Luka 22

A so Yesu yi nɔ

(Mateo 26.1-5; Marko 14.1-2; Yohane 11.45-53)

1Jeha nɛ ɔ akpiti nyami ligbi nɛ a tsɛɛ lɛ Hetsɔmi ɔ ba su. 2Nɛ osɔfo nikɔtɔma amɛ kɛ mlaa tsɔɔli ɔmɛ hla bɔ nɛ a maa pee nɛ a gbe Yesu; se a ngɛ ma a gbeye yee.

Yuda kplɛɛ kaa e maa tsɔɔ Yesu se blɔ

(Mateo 26.14-16; Marko 14.10-11)

3Kɛkɛ nɛ Abosiami ya sɛ Yuda, nɔ nɛ a tsɛɛ lɛ Iskariot nɛ ji ni nyɔngma kɛ enyɔ ɔmɛ a kpɛti nɔ kake ɔ mi. 4Nɛ e pue nɔ kɛ ho nɛ e kɛ osɔfo nikɔtɔma amɛ kɛ asafoatsɛmɛ ɔmɛ ya tu munyu bɔ nɛ e maa pee nɛ e je Yesu ngɔ ha mɛ. 5Nɛ a nya, nɛ a wo lɛ si ke a ma ha lɛ sika; 6nɛ e kplɛɛ, nɛ e hla be nɛ sa nɛ e kɛ je lɛ ngɔ ha mɛ zaa.

Yesu dla e he kɛ ha Hetsɔmi niyeni ɔ yemi

(Mateo 26.17-25; Marko 14.12-21; Yohane 13.21-30)

7Kɛkɛ nɛ akpiti nyami ligbi nɛ sa kaa a gbee Hetsɔmi to bi ɔ ngɛ nɔ ɔ ba su; 8nɛ Yesu tsɔ Petro kɛ Yohane nɛ e ke: “Nyɛɛ ya nɛ nyɛ ya dla Hetsɔmi niyeni ɔ ngɔ to wɔ konɛ wa ba ye.” 9Nɛ a bi lɛ ke: “Jije o suɔ kaa wa ya dla ngɔ to ngɛ?” 10Nɛ e de mɛ ke: “Ke nyɛ sɛ ma a mi ɔ, oʼɛ, nyumu ko kɛ nyɛ maa kpe nɛ e tloo nyu buɛ, nyɛɛ nyɛɛ e se kɛ ya we mi he nɛ e yaa sɛ ɔ, 11nɛ nyɛ ya de wetsɛ ɔ ke: ‘Tsɔɔlɔ ɔ ke wa ba de mo ke: Jije nibwɔhi a tsu ɔ nɛ i kɛ ye kaseli ɔmɛ maa ye Hetsɔmi niyeni ɔ ngɛ mi ɔ ngɛ?’ 12Nɛ e maa tsɔɔ nyɛ hiɔwe asa kpetekpleenyɛ ko nɛ a dla mi; lejɛ ɔ nyɛ ya dla ni ɔ ngɔ to ngɛ.” 13Nɛ a pue nɔ kɛ ho nɛ a ya na kaa bɔ nɛ e de mɛ ɔ, nɛ a ya dla Hetsɔmi niyeni ɔ ngɔ to.

Nyɔmtsɛ niyeni ɔ sisitomi

(Mateo 26.26-30; Marko 14.22-26; 1 Korintobi 11.23-25)

14Nɛ benɛ ngmlɛfia a su ɔ, Yesu ya hi si ngɛ niyeni ɔ he, nɛ bɔfohi nyɔngma kɛ enyɔ ɔmɛ hu piɛ e he. 15Nɛ e de mɛ ke: “Pe i ngɛ hlae nɛ i kɛ nyɛ maa ye kikɛmɛ a Hetsɔmi nɛ ɔ loko ma na amanehlu ɔ; 16ejakaa i ngɛ nyɛ dee ke: I be eko yee hu kɛ yaa su be nɛ e maa ba mi ngɛ Mawu matsɛ yemi ɔ mi.” 17Nɛ e wo kplu ɔ, nɛ e na si, nɛ e ke: “Nyɛ he nɛ nyɛɛ dla; 18ejakaa i ngɛ nyɛ dee ke: i be wai tso yiblii nɛ ɔ eko nue hu kɛ yaa su be nɛ Mawu matsɛ yemi ɔ maa ba.” 19Nɛ e kɛ̃ abolo, nɛ e na si, nɛ e kuɔ mi, nɛ e ngɔ ha mɛ nɛ e ke: “Enɛ ɔ ji ye nɔmlɔ tso nɛ a ngɔ ha ngɛ nyɛ he ɔ nɛ; nyɛɛ pee enɛ ɔ nɛ nyɛ kɛ kai mi.” 20Ja nɔuu e wo kplu ɔ hu ngɛ niyeni ɔ se, nɛ e ke: “Kikɛmɛ a kplu nɛ ɔ ji somi he ɔ ngɛ ye muɔ nɛ a ngɔ pue si ha nyɛ ɔ mi.

