SAN MATEO 24

Jesús apxeyenma yakwayam kóltegkesek tegma appagkanamap

(Mr 13.1-2; Lc 21.5-6)

1Aptekkek axta Jesús kañe' tegma appagkanamap, peyk axta eykhe exog, keñe axta apya'awekto apkeltámeséyak apxekmósa m'a ektémakxa axta apkelánamap tegma appagkanamap. 2Aptahak axta apkeláneya Jesús se'e:

—Kélwet'ak kéxegke ekyókxoho xa. Kasawhaxkohok sat kaxpaknek meteymog, megkathánekxék sat mók, ekyókxoho sat kalmassegwók. Nakso' xa sektahakxa nak seláneya kéxegke.

Magkenatcheso yakwánxa katnehek néxa ekhem

(Mr 13.3-23; Lc 21.7-24; 17.22-24)

3Apkelmeyákxeyk axta egkexe Olivos natámen xa. Aphakmek axta Jesús ma'a, apya'aweykxeyk axta apkeltámeséyak yakwayam elmaxneyha apxakko' ma'a. Aptahak axta s'e:

—Egmenyék negko'o hẽltennaksek ekhem yakwánxa katnehek ma'a apxéna exchek. ¿Háxko sat katnehek magkenatcheso apkexyekmo sat makham xép, tén han ma'a ektemégwokmo sat néxa ekhem?

4Aptahak axta apchátegmowágko Jesús se'e:

—Kólleyxmakha sat, nágkólho aksa kólyexanchesha. 5Hakte elwak sat énxet apxámokma sexneyásamákpoho ko'o. Sat etnehek apkelpeywa s'e: ‘Ko'o Mesías’, apxámok sat nahan etnehek énxet apkelyexancháseykha. 6Kóllegak sat kéxegke amya'a ektepa kempakhakma s'e, tén han ma'a mók apkelókxa nak; nágkólyegwé aksa, hakte cháxa yakwánxa nak katnehek xa, háwe eyke yakwánxa makham katnehek néxa ekhem ma'a. 7Elnapakpok sat énxet xama yókxexma, yenmexek sat ma'a apheykha nak mók apkelókxa, kampakhaxchek sat nahan mók apkelókxa; katyapok sat meyk segakhe, kayawheykha sat nahan xóp mók xama apkelókxa. 8Wánxa agkok, cháxa eyesextexa sekxo' kéllegeykegkoho ekmáske xa.

9“Keñe sat kólmaxchek kéxegke yakwayam kólnaktawasagkoho'; kóltekyók sat nahan, apyókxoho énxet sat nahan etaknók kéxegke ko'o eñamakxa.#Mt 10.22. 10Apxámok sat énxet apkelyenseyam apteme melya'áseyam ma'a ekhem sat, etaknaweykxak sat cha'a pók apagko' énxet, etlakkasesek sat nahan cha'a yának emakpok pók. 11Elántépok sat Dios appeywa apkellegaso apkelmopwána amya'a nak, apxámok sat nahan etnehek énxet apkelyexancháseykha. 12Kapayhekxak sat ekmaso nentémakxa, kamaskok sat apkelásekhamap énxet. 13Wánxa agkok ewagkasakpok sat eyke teyp ma'a énxet apteme nak apyennaktésamo mehey'áseyam ko'o ekwokmoho néxa.#Mt 10.22. 14Ekyókxoho yókxexma sat kóllegaksek xa amya'a ektakmela ekxeyenma nak ma'a aptémakxa nak Wese' apwányam Dios, yakwayam enxoho elya'ásegwók apyókxoho pók aptémakxa énxet; keñe sat kammok néxa ekhem.

