Luc 16
16
Atisokanicic: Arotakan ka ki kackitatc
1Cecoc atisokawew owitcewakana, e itatc: “Takopan iriniw e micikitatc. Tarikopan peikw otarotakana ka mitarispana kaskina e ici tatak. Kek peikwaw e kicikarik ki pe witamawakaniwiw e ki onactaritci ocoriam anihi otarotakana. 2Anahwe ka tiperitak wicamew otarotakana kitci pe natawapamikotc, e itatc: ‘Kekwan ni anihe ka ititakeian e itatcimikoin, e onactain nicoriam? Matca nta masinaha kaskina ka ki irapatcitain nicoriam. Nama meka aci ki ka ki atoskectawiin.’”
3“Anahwe arotakan iteritam: ‘Ni ka maninamakw nokimam notamirowiniw. Tan tca ke ki totaman? Nama ni tipi mackawisin kitci ki otamiroan kitikan askik, kirika ni ta waneriten kitci natotamakeian.’ 4Kek iteritam: ‘Ah! Ni kiskeriten ke totaman! Kirika ickwa onitaiane notamirowin, ni ka pitakahikok iriniwok omikiwamiwak!’”
5“Papeikw wicamew kitci pe natawapamikotc kaskina anihi iriniwa ka ki masinahamowarispana kekociciriw anihi okimama. Itew anihi nictam ka pe icaritci: ‘Tan irikik mesinahamowotc nokimam?’”
6“Itiko anihi iriniwa: ‘Mitato mitana tato kwapahikan#16.6 Mitato mitana tato kwapahikan: Itemakan e emitikociwictek: 100 “tonneaux” kekotc 100 “jarres” kekotc 100 “barils.” pimiteriw.’”
“Itew anahwe arotakan: ‘Enko ohwe kimasinahikan ka ki masinahotisoipan. Wewepita nta api. Meckotasinaha tca, tepirak niaranaw mitana tato kwapahikan kitci itasinatek e masinahamowotc nokimam.’”
7“Minawatc kotakihi iriniwa itew: ‘Kir tca, tan irikik mesinahamowotc nokimam?’”
“‘Mitato mitana tatockin mirominockwa,’#16.7 Mitato mitana tatockin mirominockwa: Itemakan e emitikociwictek: 100 “sacs.” itiko anihi iriniwa.”
“Itew anahwe ka atoskectaketc: ‘Enko ohwe kimasinahikan ka ki masinahotisoipan. Meckotasinaha tca, tepirak nicwaso mitana#16.7 nicwaso mitana: (80) tatockin kitci itasinatek e masinahamowotc nokimam.’”
8“Minawatc nanake anahwe ka tiperitak ka petaketc ka ki totamiritci otarotakana e ki wecimikotc, peikon ki mirwatcimew, osam e ki kackitaritci kitci nahiparitaritci aniheriw ka ki ici matcipariritci. Tapwe wirata, iriniwok e tiperitakositcik ota askik, kirawe wirawaw kackitawok ko e natowi totakik ke ki totcikaterik kitci nahiparihitonaniwonik patok iriniwok ka waseatisitcik.”
9Kirika kiapatc ki itew Cecoc: “Nin kaie ki witamatinawaw: mirwapatcitakw kicoriamiwaw ota askik e takok, anihe ke ki wecimikoekw, eckam kirawe kitci mitcetitcik kikwimesiwawok. Ickwa tca tcakinamekwe kicoriamiwaw, kata mireritam Kice Manito kitci pitakahitakw kakike tacikewinik.”
10“Iriniw ke ki asperimototawakaniwitc kitci mitatc kekociciriw aka orina e kicteritakonik, matci kaie kata ki asperimototawakaniwiw kitci mitatc kekociciriw ka kicteritakonik. Minawatc iriniw aka ke ki asperimototawakaniwitc kitci mitatc aniheriw aka ka kicteritakonik ka ki mirakaniwitc kitci mitatc, peikon nama kata ki asperimototawakaniwiw kitci mitatc kekociciriw ka kicteritakonik. 11Kecpin tca kirawaw aka ki otci miro irapatcitaiekw kicoriamiwaw ota askik, awin tca ke asperimototatakw kitci mitaiekw tapwe micikitawin? 12Kecpin aka e ki otci miro irapatcitawekw kotak awik otirapatcitcikan e mitawekw, awin ke miritakw tipirawe ke tiperitamekw?”
13“Nama awik kata ki atoskectawew nicw okimawa. Matci peikw kata cikerimew, kotakihi tca matci kata sakihew. Kekotc peikw kata miro atoskectawew, kotakihi tca kata atimikapowictawew. Nama ki ka ki atoskectawawaw Kice Manito kirika tca mekwata coria e atoskectamekw.”
