BEGGAR 45
45
Josap Mwwg Vbw-boram la Imiqkam Cin-hoonam
1Ho mwwg agaho nyi tulug daqnam mam kaatwl Josap mwv atv cwqla kumanum. Mwv xabnum, “Ngoqg soqgv mwlwngv wleqto.” Ho hwdlo Josap mwv atv mwwg vbw-bor tulungam betam yukho, nyi akam mwwg dookho doom mvmanum. 2Hoo mwv vc loodab xabnum, ho Ijipt nyi tulungv ham tapanum, hoo Parog imiq dvparvkam ham tapanum. 3Hoo Josap mwwg vbw-bor tulungam benum, “Ngo Josap! Ngoqg ab hvraqb swwl dooxiqdo i?” Hvbmabde mwwg vbw-bor tulungv mwam hog birwq sv dook maanum, hoggab bulv mwwg agaho sidkun hvb nyiknum.
4Ho Josap mwwg vbw-bor tulungam benum, “Kujo, ngoqg ogumb hvvnwqto.” Hoo bulv ogumb hvvnwqnum. Hoo mwv benum, “Ngo nulug bor Josap, hiyam nulv Ijiptho puqnum. 5Hoo sija nulv mwwdwq maabv ho atv-atam hang lengmabv nulv ngam so puqgam gab, hoggab Pwnbov ngam nulug otuqb kanam coopan, nyi tulungam ywwlin mvdwb. 6Hoggab gvdaho dwrv vnyw nywnyi gob nyidu kunum, hoo vnyw nywng gota vly liikam ram hoo vly naakam ram. 7Hoo Pwnbov ngam nulug otuqb kanam paku swcw nvg aoso nulug doonyu bo nyi tulungam ywwlin mvdwb, hoo nulam swwl doom dvb hoo nulug hoqgv hotam mam swsiql lengm dvb. 8Ho nulv ma ngam so kanamnum, hvbmabde Pwnbov. Mwv ngam Parog ab gob mvpa ku, hoo mwwg imiq dvparag at gob mvpa ku hoo Ijipt gvdangam pvvb bwwl doog mvdwb jiknum. 9Nulv nyebia jaqb ngoqg abwg dookub wgdvl hoo mwam beta, ‘Soq sib noqg ko tuup Josap bede hvta, Pwnbov Ijipt lo ngam nyiit at gob mvpa ku. Oyul doomab; ngoqg dookub nyebia jaqb itwg hvta. 10No Gosen gvdaho dootayin, hoo no ngoqgab ogum tayin, no la noqg ko tulungv hoo noqg ko hosiq-hosiqkv, hoo noqg sviya pvtwngv, noqg sibin-svvngv hoo noqg doognam mwlwngv dvmin-twwmin tayin. 11Tolo ngo nam dvs-twwsam cita-hootayin, hoggab vnyw nywng gota dwr wsv dooxiqdo, ho no la noqg imiq dvparv, hoo noqg doognam mwlwngam kvvyw-tada tayin, jwwgw-homa maadwb.’ 12Hoo sija nulug vnyiqkv kaapa ku, hoo ngoqg bor Benjaminwg vnyiqkvkam kaapa ku, ngoqg agam jaq soqgv nulam goodwn. 13Nulv hoggub nyijaqkam ngoqg abam Ijipt so ngam xinam-paqnam, hoo nulug kaaknum hog mwlwngam beta. Nyebiab wgdvl ngoqg abam soqb bool ta.” 14Ho mwwg bor Benjaminwg lwwpo ho mwv hwrgab tvl hoo xabnum, hoo Benjamin mwwg lwwpo ho hwrgab tvl xabnum. 15Hoo mwwg vbw-bor tulu mwlwngam mwv moopup tvl bulug aoho xabnum. Hoq kokw so mwwg vbw-bor tulungv mwam agam goonum.
16Hwdlo Parog imiq dvparv Josapg vbw-bor tulug “Josap dookub haanam puiyam tapa yin,” hoqhv Paro nvla mwwg nyera tulungam hemp mvnum. 17Hoo Paro Josapnvn benum, “Noqg vbw-boram beto, ‘Soq sam nyimto: bulug svdin ho dvs-twws loq pvvlwq layil hoo Kanaan gvdab wkur mvto, 18hoo nulug abam la nulug imiq dvpar mwlwngam boolayil ngoqg dookub haamto, hoo ngo nulam Ijipt gvda so diibuqbo nyookam jitayin, hoo nulv gvda hoqg swwlinam mam dvtayin.’ 19Hoo Josap no, soq sam gaml jito, ‘Soq sam nyimto: Ijipt gvda hoqgv svdin gaari loq naalayil nulug ko anyo tulungam la nulug nywxw tulungam, nulug abam baqal haag mvto. 20Nulug dupum-dvrab gab mwwdwq maabv, hoggab Ijipt soqg mwlwngam alyanbo gvdangv nul gvku.’”
21Israelwg ko tuup tulungv hvb nyiknum: hoo Parog gaml jik jaqb, Josap bulam svdin gaaringam jinum, hoo bulam nyiody boorin nan dvs-twwsam jinum. 22Ho bul mwlwngam vj koolynanv rumsaq twqb jinum, hvbmabde Benjaminnvn sikil rup lwum gola kwlynan vj rumg go jinum. 23Ho mwwg ab gab mwv soq tulu sam jilwqnum: Ijipt hoqg dupum-dvrab pv svdam doryw gob tumlwq jinum, hoo amv la wtwngv svdam damn doryw gob vlwq jinum, hoo mwwg abwg lamta wrinam dvb dvs-twwsv vlwq jinum. 24Ho mwwg vbw-bor tulungam mwv kanam tvl wwm kunum, hoo bulv wknum, mwv bulam benum, “Nulv lamta alo yolu duma bvka i.”
25Ho bulv Ijipt hoqgv wknum hoo bulug ab dookub Kanaan gvdaho haaknum. 26Hoo bulv mwam betamnum, “Josap sija godab swwl doodo, hoo mwv Ijipt gvdaho pvvb bwwl doogbo gob nyidku.” Hoo mwwg hangv dwqk-dwqk duqnum, hoggab mwv bulam mwwjw maanum. 27Hvbmabde hwdlo bulv mwam Josapg bulam goonam gomcwr mwlwngam betamnum, hoo hwdlo mwv Josapg mwwg gab svdin gaari ho dvs-twws jilwqnam mam kaapa yin, bulug ab Jakub yalv lokta hwrcw kunum. 28Hoo Israel benum, “Soq si jotv paku; ngoqg ko tuup Josap sija godab swwl doodnyi. Ngoqg sima taab ngo mwam wgdvl kaatayin.”
Currently Selected:
BEGGAR 45: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
