Yohane 1

Wami munyu

1Sisi je ɔ mi ɔ Munyu ɔ ngɛ, nɛ munyu ɔ kɛ Mawu lɛ ngɛ, nɛ Munyu ɔ Mawu ʼi. 2Lɛ nɔuu sisije ɔ e kɛ Mawu ngɛ. 3Lɛ e nɔ a gu kɛ pee nihi kulaa, nɛ a si we lɛ se kɛ pee nɔ́ ko nɔ́ ko. 4E mi wami ngɛ, nɛ wami ɔ ji nimli a la a nɛ; 5nɛ la a ngɛ tsoe ngɛ diblii ɔ mi, nɛ diblii ɔ nyɛ we nya nɛ e da.

6Nyumu ko ngɛ nɛ Mawu tsɔ lɛ kɛ ba, a tsɛɛ lɛ Yohane. 7Lɛɛ odase yemi he nɛ e ba, nɛ e ba ye la a he odase, kone nihi kulaa nɛ gu e nɔ nɛ a he ye. 8Pi lɛ ji la a; se mohu la a he odase yemi he nɛ e ba. 9La nitse nɛ tsoo haa nɔ tsuaa nɔ ɔ lɛ ma je ɔ mi ɔ nɛ.

10Je ɔ mi e ngɛ, nɛ e nɔ a gu kɛ pee je ɔ, se je ɔ li lɛ. 11Lɛ nitse e nihi a ngɔ e ba, nɛ nihi nɛ ji lɛ nitse e ni ɔmɛ he we lɛ. 12Se nihi abɔ nɛ he lɛ ɔ, nihi nɛ heɔ e biɛ ɔ nɔ ye ɔ, e ha mɛ he blɔ kaa a pee Mawu bimɛ, 13nihi nɛ pi muɔ loo he loo nyumu ko suɔmi nya, se mohu Mawu mi a je kɛ fɔ mɛ.

14Nɛ Munyu ɔ plɛ he lo, nɛ e ba hi wa kpɛti, nɛ wa na e hɛ mi nyami ɔ kaa Tsɛ ɔ Bi kaketoo ɔ hɛ mi nyami, nɛ dloomi kɛ anɔkuale hyi lɛ tɔtɔɔtɔ. 15Yohane ye e he odase nɛ e kpa ngmlaa ke: “Nɔ nɛ ɔ ji nɔ nɛ i ngɛ dee ngɛ e he ke: ‘Nɔ nɛ ma ngɛ ye se ɔ, e pa mi’ ejakaa e ngɛ loko i ngɛ.”

16Ejakaa e hyi mi ɔ mi je nɛ wɔ tsuo wa na dloomi ngɔ si dloomi nɔ. 17Ejakaa Mlaa a Mose nɔ a gu nɛ a ngɔ ha, se dloomi kɛ anɔkuale ɔ, Yesu Kristo nɔ e gu kɛ ba. 18Mawu ɔp nɔ ko nɛ́ lɛ hyɛ; Bi kaketoo nɛ ngɛ Tsɛ o mi si ɔ, lɛ nɛ e ba je lɛ si ngɔ tsɔɔ paa.

Yohane Baptisilɔ ɔ fiɛmi

(Mateo 3.1-12; Marko 1.1-8; Luka 3.1-18)

19Enɛ ɔ ji Yohane odase nɛ e ye, bene Yudafo ɔmɛ tsɔ osɔfohi kɛ Levibihi kɛ je Yerusalem nɛ a ba bi lɛ ke: “Mɛnɔ ji mo?” ɔ. 20Nɛ e gba mi paa nɛ e laa we nɔ, nɛ e gba mi de ke: “Tsa pi imi ji Kristo ɔ.” 21Nɛ a bi lɛ ke: “Mɛnɔ ji mo mɔ? Elia ji mo lo?” Nɛ e ke: “Tsa pi lɛ ji mi.” “Gbalɔ ji mo lo?” Nɛ e he nɔ ke: “Dɛbi.” 22Jeha nɛ ɔ a bi lɛ ke: “Mɛnɔ ji mo? konɛ wa na heto ko kɛ ya ha ninɛmɛ nɛ tsɔ wɔ ɔ. Kɛ o deɔ ngɛ mo nitse o he kɛɛ?” 23E ke: “Imi ji nɔ nɛ gbi nɛ ngɛ pɛe ngɛ nga a nɔ ke: ‘Nyɛ dla Nyɔmtsɛ ɔ blɔ ɔ,’ kaa bɔ nɛ gbalɔ Yesaia de ɔ.”

24Ninɛmɛ nɛ atsɔ ɔ je Farisifo ɔmɛ a kpɛti; 25nɛ a ba bi lɛ ke: “Ke pi mo ji Kristo ɔ, loo Elia loo gbalɔ ɔ, lɛɛ mɛni he je o ngɛ baptisie mɔ?” 26Yohane he nɔ ke: “Imi lɛɛ i baptisii ngɛ nyu mi, se nɔ ko daa si ngɛ nyɛ kpɛti nɛ nyɛɛ lɛɛ nyɛ li lɛ, 27lɛ ji nɔ nɛ ma ngɛ ye se, se e sɛ ye hlami, nɔ nɛ i sɛ kaa i pɛneɔ e tokota nya kpa a.”

28A pee ni nɛ ɔmɛ ngɛ Betania ngɛ Yordan se, he nɛ Yohane ngɛ baptisie ngɛ ɔ.

