DOOGIN 1

Ijiptho Israelv Nyiitw Mvqlwnam

1Soq tulu si Israelwg ko tuup tulug eminv hiyv Jakub lvgab Ijiptho haanum, soq si bulug imiq dvpar-dvparv: 2‍Reuben, Simeon, Lebi, hoo Juda, 3‍Issakar, Jebulun, hoo Benjamin, 4‍Dan hoo Naptali, Gad hoo Aser. 5‍Soq tulu si Jakubg hotam camleq kvn gob haanbov; Josap Ijipt gvdaho dooxo kunum. 6‍Ho Josap sinum, hoo mwwg vbw-bor tulungv la hoqg hotam mwlwngv sileq kunum. 7‍Hvbmabde Israel nyiilungv mipar-gooiyiql hoo homw-lengknum; bulv dumtwq-miilywl hoo vcib mvqlwl atorbo nyiib swwnum, ho gvda mwlwho bulv doopiwnum.

Paro Israelam Nyijab-nyiyiqnam

8‍Josapnvn cengma bo, nitbo lvpw at ak Ijiptho swwlinum. 9‍Hoo mwv nyiilungam benum, “Kaato, Israelwg nyiilu si nyiitw mvqlw do hoo ngul gab ator jaqdo. 10‍Haato, ngulv bulam hengab jaqb hvvmin gvdwl mvtor dvb nyipa, bulv nyiitw mvqlw do, hoo nyob parab baloqkam, bulv ngulug ceebio lvgab nyob pamin gvl ngulam ceekol nyob patayi hoo gvda soqgv keleqtayi.” 11‍Hoqgab bulv bulug aoho bon kanam-nvmlwqbo tulungam xuqlin tvl bulug aoho hentwr jaqb vgw bo bonam nyim dvb ningteqnum. Bulv Parog Pitom la Raameses bopam noosu tulungam ywrnum. 12‍Hvbmabde bulam vi go nyijab-nyiyiq yin, bulv vi yaiya go dumtwq-miilywl swwlinv hoo bulv gvda mwlwho doumab doonum. Hoo Ijipt nyi tulungv Israel nyiilungam vcjaqb bosnum. 13‍Ho bulv Israel nyiilungam anya-asor kaapa dvb nyera raasur gob bonam nyim kunum 14‍hoo bulug swwnamv henc-henya dvb bonam nyil swwdkub mvnum, simit la hita lvgab nam ywrgwi hoo luuxig rongo bonam nyimnum. Bulug bonam mwlwho bulv anya-asor kaapa dvb raasur gob bonam nyimnum.

15‍Ho Ijipt gv lvpw atv Hibru nyem tulungam cinc jooiya boam benum, akwn hoqg eminv Sipra hoo asaq hoqg eminv Pua, 16“Hwdlo nulv Hibru nyem tulungam cinc jooiya jiyikam bulug ko bwwnam mam kaato, nyega ko baloqkam nulv mwam mengpaq to, hvbmabde nyem ko baloqkam mwnwn swwto.” 17‍Hvbmabde cinc jooiya bo tuluhv Pwnboam bosnum hoo Ijipt lvpw atwg gaml jinam hvb nyimanum, hvbmabde nyega ko tulungam swwl doomnum. 18‍Ho Ijipt gv lvpw atv cinc jooiya bo nyem vnyiam goqnum hoo bulam benum, “Hog gab nulv nyega koam swwl doom dvb, soq si nyipa kun?” 19‍Cinc jooiya bo vnyiv Paronvn benum, “Hibru nyem tulungv Ijipt nyem tulu hvb nyima, hoggab bulv ator jaqdo hoo cinc jooiya bov bulug dookub hvvc maatab, koam bwwxo tukul doodkun.” 20‍Ho Pwnbov cinc jooiya bo vnyig lvgab bonam nyigam gab nyiilungv dumtwq-miilywl hoo koijaqb atorl swwnum. 21‍Hoo cinc jooiya bov Pwnboam bos ko-gab mwv bulam imiq dvparam jinum. 22‍Ho Paro mwwg nyiilu mwlwngam gaml jinum, “Hibru tulug nyega ko bwwnam vxiam nulv Nail pobu ho joolwq tayin, hvbmabde nyem ko bwwnam vxiam swwm to.”

Currently Selected:

DOOGIN 1: NYISBSI

Highlight

Copy