Ka ki aitotiskeritci Cecoc otarotakana 12
12
Cak e nipahakaniwitc, minawatc Pien e kipohwakaniwitc
1Ani apitc okimaw Hérode ki irakonikew kitci nekatcihakaniwiritci atita anihi ka nosanehwaritci Cecoca. 2Ki irakonikew kitci nipahakaniwiritci Caka, Jean anihi owitcicana, micta mokomaniw kitci apatanik. 3Minawatc ka ickwa wapatak aniheriw Hérode e mireritamiritci cota iriniwa e ki totcikaterik, ki itew ocimakanicima kitci makonaritci kiapatc Piena. Mekwata makocaniwonikopan, “Pakwecikan aka ka opisotc” e icinikatekopanen anihe makocan. 4Ka ickwa makonakaniwiritci Piena, Hérode ki itew kitci kipohwakaniwiritci, mitato acitc nikotwaso cimakanicak kitci nanakatcihatcik, kitci tca nanewo taciketcik e kanawerimatcik Piena. Iteritamokopan Hérode kitci tipaskonakaniwiritci anihi Piena miparinike ke mirwatcikaterik, Pâque ka icinikaterik, kaskina awik kitci wapatak. 5Kipohotowikamikok taci kanaweritakosipan Pien. Aric kaskina aniki ka tapwerimatcik Cecoca micta aiamihectamowepanak, e pakoserimatcik Kice Manitowa kitci nanakatcihikoritci.
Pien e wikotcihakaniwitc kipohotowikamikok
6Tepiskarik, aci aniheriw ke kicikarik Pien kitci tipaskonikotc Héroda, kaskina awiriwa kitci wapamikotc, taci nipapan nictowitc nicw cimakanica e nanakatcihikotc. Nicw piwapiskwapiriw takopisopan, kirika cimakanica nanakatcihikopan pecotcik ickwatemik kipohotowikamikok e nanipowiritci. 7Kek keskat otci pe nokosiriw peikw otacerima Teperitciketc, e micta wasiterik neta aricapik ka ici kipohwakaniwitc Pien. Ki takiniko opimera anihi aceriwa e kockonikotc, e itikotc: “Tactapi, pasiko!” Piwapiskwapiriw ka takopisospan otcitcik ki paskipariniw. 8Kiapatc itiko anihi aceriwa: “Piska kiwikasim kaie takopita kimaskisin!” Ekoni ka totak Pien. Minawatc itiko aceriwa: “Kikapotowan piska! Pe nosanehici tca!”
9Pien ki orowiw nta kipohotowikamikok e iti nosanehwatc aceriwa. Iteritamokopan: “Aniheriw ka totak aceriw, nama ni tapwe isparin, nit itapataman,” iteritamokopan. 10Ki pimotewok nictam nta ka ici tacikeritci cimakanica ka nanakatcitaritci kipohotowikamiriw, minawatc kotakihi ka tacikeritci cimakanica kiapatc nta ki pimotewok, nac nte iti takociniwok micta piwapisko ickwatemik ka otci pitakaniwok otenak. Wircike ceparin anihe piwapisko ickwatem, ekoni e ici orowitcik. Meskanak iti pimotewok. Kek keskat nakatiko Pien anihi aceriwa.
11Aci kiskeritam Pien tapwe aniheriw ka ki isparinik. Itew: “Anotc ni wapaten tapwe anihe ka ki isparik! Teperitciketc ki pe iciticahwew otacerima. Ni ki wikotcihikw aka awocamec kitci tiperimitc Hérode kaie ni ki witcihikw aka kitci matci totawitcik cota iriniwok kotc ka ici iteritamwakopanen.”
12Ka ickwa nisitotak ka ki iciwepasitc, nete Mariwa omikiwamirik ki icaw, Jean anihi okawiwa. Mark arica icinikatakaniwipan anahwe Jean. Mitcetiwakopan nta iriniwok e ki mawotcihitowakopanen e aiamihatcik. 13Pien ki papawoham ickwatemiriw. Peikw nta ka atoskectaketc iskwew, Rhode icinikatakaniwiw, ki pe nta cenamawew. 14Ki nisitotawew e arimweritci Piena. E apitc mireritak, nama wawatc pitama cenam ickwatemiriw. Ki ispataw nte pitakamik ka ici mawotcihitonaniwonik e nta tipatcimotc e tacikeritci Piena nta orowitimik.