Kotakeriw ka ki aitetc Cecoc
(Natawapata kaie Matio 11.12-13; 5.31-32; Mark 10.11-12)
14Mekwata Pharisien iriniwok kaskina petawewakopan Cecoca e aiteritci, papirotawewakopan. Sakitawakopan meka coriariw. 15Ki itikowok Cecoca: “Kirawaw iriniwok ka nataweritamekw kitci iterimitakok iriniwok ‘icikowisk itatisiwok.’ Aric Kice Manito ki kiskerimikowaw e icinakosiekw kitehiwak. Aniheriw meka ka ici kicteritakik iriniwok, wir Kice Manito cikeritam.”
16“Kinowec mirwapatanipan Moïse otirakonikewin acitc ka ki pa nikan tipatcimotcik omasinahikaniwawa, nac apitc ka pe takocik Capatis. Esko tca ki pe takocik Capatis, aci Mirwatcimowin tipatcimonaniwon, Kice Manito Okimawin ka otci kiskeritcikaterik. Kaskina awik tca wikokwe pitakewok neta, aka aric e wi nosanetatcik otirakonikewiniriw. 17Kirawe aric kata wetanopan keskat aka kitci takok wasko kirika aski, patok aka kitci takok mawotci e apicacik itewin kotc e itisinatek irakonikewinik.”#16.17 irakonikewinik: Wi itemakanotake: Kice Manito otirakonikewinik.
18“Iriniw ka matceticohwatc okoma, e tca nipowitc kotakihi iskwewa, pacikwatisiw. Kaie iriniw ka nipowitc iskwewa e ki matceticohwaritci onapema, peikon kaie wir anahwe iriniw pacikwatisiw.”
Iriniw ka micikitatc kirika Lazare
19“Takopan iriniw e micikitaspan. Micta mirwaspisokopan. Ka mawotci mirwekinik kirika mocak ka mawotci misakitakonik wikasiriw apatcitakopan. Tato kickwa mirwatcitahitisokopan e micta ko miro mitcisokopanen. 20Takopan kaie kotak iriniw e kitimakisispan, Lazare icinikasokopan. Micta akosikopan e omikitc kaskina ocakak. Taci mackocinokopan nikanik otickwatemirik anihi iriniwa ka micikitaritci. 21Kata ki mireritamokopan kitci mitcik e pinekitcikeritci, mitcisowakanatikok e otci papakitinik, anihi ka micikitaritci iriniwa e ici apirispana. Wawatc kaie atimwa pe nta nanokwatamiripana aniheriw omiki, e apitc omikispan.”
22“Kek anahwe iriniw ka kitimakisitc ki nipo. Aceriwa ki iciwiriko neta pecotcik Abrahama e ici tacikeritci.#16.22 Abrahama e ici tacikeritci: wakwek. Kaie wir anahwe iriniw ka micikitatc ki nipo, kirika ki rikwaskatakaniwiw. 23Micta nekatcitakopan neta ka ici taciketcik ka nipotcik.#16.23 ka ici taciketcik ka nipotcik: Mia itemakan: l'Hadès. Ki itapiw icpimik. Wapamew Abrahama acitc Lazara e witcikapowictakoritci. 24Aci nte ici tepwew: ‘Notawi Abraham, kitimakerimici! Pe iciticoho anahwe tca Lazare onoskotc otcitci kitci akotitatc nipik, kitci tca pe takapawotatc niteriniriw. Ni micta meka nekatcitan ota ickotek.’”
25“Aric itew Abraham: ‘Nosim, mikawi ma kir nipara e ki mirikoin kekocica mekwata ka pimatisiipan. Lazare tca wir kaskina wiec ici arimiparipan. Aric ota kakitcihakaniwiw, meckotc tca kir ki nekatcitan. 26Kirika mictahi waraw neta nictowitc ka ici tacikeiekw kaie tca ninan. Nama tca awik kata ki pimotew neta kitci ki natawapamitakw, nama kaie awik ni ka ki pe natawapamikonan nte kitci ototetc ka ici tacikeiekw.’”
27“Iriniw ka micikitatc itew: ‘Ki pakoserimitin, notawi, kitci iciticohwotc Lazare nete notawiwa omikiwamirik. 28Niaraniwok neta nicimak. Ni pakoserimon tca Lazare kitci nta nanakasomatc anihi nicima kitci aiekwamisiritci, aka tca kitci pe icaritci kaie wirawaw ota ka ici nekatcitakaniwonik.’”
29“Abrahama itiko: ‘Aniki kicimak kata ki tapwatamok aniheriw weckatc ka ki ici masinahamiritci Moïsa acitc ka ki pe nikan tipatcimorispana Kice Manito Omasinahikanik. Enkweriw ke ki natotawatcik.’”
30“Anahwe ka micikitatc itew: ‘Notawi Abraham, nama kata tipipariniw kitci ki otci nisitotakik. Kecpin aric awiriw aci e ki niporitci pe natawapamikotawe, aci nta kata kweskatisiwok.’”
31“Aric itiko Abrahama: ‘Kecpin aka wa natotawekwen Moïsa kirika anahweriw ka ki pe nikan tipatcimorispana, nama peikon kata wi pamitamok misawatc kecpin wapamatawe awiriw e ki niporitci minawatc tca e pe pimatisiritci.’”
Currently Selected:
Luc 16: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
