- उत्पत्ति 20
20
अब्राहम और अबीमेलेक
1फिन अब्राहम उतै सें कड़कें दक्खिन देस में आकें कादेस और शूर के मजारें ठैरो, और गरार में रैन लगो। 2अब्राहम ने अपनी बईयर सारा के बारे में कई, “बा मोरी बहन आय,” ई लाने गरार के राजा अबीमेलेक ने दूत पठैकें सारा हों बुलवा लओ। 3रात हों यहोवा परमेसुर ने सपने में अबीमेलेक के लिगां आकें कई, “सुन, जौन बईयर हों तेंने रख लओ आय ऊके कारन तें मर जैहै कायसे बा सुहागन आय।” 4परन्त अबीमेलेक ऊके लिगां नें गओ हतो; ई लाने ऊने कई, “हे पिरभु, का तें निरदोस जाति हों भी मार डालहै? 5का ओई ने खुद मोए सें नईं कई, ‘बा मोरी बहन आय?’ और ऊ बईयर ने भी खुद कई, ‘ऊ मोरो भईया आय;’ मैंने तौ अपने मन के खरेपन और अपने ब्योहार की सच्चाई सें जौ काम करो।” 6यहोवा परमेसुर ने ऊसें सपने में कई, “हओ, मैं भी जानत आंव कि अपने मन के खरेपन सें तेंने जौ काम करो आय, और मैंने तोहों रोक भी रखो कि तें मोरे बिरुद्ध पाप नें करे; ऐई कारन मैंने तोए ऊहों छियन नईं दओ। 7ई लाने अब ऊ मान्स की बईयर हों ऊहों लौटा दे; कायसे ऊ नबी आय, और तोरे लाने बिन्तवाई करहै, और तें जियत रैहै; परन्त जदि तें ऊहों नें लौटाहै तौ जान लईयो कि तें और तोरे जितेक मान्सन आंय, सबरे पक्कौ जानौ मर जैहें।”
8भुन्सारे अबीमेलेक ने जल्दी उठकें अपने सबरे करमचारियन हों टेरकें जे सब बातें सुनाईं; और बे मान्सन बेजा डर गए। 9तब अबीमेलेक ने अब्राहम हों टेरकें कई, “तेंने हमाए संगै जौ का करो आय? मैंने तोरो का बिगाड़ो हतो कि तेंने मोरे और मोरे राज के ऊपर एैसो बड़ो पाप डाल दओ आय? तेंने मोरे संगै ऊ काम करो आय जो सही नें हतो।” 10फिन अबीमेलेक ने अब्राहम सें पूंछी, “तेंने का समझकें एैसो काम करो?” 11अब्राहम ने कई, “मैंने जौ सोचो हतो कि ई जागां में यहोवा परमेसुर कौ कछु भी डर नें हुईये; ई लाने जे मान्सन मोरी बईयर के कारन मोहों मार डालहें। 12ईके बाद भी सांचऊं में बा मोरी बहन आय; बा मोरे बाप की मोंड़ी तौ आय, परन्त मोरी मताई की बिटिया नईंया; फिन बा मोरी बईयर हो गई। 13एैसो भओ कि जब यहोवा परमेसुर ने मोहों अपने बाप कौ घर छोड़कें कड़बे कौ हुकम दओ, तब मैंने सारा सें कई, ‘इतेक किरपा तोहों मोए पै करने हुईये कि हम दोई जितै-जितै जाएं, उतै-उतै तें मोरे बारे में कईयो कि जौ मोरो भईया आय’।” 14तब अबीमेलेक ने गाड़र-छिरियां, गईया-बैला, और दास-दासियां लैकें अब्राहम हों दईं, और ऊकी बईयर सारा हों भी ऊहों लौटा दओ। 15अबीमेलेक ने कई, “हेर, मोरो देस तोरे सामूं आय, जितै तोहों अच्छो लगै उतै रै।” 16सारा सें ऊने कई, “हेर, मैंने तोरे भईया हों चांदी के एक हजार टुकड़ा दए आंय। ईसें तें अपने मान्सन की नज़र में निरदोस ठैराई जैहे, और सब के सामूं तें दोसमुक्त ठैरहै।” 17-18अब्राहम ने यहोवा परमेसुर सें बिन्तवाई करी, कायसे यहोवा परमेसुर ने अब्राहम की बईयर सारा के कारन अबीमेलेक के घर की सबरी बईयरों की कोखों हों पूरी तरहां सें बन्द कर दओ हतो, और यहोवा परमेसुर ने अबीमेलेक, और ऊकी बईयर और दासियों हों चंगो करो और बे जनन लगीं।
Currently Selected:
- उत्पत्ति 20: BHB
Highlight
Share
Copy
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
