Jean 19

1Aci Pilate itew kitci pe iciwirakaniwiritci Cecoca, kitci tca pasakactehwakaniwiritci. 2Cimakanicak ki apikatamok minesikaciriw, Cecoca octikwanirik e ki actawatcik. Kapotowaniw e mikwekicinik ki piskamotarewok. 3Ki natcikapowictawewok, e tca itatcik: “Kwei, cota iriniwok okimamiwawa!” kirika e pasakwehwatcik.

4Kiapatc orowiw Pilate, e itatc anihi iriniwa e mitcetiritci: “Natotamokw! Ni ka pe orowitahaw anahwe iriniw kitci kiskeritamekw aka e ki otci miskamowak ke ki otci atamerimak.”

5Aci pe orowiw Cecoc. Apatcitaw aniheriw minesikaciriw ka ki actakaniwonik octikwanik kaie ka mikwekicinik kapotowaniw. Itikowok: “Enko anahwe iriniw!”

6Aric kotc ka wapamatcik Cecoca cota makatewokorewok ka tiperitakik acitc kotakihik cota iriniwok ka nanakatcitatcik kitci aiamihe mikiwamiriw, ki tepitepwewok e itetcik: “Tcictaskowaci tcipaiatikok! Tcictaskowaci tcipaiatikok!”

Itikowok Pilate: “Kirawaw tipirawe nta tcictaskowatakw tcipaiatikok! Nama kekociciriw ni ki otci miskamwan ke ki otci atamerimak.”

7Aci itewok cota iriniwok: “Takon ninan nitirakonikewinan.#19.7 nitirakonikewinan: Enkweriw cota iriniwok otaiamihe irakonikewiniwaw. Itactew neta kitci nipotc, osam e ki itekasotc: ‘Nin Kice Manito Okosa.’”

8Ka petak aniheriw Pilate, kirawe ki sekisiw. 9Ki pitakew omicta omikiwamik, e nta kokwetcimatc Cecoca, e itatc: “Tante wetciin?”

Nama aric ki otci kito Cecoc.

10 Pilate minawatc itew: “Nama ia ni ki wi naskamowin? Nama ia ki kiskeriten matci kitci ki iteian kitci pakitinikoin kekotc ma matci kitci tcictaskowatikoin tcipaiatikok?”

11Itew Cecoc: “Tekaci nama takon kitiperitamowin nin kitci tiperimiin, tepirak aniheriw ka ki mirisk Kice Manito. Ekoni wetci iteian, anahwe iriniw ka ki pe pakiterimitc kitci iciwirikoian ota, wir kirawe anweritakosiw patok kir.”

12Aci anotc natowi totamokopan anahwe Pilate kitci ki pakitinatc Cecoca. Aric cota iriniwok neta ki iti tepwewok: “Kecpin pakitinate anahwe iriniw, nama ki okwimesimaw Kice Okimaw!#19.12,15 Kice Okimaw: Enko na César. Kaskina meka awik ka itekasotc ‘ni okimawin’ wi cakotcihew anihi Kice Okimawa!”

13Ka petak aniheriw Pilate, ki itew kitci pe orowitirakaniwiritci Cecoca, neta wiec e ici asinikanikiterik. —“Place pavée” icinikateriw, acitc Gabbatha, hébreu#19.13 hébreu: Kirawe “araméen” e ici arimwaniwok. e ici arimwaniwok.— Neta tipaskonike tetapiwakanik ki apiw anahwe Pilate. 14Anahwe e kicikak peikwo kickwa epwamoci aiamihe makocaniwonik Pâque, wiec e apita kicikak. Aci Pilate ki itew cota iriniwa: “Enko ohwe kokimamiwaw!”

15Tepitepwewok e aitetcik: “Kitci nipotc! Kitci nipotc! Tcictaskowaci tcipaiatikok!”

Pilate itew: “Actew ia kitci tcictaskowatak kokimamiwaw tcipaiatikok?”

Itewok aniki cota makatewokorewok ka tiperitakik: “Nama taw kotak nokimaminan, enko tepirak Kice Okimaw!”

16Aci Pilate pakitinew anahweriw iriniwa kitci matcewiraritci Cecoca, kitci tcictaskowatakaniwiritci tcipaiatikok.

