- उत्पत्ति 17
17
बाचा कौ चिन्ह - खतना
1जब अब्राम निन्यानबे साल कौ हो गओ; तब यहोवा परमेसुर ने ऊहों दरसन दैकें कई, “मैं सर्वसक्तिमान यहोवा परमेसुर आंव; मोरी उपस्थिति में चल और खरो होत जा; 2जीसें मैं तोरे संगै बाचा बांधहों और तोरे बंस हों बेजा बढ़ाहों।” 3तब अब्राम मों के बल गिरो। फिन यहोवा परमेसुर ऊसें जौ कहकें बातें करन लगो, 4“हेर, मोरी बाचा तोरे संगै बंधी रैहै, ई लाने तें मुतकी जातियन कौ मूलबाप हो जैहै। 5ई लाने अब तोरो नाओं अब्राम नें रैहै, परन्त तोरो नाओं अब्राहम हुईये; कायसे मैंने तोहों मुतकी जातियन कौ मूलबाप ठैरा दओ आय। 6मैं तोहों बेजा फलवन्त करहों, तोहों जाति-जाति कौ मूल बना दैहों और तोरे बंस में राजा पैदा हुईयें। 7मैं तोरे संगै, और तोरे बाद पीढ़ी दर पीढ़ी लौ तोरे बंस के संगै भी ऐई सम्बन्ध में जुग-जुग की बाचा बांधत आंव, कि मैं तोरो और तोरे बाद तोरे बंस कौ भी यहोवा परमेसुर रैहों। 8मैं तोए हों, और तोरे बाद तोरे बंस हों भी, जौ पूरो कनान देस जीमें तें परदेसी होकें रैत आय, ई तरहां सें दैहों कि बा जुग-जुग लौ उनकी निज भूमि रैहै, और मैं उनकौ यहोवा परमेसुर रैहों।”
9फिन यहोवा परमेसुर ने अब्राहम सें कई, “तें भी मोरे संगै बांधी भई बाचा कौ पालन करियो; तें और तोरे बाद तोरो बंस भी अपनी-अपनी पीढ़ी में ऊकौ पालन करे। 10मोरे संगै बांधी भई बाचा, जीकौ पालन तोहों और तोरे बाद तोरे बंस हों करने पड़है, ऊ जौ आय: तुम में सें एक-एक मान्स कौ खतना होए। 11तुम अपनी-अपनी खलड़िया कौ खतना करा लईयो: जो बाचा मोरे और तुमाए मजारें आय, ऊकौ जौई चिन्ह हुईये। 12पीढ़ी दर पीढ़ी में केवल तोरे बंस ही के मान्स नईं परन्त जो तोरे घर में पैदा भओ होए, या परदेसियन सें रूपा दैकें मोल लओ जाए, एैसे सबरे मान्स भी जब आठ दिना के हो जाएं, तब उनकौ खतना करो जाए। 13जो तोरे घर में पैदा होए, या तोरी चांदी सें खरीद लओ जाए, ऊकौ खतना जरूरई करो जाए; ई तरहां मोरी बाचा जीकौ चिन्ह तुमाए सरीर में हुईये ऊ जुग-जुग बनो रैहै। 14जो मान्स खतना नें कराहै, मतलब जिनकी खलड़िया कौ खतना नें हुईये, ऊ मान्स अपने जनों के मजारें सें काड़ दओ जाए, कायसे ऊने मोरे संगै बांधी भई बाचा हों तोड़ दओ।”
15फिन यहोवा परमेसुर ने अब्राहम सें कई, “तोरी जो घरवारी सारै आय, ऊहों तें अब सारै नें कईयो, ऊकौ नाओं सारा हुईये। 16मैं ऊहों आसीस दैहों, और तोए हों ऊसें एक मोंड़ा दैहों; और मैं ऊहों एैसी आसीस दैहों कि बा मुतकी जातियन की मूलमाता हो जैहै; और ऊके बंस में मुतके राज्यों के राजा पैदा हुईयें।” 17तब अब्राहम मों के बल गिर पड़ो और हंसो, और मनई मन कैन लगो, “का सौ साल के मान्स के इतै संतान हुईये और का सारा जो नब्बे साल की आय मोंड़ा जनहै?” 18अब्राहम ने यहोवा परमेसुर सें कई, “इश्माएल तोरी नजर में बनो रए! जौई बहुत आय।” 19तब यहोवा परमेसुर ने कई, “पक्कौ तोरी घरवारी सारा हों तोए सें एक मोंड़ा पैदा हुईये; और तें ऊकौ नाओं इसहाक#17:19 ऊ हंसत आय रखियो; और मैं ऊके संगै एैसी बाचा बांधहों जो ऊके बाद ऊके बंस के लाने जुग-जुग की बाचा हुईये। 20इश्माएल के बारे में भी मैंने तोरी सुनी आय; मैं ऊहों भी आसीस दैहों, ऊहों फलवन्त करहों और बेजा बढ़ा दैहों; ऊसें बारह परधान पैदा हुईयें, और मैं ऊसें एक बड़ी जाति बनाहों। 21परन्त मैं अपनी बाचा इसहाक ही के संगै बांधहों जो सारा सें अगले साल की ठैराई गई बेरा में पैदा हुईये।”
22तब यहोवा परमेसुर ने अब्राहम सें बातें करबो बन्द कर दओ और ऊके लिगां सें ऊपर चढ़ गओ। 23तब अब्राहम ने अपने मोंड़ा इश्माएल हों लओ; और ऊके घर में जितेक पैदा भए हते, और जितेक ऊके रुपईया सें मोल लए गए हते, मतलब ऊके घर में जितेक मान्स हते उन सब हों लैकें ओई दिना यहोवा परमेसुर के बचन के अनसार उनकी खलड़िया कौ खतना करो। 24जब अब्राहम की खलड़िया कौ खतना भओ तब ऊ निन्यानबे साल कौ हतो। 25जब ऊके मोंड़ा इश्माएल की खलड़िया कौ खतना भओ तब ऊ तेरह साल कौ हतो। 26अब्राहम और ऊके मोंड़ा इश्माएल दोई कौ खतना एकई दिना में भओ। 27ऊके घर में जितेक मान्स हते, जो घर में पैदा भए और जो परदेसियन के हाथ सें मोल लए गए हते, सब कौ खतना ऊके संगैई भओ।
Currently Selected:
- उत्पत्ति 17: BHB
Highlight
Share
Copy
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
