Luka 16
16
Tsɔlɔ nɔkɔtɔma kutupɔtsɛ ɔ
1Yesu de e kaseli ɔmɛ hu ke: “Nyumu niatsɛ ko hi si nɛ e ngɛ tsɔlɔ nɔkɔtɔma ko nɛ a ba po e nya ngɔ ha lɛ ke e ngɛ e ni ɔmɛ a hɛ mi kpatae. 2E tsɛ tsɔlɔ ɔ nɛ e de lɛ ke: ‘Kɛ pee kɛɛ nɛ i ngɛ enɛ ɔ nue ngɛ o he nɛ ɔ?’ Ba bu o nɔkɔtɔma yemi ɔ he akɔɔtaa ejakaa o be nɔkɔtɔma nyɛe maa ye hu. 3Nɛ tsɔlɔ nɔkɔtɔma a de ngɛ e yi mi ke: ‘Nɛ ye nyɔmtsɛ ngɛ nɔkɔtɔma yemi ɔ kpɔe ngɛ ye dɛ nɛ ɔ, kɛ ma pee kɛɛ? I be nyɛe si ma tsua, nɛ nɔ bami hu ngɛ mi zo pee. 4I na bɔ nɛ ma pee nɛ ke a kpa mi nɔkɔtɔma yemi ɔ nɛ a he mi ngɛ a wehi a mi.’ 5Lɔ ɔ he ɔ, e tsɛ e nyɔmtsɛ hiɔtsɛmɛ ɔmɛ tsuo kɛ ba kakaaka; e bi kekle nɔ ɔ ke: ‘Hiɔ nyɛmɛ o hɛɛ ye nyɔmtsɛ ɔ?’ 6Nɛ e ke: ‘Nu tɔ lafa.’ Nɛ e de lɛ ke: ‘He o womi ɔ nɛ o hi si esɔ nɛ o ngma nyingmi enuɔ. 7Nɛ nɔ kpa hu e bi lɛ ke: ‘Nɛ mo nɛɛ, hiɔ nyɛmɛ o hɛɛ?’ E ha heto ke: ‘Ngma kpɛɛ lafa.’ Nɛ e de lɛ ke: ‘He o womi ɔ nɛ o ngma nyingmi kpaanyɔ.’ 8Nɛ nyɔmtsɛ ɔ je tsɔlɔ nɔkɔtɔma kutupɔtsɛ ɔ yi kaa e ye sane ɔ ga mi. Ejakaa je nɛ ɔ mi bi ɔmɛ le a nɔ ɔ mi ga pe la bi ɔmɛ.
9“Nɛ imi hu i ngɛ nyɛ dee ke: Nyɛɛ ngɔ kutupɔ ni nami ɔ eko ngɔ pee huɛmɛ ngɔ ha nyɛ he; konɛ, ke e puɛ nyɛ ɔ, nɛ a he nyɛ kɛ ya neneene si himi mi. 10Nɔ nɛ yeɔ nɔ́ ko nyafii mi anɔkuale ɔ, e yeɔ babauu hu mi anɔkuale. Nɛ nɔ nɛ yi nɔ́ ko nyafii mi anɔkuale ɔ, e yi babauu hu mi anɔkuale. 11Lɔ ɔ he ɔ ke nyɛ yi kutupɔ ni nami ɔ po mi anɔkuale ɔ, nɔ́ nɛ ji ni nami nitsɛ ɔ, mɛnɔ maa tu kɔlɔ ɔ ngɔ wo nyɛ dɛ? 12Nɛ ke nyɛ yi nɔ kpa nɔ́ mi anɔkuale ɔ, mɛnɔ maa ngɔ nyɛ nitsɛmɛ nyɛ nɔ́ ɔ ngɔ ha nyɛ?
13“Wenyumu ko be nyɔmtsɛmɛ enyɔ nyɛe ma sɔmɔ, ejakaa eko ɔ e maa nyɛ nɔ kake nɛ e maa suɔ nɔ kpa a, aloo e maa pɛtɛ nɔ kake he, nɛ e maa gbe nɔ kpa a he guɛ. Nyɛ be Mawu kɛ ni nami nyɛe ma sɔmɔ.”
Yesu munyuhi komɛ
(Mateo 11.12-13; 5.31-32; Marko 10.11-12)
14Nɛ Farisifo ɔmɛ nɛ ji sikasuɔli ɔmɛ nu ni nɛ ɔmɛ tsuo nɛ a muɔ lɛ. 15Nɛ Yesu de mɛ ke: “Nyɛ ji nihi nɛ nyɛ buu nyɛ he bemi ngɛ nimli a hɛ mi; se Mawu lɛɛ e le nyɛ tsuihi a mi, ejakaa nɔ nɛ ji gojoo ngɛ nimli a hɛ mi ɔ, eji nɔ ko nɛ Mawu nyɛɛ.
