Mateo 8
8
Yesu tsa tsitsɛ ko
(Marko 1.40-45; Luka 5.12-16)
1Benɛ Yesu kple si kɛ je yoku ɔ nɔ ɔ, nihi tuu nyɛɛ e se. 2Nɛ oʼɛ, tsitsɛ ko ba kpla si ngɛ e hɛ mi nɛ e ke: “Nyɔmtsɛ, ke o suɔ ɔ, o ma nyɛ ma ha ye he nɛ tsɔ!” 3Nɛ Yesu kpa e nine mi nɛ e ta e he nɛ e de lɛ ke: “I suɔ, o he nɛ tsɔ!” Nɛ amlɔ ɔ tsi ɔ ta ngɛ e he. 4Nɛ Yesu de lɛ ke: “Hyɛ nɛ o ko de nɔ ko; se mohu yaa nɛ o kɛ o he ya tsɔɔ osɔfo ɔ, nɛ o ha ke ni nɛ Mose to ɔ kɛ ye odase.”
Yesu tsa aslaafohi lafa a nyatsɛ wenyumu ko
(Luka 7.1-10)
5Benɛ Yesu sɛ Kapernaum ɔ, aslaafohi lafa a nyatsɛ ko ba e ngɔ ba kpa lɛ pɛɛ 6nɛ e de ke: “Nyɔmtsɛ, ye wenyumu fɔɔ si ngɛ we mi kɛ hulemi hiɔ, e ngɛ nɔ nae wawɛɛ.” 7Nɛ Yesu de lɛ ke: “I ma nɛ ma ba tsa lɛ.” 8Se aslaafohi lafa a nyatsɛ ɔ he nɔ ke: “Nyɔmtsɛ, e sɛ mi kaa o baa ye kue ɔ mi, se mohu tu munyu kɛkɛ, nɛ a ma tsa ye wenyumu ɔ. 9Ejakaa imi po nɛ i ji nɔmlɔ nɛ a yeɔ e nɔ ɔ, i ngɛ aslaafohi ngɛ ye sisi, nɛ ke i de nɔ kake ke: ‘Yaa’ a, e yaa, nɛ ke i de nɔ kpa hu ke: ‘Ba’ a, e baa, nɛ ke i de ye tsɔlɔ ke: ‘Pee enɛ ɔ’ ɔ, e peɔ.” 10Se benɛ Yesu nu enɛ ɔ ɔ, e hɛ mi pee lɛ yaa, nɛ e de nihi nɛ nyɛɛ e se ɔ ke: “Niinɛ, i ngɛ nyɛ dee ke: Israel mi tete i nɛ hemi kɛ yemi nɛ kle kaa enɛ ɔ lolo! 11Se i ngɛ nyɛ dee ke: Nihi fuu maa je beleku (pu je he) kɛ bonyoku (pu si nɔ he) maa ba nɛ a kɛ Abraham kɛ Isak kɛ Yakob ma ba hi si ngɛ hiɔwe matsɛ yemi ɔ mi; 12se matsɛ yemi ɔ mi bimɛ ɔmɛ ɔ, lɛɛ a ma sake mɛ ngɔ fɔ blɔ se diblii ɔ mi; lejɛ ɔ ya fomi kɛ lungu nya kpemi maa hi.” 13Nɛ Yesu de aslaafohi lafa a nyatsɛ ɔ ke: “Yaa, bɔ nɛ o he ye ɔ, a pee ja ha mo.” Nɛ a tsa e wenyumu ɔ ngɛ lɛ ngmlɛfia a nɔuu nɔ.
Yesu tsa nihi babauu
(Marko 1.29-34; Luka 4.38-41)
14Benɛ Yesu ba Petro we ɔ mi ɔ, e na Petro nganyɛ nɛ fɔɔ si kɛ asla. 15Nɛ e nu e nine si, nɛ asla a po ngɛ e nɔ, nɛ e te si nɛ e sɔmɔ mɛ.
16Jamɛ a gbɔkuɛ ɔ, a kɛ nihi fuu nɛ mumi yayamihi ngɛ a mi ba e ngɔ. Nɛ e kɛ e munyu hia mumi ɔmɛ, nɛ e tsa hiɔtsɛmɛ ɔmɛ tsuo. 17Konɛ nɔ́ nɛ gbalɔ Yesaia de ɔ nɛ ba mi ke: “Lɛ nitsɛ e wo wa dengme ɔmɛ, nɛ e tloo wa hiɔ ɔmɛ.”
