Jean 21
21
Cecoc e wapamikotc nicowaso#21.1 nicowaso: (7) owitcewakana
1Minawatc kiapatc Cecoc ki wapamiko owitcewakana neta rarewak sakihikanik, Tibériade ka icinikaterik. Ekoni e iciwepanikopanen ani apitc ka pe nokositc: 2Tapickotc taci tacikewakopan anahwe Simo Pien kirika Toma —Nicocan ka icinikatakaniwitc—, kirika Nathanaël —Cana otenak ka otcitc, Galilée askik itekera—, kaie okosa Zébédée,#21.2 okosa Zébédée: Enko aniki Cak kirika Jean. acitc nicw kotakihi owitcewakana Cecoc. 3Aci itew Simo Pien: “Ni ka nta pakitohwan.”
Aci kaie wirawaw itewok: “Kaie ninan, ki ka witcewitinan.” Ekoni e ici matcatcik e nta positcimetcik. Kape tipiskwa ki itanahowok. Nama otci peikw namesa patahorewok. 4E iti wapanik, aci Cecoc pe icikapowiw rarewak, nama aric nisitowinako anahweriw owitcewakana. 5Aci itew Cecoc: “Ninitcanicak, nama ia ki ki otci patahorawaw names?”
“Nama otci peikw!” itewok.
6Minawatc itikowok: “Nte iciwepinakw kitaripiwaw, kinihiwiniwak itekera! Ki ka patahorawaw!”
Ekoni e ici iciwepinatcik otaripiwawa. E apitc mitcetiritci namesa, nama wawatc kackapitewok otaripiwawa e akwasapitatcik. 7Anahwe tca owitcewakana Cecoc ka sakihaspan,#21.7 Anahwe tca owitcewakana Cecoc ka sakihaspan: Enko natake Jean e arimomitisotc, anahwe mia ka ki masinahak ohweriw tipatcimowiniw. itew anihi Piena: “Teperitciketc na!”
Simo Pien ka petak ani e itwaniwonik “Teperitciketc na,” ki piskam owikasim, e ki maninamokopanen e pakitohwatc, e tca pakope kwackotitc. 8Kotakihik owitcewakana petcimickawok e petahoratcik otaripiwawa. Nama meka micta tetawokam ki otci icitcimewakopan, wiec mitato mitana tipaskonikan irikik. 9Ka macakatcik wapatamok neta kotowaniw acitc namesa e kisiswakaniwiritci kirika pakwecikana. 10Aci itikowok Cecoca: “Pecowakok ote atita namesak ka ki patahorekok.”
11Simo Pien positcimew e akwapitatc aripiwa e mockineritci mitcet micta namesa. Mitato mitana acitc niarano mitana acitc nicto namesa ki patahorewakopan. Misawatc e mitcetiritci, nama pikopitewok aripiwa. 12Minawatc itikowok kiapatc Cecoca: “Pe nta mitcisokw.” Nama otci peikw itew: “Awin ni kir,” kaskina e kiskeritakik, enko anihi Teperitcikeritci. 13Aci Cecoc pe natcikapowictawew. Otapinew pakwecikana e matinamowatc. Kaie anahweriw namesa mamirew. 14Ekoni aci nictowaw e nokohitisotc owitcewakana otci, esko ka apitcipatc.
Cecoc kirika Pien
15Ka ickwa mitcisotcik, Cecoc itew anihi Simo Piena: “Simo, Jean okosa, kirawe ia ki sakihin patok aniki wirawaw?”
“Ehe, Teperitcikein, ki kiskeriten e sakihitan,” itew Simo Pien.
Itiko tca Cecoca: “Nakatawerimik nimaritcenicicimak.”
16Kiapatc kokwetcimew Cecoc: “Simo, Jean okosa, ki sakihin ia?”
“Ehe, Teperitcikein, ki kiskeriten e sakihitan,” itew Simo Pien.
Itiko tca kiapatc Cecoca: “Nakatawerimik nimaritcenicimak.”
17Nac nictowaw, ekoni ka ki kokwetcimikotc Pien: “Simo, Jean okosa, ki sakihin ia?”
Aci iti kackeritamokopan Pien, nictowaw e ki kokwetcimikotc Cecoca: “Ki sakihin ia?” Kiapatc itew: “Teperitcikein, kir kaskina kekocic ka kiskeritaman. Ki kiskeriten e sakihitan.”
Kiapatc itiko: “Nakatawerimik nimaritcenicimak. 18Ohwe ka witamatan, tapwe ni icinakon: mekwata e ockinikiwiipan kir tipirawe ki wespititisotai, kaie kit icatai ite wa icaipan. Aric kice iriniwiine, arimatc ki ka tcipaiatikoniskerin, kotak awik ki ka wespitikw, kaie ki ka iciwirikw ite aka wa icain.”
19Ani e itetc Cecoc, wapatahew anihi Piena tan ke ici niporitci, kitci tca otci icperimakaniwiritci Kice Manitowa. Minawatc ki itew: “Nosanehoci!”
Cecoc owitcewakana ka sakihaspan
20Pien kiwekapowiw. Wapamew e petcimoteritci otananik anihi owitcewakana Cecoc ka sakihaspan, —anahwe ka ki icictakopanen nte Cecoca e ici apirikopanen mekwata e mitcisowakopanen, e tca kokwetcimakopanen: “Teperitcikein, awin na ke pakiterimisk.”— 21Wapamew tca anihi iriniwa ka petcimoteritci Pien, minawatc e itatc Cecoca: “Teperitcikein, anahwe tca, tan ni ke iciwepasitc?”
22Cecoc itew: “Kecpin nin e nataweritaman kitci pimatisitc nac minawatc kitci takocinian, nama wiec iteritakon kir otci. Kir tca, nosanehici.”
23Ekoni kaskina awik e petaketc aka kitci niporitci anihi Cecoc owitcewakana ka sakihaspan. Aric Cecoc nama ki otci itepan Piena: “Nama wiskat kata nipo,” aric ki itepan: “Kecpin nin e nataweritaman kitci pimatisitc nac minawatc kitci takocinian, nama wiec iteritakon kir otci.”
24Enko anahwe peikon Cecoc owitcewakana ka taci tipatcimotc, e tipatatak ka ki iciwepanik, kirika ka ki masinahak. Ki kiskeritenano tca e tapwemakanik otipatcimowin.
Mamitcitc witamakewin
25Kirawe kiapatc micta mitceniw ka ki aitotak Cecoc. Kecpin kaskina papeikw ki atisokaniwonik e masinaterik, nit iteriten, nama kata tipiparinopan e irikokoskamikak kitci ki actakaniwokipan ke tatikipan masinahikana kitci ki masinahikatekipan.
Currently Selected:
Jean 21: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
