lu-kaa 4

myenq Eei huvb seij ye-su

(peiq mavg matq-Taai 4:1-11; maa-Ko 1:12-13)

1ye-su mivb Jx-Dcn Daaib Rwrnj, sivj livb yem pwavq ninb Eei Hruq. sivj livb yaag txb ninb mivb yem teib puvb Waav, 2feij zyepg Nxi, zu'g myenq Eei huvb seij. naaiq teij Nxi ka'Euad, ye-su maiq Eang haiq Euvg. naaiq teij Nxib Eia'g Jiaj liud, ninb Hruq sia a'q.

3myenq Eei huvb zyrug kxvq Buaj ninb, “sij kxvq meib zruj Tinb huvb Eei txn nx, heug naaiq nxm la'pyeiq penj Fuaq taaib maa'b!”

4ye-su tau, “kivb sru fiaq Jyenq kxvq,

‘myenb maiq zeid Kuvj Kauj Eang hopq yuvd mcvg Navq.’+”#4:4 maaib teij lob Nxi sru Tipq waag kxvq “yaag xij zu'g Kauj zyruq kxvq Eei Jrub Jruj waag”.#Ramg leib latg 8:3

5myenq Eei huvb cvj txb ninb faauj nxm txvj Lav Eei, zyrug zx'q paamb ken Eei maang kua'q hing Zwrtq Fapg tavb pun ninb mavg, 6yaag kxvq, “naaiq yetg zuvq Eei livg Zauj naaiq teij nxmb nxm kua'q Eei zinb zxib yia Jiu pun meib, weig zu'g naaiq teij yetg zuvq se Jiu pun yia mig a'q. yia xij pun haiq taub se sweib yia pun a'q. 7sij kxvq meib paaij yia, naaiq teij yetg zuvq zyrug penj meib Eei Revg.”

8ye-su cvj tau ninb, “kivb sru fiaq Jyenq kxvq,

‘xij zu'g paaij zyruq, meib Eei Tinb huvb,

Kuvj xij zu'g zavg ninb Du'g taub Navq.’+”#Ramg leib latg 6:13

9myenq Eei huvb cvj txb ye-su mivb ye-lu-saa-lem zivb, zavg Tinb huvb Eei pyauq uaq, pun ninb yem Lav Jiaj uaq nxm txvj, kxvq Buaj ninb, “sij kxvq meib penj Tinb huvb Eei txn nx, yem naaiq piu Fiag kaaj. 10weig zu'g kivb sru fiaq Jyenq kxvq,

‘Tinb huvb xij Paaiq ninb Eei finb myenb

peu Jyenq, kruj Jyenq meib,’#sivj Ruv 91:11-12

yaag kxvq,

11‘ninb Bua zyrug lovg puad prub Jyenq meib,

maiq pun meib Eei zauj zov zu'g la'pyeiq.’+”

12ye-su tau, “kivb sru kxvq,

‘maiq tuvq seij zyruq,

meib Eei Tinb huvb.’+”#Ramg leib latg 6:16

13myenq Eei huvb lovg Euvb Euvg za'eij seij liud, zyrug mivb mig a'q, zuaq Jyenq lxd Qavj taaib seij.

ye-su yem kaa-li-li scvq Jiad kxn zunb tod

(peiq mavg matq-Taai 4:12-17; maa-Ko 1:14-15)

14ye-su cvj Rwrnj kaa-li-li scvq, maaib sivj livb Eei Qa'q Zauj ninb yem. ninb Eei Jaub lrug siv pwavq uaq nxm teib puv. 15ninb yem ninb Bua Eei nxmb nxm wig txvb Faauj myenb. zwavj myenb yaag Zev ninb.

naa-saa-letq myenb maiq lovg ye-su yem

(peiq mavg matq-Taai 13:53-58; maa-Ko 6:1-6)