Yesu senyɛɛmi
(Luka 9.57-62)
18Benɛ Yesu na nihi fuu ngɛ e he ɔ, e fa ke a po wo ɔ nɛ a ya e se je. 19Nɛ mlaa tsɔɔlɔ ko ba e ngɔ ba de lɛ ke: “Tsɔɔlɔ, he tsuaa he nɛ o yaa a ma nyɛɛ o se.” 20Yesu de lɛ ke: “Kɔkɔbohi ngɛ muɔhi, nɛ hiɔwe lohwe pɛlitsɛmɛ ngɛ tsuhi; se Nɔmlɔ Bi ɔ be he nɛ e kɛ e yi fɔɔ.” 21Se e kaseli ɔmɛ a ti nɔ kpa ko hu de lɛ ke: “Nyɔmtsɛ, ngmɛɛ mi blɔ nɛ ma ya pu ye tsɛ lolo.” 22Se Yesu de lɛ ke: “Nyɛɛ ye se, nɛ o ha ni gbogboe ɔmɛ a pu mɛ nitsɛmɛ a ni gbogboehi.”
Yesu jɔɔ wo nɔ kɔɔyɔ ko he
(Marko 4.35-41; Luka 8.22-25)
23Nɛ Yesu sɛ lɛ ko mi nɛ e kaseli ɔmɛ nyɛɛ e se. 24Nɛ si kake ɔ, wo ɔ pee hamahama, nɛ oslɔke ɔmɛ ngɛ kue kɛ ngɛ lɛ ɔ mi woe; se lɛɛ e hwɔ mahɛ. 25Nɛ e kaseli ɔmɛ ba e ngɔ nɛ a ba tsɛɛ lɛ de ke: “Mawetsɛ, he wa yiwami, wa ngɛ laae!” 26Nɛ e de mɛ ke: “Mɛni he je nyɛ ngɛ gbeye yee kikɛ, nyɛ nɛ nyɛ hemi kɛ yemi pi?” Kɛkɛ nɛ e te se nɛ e ke kɔɔhiɔ ɔ kɛ wo ɔ yi nɛ a ngmɛ dii. 27Se ni ɔmɛ a hɛ mi pee mɛ yaa nɛ a ke: “Mɛni nɔmlɔ slɔɔto ji nɛ nɛ kɔɔhiɔ kɛ wo tete boɔ lɛ tue nɛ ɔ?”
Yesu tsa ni enyɔ nɛ mumi yayami ngɛ a mi
(Marko 5.1-20; Luka 8.26-39)
28Benɛ Yesu ba se ɔ blɔ ngɛ Gadarabi ɔmɛ a zugba a nɔ ɔ, ni enyɔ nɛ mumi yayami ngɛ a mi kɛ lɛ ba kpe, a je ni gbogboehi a pu he ɔ nɛ a hɛ wo la tsɔ, bɔ nɛ nɔ ko nyɛ we jamɛ a blɔ ɔ nɔ nɛ e gu. 29Nɛ oʼɛ, a kpa ngmlaa ke: “Mɛni sane waa kɛ mo ngɛ mo Yesu, Mawu bi ɔ? Anɛ o ba wɔ dengme womi loko be ɔ nɛ su lo?” 30Nɛ kpotoohi a kuu ngua ko ngɛ ni yee ngɛ lokoo. 31Nɛ mumi yayami ɔmɛ kpa Yesu pɛɛ ke: “Ke o hia wɔ ɔ, ngmɛɛ wɔ blɔ nɛ wa ya sɛ kpotoohi a kuu ɔ mi.” 32Nɛ e de mɛ ke: “Nyɛɛ ya!” Nɛ a je kpo ya sɛ kpotoohi a kuu ɔ mi; nɛ oʼɛ, kuu mluku ɔ tsuo wo fo kɛ je yoku ɔ nɔ kɛ ya pue wo ɔ mi, nɛ a gbo ngɛ nyu ɔ mi.
33Nɛ kpotoohyɛli ɔmɛ tu fo kɛ ho ma a mi ya nɛ a ya sɛɛ sane ɔmɛ tsuo kɛ nihi nɛ mumi yayamihi ngɛ a mi ɔmɛ a nɔ́ ɔ hulɔ. 34Nɛ oʼɛ, ma mluku ɔ tsuo je kpo nɛ a kɛ Yesu ya kpe, nɛ benɛ a na lɛ ɔ, a kpa lɛ pɛɛ ke e je a kpo ɔmɛ a nɔ nɛ e ho.
Currently Selected:
Mateo 8: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