15Aci itakaniwiw: “Ki pisinateriten ni!” Aric itew anahwe iskwew: “Tapwe ni! Pien ka ki pe takocik!” Aci itewok: “Namaiew na Pien! Otacerima ni!”
16Kiapatc aric mate papawoham Pien. Kek e nta cenakik ickwatemiriw, ki kockowapamowok apitc ka wapamatcik. 17Nakahactahamawew Pien aka kitci kitoritci. Ki atisokawew ka ki totamiritci Teperitcikeritci ka orowitihikotc kipohotowikamikok. Kiapatc itew: “Nta witamawakok Cak kirika kotakihik kiwitcicaninowok.”#12.17 kiwitcicaninowok: kikwimesinowok kaie wirawaw ka tapwerimatcik Cecoca. Minawatc ki orowiw, e tca matcatc, wiec e icatc.
18Kecikarik aniki cimakanicak ka ki nanakatcihatcik Piena nta kipohotowikamikok arimeritamwakopan e kowetowi aiteritakik ka ki isparitci Piena. 19Okimaw HĂ©rode ki itew kitci nantowapamakaniwiritci. Nama aric ki otci miskawakaniwiriw. Minawatc ki itew kitci kokwetcimakaniwiritci anihi cimakanica ka ki nanakatciharitci Piena tan ka ki isparinik. Minawatc ki itew kitci nipahakaniwiritci kaskina e taciritci.
Ekoni ka ici matcatc anahwe okimaw Hérode nete Judée askik, nete Césarée otenak e icatc. Ekota nta kinowec ka taciketc.
Ka poni pimatisitc HĂ©rode
20 HĂ©rode micta kiciwahikokopan iriniwa nta ka tacikeritci otenak Tyr kirika Sidon ka icinikaterik. Aniki iriniwok tapickotc ki iteritamok kitci natawapamatcik anihi okimamiwawa. Pitama peikw kotakihi iriniwa ki cikimewok kitci witcihikotcik. Blastus icinikasopan anahwe iriniw, wir tipirawe mihepan okimawa omikiwamirik. Ekoni ka ici natawapamatcik HĂ©roda e nataweritamawatcik aka awocamec kitci kiciwasiritci aci kitci miroparihitonaniwonik, osam e otinamasotcik omitcimimiwaw nta okimawa HĂ©rode otaskirik.
21Aci aniheriw kecikarik Hérode piskam okimaw okapotowan. Ki nta apiw okimaw otetapiwakanik e aiarimwetc, e aimihatc kaskina e taciritci. 22Ka ickwa arimwetc, aci tepitepwewok kaskina aniki iriniwok, e itetcik: “Namaiew na tepirak iriniw anahwe ka aiarimwetc! Kice manitowiw!”
23Aric mekwata e taci tepitepwetcik, peikw Teperitciketc otacerima, keskat ki mirew anihi HĂ©roda kitci akosiritci, osam e ki kanaweritamatisoritci kitci kicterimakaniwiritci, aka tca e ki otci iteritci wir Kice Manito kitci kicterimakaniwitc. Mantcoca ki mowiko, ekoni ka iti poni pimatisitc.
24Kirawe kiapatc iti tipatcitcikateripan Kice Manito otitewin, kirawe e iti mitcetiwaspan ka asperimotcik.
25Ka ickwa aiketcik aniheriw ka ki nta itotiskewaspan aniki Barnabas kirika Saul, nete ki iti kiwewok JĂ©rusalem otenak. Aniheriw ki iti matcewirewok Jeanwa. Enko anahwe Jean, Mark arica ka icinikatakaniwispan.
Currently Selected:
Ka ki aitotiskeritci Cecoc otarotakana 12: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