16ye-su cvj Rwrnj naa-saa-letq, tovb ninb yem uaq Lo taaib uaq nxm muvq. Tauj tivb kov Nxi ninb Navq yetg kau nx, mivb wig txvb. ninb zyrug sruq Jiad taaib to'g kivb sru. 17maaib taub zx'q Fung uaq taub trug waag myenb, i-saa-yaa, Eei sru Zunq pun ye-su. ninb zyrug Kxi taaib lxd pwatg fiaq Jyenq naaiq teij waag,

18“zyruq Eei sivj livb Zauj yia yem,

weig zu'g ninb kinq yia taaib zunb Kuq fyenj

Buaj myenb Jomg myenb.

ninb Paaiq yia taaib zunb Buaj zu'g wrnj Eei myenb

ninb Bua xij tu'q puvj Zwrtq,

yaag zunb Buaj mziv mcvb Eei myenb,

ninb Bua haib mavg tu'q pwatg,

yaag pun zu'g myenb zruj to'g hxig uaq teij tu'q puvj Gxi,#i-saa-yaa 61:1-2

19cvj zunb kxvq zyruq Zeij en Eei Havj Tauj a'q.”

20ye-su to'g liud zyrug Fung Jyenq sru Jiu pun kruj wig txvb Eei myenb syru zyrug zweid Fiag. yetg zwavj wig txvb Eei myenb nib nuvj nu'q Eei mavg Jyenq ye-su. 21ninb zyrug kxvq mevb Buaj ninb Bua, “meib Bua haid liud naaiq trug kivb sru Eei waag, ib Nxi Zwrtq taaib txib tiug Revg.”

22zwavj myenb haid hxpg Hruq haig ninb, yaag Bua'g hxvb ninb Eei waag Dovg naaig Kub mwavj. ninb Bua naaig kaaj, “naaiq yo-sepq Eei txn maiq zeid?”

23ye-su kxvq Buaj ninb Bua, “yia hiuq tu'q meib Bua Dovg haaij xij kxvq naaiq tiub waab peiq pun yia, ‘Diab sai aa'b! xij zu'g zxg meib kanb maa'b!’ yaag xij Buaj yia, ‘yia Bua haid meib yem Kaa-pe-naa-um muvq zruj Eei sig. ib zang meib yem naaiq meib Eei pwrnb muvq zruj kaaj maa'b!’+”

24ye-su cvj Buaj ninb Bua, “trug waag myenb yem kanb Eei pwrnb muvq maiq maaib haiq taub a'Neiq zipq.#yo-han 4:44 25yia Buaj meib Bua, yem e-li-yaa Eei luvb Diaq luvb haand pua Havb pyenj. pwavb zu'g tomb Waav tomb vxg uaq zang,#1 huvb trub 17:1 i-saa-laa-en teib puv maaib aub kwaaq Zamq Eei. 26Tinb huvb yaag maiq Paaiq e-li-yaa mivb lxd yem i-saa-laa-en teib puv Eei haiq taub. Kuvj Paaiq ninb mivb lxd yem sai-Dxn teig, saaj-le-fatq muvq uaq taub Navq.#1 huvb trub 17:8-16 27trug waag myenb, e-li-saa, Eei luvb Diaq maaib putq komb huq pcvg Eei myenb Zamq Eei. mq paag maiq maaib haiq taub nxig tu'q ninb kanb Eei pcvg lovj. Kuvj maaib uaq taub si-lia myenb, naa-aa-maan, Du'g taub tu'q pcvg lovj Navq.”#2 huvb trub 5:1-14

28yem wig txvb Eei zwavj myenb haid ye-su Navq naaiq nx kxvq, ninb Bua Qiaj Jiad! haig, 29zyrug Jiad sin Revg taaib, Tx ye-su Zwrtq zi'g muvq. uaq nxm muvq yem Bov kub vwaaig, ninb Bua zyrug Tx Jyenq mivb Tauj Kamb Baav taaub, xij fovq ninb Dxtq. 30mq paag ye-su yavb zwavj myenb Bu'Dovj, mivb mig a'q.

