BEGGAR 16
16
Sarai la Hagar
1Abram gv nywxw Sarai mwam ko bwwj maanum. Mwn Ijipt paqn ak doognum hoqg eminv Hagar. 2Hoo Sarai Abramnvn benum, “Sija kaato, At Sw ngam ko bwwm kuma. Ngoqg paqn dookub wno; ngo lokam mwnwg hoqgv ko ak kaapa dvb nyikam yin pv.” Hoo Abram Sarai benam mam tanum. 3Ho Abram Kanaan gvdaho vnyw nywyw go dooxo kokw so, Abram gv nywxw Sarai, mwnwg Ijipt paqn Hagarnvn naalayil mwnwg nyol Abramnvn nywxwb jinum. 4Hoo mwv Hagarnvn doognum, hoo mwn ko gvnum. Hoo hwdlo mwn ko gvpa kun hvl ceng yikho, mwnwg aiyam mwn xik maab nyinum. 5Hoo Sarai Abramnvn benum, “Ngam xik maab nyinam sam no gorgy baqto! Ngoqg paqnam ngo nam doog mvdwb jinum, hoo hwdlo mwn ko gvpa kun hvl ceng yikho, mwn ngam xik maab kaanyi-kaayanum. At Swn noqg gvla ngoqg pengko so pw-hwwm to!” 6Hvbmabde Abram Sarainvn benum, “Kaato, noqg paqnv noqg uraho doodwn; mwnwn no hoggub mwnw dvn mvto.” Ho Sarai mwnwn vc loodab vs-axaq dvb mvnum, hoo mwnwg hoqgv mwn keknum.
7At Swg gumtwngv mwnwn deexa-rarag iss subuq buqlinko ho kaapanum, hoqhv Sur lamta wga ho doonum. 8Hoo mwv benum, “Saraig paqn Hagar, no hogloqkv haapan hoo hogloqb wdu dvn?” Mwn benum, “Ngoqg ai Sarai hoqgv ngo kelin yin.” 9At Swg gumtwngv mwnwn benum, “Noqg ai dookub wkur nuku hoo mwnwg uraho doota.” 10At Swg gumtwngv mwnwn hvlakam benum, “Noqg hosiqkam ngo dumtwq-miilyw mvtayin ho bulug dumtwq-miilywnam mam xila nyokram.” 11Hoo At Swg gumtwngv mwnwn benum,
“Kaato, no ko gvpa ku
hoo nyega ko ak bwwtayin.
Mwwg eminam no Ismaiyel hvl goqto,
hoggab At Sw noqg hentwr henam mam tapa paku.
12Mwv nyoro svdamg nyi ak hvb nyitayin,
mwwg alaqkv nyiicwr-cwrxiam ceeko tayin,
hoo nyiicwr-cwrxig alaqkv mwam ceeko tayin,
hoo mwwg nyiin-orum dook mwlwho mwv ceekol dootayin.”
13Ho mwnwn agam goonbo At Swg eminam mwn goqnum, “No kaanbo Pwnbo ak nyi,” ho mwn benum, “Jvqtw jaqb ngam kvvyw-tadabo akam, ngo mwam so kaapa paku.” 14Hoqgab sokum mam Beer-lahai-roi hvl eminum; hoqhv Kades gvla Bered pengko ho doodwn.
15Hoo Hagar Abramnvn nyega ko ak bwwjnum, hoo Hagarg ko bwwnam ham Abram Ismaiyel hvl emin goqnum. 16Hwdlo Hagar Ismaiyelnvn Abram gab bwwj yukho, Abram vnyw campiin leq nywx gob axa kunum.
Currently Selected:
BEGGAR 16: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