Cecoc e tcictaskowatakaniwitc tcipaiatikok

(Natawapata kaie Matio 27.32-44; Mark 15.21-32; Luc 23.26-43)

Minawatc ki matcewirakaniwiw Cecoc. 17Wir tipirawe ki pimitinikamew otcipaiatikoma e orowitc otenak, nete tca e icatc Octikwanikekan Matinacic ka icinikaterik. —Golgotha icinikateriw hébreu#19.17 hébreu: Kirawe “araméen” e ici arimwaniwok. e ici arimwaniwonik.— 18Ekota neta ka ici tcictaskowatakaniwitc Cecoc tcipaiatikok, cimakanica e tcictaskowatikotc. Nicipanak iriniwok mekwata kaie wirawaw e tcictaskowatakaniwiwakopanen otcipaiatikomiwak. Nictowitc ki tcimorakaniwiriw Cecoc otcipaiatikoma, aniki tca iriniwok waopimera.

19Ki itew kaie Pilate kitci masinahikaniwonik napakitikwatikocik, okitc Cecoca octikwanik otcipaiatikomirik kitci actakaniwonik, kitci tca itacterik: “Cecoc, Nazareth ka otcitc, cota iriniwok okimamiwawa.” 20Mitcet cota iriniwok ki tapwatamok aniheriw ka ki masinahikaterik. Neta meka Cecoc ka ki ici tcictaskowatakaniwitc pecotcik ni otenak. Nicto arimwewin ki apatan e masinahikatek: hébreu, latin kaie grec arimwewina.

21Aci Pilate ki itiko anahweriw cota makatewokorewa ka tiperitamiritci: “Nama ki ta pakitinen kitci masinatek: ‘Cota iriniwok okimamiwawa.’ Aric ma kitci itactek: ‘Iriniw anahwe ka ki itekasotc: Nin cota iriniwok okimamiwawa.’”

22Itew Pilate: “Ka ki masinahaman, enko ni ke masinatek.”

23Ka ickwa tcictaskowatatcik Cecoca tcipaiatikok aniki cimakanicak, ki otapinamok owikasimiriw. Newaw ki tetawonamok, papeikw e kanaweritakik. Otakopiriw kaie ki otapinamok aka e kicikwaterik e misiwekanik. 24Aititowok aniki cimakanicak: “Akawir pakickipitetan ohwe akop. Ekoci metowetan kitci kiskeritamokw anahwe nta e taciikw ke kanaweritak.” Ekoni tapwe ka iti otcitciparik anihe ka masinatekipan Kice Manito Omasinahikanik:

“Ki tetawonamok niwikasimiriw

kirika metowakatamok nititaspisowiniw.” Psaumes 22.19(18)

Ekoni mia ka ki totakik cimakanicak.

25Pecotcik Cecoc otcipaiatikomik icikapowiwakopan okawiwa, Mari, acitc otosa, acitc Clopas okoma, Mari kaie wir e icinikasoritci, acitc kotak anahwe Mari, neta otenak Magdala ka otcitc. 26Cecoc ki wapamew okawiwa, kirika pecotcik e witcikapowictakoritci anihi owitcewakana ka sakihatc. Aci itew anihi okawiwa: “Nikawi, enko ohwa kikosis.”

27Minawatc itew anihi owitcewakana: “Enko ohwe kikawi.” Kotc ka ickwa itatc anihi owitcewakana, mocak ki kanawerimeriw omikiwamirik Cecoc okawiriw.

Ka nipotc Cecoc

(Natawapata kaie Matio 27.45-56; Mark 15.33-41; Luc 23.44-49)

28Ka ickwa itetc aniheriw Cecoc, aci kiskeritam kaskina e ickwaparinik. Mamitcitc ohweriw itew: “Ni pakatamon,” kiapatc kitci ki iciwepanik aniheriw ka ki masinaterik Kice Manito Omasinahikanik.

29Takonokopan neta micta opotai e mockinepek pinekinapo.#19.29 pinekinapo: Enko na minicapo ka wisakakamik, mia pinekinapo e ispokok. Ka kitimakisitcik kaie cimakanicak minikwewakopan ko aniheriw, aka e misakitakonik. Cimakanicak ki akotitawok pakiwaniciriw#19.29 pakiwaniciriw: Mia itemakan: une éponge. pinekinapok. Minawatc ki takopitamok mictikok,#19.29 mictikok: Anihe mictikw, “hysope” icinikatew. eko tca e ici itaskohamowatcik Cecoca kitci minikweritci. 30Ka ickwa minikwetc Cecoc, ki itew: “Aci kaskina ickwaparin.”

Ekoni ka atcitaskweparitc e nipotc.

