Лукара йибкьыд Шадды Хабар 21

Гъарсынид кьадар

1ГьӀасас, гакъыйне, ад-ахъыдбыр гьадубгура, гъарсыд садакьабыр силхъере ад. 2Гьарубгура Гьанийс хиндадый ки, гъывырсыр кьӀваб шийи сивилхьере ад, 3хьели рухьура Гьание:

4– Инаамиш диш, гьеми хиндадыйере сиенебишихъаъ бала выри гъарсыр ад. Мадды сиенебише лилхьере ай артухды, гьание, хьуйне, гьаасад касибере, ридж ешемиш риъидухъунды сиене гъарсыр а.

Диндыы гъигъе диш!

5Аа-уу гидбыр Йинчид Халыклаа далгара каӀчӀуйне, шудаъ бытӀрад духлаклаа гьыъыр ади гьа, шудаъ багьад карбыр гьадис гъарсыр ади садакьадисне, ГьӀасара рухьура:

6– ВаӀс гьааса бытӀраана гьабгуд сиене лука гьаъаси, Йыкьаси йыгъ, миди духул духлаа гъаджабгасды.

«Выхьды кьулуула са чӀар ки сипӀесдиш!»

7– МагьӀалим, мыс йикиси гьааса? – хулкара ГьӀасадаа. – Ес гьидыыла гьацӀаси, гьа кар бейде йиъид? Шыв лышан йикиси?

8– Гадакъ, ваӀ адарца даъас мылвыцӀ, – рухьура ГьӀасара.

– Баладбыр дыкьаси изды дур хакьыр.

Гьухьуси: «Гьа ми зы йиъиӀ», «Вахт ливкьыр а»

МадугъӀ гьабишихда хъуна!

9ДагьӀви, къал ад хабар вишийне,

ГичӀ мырвыхӀ.

Суьхьде гьааса йишир йигара,

амма аахир гьааса кӀыбди выкьасдиш.

10Хьели ГьӀасара рухьура гьабишде:

– Халкь мадды халкьдыы вуруъуси,

пагьӀчаалыгъ мадды пагьӀчаалыгъахьван киджибхъаси,

11эккед лыкьынбыр ситӀеси,

гаӀш либхьуси, гьвабаъад эзер идхьуси.

ХӀалмаа мыкьлад гьӀаламатбыр гьагваси.

12Амма гьаасад гвалахбыр руъумаа ваӀ илсанаше

хадылкьара дикиси, дустах даъара, джыбра ана,

синагогама диван ваъара, дустахма эдеси,

ваӀ пагьӀчаагьашды на кӀайсарашды бегеде

дыгыргаси

Зы себеб вишир.

13Гьа ваӀс Изды шигьидерне луьздесды вахт виъи.

14Гъигъене йикӀыы хакьаъ:

Шууна гьамма выхьды кьул эгъепӀесди улихьде мадана фикир мываъ.

15За ваӀс гьассад миз не гьакьал выси, – гьалдаана выхьды

уликлаа лаъ луьздес йикисдиш,

выхьды хьураа лаъ лузас са душманадаа ки йикисдиш.

16Дидабаше не шубаӀше ки кине ваӀ йыдылхӀаре дикиси,

бейдедбише ки, хыдиймаше ки.

ВаӀклаа са-садбыр йыдхӀыси.

17Сиенебишис ваӀ Изды бадаана негь дикиси.

18Амма выхьды кьулуула са чӀар ки сипӀесдиш.

19Гьигъе диш – ваӀ выхьды кьул кьӀаряа эгъепӀеси.

Иерусалим шувна валхурди

20Иерусалимдид аа-уу гид эскерер гьадгуйне,

гьацӀара йиш: шегьер вай-виран ваъасды вахт бегеде виъи.

21Гьа гедеэне Иудеяди адбыр банымыы дахыхь;

Иерусалимди адбыр кӀыбди араа гъаъ аӀгъӀачӀухь,

Иерусалимдид аа-уу гидбыр аъ шегьерди ахъӀмадугъӀуй.

22Гьис хьуйне, джываб ягъӀад вахт йибкьыр а,

Диндид дахьвдарак кидбыр сиене кьулуу йыкьасды вахт йибкьыр а.

23Гьа гедеэне ухьне кидбишыы на тӀитӀ кывылцӀадбишыы йыгъбыр йыкьаси!

Эккед къам на зулумбыр йыкьаси ми накьудыы,

Йинчид завх сибхьуси ми халкьдыы:

24са-садбыр туруд кӀеъэлыы дыкьыркьаси,

маддыбыр, лыкӀра кал, мадды уьлкема дыгыргаси.

Кафиреше луьвшуси Иерусалим,

таа ки джухьды вахт ладжваалтӀамаа.

Илсанашды Дух йыркьын

25Виргъиы на вазырыы на хӀадиймыы мыкьлад лышанбыр йикиси

накьудыы гъад илсанашды йикӀбыр тӀулкьара йикиси

дейрагьаа гъад лепебыр гьагуйне, дейрагьад сесед ун йишийне.

26Илсан ил киидхьур сатӀаси гичӀ йывхӀыр

дуьнйадыы руъура ад гвалахбыр гьагуйне.

Гьис хьуйне, хӀал кьалкьаси.

27Гьа гедеэне гьагуси:

Илсанашды Дух йиъина а гыблиыла хьуъ,

кьуувет не кьухьды ашгарвалды хана.

28Гьа гвалахбыр руъура каӀчӀуйне,

Кьул лаъ кеэпӀе, йыкьӀ дуьз гьаъ

Азадвалды бейде виъи!

Инжиред хук

29ГьӀасара гьабишис мисед ихтилат гьаъара:

Гадакъ инжиред не мадды хукумыхда.

30Гьаммыра кьурукь гьаъад вахтинди гадкъыйне

ваӀс гъӀылд бегеде йиъид гьацӀара руъура.

31Миди ки гьааса:

Гьа гвалахбыр руъура каӀчӀуйне,

гьацӀ, Аллагьад ПагьӀчаалыгъ бегеде виъи.

32Рухьура ваӀде, мибыйды арха угъӀувчӀусмаа

ми чӀел игъибкьаси.

33ХӀал не чӀир хьаӀл саджабтыр тарг йикиси,

Амма Изды чӀел игъджибкьыр абгасдиш.

34Иди гадакъ, дуьгъуьргъере, дирхьара, рагъара, кенчи гвалахмыра выхьды йикӀбыр юкьӀа маъ. Вахт ливкьыйне, ваӀ гьӀазырана адгын бадаана. 35ЧӀаӀнкӀ кал йикиси гьа йыгъ сиене дуьнйадыы гъад духъундыбишис. 36Некьиде хиджидхьур, мыс-га куб ваъ, дугьӀабыр гьаъ ваӀс гьа амзырмаа хьуъ аӀгъӀачӀус ягьӀ гъийкьын бадаана, Илсанашды духарды улихьде луьздес йишин бадаана.

37Йыгъадыхъаъ ГьӀасара Илагьиед хала хӀаар даъарай, нахӀ руъуд гедеэне йыхьыр, выш Елеон хьур дур гъад банаа лиерей. 38Сиене халкь йаӀкв кьатӀ йишир мадана Илагьиед хала вуруъурай, Гьанийхда хъавацус хьур.

Currently Selected:

Лукара йибкьыд Шадды Хабар 21: RUT

Highlight

Copy