21“Se oʼɛ, nɔ nɛ maa tsɔɔ ye se blɔ ɔ nine kɛ ye nine ngɛ ka a mi; 22ejakaa Nɔmlɔ Bi ɔ yaa kaa bɔ nɛ a so ngɔ to momo ɔ lɛɛ, se musu tloo nɔ nɛ maa tsɔɔ e se blɔ ɔ!” 23Nɛ a bɔni a he bimi ke a kpɛti mɛnɔ po maa pee enɛ ɔ.

Agbopeemi he nyasami

24Nya sami ba te si ngɛ a kpɛti kaa a ti mɛnɔ a maa bu agbo pe kulaa. 25Se Yesu de mɛ ke: “Majeli ɔmɛ a nɔ matsɛmɛ ɔmɛ yeɔ a nɔ odehehi a sane, nɛ nihi nɛ ngɛ a nɔ he wami ɔ, a tsɛɛ mɛ kplɔkɔtɔtsɛmɛ. 26Se nyɛɛ lɛɛ e be nyɛ ja; se mohu nɔ nɛ ji nɔ ngua ngɛ nyɛ kpɛti ɔ, e plɛ kaa jokuɛyo, nɛ nɔ nɛ ji nɔkɔtɔma a hu kaa nɔ nɛ sɔmɔɔ. 27Ejakaa te nɔ nɛ pe e nyɛmi nɛɛ: nɔ nɛ hii okplɔɔ he ɔ, aloo nɔ nɛ sɔmɔɔ ɔ? Anɛ pi nɔ nɛ hii okplɔɔ he ɔ lo? Se imi lɛɛ i ngɛ nyɛ kpɛti kaa nɔ nɛ sɔmɔɔ.

28“Se nyɛ ji nihi nɛ kɛ mi hi si ngɛ ye ka amɛ a mi; 29nɛ imi hu i ngɛ matsɛ yemi toe ha nyɛ kaa bɔ nɛ Tsaatsɛ to ha mi ɔ, 30konɛ nyɛɛ ye nɛ nyɛɛ nu ngɛ ye kplɔɔ ɔ he ngɛ ye matsɛ yemi ɔ mi, nɛ nyɛɛ hi sɛhi a nɔ nɛ nyɛɛ kojo Israel wɛtso nyɔngma kɛ enyɔ ɔ.”

Yesu gba Petro kuami ngɔ to

(Mateo 26.31-35; Marko 14.27-31; Yohane 13.36-38)

31“Simon, Simon, oʼɛ, Satan bi blɔ, konɛ e sa nyɛ mi kaa ngma; 32se imi lɛɛ i kpa pɛɛ ha mo, konɛ o hemi kɛ yemi ko ta; nɛ mo hu, ke o kpale ɔ, wo o nyɛmimɛ ɔmɛ he wami.” 33Se Petro de lɛ ke: “Nyɔmtsɛ, i dla ye he ngɔ to nɛ ke tsu mi oo, gbenɔ mi oo, nɛ i kɛ mo maa ya.” 34Nɛ Yesu ke: “Petro, i ngɛ mo de ke mwɔnɛ kungwɔ be nɔ kpae, nɛ o ma kua si etɛ ke o li mi.”