ye-su zung Yiab kwaiq myenq Zwrtq

(peiq mavg maa-Ko 1:21-28)

31ye-su Fiag Tauj kaa-li-li scvq, Kaa-pe-naa-um muvq. tivb kov Nxi ninb yem uaq Faauj myenb. 32zwavj myenb Bua'g hxvb ninb Faauj Eei waag, weig zu'g ninb Eei waag maaib hatg maad.#matq-Taai 7:28-29

33yem uaq wig txvb maaib laanb myenb maaib Yiab kwaiq myenq yem ninb Eei sin. ninb naub naug Eei kxvq, 34“naa-saa-letq muvq Eei ye-su aa'b! meib maaib haiq Euvg kwen zu'g yia Bua? meib taaib naaiq xij myetg yia Bua? meib haiq taub yia hiuq Eei. meib se Tinb huvb Eei Zivb Revg myenb uaq taub.”

35ye-su hatg uaq taub myenq, “maiq tuvq Ko lo. Zwrtq naaiq taub myenb Eei sin taaib maa'b!” myenq zyrug mua'q uaq taub myenb Kiv Gwekg Fiag zwavj myenb Eei Ra'Myen, zyav naaig Zwrtq mig a'q, yaag maiq zruj haiq Euvg hxig uaq laanb myenb.

36zwavj myenb Bua'g hxvb haig. laanb Buaj laanb, “naaig haiq Euvg waag ni? ninb maaib livg maaib hatg maad hatg Yiab kwaiq myenq Zwrtq, myenq zyrug Zwrtq mig a'q.” 37ye-su zruj Eei Jaub lrug zyrug siv pwavq uaq nxm teib puv.

ye-su zxg myenb Zamq Eei pcvg

(peiq mavg matq-Taai 8:14-17; maa-Ko 1:29-34)

38ye-su Zwrtq wig txvb cvj mivb si-mon Eei pyauq. si-mon Eei maab tiaq putq pcvg, sin Lu'q Jxm Eei. ninb Bua zyrug Toq ye-su Tevj. 39ye-su zyrug mivb sruq Jyenq ninb Eei ka'Len hatg sin Jxm pcvg Twij. pcvg zyrug Twij mig a'q. pi-te Eei maab tiaq lyemb zeib Jiad sin taaib fub suj ye-su Bua.

40Ba'Nxi mwrtq Eei zyavb hog, haiq taub maaib kxb yrud putq haiq Euvg pcvg zyrug txb taaib lxd ye-su. ye-su maan Jyenq taub taub, zxg yetg zuvq Eei pcvg lovj Revg. 41myenq yem myenb Zamq Eei sin Zwrtq nib nuvj naug Eei heug Jyenq kxvq, “meib se Tinb huvb Eei txn.” mq paag ye-su hatg myenq, maiq pun ninb Bua kxvq waag, weig zu'g ninb Bua hiuq tu'q ninb se ki-tug.#4:41 fai me-si-yaa.

ye-su yem wig txvb zunb tod

(peiq mavg maa-Ko 1:35-39)

42luvb Fav ye-su Zwrtq zi'g muvq mivb levb Eei txvj. zwavj myenb Zwrtq mivb lxd. lxd pwatg, ninb Bua xij lyrub ninb yem uaq, maiq pun ninb leib Gxi ninb Bua.

43ye-su Buaj ninb Bua, “Tinb huvb Paaiq yia, yia zyrug xij zu'g mivb uaq teij kanb nxm muvq zunb Tinb huvb zruj zyruq kunq myenb Eei Kuq fyenj. Tinb huvb Paaiq yia taaib se weig Navq naaiq nx zruj.” 44ye-su zyrug mivb kxmj yu-Dia teig#4:44 naaiq nxm txvj piuj mevb yiu-Tai myenb yem Eei txvj. maaib teij lob Nxi sru kxvq kaa-li-li teig. Eei wig txvb zunb tod.

Currently Selected:

lu-kaa 4: IuMiNOR

Highlight

Copy