BEGGAR 42
42
Josapg Vbw Tulungv Ijipt Wnam
1Hwdlo Jakub Ijiptho dvg puqdwk hvl cengnum, mwwg ko tuup tulungam mwv benum, “Hoggub nulv akwn-akwn kaagab-kaarabl doodwn?” 2Hoo mwv benum, “Kaato, Ijipt gvdaho dvg puqdwk hvl ngo tapanum. Boloqb igdvl dvg loq ngul gab rvta, ho ngulv swwl dookam yin pv hoo siram.” 3Ho Josapg vbw wywngv Ijipt gvdaho dvr rvtab haanum. 4Hvbmabde Josapg bor Benjaminnvn Jakub mwwg vbw tulug lvgab kanam maanum, hoggab mwam almab nyikam twqto mwwnv mwv bosnum. 5Soq sib Israelwg ko tuup tulu hvvkam dvr rvtab haanbo nyi tulug pengko ho haanum, hoggab Kanaan gvdaho dwrv wnum.
6Hoq moodho Josap gvdaho gvdag nyiit rad gob nyinum. Mwv gvdag nyiilungam dvg puqn bo akv. Hoo Josapg vbw tulungv haanum hoo bulv atv mwwg agaho bulug nyuqm mam kedho pvxwnum. 7Josap mwwg vbw tulungam kaatwl hoo bulam kaalaqnum, hvbmabde mwv bulam nyoodo nyi hvb nyin-mvnam hoo bulam gamtor alwb agam goonum. “Nulv hogloqkv haai yin hvl mwv benum?” Bulv benum, “Dvr rvtab, Kanaan gvda hoqgv haai yin.” 8Hoo Josap mwwg vbw tulungam kaalaqnum, hvbmabde bulv mwam kaacin maanum. 9Hoo bul gab yuma maaknum ham Josap yuma tulungam mwwpa kunum. Hoo mwv bulam benum, “Nulv mvqky-maqlam mvnbo go; nulv gvdag talonam mam kaatab haapa ku.” 10Bulv mwam benum, “Hvbma, ngoqg atv, noqg nyera tulungv dvs rvtab haaiyin. 11Ngul mwlwngv nyi akinwg ko tuupv. Ngulv lootw bo nyi tulungv. Noqg nyera tulungv nywywngam mvqky-maqlam mvka ma.”
12Mwv bulam benum, “Hvbma, gvdag talonam mam nulv kaatab haapa ku.” 13Hoo bulv benum, “Ngulv, noqg nyera tulungv, vbw-bor camleq vnyi go doodwn, Kanaan gvda hoqg nyi akinwg ko tuupv, hoo kaato, anya jaqkv sija godab ngulug ab lvgab doodwn, hoo akwn dookma.” 14Hvbmabde bulam Josap benum, “Ngoqg nulam benam hv bijwqpa. Nulv mvqky-maqlam mvnbo go. 15Soq sam nyil nulam pooiyeq tayin: Parog emin gab bedwn, hwdlo nulv nulug bor anya ham so boa maady deedib nulv soq nyook soqgv wla kuram. 16Nulug akwn kanam to, hoo mwam nulug boram boa mvto, ho nulv so biimab dooiya to, ho nulug jvqtw agam benam mam cengtayin. Hvbmab nyiloqkam Parog emin gab bedwn, jvqtw jaqb nulv mvqky-maqlam mvnbo go.” 17Hoo mwv bul mwlwngam aal loum gab pvtwq uraho vlwqnum.