15“Aptáxésegkek axta Daniel aptaha axta Dios appeywa aplegaso m'a aksok ekmaso agko' ektawáseykencha'a axta tegma appagkanamap.#Dn 9.27; 11.31; 12.11. Kélwet'ak sat agkok kéxegke ekyetna aksok ekmaso m'a kañe' tegma appagkanamap ekpagkanamaxchexa nak —kéxegke ektahakxa enxoho kélyetseté s'e, kólya'asagkoho ektémakxa—, 16kólmohok sat kólenyahagkok néten xóp elekháhéyak elyawe kéxegke kéltaha nak kélheykha Judea; 17keñe m'a énxet apheykha nak néten apxanák, nágkólántep aksa yakwayam kóllekwakxak aksok kélagkok kañe'; 18keñe énxet'ák apkeltamheykha nak yókxexma, tásek melmeyekxek apxanák yakwayam elwakxak apkelnakta.#Lc 17.31. 19¡Ayósekak sat kelán'ák lós'awók ma'a ekhem sat, tén han ma'a kelán'ák keyetsék étchek nak! 20Kólmaxna kéxegke Dios yakwayam enxoho megkólenyahagkok ma'a apkepsamágexal'a tén han ma'a ekhem sábado, 21hakte katyapok sat nenlegeykegkoho ekyawe agko', megkatnama axta eyeynamókxa elánamáxche keso náxop,#Dn 12.1; Ap 7.14. megkatnekxék sat nahan cha'a. 22Apwenakteyások agkok Dios xa ekhem nak, méko kawagkasaxchek teyp; eyakwataksohok sat eyke eñama apkelásekhayo m'a ektaha nak apkelyéseykha.

23“Temék agkok amya'a kéláneyáxko kéxegke s'e: ‘Kóllano, keso Mesías se'e’, esenhan katnehek amya'a s'e: ‘Kóllano, cháxa apha xa’, nágkóleyxho aksa. 24Hakte elwak sat énxet'ák apkeltemesásamap nak Mesías, tén han ma'a Dios appeywa apkellegaso apkelmopwána amya'a nak; elának sat nahan aksok magkenatcheso agko' nak agweta', tén han ma'a sempelakkaso nak agweta', yakwayam enxoho elyexanchesha énxet'ák, kawomhok sat nahan apkelyexancháseykha m'a ektaha nak Dios apkelyéseykha, apkepwagko enxoho. 25Ekpenchásók seltennasa kéxegke seyésa xa, amonye ekteme. 26Temék agkok amya'a kéláneyáxko kéxegke s'e: ‘Kóllano, apheyk Mesías á yókxexma meykexa énxet’, nágkólmohok aksa; temék agkok nahan amya'a kéláneyáxko s'e: ‘Kóllano, keso apyexanma Mesías se'e’, nágkóleyxho aksa. 27Máxa takha' apkelyenma sat katnehek katyapok elyenma m'a ekteyapmakxa ekhem ekweykekxoho m'a taxnegwánxa ekhem, sat katnehek apkexyekmo sat aptaha nak Apketche énxet xa.#Lc 17.23,24. 28Sat yaknekxak máma m'a ekyetnakxa enxoho kélhápak.#Lc 17.37.

Ektaha nak Apketche énxet apkexyeyam

(Mr 13.24-37; Lc 21.25-33; 17.26-30,34-36)

29“Yeyk'ak sat agkok xa nenlegeykegkoho nak, kapeysemekxak sat ekhem,#Is 13.10; Jl 2.10,31; 3.15; Ap 6.12. kamaskok sat nahan apkelsasáxma m'a pelten,#Is 13.10; Ez 32.7; Jl 2.10; 3.15. epallentak sat yaw'a apkeleñama néten,#Is 34.4; Ap 6.13. kalyawheykha sat ekyókxoho aksok ekhéyak nak néten.#Jl 2.10. 30Keñe sat kataxchek néten aksok magkenatcheso apkexyeyam ma'a aptaha nak Apketche énxet, elyegweyk sat apyókxoho énxet apheykha nak keso náxop, ellekxagwaha sat nahan, étak sat nahan exyók néten#Dn 7.13; Ap 1.7. neyseksa yaphopé m'a aptaha nak Apketche énxet, yetlo ekyawe apmopwána tén han apcheymákpoho. 31Eláphaksek sat apkelásenneykha yetlo ekyennakte apkelpáwaso apkelakkahaso yakwayam enxoho yánchásekxak ma'a ektaha nak apkelyéseykha apkeleñama ekyókxoho yókxexma: nexcheyha, nepyeyam, ekteyapmakxa ekhem, tén han ma'a ektaxnegwánxa ekhem, esawhekxohok sat keso náxop.