Mawu To Bi ɔ

29E nɔ je na a, Yohane na Yesu ma e ngɔ nɛ e ke: “Oʼɛ Mawu To bi ɔ nɛ woɔ je ɔ he yayami ɔ kɛ yaa a! 30Nɔ nɛ ɔ ji nɔ nɛ i ngɛ dee ngɛ e he ke: ‘Nyumu ko ma ngɛ ye se, nɛ e pã mi,’ ejakaa e ngɛ loko i ngɛ ɔ nɛ. 31Nɛ imi lɛɛ i li lɛ, se mohu bene pee nɛ a je lɛ kpo ngɔ tsɔɔ Israel he je nɛ i ba ngɛ baptisie ngɛ nyu mi nɔ nɛ.” 32Yohane ye odase ke: “I na Mumi ɔ nɛ kple si kɛ je hiɔwe kaa lahuɛ, nɛ e ba ma e nɔ. 33Nɛ imi lɛɛ i li lɛ, se nɔ nɛ tsɔ mi ke ma ba baptisi ngɛ nyu mi ɔ, lɛ nɔuu lɛ e de mi ke: ‘Nɔ nɛ nɔ nɛ o maa na kaa Mumi ɔ ngɛ kplee nɛ e ngɛ e nɔ hie ɔ, lɛ ji nɔ nɛ baptisii ngɛ Mumi Klɔuklɔu mi ɔ nɛ.’ 34Nɛ i na, nɛ i ye he odase kaa lɛ ji Mawu Bi ɔ nɛ.”

Yesu kekleekle kaseli ɔmɛ

35E nɔ je na nɔ ɔ, Yohane kɛ e kaseli ɔmɛ a ti ni enyɔ daa si, 36nɛ bene Yesu bee ɔ, e hyɛ lɛ nɛ e ke: “Oʼɛ Mawu lo Bi ɔ!” 37Nɛ kaseli enyɔ ɔmɛ nu e munyu ɔ, nɛ a ya nyɛɛ Yesu se. 38Yesu plɛ e he nɛ benɛ e na kaa a nyɛɛ e se ɔ, e bi mɛ ke: “Mɛni nyɛ ngɛ hlae?” Nɛ a de lɛ ke: “Rabi” (e sisi ji Tsɔɔlɔ) “jije o hii?” 39E de mɛ ke: “Nyɛɛ ba nɛ nyɛ ba hyɛ.” A ya nɛ a ya na he nɛ e hii ɔ, nɛ a kɛ lɛ hi si jamɛ a ligbi ɔ. Nɛ gbɔkuɛ ngmlɛ eywiɛ mi ʼi.

40Ni enyɔ ɔmɛ nɛ nu nɛ Yohane tu munyu ɔ nɛ a ya nyɛɛ e se ɔ a ti nɔ kake ji Andrea, Simon Petro nyɛmi ɔ. 41Andrea ya na lɛ nitsɛ e nyɛmi Simon kekle, nɛ e de lɛ ke: “Wa na Mesia a.” (E sisi ji Kristo, loo cnɔ nɛ a pɔ lɛ nu.) 42Nɛ e kɛ lɛ ba Yesu ngɔ. Nɛ benɛ Yesu hyɛ lɛ ɔ, e ke: “Mo ji Simon, Yona bi ɔ, a ma tsɛ mo Kefa.” (E sisi ji Petro loo tɛ sa.)

Yesu tsɛ Filipo kɛ Natanael

43Je na nɔ ɔ, Yesu to e yi mi kaa e maa ya Galilea, nɛ e na Filipo, nɛ e de lɛ ke: “Nyɛɛ ye se!” 44Filipo je Betsaida, Andrea kɛ Petromɛ a ma a mi. 45Filipo hu na Natanael, nɛ e de lɛ ke: “Wa na nɔ nɛ Mose ngma e he sane ngɛ Mlaa a mi, nɛ gbali ɔmɛ hu ngma e he sane ɔ, Yesu, Yosef bi nɛ je Nazaret ɔ.” 46Nɛ Natanael de Filipo ke: “Anɛ nɔ́ kpakpa ko ma nyɛ Nazaret maa je lo?” Filipo de lɛ ke: “Ba nɛ o ba hyɛ.”

47Yesu na Natanael ma e ngɔ, nɛ e de ngɛ e he ke: “Oʼɛ anɔkuale Israelno, nɔ nɛ sisimi be e mi.” 48Natanael bi Yesu ke: “Jije o le mi ngɛ?” Yesu he nɔ nɛ e de lɛ ke: “I na mo loko Filipo tsɛ mo, be mi nɛ o ngɛ ngmɔkɔ tso ɔ sisi ɔ.” 49Natanael he nɔ nɛ e de lɛ ke: “Rabi, mo ji Mawu Bi ɔ nɛ, mo ji Israel matsɛ ɔ nɛ!” 50Yesu he nɔ nɛ e de lɛ ke: “Nɛ i de mo ke i na mo ngɛ ngmɔkɔ tso ɔ sisi ɔ he je o heɔ yeɔ nɛ ɔ? O maa na ni nguahi nɛ pe enɛ ɔ.” 51Nɛ e de mɛ ke: “I ngɛ nyɛ dee anɔkuale mi ke: Kɛ je be nɛ ɔ nɔ ɔ, nyɛ maa na kaa hiɔwe nya bli nɛ Mawu bɔfo ɔmɛ ngɛ si kplee ngɛ Nɔmlɔ Bi ɔ nɔ.”

Currently Selected:

Yohane 1: DAN77

Highlight

Copy