Sika kpɛɛ kɛ kotoku kɛ klaate

35Nɛ Yesu bi mɛ ke: “Benɛ i tsɔ nyɛ nɛ nyɛ hɛɛ we sika kpɛɛ kɛ kotoku kɛ tokotahi ɔ, anɛ nɔ ko hia nyɛ lo?” Nɛ a ke: “Nɔ ko nɔ ko hia we wɔ.” 36Kɛkɛ nɛ e de mɛ ke: “Se jeha nɛ ɔ ɔ, nɔ nɛ ngɛ sika kpɛɛ ɔ, e ngɔ; ja nɔuu hu nɔ nɛ ngɛ kotoku. Nɛ nɔ nɛ be klaate ɔ, e jua e tade nɛ e kɛ he eko. 37Ejakaa i ngɛ nyɛ dee ke nɔ́ nɛ a ngma nɛ ɔ hu ja e ba mi ngɛ ye he ke: ‘Nɛ a bu lɛ ngɔ si mlaa tɔli ɔmɛ a nɔ;’ ejakaa ye he sane ɔmɛ ma mi.” 38Nɛ a ke: “Nyɔmtsɛ, oʼɛ klaatehi enyɔ.” Se e de mɛ ke: “E hiɛ.”

Yesu sɔle

(Mateo 26.36-46; Marko 14.32-42)

39Nɛ Yesu je kpo, nɛ kaa bɔ nɛ e pɔɔ peemi ɔ, e pue nɔ kɛ ho Nuyoku ɔ nɔ ya; nɛ e kaseli ɔmɛ nyɛɛ e se. 40Nɛ benɛ e su leje ɔ, e de mɛ ke: “Nyɛɛ sɔle, konɛ nyɛ ko sɛ ka mi.” 41Nɛ e sã e he si kɛ je a ngɔ maa pee tɛ fɔmi kɛmi, nɛ e kpla si, nɛ e sɔle 42ke: “Tsaatsɛ, ke o suɔ ɔ, je kplu nɛ ɔ kɛ je ye nɔ! Se kɛ̃ ɔ pi bɔ nɛ i suɔ, se mohu bɔ nɛ mo o suɔ.” [ 43Nɛ bɔfo ko je hiɔwe ba je e he kpo tsɔɔ lɛ, nɛ e wo lɛ he wami. 44Nɛ benɛ e he ngɛ lɛ hiae ɔ, e ha e sɔlemi ɔ mi wa. Nɛ e he latsa plɛ kaa muɔloku nɛ ngɛ tslee kɛ ngɛ si puee.]

45Nɛ benɛ e te si kɛ je sɔlemi ɔ mi nɛ e ba e kaseli ɔmɛ a ngɔ ɔ, e ba na mɛ kaa a ngɛ mahɛ hwɔe ngɛ aywlɛho nya; 46nɛ e de mɛ ke: “Mɛni he je nyɛ ngɛ mahɛ hwɔe? Nyɛɛ te si nɛ nyɛɛ sɔle, konɛ nyɛ ko sɛ ka mi.”

A nu Yesu

(Mateo 26.47-56; Marko 14.43-50; Yohane 18.3-11)

47Benɛ Yesu ngɛ munyu ɔ tue ɔ, oʼɛ asafo ko, nɛ ni nyɔngma kɛ enyɔ ɔmɛ a kpɛti nɔ kake nɛ a tsɛɛ lɛ Yuda a nyɛɛ a hɛ mi, nɛ e hɛ lɛ su Yesu he konɛ e fiɔ e nya he. 48Se Yesu de lɛ ke: “Yuda, o kɛ nya he fiɔmi ngɛ Nɔmlɔ Bi ɔ se blɔ tsɔɔe?” 49Nɛ benɛ nihi nɛ kɛ lɛ ngɛ ɔ na nɔ nɛ ma a, a de lɛ ke: “Mawetsɛ, wa ja klaate lo?” 50Nɛ a ti nɔ kake ja osɔfo nɔkɔtɔma a tsɔlɔ ɔ klaate nɛ e po e hiɛ ɔ nɔ tue. 51Nɛ Yesu he nɔ nɛ e ke: “Enɛ ɔ hiɛ.” Nɛ e ta e tue ɔ he nɛ e tsa lɛ.

52Kɛkɛ nɛ Yesu de osɔfo nikɔtɔma amɛ kɛ sɔlemi we asafoatsɛmɛ ɔmɛ kɛ ma nikɔtɔma amɛ nɛ ma lɛ numi ɔ ke: “Ye nɔ nyɛ je kpo kɛ ba lɛ klaatehi kɛ tsohi kaa a baa awiyelɔ nɔ nɛ ɔ? 53Daa nɛ i kɛ nyɛ ngɛ sɔlemi we ɔ lɛɛ nyɛ wo we nyɛ nine nɔ ngɛ ye nɔ; se nyɛ ngmlɛfia a kɛ diblii ɔ he wami ji nɛ ɔ nɛ!”

