Jean 14

Cecoc ki ki meskanakatikono kitci ki natawapamimokw Otawiwa

1“Aka arimeritamokw,” itew Cecoc. “Asperimototowakw Kice Manito. Kaie nin asperimototacikw. 2Micta mitceniw ke ici tacikaniwonik Notawi omikiwamik. Kicatc nit ican neta kitci ki nisawitatakok ke ici tacikeiekw. Kecpin aka tapwe ki otci icinakok anihe, nama ki ta ki otci witamatinawaw. 3Ickwa nta nisawitaiane neta ke ici tacikeiekw, minawatc ni ka pe ican kitci pe natcipahitakok kitci iciwiritakok nete, kaie kirawaw kitci ki tacikeiekw nin ka ici tacikeian. 4Ki kiskeritenawaw meka anihe meskanaw ka iticimok nte e icaian.”

5Aci Toma itew: “Teperitcikein, nama ni kiskeritenan nte e icain. Tan tca ke ki otci kiskeritamak anihe meskanaw ke mitimeiak kitci ki icaiak nete?”

6Cecoca itiko: “Nin ni anihe meskanaw e iteritakosian, tapwewin kaie pimatisiwin. Nama awik kata ki natawapamew Notawiwa, patoc nin pe nosanehwite. 7Kecpin tapwe e kiskerimiekw, Notawi kaie wir ki ta kiskerimawaw. Aci anotc ki kiskerimawaw kaie ki ki wapamawaw.”

8Aci itew Pirip: “Teperitcikein, wapatahicinan Kotawi. Ni ka mireritenan.”

9Cecoc itew: “Aci weckatc ki witci tacikemitinawaw. Nama ia tca moci ki kiskerimin, Pirip? Anahwe ka wapamitc, aci ki wapamew kaie Notawiwa. Kekwan tca wetci itein: ‘Wapatahicinan Kotawi’? 10Nama ia ki tapweten Notawi otehik e witci tacikemak, acitc wir e witci tacikemitc nitehik? Anihi nititewina ka ititakok, namaiew ni nin tipirawe ka ki iteritaman ka aiteian. Notawi, anahwe ka witci tacikemitc nitehik, enkweriw ni wir tipirawe otitotiskewin. 11Tapwetacikw e ititakok: nin ni witci tacikemaw Notawi otehik acitc kaie wir ni witci tacikemikw nitehik. Kekotc ma karike tapwetamokw e ki wapatamekw anihe ka matawi aitotiskaniwok. 12Ohwe ka witamatakok, tapwe ni icinakon: anahwe ka tapwerimitc kaie wir peikon kata itotiskew kaie wir kotc e itotiskewak. Wawatc kirawe mictahi kekociciriw kata totam, osam meka ni nta witci tacikemaw Notawi. 13Ni ka itotiskan kaie kaskina ke ici nataweritamekw, niticinikasowin otci, kitci ki otci wapatahiwewak Notawi oticperitakosiwin, nin Kice Manito Okosa. 14Kecpin kekocic nataweritamawiekwe niticinikasowin otci, ni ka itotiskan.”

E nespi tapwetc Cecoc kitci pe iciticohwakaniwiritci Miro Manitowa

15“Kecpin e sakihiekw, ki ka sapitenawaw nitirakonikewin. 16Ni ka nataweritamawaw Notawi kotakihi awiriw kitci iciticahamatakw kitci pe nta witcihitakw, mocak kitci witci tacikemitakw: 17Enko na Miro Manito#14.17 Miro Manito: Mia itemakan: Manito. ka petatc tapwewiniw. Iriniwok ka nosanetatcik matci meskanariw ota askik nama kata ki pe otitikowok anihi Miro Manitowa, osam nama wapamewok kaie nama kiskerimewok. Aric kirawaw, ki kiskerimawaw. Ki witci tacikemikowaw meka, kirika mocak kata tacikew#14.17 kata tacikew: Itemakan atita masinahikanik: tacikew. kitehiwak.”

18“Nama kinowec ki ka pakitinitinawaw kircikewaw kitci tacikeiekw, mitowi awacak aka e taritci onikihikowawa. Kecko ki ka pe kiwe natawapamitinawaw. 19Aci kekatc nama awocamec ni ka wapamikok iriniwok ka nosanetatcik matci meskanariw ota askik. Aric kirawaw ki ka wapaminawaw, osam meka nin e pimatisian, kaie kirawaw tca e pimatisiekw. 20Ani apitc ki ka nisitotenawaw ohwe: Notawi otehik ni witci tacikemaw, kirika kirawaw ki witci tacikeminawaw nitehik, acitc nin e witci tacikemitakok kitehiwak.”

21“Anahwe ka otapinak nitirakonikewiniw kaie ka sapitak, enko anahwe ka sakihitc. Notawi kata sakihew aniheriw ka sakihimitc. Kaie nin ni ka sakihaw, kaie ni ka miraw kitci kiskeritak mia e witcewak.”

22Aci itiko peikw nta owitcewakana ka tacikerispan, Jude ka icinikasoritci —namaiew ni anahwe Judas Iscariote—: “Teperitcikein, kekwan ke otci ninan miriak kitci wapamitak, nama aric iriniwok ota askik ka nosanetatcik matci meskanariw?”

23Aci minawatc itew Cecoc: “Anahwe ka sakihitc kata sapitam ka itewak. Notawiwa kata sakihiko. Ni ka natawapamanan, Notawi kirika nin, kaie ni ka witci tacikemanan otehik. 24Minawatc anahwe aka ka sakihitc nama sapitam nititewiniw. Anihe meka kaskina ka ki ici petawiekw e iteian, namaiew ni nin nititewin. Notawik otciparin, anahwe ka ki pe iciticohwitc.”

25“Ki ki witamatinawaw ohwe mekwata kiapatc e pa witci tacikemitakok. 26Anahwe ke pe nta witcihitakw, Miro Manito, ke pe iciticohikotc Notawiwa niticinikasowin otci, kaskina ki ka kiskinohamakowaw kaie ki ka mikawasimikowaw kaskina tan ka ki aititakok.”

27“Pekateritamowin ni pakitinen kirawaw otci. Enko anihe nipekateritamowin ka miritakok. Nama ki miritinawaw anihe irin ka ici miriwaniwok ota askik. Aka arimeritamokw, aka sekisikw. 28Ki ki petawinawaw ka iteian: ‘Ni ka matcan, aric kecko ki ka pe kiwe natawapamitinawaw.’ Kecpin ki sakihiekw, ki ta micta mireritenawaw e kiskeritamekw nte kitci icaian Notawi e ici taciketc. Kirawe meka kicteritakosiw patok nin. 29Aci anotc kicatc ki ki witamatinawaw, epwamoci kaskina isparik, kitci ki tca tapwetamekw, otcitciparike. 30Nama tapwe awocamec ki ka aimihitinawaw. Osam meka pe takociniw anahwe ka tiperimatc iriniwa ka nosanetaritci matci meskanariw ota askik.#14.30 anahwe ka tiperimatc iriniwa ka nosanetaritci matci meskanariw ota askik: Enko na Matci Manito. Tekaci nama ni tiperimikw. 31Patoc aric otcitakotc iriniwok kata kiskeritamok e sakihak Notawi, kaie e totamwak aniheriw e ici witamawitc kitci itotiskewak. Pasikokw! Ki ka matcanano!”

Currently Selected:

Jean 14: ATMK

Highlight

Copy