18Aal loum ho Josap bulam benum, “Soq sam nyito hoo nulv swwl dootayin, hoggab ngo Pwnboam bosbov: 19nulv lootw bo nyiingv jaq nyiloqkam nulv vbw akwn nulug sija pvtwq dookho dooiya mvto, hoo kiya gon nulug imiq dvparg dwr-kano gab dvg baqlayil wn, 20hoo nulug bor anyangam ngam boa jito. Ho nulug agam mam jvqtwngv hvtayin, hoo nulv siram. “Hoo bulv hvb nyinum. 21Ho bulv akwn-akwn bemin sunum, “Jvqtwngam bebnyiloqkam ngulv ngulug boram nyixiaq ko-gab ngulam soq sib nyiyi kubo. Mwwg hentwr henam mam ngulv kaanum, hoo hwdlo mwv ngulam xuml daal mvnyi-moiyul svkangam konum ngulv tamanum. Hoqgab soq vs-axaq hentwr si ngulug aoso haapa ku.” 22Hoo Reuben bulam birwqnum, “Ngo nulam boram nyic nyima bvk hvl bema namyv? Hvbmabde nulv tamanum. Ho sija mwwg hijum kwlib ngulam haapa ku.” 23Josap bulam cengdwn hvl bulv cengmanum, hoggab bulug pengko ho agam mam bisiq yaanbo doonum. 24Ho mwv bulug hoqgv nywkur banv hoo xabnum. Hoo mwv bulam nywkur banv agam goonum. Hoo mwv Simeonnvn bulug hoqgv naanv mwam bulug vnyiq kaagaho raql apnum. 25Hoo Josap bulug tuila ho am mam tuqlwq mvdwb gaml jinum, hoo nyi vxig twngkam bulug tuila ho vlwq jinum, hoo lamta wrinam dvb dvs-twwsv vlwq jinum. Soq si bulam nyiknum.
26Ho bulv bulug svdam tuluho am mam rublwq laikul hoo wknum. 27Hoo bulug hoq akwn liit doonu ko ho svdam dvsam naalin dvb hvl mwwg tuilangam mvkonum, ho mwwg twngkam tuila gamb ho mwv doodwb kaapanum. 28Mwwg vbw-bor tulungam mwv benum, “Ngoqg twngkam okur jipa ku; tuila gamb si doodo!” Hoq moodho bulug hangv hoxa kunum, hoo bulv akwn-akwn kaatwl tvmdwr hwql begamv, “Hoggv ngulam Pwnbov soq sib nyipa kun?”
29Hwdlo bulv bulug ab Jakub dook Kanaan gvdaho hvvc kunum, bulam hog mwlw nyiknam mam bulv mwam betamnv begamv, 30“Gvdag at, akv ngulam gamtor jaqb agam benum hoo ngulam gvdangam mvqky-maqlam mvnbo gob mwwnum. 31Hvbmabde ngulv mwam benum, ‘Ngulv lootw bo nyiingv; ngulv nywywngam mvqky-maqlam mvnbo nyiib nyika ma. 32Ngulv ab akin hoqgv camleq vnyi go vbw-borv doodwn hvnum. Akwn hv dook ma, hoo bor anya jaqkv soolo godab Kanaan gvdaho ngulug ab lvgab doodwn hvnum.’ 33Ho gvdag at nyi akv, ngulam benum, ‘Soq sam nulv nyib nyiloqkam ngo nulam lootwbo nyiingv hvl cengtayin: nulug vbw-bor akwn ngoqg lvgab apaq pe, hoo dwr wggam gab nulug nam dvpar gab dvg naalayil, hoo nulug lamtab wnku. 34Nulug bor anyangam ngam boa jito. Ho ngo cengtayin nulv mvqky-maqlam mvnbo nyi ma hvbmabde lootw bo nyiingv hvtayin, hoo ngo nulug vbw-boram tolin jitayin, hoo nulv gvda so pudu ruutayin.’”
35Bulv bulug tuilangam yaqro yukho, kaato, nyiicwr-cwrxig twngk agaqkv mwwg tuila ho doonum. Hoo hwdlo bulv la bulug abv twngk agaqkam kaatwl, bulv bosnum. 36Hoo bulug ab Jakub bulam benum, “Nulv ngoqg ko tulu gab ngam mwwdwq dwqm do: Josap dook ma, hoo Simeon kam dook ma, hoo sija nulv Benjamin nvrub boog deen hvdo. Soq mwlw si ngam ceeko dvb haapa ku.” 37Ho Reuben mwwg abam benum, “Mwam ngo bookurl boa kuma baloqkam ngoqg ko tuup vnyiam mengto. Mwam ngoqg alaq so gvqlwqto hoo ngo mwam nam bookur jitayin.” 38Hvbmabde mwv benum, “Ngoqg kongam nulug lvgab imin gvmram, hoggab mwwg vbwngv sinkun, hoo mwv twq sija doodwn. Nulug pudu ruuk lamta ho mwv bwdw-taraq hokam sui yv, ho nulv ngoqg dum dumpu lvgab Sux-ywlw ho mwwdwq dvb ipoq mvta yi.”
Currently Selected:
BEGGAR 42: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