16“Mlaa a kɛ gbali ɔmɛ gba kɛ ba su Yohane nɔ; kɛ je jamɛ a be ɔ nɔ nɔ, a ngɛ Mawu matsɛ yemi he Sane Kpakpa a fiee, nɛ nɔ tsuaa nɔ sɛɛ mi ka nya. 17E wɛ hi hiɔwe kɛ zugba kaa a maa be kɛ ho pe nɔ́ nɛ Mlaa a mi ngu kake maa nɔ si.
18“Nɔ tsuaa nɔ nɛ fieɔ e yo nɛ e ya ngɔɔ nɔ kpa a, e puɛ gba; nɛ nɔ tsuaa nɔ nɛ ngɔɔ yo nɛ e huno fie lɛ ɔ, lɛ hu e puɛ gba.”
Niatsɛ ɔ kɛ Lazaro
19“Jeha nɔ nyumu niatsɛ ko ngɛ, nɛ e woɔ tade tsu kɛ klala nɛ ngɛ fɛu, nɛ e naa bua jɔmi, nɛ e peɔ afɛu ni daa nɛ ɔ. 20Nɛ ohiafo ko hu ngɛ nɛ a tsɛɛ lɛ Lazaro, nɛ a ngɔ lɛ ba fɔ si ngɛ e gbo ɔ nya kɛ e he pahi fuu bam. 21Nɛ e jloɔ lɛ kaa e na niyeni bibli nɛ jee niatsɛ ɔ okplɔɔ ɔ nɔ pue ɔ si ɔ eko nɛ e ye; se gbehi lɛ baa nɛ a ba lɔɔ e pa amɛ a nɔ. 22Nɛ e ba mi kaa ohiafo ɔ ba gbo, nɛ hiɔwe bɔfohi ba ba wo lɛ kɛ ho Abraham mi si ya; nɛ niatsɛ ɔ hu ba gbo nɛ a pu lɛ. 23Nɛ benɛ e ngɛ he hiami mi ngɛ gbeje nɛ e ma wo e hɛ nɔ ɔ, e na Abraham ngɛ lokoo, kɛ Lazaro ngɛ e mi si. 24Nɛ e kpa ngmlaa kɛ tsɛ ke: ‘Etsɛ Abraham, naa mi mobɔ nɛ o tsɔ Lazaro nɛ e kɛ e nine nguɛ nya ya sɔ nyu mi nɛ e kɛ ba jɔɔ ye lilɛ he, ejakaa i ngɛ nɔ nae ngɛ la lilɛ nɛ ɔmɛ a mi.’ 25Se Abraham de lɛ ke: ‘Ye bi, kaii kaa moo lɛɛ o na o ni kpakpa amɛ ngɛ o wami be ɔ mi, nɛ ja nɔuu Lazaro hu na ni yayahi, se jeha nɛ ɔ a ngɛ e bua jɔɔe ngɛ hiɛ ɔ, nɛ moo lɛɛ a ngɛ mo piie. 26Nɛ enɛ ɔmɛ kulaa se hu ɔ, dɔ kpetekpleenyɛ ko ngɛ waa kɛ nyɛ kpɛti, konɛ nihi nɛ hlaa nɛ a je lejɛ ɔ kɛ po mi kɛ ba wa ngɔ ɔ a ko nyɛ.’ 27Se niatsɛ ɔ ke: ‘Lɛɛ i kpa mo pɛɛ mɔ, tsaatsɛ, nɛ o tsɔ Lazaro tsaatsɛ we ɔ, 28ejakaa i ngɛ nyɛmimɛ enuɔ, benɛ pee nɛ e ya ye odase ngɔ tsɔɔ mɛ, konɛ mɛ hu a ko ba piimi he nɛ ɔ.’ 29Nɛ Abraham de lɛ ke: ‘Mose kɛ gbali ɔmɛ ngɛ a dɛ; ha a bu kɔlɔ ɔmɛ tue! 30Se lɛɛ e ke: ‘Dɛbi, Etsɛ Abraham, ke nɔ ko je gbeje kɛ ya a ngɔ ɔ, lɔ ɔ loko a ma tsake a tsui. 31Se Abraham de lɛ ke: ‘Ke a bui Mose kɛ gbali ɔmɛ tue ɔ, lɔ ɔ lɛɛ ke nɔ ko te si kɛ je gbeje tete ɔ, a yi mi be plee.’ ”
Currently Selected:
Luka 16: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