32“Kólya'asagkoho kéxegke ektémakxa nak senxekmóso yámet ekwesey nak higo: Keltásek agkok naw'ék aktegák yámet ekwesey nak higo, keñe katyapok áwa', keñe kólya'asagkohok kéxegke eyágketwokmo m'a ekméxanmakxal'a. 33Ekhawo nahan ektémakxa xa, kélwet'ak agkok ektaha ekyókxoho xa, kólya'ásegwomho sat eyágketwokmo apweyktamxa m'a aptaha nak Apketche énxet. 34Katnehek sat xa amonye apkeletsapma énxet'ák apheyncha'a se'e kaxwo' nak. Nakso' xa sektahakxa nak seláneya kéxegke. 35Kamaskok sat néten, kamaskok sat nahan keso náxop, wánxa agkok megkamassegwomek eyke ko'o sekpeywa.

36“Méko ekya'ásegkoho ekwánxa ekhem tén han ekwánxa hora, melya'ásegkok nahan ma'a Dios apkelásenneykha apheykencha'a nak néten, mey'ásegkok nahan ma'a Dios Apketche. Wánxa apya'ásegkoho m'a Apyap.

37“Sat katnehek nahan apkexyekmo sat ektaha nak Apketche énxet ma'a, ektémakxa axta aphamakxa Noé.#Gn 6.5-8. 38Apyeneykegkek axta apyenéyak énxet, apteykegkek axta anhan aptéyak, kelyamhápeykegkek axta nahan, cham'a amonye ekwé axta mámeye ekyawe agko', ekwokmoho m'a ekhem aptaxna axta Noé kañe' yántakpayhe. 39Wa'ak axta mámeye ekwányam agko' neyseksa melhaxanma, sawhawók axta elnapa yegmen xa énxet'ák nak.#Gn 7.6-24. Sat nahan katnehek apkexyekmo sat aptaha nak Apketche énxet. 40Apkánet énxet sat exmakha yókxexma ektaha sat xa: xama sat emakpok, keñe sat etakmopagkok ma'a pók. 41Anet kelán'a sat katekxók aksok ektekxekxo: xama sat kamaxchek, keñe sat katakmopagkok ma'a mók.

42“Kólleyxmakha kéxegke, hakte megkólya'ásegkok ekwánxa ekhem yakwánxa ewatak Wese' kélagkok. 43Kólya'asagkoho nahan se'e: apleg'ak agkok ekwánxa hora axta'a yakwánxa etaxnegwók apxagkok apmenyexma m'a énxet ekha nak apxagkok, eleyxmakha aksa, megyohok nahan etaxnegwók énxet ma'a apxagkok yakwayam enxoho emenyexwók. 44Kóllánekxak nahan kéxegkáxa kéltahakxa; hakte ewatak sat ektaha nak Apketche énxet neyseksa megkólhaxanma.#Lc 12.39-40.

Kélásenneykha meyenseyam aptamheykha tén han ma'a kélásenneykha apyenseyam nak aptamheykha

(Lc 12.41-48)

45“¿Yaksak m'a kélásenneykha meyenseyam nak aptamheykha, tén han ma'a ekha nak apya'áseykegkoho aksok, cham'a apchásenneykekxohol'a wese' apagkok etakmelchesesek ma'a apkeláneykha apheykha nak apxagkok, yakwayam enxoho elmésagkok aptéyak ekwokmo enxoho apteykegkaxa aptéyak? 46Apkeleñémo agko' énxet kélásenneykha apwetágweykxo enxoho wese' apagkok apkelana m'a apkeltamhókxa axta elána'. 47Eltennásek ko'o kéxegke peya esawhohok elmések aksok apagkok wese' yakwayam eltakmelchesesek xa kélásenneykha nak. 48Wánxa agkok, ekmaso aptémakxa agkok se'e kélásenneykha nak, xénchek agkok apwáxok peya mewakxék heykxa wese' apagkok, 49keñe enaktawasagkohok ma'a apkelxegexma'a aptamheykha, epaxkaha nahan anmenát'ák, etwohok nahan xamo' aptéyak tén han énhok xamo' apyenéyak, 50keñe ewatak aksa wese' apagkok neyseksa melhaxnakxoho, mey'asagkehek nahan ekwánxa hora, 51eñásesagkohok nahan, exnéshok ekwánxal'a kéllegasáseykegkoho m'a énxet'ák apkelmeyókásamákpoho apagko' nak apkeltémakxa. Keñe, elekxagwaha, eltakxek nahan apma'ák eñama aplegeykegkoho ekmáske.

Currently Selected:

SAN MATEO 24: LEGN

Highlight

Copy