Petro kua Yesu

(Mateo 26.57-58, 69-75; Marko 14.53-54, 66-72; Yohane 18.12-18, 25-27)

54Kɛkɛ nɛ a nu Yesu nɛ a kpaka lɛ kɛ ho osɔfo nɔkɔtɔma a we ɔ mi ya. Se Petro nyɛɛ se ngɛ lokoo. 55Nɛ benɛ a slɛ la ngɛ mɔ ɔ kpo ɔ kpɛti nɛ a ho hi si ngɛ he ɔ, Petro hu ho ya hi si ngɛ a kpɛti. 56Nɛ yiheyo ko na lɛ nɛ e hii si ngɛ la a he, nɛ e hyɛ lɛ too nɛ e ke: “Nyumu nɛ ɔ hu kɛ lɛ nɛ ngɛ.” 57Se Petro kua nɛ eke: “Maa, i li lɛ!” 58Lɔ ɔ se bɔɔ ɔ, nɔ kpa hu na lɛ nɛ e ke: “Mo hu a ti nɔ ko ji mo.” Se Petro ke: “Tsaatsɛ, pi a ti nɔ ko ji mi!” 59Lɔ ɔ se maa pee ngmlɛfia kake ɔ, nɔ kpa hu ma nɔ mi veveeve ke: “Niinɛ kaa nyumu nɛ ɔ hu kɛ lɛ nɛ ngɛ; ejakaa Galileano hu ji lɛ!” 60Se Petro ke: “Tsaatsɛ, i li nɔ́ nɛ o ngɛ dee nɛ ɔ!” Nɛ amlɔ nɔuu, benɛ e ngɛ munyu ɔ tue ɔ, kungwɔ kpa nɔ. 61Nɛ Nyɔmtsɛ ɔ plɛ e he, nɛ e hyɛ lɛ nɛ Petro kai Nyɔmtsɛ ɔ munyu ɔ nɛ e de lɛ ke: “Kungwɔ be nɔ kpae, nɛ o ma kpa ngɛ ye se si etɛ” ɔ. 62Nɛ Petro je kpo, nɛ e ya fo ya wawɛɛ.

A ye Yesu he fɛu, nɛ a fia lɛ ni

(Mateo 26.67-68; Marko 14.65)

63Nihi nɛ hɛɛ Yesu mi ɔ ye e he fɛu, nɛ a fia lɛ ni. 64Nɛ a fi e hɛ mi, nɛ a gba e hɛ mi ma, nɛ a de lɛ ke: “Gbaa, mɛnɔ ji nɔ nɛ gba mo ma a?” 65Nɛ a de ni kpahi fuu kɛ bɔ musu ngɔ si lɛ.

Yesu ngɛ gua a hɛ mi

(Mateo 26.59-66; Marko 14.55-64; Yohane 18.19-24)

66Benɛ je na a, ma nikɔtɔma amɛ kɛ osɔfo nikɔtɔma amɛ kɛ mlaa tsɔɔli ɔmɛ a nya ba bua, nɛ a kpaka lɛ kɛ ho a gua a hɛ mi ya, 67nɛ a ke: “Ke mo ji Kristo ɔ, de wɔ.” Nɛ e de mɛ ke: “Ke i de nyɛ ɔ, nyɛ be hee maa ye; 68nɛ ke sane ko nɛ i bi hu, nyɛ be mi heto hae. 69Se kɛ je be nɛ ɔ kɛ yaa nɛ ɔ ɔ, Nɔmlɔ Bi ɔ maa hi Mawu he wami ɔ hiɛ ɔ nɔ.” 70Kɛkɛ nɛ mɛ tsuo a ke: “Lɛɛ, tse mo ji Mawu bi ɔ?” Nɛ e de mɛ ke: “Nyɛ nitsɛmɛ lɛ nyɛ ngɛ dee; ami ʼi.” 71Se a ke: “Mɛni wa pa ngɛ odase yeli hlae yaa pee? ejakaa wɔ nitsɛmɛ wa nu kɛ je e nya.”

Currently Selected:

Luka 22: DAN77

Highlight

Copy