Cecoc e pataskohwakaniwitc opimera

31Tcipaiatiko kicikakopan.#19.31 Tcipaiatiko kicikakopan: Mia e pakicimotc pisimw e tcipaiatikw kicikak aci kitciparin e arwepi kicikak, cota iriniwok otci. Nama nataweritamwakopan aniki cota okimawok kiapatc kitci itakokeritci otcipaiatikomirik awiriw ka ki tcictaskowatakaniwiritci e mekwa arwepi kicikarik. Anihe e arwepi kicikak micta kicteritakonokopan cota aiamihewinik itekera. Ki tca nataweritamawewok anihi Pilata kitci iteritci kitci natwakatehakaniwiritci iriniwa ka ki tcictaskowatakaniwiritci tcipaiatikok,#19.31 kitci natwakatehakaniwiritci iriniwa ka ki tcictaskowatakaniwiritci tcipaiatikok: Ani apitc awik ka ki tcictaskowatakaniwitc ki nipo, osam e notetamotc. Wetci tca ki nataweritcikaterik kitci natwakatehakaniwitc, aka kitci tipi mackawisitc kitci iskotamotc, kirawe tca kitci kiciparinik e nipotc. minawatc acitc kitci nitanakaniwiritci owiawiwariw. 32Aci aniki cimakanicak ki pe nta natwakatehewok anihi nictam iriniwa, minawatc anihi kotakihi, tapickotc Cecoc ka ki tcictaskowatakaniwitcik. 33E iti otitickwatcik neta Cecoca otcipaiatikomirik, wapamewok aci e niporitci. Ekoni wetci aka ki otci natwakatehatcik. 34Aric peikw cimakanic ki pataskahwew opimera, ospakarik itekera, ocimakan e apatcitatc. Tecikotc orowi acokowiniw omikoriw acitc nipiriw. 35Iriniw ka tipatcimotc, wir tipirawe ki wapatam aniheriw ka ki iciwepanik. Tapwe aniheriw ka ici tipatatak. Wir tipirawe kiskeritam e tapwetc. Tipatatam aniheriw kitci ki kaie kirawaw tapwetamekw. 36Tapwe kaskina ohwe ki iciwepan kitci ki otcitciparik anihe ka masinatek Kice Manito Omasinahikanik:

“Nama otci peikw kata pikotakaniwoniw oskan.” Exode 12.46; Nombres 9.12; Psaumes 34.21(20)

37Ohwe kiapatc masinatew:

“Kata kanawapamewok anihi ka ki pataskohwatcik.” Zacharie 12.10

Cecoc ka nta nahikowakaniwitc

(Natawapata kaie Matio 27.57-61; Mark 15.42-47; Luc 23.50-56)

38Ka ickwa nipotc Cecoc, peikw iriniw, Sosep#19.38 Sosep: Joseph e icinikasotc, neta otenak Arimathée ka otcitc, ki nataweritamawew Pilata kitci matcewitwatc Cecoca owiawiriw. —Anahwe Sosep ki nosanehwepan Cecoca, aric kimotc ni ki totamokopan, osam e koctakopanen anahweriw cota okimawa.— Pilate ki ici naheritam. Ekoni ka ici matcewitwatc anahwe Sosep Cecoca owiawiriw. 39Nicodème kaie wir ki pe icaw, anahwe weckatc peikwaw ka ki natawapamaspan Cecoca e mekwa tipiskarik. Wiec mitato mitana tatawatcikan#19.39 Wiec mitato mitana tatawatcikan: Peikon kata ki ici nisitotakon: wiec 30 kilos. pimiteriw ka miromakonik ki petaw,#19.39 pimiteriw ka miromakonik ki petaw: Wetci ki petatcik aniheriw pimiteriw ka miromakonik, kitci ciconikaterik neta pakiwaniciapik ke wikwenikatewakaniwonik Cecoca owiawiriw, aka ni wipatc kitci maratanik owiawiriw. mictikocik e ki otinikaterik aniheriw pimiteriw, “la myrrhe” acitc “l'aloès” e icinikaterik. 40E nicitcik ki matcewirewok Cecoca e tca wikwekinatcik pakiwaniciwapiriw e totakik, kirika e actawatcik aniheriw pimiteriw. Ekoni ko e totamwakopanen cota iriniwok e nahikowatcik awiriw. 41Neta ka ki ici tcictaskowatakaniwitc Cecoc, takonokopan kitikan aski. Neta kitikan askik ocki matikowoc takonokopan, asinik e ki ici ocitakaniwok, aka wiskat moci awik e ki otci nahikowakaniwitc neta. 42Ekota tca ka ici nahikowatcik Cecoca, kirawe e peconakonikopanen anihe matikowoc, osam meka anihe e kicikak, peikwo kickwa ni epwamoci arwepiw kicikarik.

Currently Selected:

Jean 19: ATMK

Highlight

Copy