BEGGAR 49
49
Jakub Mwwg Ko Tuup Tulungam Lvqcnam
1Ho Jakub mwwg ko tuup tulungam goql benum, “Nul lvkin gob hookum to, ho haata bo aalam hoggv nyita dvn, ngo nulam betam tayin.
2“Hookum gvdwl hoo tato, Jakubg ko tuup tulunga,
nulug ab Israelnvn tato.
3“Reuben, no ngoqg tuup vbw cociqkv,
ngoqg svqgwngv, hoo ngoqg ator yikho aaxy xeeconamv,
mwlwngam xibin yaadwb lvrgwnanv hoo mwlwngam gaml-ator doobin yaan bov.
4Iss tonam hvb todwn, hvbsujaqkam no hvvtw pootam doogram,
hoggab no abwg paqn nywxwngam doognum;
ho no ham kacdvb nyiburnum—mwv ngoqg yubk cwwrw namgub haanum!
5“Simeon la Lebi vbw-borv;
bulug lyoqr orioq lvgab yolu-swcin bamy-tai rooxo do.
6Ngoqg yvjv bulug dookum ho haaram;
ngoqg yuunamv, bulug dvparho haamin gvram.
Hoggab bulug hang lengnamv nyiingam mengdwn,
hoo bulv tvjwmab nyinv svv hvvbam lemy padwn.
7Bulug haaxaqnam mam beegywn, hoggab hoqhv hang lingtwr mvdo,
hoo bulug hang lingtwr-twryanam mam beeg yin, hoggab hoqhv hangv sibynan dooma!
Ngo bulam Jakub uraho mvpin-mvra tayin
hoo bulam Israel uraho cwrsaq twqb mvtayin.
8“Juda, noqg vbw-borv ngam paqtayin;
noqg alaqkv noqg ceebio tulug lwwpo ho laqdaq tayin;
noqg abwg ko tuup tulungv noqg agaho pvxwl xumtayin.
9Juda si sony nyot ko ak hvb nyidwn;
mengnam mam mengpe kul, ngoqg ko tuupv, no wpa ku.
Mwv vjin-atal karmin dvn; sony nyot nyem akv karminam hvb
mwv sony nyot hvb gikub-gexeql karminl doodwn; hiyv mwam haakaml muu deen bov?
10Beqnyiangv Juda hoqgv wleqram,
ho pvvb bwwl doogbog dupum-dvrab pv mwwg lvpia hoqgv wleqram,
hwdlo xinamv mwam haama deedib;
hoo nyiilungv mwam tvjw tayin.
11Mwwg svdam koam roo annho rwwtu dvn hoo mwwg svdam koam roo ann mwlwngam alyanbo ho soogwb nyidwn,
mwv mwwg vj pamnam mam roo ala hoqgv niixaq nvdwn
hoo mwwg vjam ui hilw hvb nyinbo roo ala hoqgv hwrxaq dvn.
12Mwwg vnyiqkv opongam lwwcw cwwbin yaadwn,
hoo mwwg exiv gwwiyam puulu yaadwn.
13“Jebulun sa-svlog sugurho dootayin;
mwv iss jaaj gab cumciq nyookub nyitayin,
hoo Sidonv mwwg vrrwb nyitayin.
14“Issakarv atorbo svdamv,
baqnan paaxa pengkob vjin-ata tayin.
15Mwv doonu ko nyookam albo gob kaanum,
hoo gvdangam xumtwl kaabynum,
ho mwv pvxwnv mwwg gorbw baqsam baqnum,
hoo nyera hvb nwwteql bon nyim kunum.
16“Dan mwwg nyiilug hvvkib nyitayin
Israelwg nyob hoolu ak gob nyitayin.
17Dan lamta ho tvb hvb nyitayin,
lamtaho tvb borta hvb nyitayin,
ho svpurg ludam cetayin
ho svpur xarn bov langkwb yoql tayin.
18At Swa, noqg ywwlinam mam ngo kaaya dvn.
19Gadnvn naalil dvco bo tulungv paa tayin,
hvbmabde mwv bulug lvlam mam ruqmin gvtayin.
20“Aserwg dvsv naleqtayin,
hoo mwv nyetbo dvnam mam dvtayin.
21“Naptali sudum hvb xarkarl yvtayin ho kangam bo koam bwwtayin.
22Josap jwjw jaqb aaxy xeenbo haqbv,
subuq buqlinko lwkwho jwjw jaqb aaxy xeenbo haqbv;
mwwg haqbv bvliam coobo-coolo tayin.
23Illy-uppuq abn bov mwam vcjaqb abtayin,
mwam abtayin, hoo mwam sima-siyv kurum dvb mvnyi-mviya tayin,
24hvbsujaqkam mwwg illiv biimab doonum;
mwwg laqpongv hengabnum
Jakubg Koibo Akwg alaqkv
(hoqhv Sviya rvkybo, Israelwg Lwwnv),
25noqg abwg Pwnbov nam svka tayin,
Mwlwngam koi yaan bov nam lvqc tayin doa aog nyodo lvgab lvqc tayin,
swcw niikumg hvvi lvgab lvqc tayin,
codum-mamparam tulungam lvqc tayin.
26Noqg abwg lvqcnamv
ngoqg ab-annwg lvqcnam mam vigo koi yaadwn,
kuiyum gob doonbo puutug lvqcnam,
tuluhv Josapg dumpo aoho doon ka,
hoo mwam ywr dumtup gvmnam mam mwwg vbw-bor tulu hoqgv nvvbwq tayin.
27“Benjamin svca caar akv,
ar komcam dvsam cextayin
hoo ariyum mam cex kunam mam mvpin-mvra tayin.”
Jakub Siknam hoo Svma Liinam
28Soq tulu si Israelwg nyob camleq vnyiv. Soq sam bulug abv mwv bulam lvqc cil benum, vx-cwram jubtaqbo lvqc cam mwv cinum. 29Ho mwv bulam gaml jil hoo bulam benum, “Ngoqg nyiilu dookum ho ngo dooba tayin; ngam ngoqg abwg lvgab Epronwg Hittait rongog lwwpwq ho svma liila ka, 30Makpela rongo, dou-cagag Mamreg Kanaan gvdag lwwpwq hogloq ham Abraham Epron Hittait hoqgv svma liikum koob rvnamho liila ka. 31Ho tolo bulv Abraham nvla mwwg nywxw Saranvn svma liinum. Tolo bulv Aisak nvla mwwg nywxw Rebeka hoo tolo ngo Liyanvn svma liinum— 32rongo gola lwwpwqkam Hittait nyi hoqgv rvnum.” 33Hwdlo Jakub mwwg ko tuup tulungam gaml jinya peekul, mwv mwwg lvpiangv yubkub korca kunum hoo mwwg nyiilungv dookum dvb mwv bingriq kunum.
Currently Selected:
BEGGAR 49: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
