohok, hakte apyókxoho énxet'ák axta apkelpeykásók Dios, axta keñamak ma'a ektahakxa axta. 22Cuarenta teyp apyeyam apagkok axta m'a énxet ekpelakkasa axta ekwetáxko kéltakmelchesakmo.
Enxet'ák apteme melya'áseyam apkeltémo egkések Dios megkalyakhapmo apwáxók tén meyke apkelaye
23Apkelmeyákxeyk axta aphágkaxa apkelxegexma'a Pedro tén han Juan natámen kélchexeykekxa, apkeltennáseyha axta ekyókxoho m'a aptahakxa axta apcháneya énxet appasmo nak apkelmaxnéseso Dios énxet'ák apagkok, tén han ma'a apkelámha apmonye'e nak kélakneykekxexa. 24Apyókxoho axta aptamhágkok nempeywa nelmaxnagko appakhetchesa Dios natámen apkellege xa amya'a nak. Aptahak axta apkelmaxneyagko s'e: “Xép Wese' Dios aptaha axta apkelané néten tén han keso náxop, tén han ma'a wátsam ekwányam, tén han ma'a ekyókxoho aksok ekheykegko nak,#Ex 20.11; Neh 9.6; Sal 146.6. 25apxénchek axta exchep eñama apxeyenma Espíritu Santo, cham'a apkeltenneykencha'a axta m'a apchásenneykha apwesey axta David, aptéma axta apkeltenneykha s'e:
‘¿Yaksak ektaha apyenegkesa nak exma
apyókxoho énxet'ák?
¿Yaksak ektaha apkelánegko nak
yakwánxa etnahagkok ektaha nak mékoho?
26Apyókxoho kelwese'e apkelwányam nak
keso náxop aptamhákxak apkenmexeykha
Wese' egegkok, tén han ma'a kelwese'e
apkeláneykha nak apkelókxa.
Apyókxoho nahan apkeláneykxak aptamhágkaxa
yakwayam etaknók Dios Wese' egegkok,
tén han yakwayam etaknók ma'a ektaha axta apkelyéseykha,
cham'a aptaha nak Mesías.’#Sal 2.1-2.
27“Nakso', apchaknákxeyk axta Herodes#Lc 23.17-11. tén han Poncio Pilato#Mt 27.1-2; Mr 15.1; Lc 23.1; Jn 18.28-29. xamo' ma'a énxet'ák metnaha nak judíos, tén han ma'a énxet'ák Israel, amya'a axta apkelaneykxak yakwánxa kóltemésesek Jesús aptaha nak Xép apkelyéseykha#Is 52.13; Flp 2.7. yakwayam etnehek Mesías. 28Cháxa ektahakxa axta apsawhawo apkelánegko énxet'ák ma'a ektémakxa axta exchep apkeláneykekxa yakweykenxa katnehek. 29Xép Wese' egegkok, elano aptamhágkaxa énxet'ák apmoko nak hẽlyegwakkasek negko'o, hegmés negko'o meyke negaye yakwayam anlegaksek xép appeywa nentaha nak xép apchásenneykha, 30yána' óltakmelchesók énxet'ák apkelháxamap eñama m'a xép apmopwána nak, tén han anlának ma'a aksok magkenatcheso nak agweta', tén han ma'a aksok sempelakkaso nak agweta' eñama apwesey m'a Jesús, aptaha nak xép apchásenneykha appagkanamap.”
31Xama axta appenchásegko aptamheyak nempeywa nelmaxnagko, pexyenegkek axta xóp ma'a apchaknákxexa axta; apkellánegkók axta apwáxók Espíritu Santo xa énxet'ák nak, apkellegásek axta Dios appeywa meyke apchéseykekxa.
Apyókxoho axta apagkok ekyókxoho aksok
32Hawók axta mók elchetamso apwáxók énxet'ák apteme axta melya'áseyam, apxámok axta anhan ma'a. Axta nahan exeyenmak ektaha apxakko' apagkok ma'a ekyókxoho aksok apagkok nak, wánxa agkok, exénhok axta cha'a ektaha apagkok ma'a apyókxoho nak.#Hch 2.44-45. 33Apkelenxaneykmók axta apkelwaskápeykekxoho énxet'ák seykha amya'a apkeltenneykha ektaha ekmámnaksoho m'a apxátekhágwayam axta Jesús, awanhek axta nahan appasmo Dios xa apyókxoho nak. 34Méko axta nepyeseksa énxet ekha nak eyéméxchexa aksok, hakte, énxet ekhakxa enxoho xóp apagkok esenhan ma'a apxagkok, ekxeykxak axta cha'a, keñe m'a selyakye nak, 35kólmések axta cha'a m'a énxet'ák seykha amya'a nak, yakwayam enxoho emlaskok ma'a énxet'ák ekyetnakxa enxoho eyéméxchexa aksok apagkok. 36Ekhawo ektahakxa axta m'a xama énxet apkeñama axta nepyeseksa Leví énxet'ák apagkok apwesey axta José, aptaha axta apkeñamakxa apagko' ma'a egkexe étkok ekwesey nak Chipre, cham'a énxet aptemesáseykxo axta énxet'ák seykha amya'a apwesey Bernabé (nentéma nak nempeywa: “Kélketche sempeykesáseykekxa egwáxok”). 37Yetneyk axta xóp apagkok xa énxet nak, apyenyókek axta eyke ekha ekyanmaga, apmések axta anhan selyakye m'a énxet'ák seykha amya'a, yakwayam enxoho etakmelcheshok apmeykha.
Currently Selected:
LOS HECHOS 4: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
