Mark 7
7
Okice omocomiwawa ka ki ici kiskinohamakotcik
(Natawapata kaie Matio 15.1-9)
1 Pharisien iriniwok kirika atita ka kiskinohamaketcik cota aiamihe irakonikewiniw ki mawotcihitowok waska Cecoca e ici tacikeritci. Jérusalem otenak ki ototewakopan. 2Aci wapamewok atita Cecoca owitcewakaniriw e mitcisoritci aka wirowatc e ki otci kasitcitceritci wewerita, kotc e itacterik cota aiamihe irakonikewinik kitci totcikaterik. Iterimewok, ometciwiriwa cota aiamihewinik itekera.
3Tapwe meka ekoni e itotisketcik aniki Pharisien iriniwok kaie kaskina kotakihik cota iriniwok. Kicteritamok ka ki ici kiskinohamakotcik okice omocomiwawa: nama mitcisowok patoc wewerita e kasitcitcetcik. 4Kaie nte e ototetcik ka ki ici atawaniwonik, nama mitcisowok patoc wewerita e kasitcitcetcik. Mitcet kotakeriw nosanetawakopan weckatc ka ki pe totcikaterik, mitowiriw ohweriw: wewerita kitci totcikatek e kisisipatakaniwoki minikwakana, opotaia, askikok ka piwapiskowitcik acitc nipakanatikwa.
5Aniki Pharisien iriniwok kirika ka kiskinohamaketcik cota aiamihe irakonikewiniw kokwetcimewok Cecoca: “Kekwariw aka wetci sapitakik kiwitcewakanak aniheriw kiskinohamakewiniw ka ki pe totakik weckatc kitaniskotape kimocominapanak? Kekwariw wetci mitcisowaketcik otcitciwaw, e ometcitcitcetcik cota aiamihe irakonikewinik itekera?”
6Aci itikowok Cecoca: “Tapwekopan Ésaïe, anahwe weckatc ka ki nikan tipatcimospan, e arimomitakopanen kirawaw ka miro iriniwikasoiekw, e ki masinahak:
‘Itew Kice Manito:
Ni kicterimikok iriniwok e mirwatcimitcik,
otitewiniwaw e apatcitatcik,
aric otehiwak nama ni kicterimikok.
7Nama wiec irapataniw e nipiskoctawitcik.
Aniheriw meka ka ici kiskinohamaketcik
namaieriw ni Kice Manito okiskinohamakewin,
iriniwok ni tepirak otirakonikewiniwaw.’” Ésaïe 29.13
8Kiapatc itew Cecoc: “Ki pakiteritamwanawaw Kice Manito otirakonikewin, tepirak e wi nosanetaiekw aniheriw iriniwok ka iteritakik kitci ici kicteritcikaterik e pimatisinaniwonik.”
9Minawatc kiapatc itew: “Kit iteritenawaw mirwacin ka totamekw e wepinamekw Kice Manito otirakonikewin, kirawaw tca ka ici kicteritamekw kitci ici pimatisinaniwok kitci apatcitaiekw. 10Moïse ki itew:
‘Kicterimik kotawi kaie kikawi.’ Exode 20.12; Deutéronome 5.16
Kaie ohweriw:
‘Anahwe ka marerimatc otawiwa kekotc okawiwa,
acteriw kitci nipahakaniwitc.’ Exode 21.17
11Aric kirawaw ki kiskinohamakanawaw aka arimatc kitci witcihatc awik onikihikwa e kitimakisiritci, kecpin e itatc, ‘Nama ki ka ki witcihitinawaw, osam meka e ki ickwa nespi tapweian kitci aiamihe pakitinaman Kice Manito otci, anihe ke ki miritakokipan.’ 12Iteritamotake, ‘Nama aci arimatc ni ka witcihawok notawi kaie nikawi.’ Ki pakitinawaw anahwe kitci tapweritak aniheriw. 13Ani e totamekw, ki pikotawanawaw Kice Manito otitewin, ani e ici kiskinohamakeiekw. Nipara kotak kekocic ki totenawaw mitowi anihe kitci ki otci onicinitcik iriniwok.”
Anihe ke ki ometcickakoikw kitcitcakocinak
(Natawapata kaie Matio 15.10-20)
14Minawatc Cecoc ki wicamew iriniwa ka ici mitcetiritci kitci pe natawapamikotc, e tca itatc: “Kaskina natotacikw ohwe ke iteian, kitci miro nisitotamekw: 15Nama ometcickako iriniw otcitcakocik, e ki mitcik kekociciriw. Tepirak otehik ka orowiparinik, enkweriw ka otci iterimikotc Kice Manitowa ‘ometciw.’ [ 16Wewerita natotamokw ohwe, kirawaw ka kackitaiekw kitci nisitotamekw.]”#7.16 Nama takon ohwe mitcet weckatc masinahikanik.
17Ka ickwa nakatatc Cecoc nta iriniwa, ki pitakew mikiwamik. Ki pe natawapamiko owitcewakana e kokwetcimikotc aniheriw ka wi itespan. 18Aci itew: “Kaie kirawaw ia, nama ki kackitanawaw kitci nisitotamekw? Nama ia ni ki nisitotenawaw, awik e mitcik kekociciriw, namaieriw aniheriw ka otci iterimikotc Kice Manitowa ‘ometciw.’ 19Nama meka otehik pitakepariniw, aric omisitak, minawatc tca pe orowipariniw.” Aniheriw ka itetc Cecoc, witamopan matci kaskina mitcimiriw kitci ki mitcinaniwonik.#7.19 Itasinateriw meka otaiamihe irakonikewiniwak cota iriniwok aka kitci mitcikik atita mitcimiriw.
20Kiapatc ki itew: “Aniheriw ka orowiparinik e maratanik iriniw otehik, enkweriw ka ometcickakotc otcitcakocik. 21Otehik meka, ekota e otciparinik e matci iteritak. Ekota tca minawatc e otciparinik e matci pimatisitc, e kimotitc, e manohotc, 22e pacikwatisitc, kaie e nataweritak kitci tatak e ici tatamiritci owitc iriniwa. Ekota kaie ka otciparinik awik e matcitwatc, e wecimiwetc, e matcatikositc, e asawakeritak, e mareritciketc, e sasekatc, kaie e kiwockweritak. 23Kaskina anihi matci kekocica, otehik orowipariniw iriniw. Ekota tca wetci ometcickakotc otcitcakocik itekera.”
Iskwew, kotak askik e otcitc, tapwerimew Cecoca
(Natawapata kaie Matio 15.21-28)
24Aci neta matcaw Cecoc, nete itekera e icatc pecotcik otenariw ka ici takonik, Tyr ka icinikaterik. Peikw mikiwamik ki pitakew. Ki nataweritam aka kitci kiskeritakonik e taciketc neta, peikon aric ki petakaniwoniw.
25Tapan nta peikw iskwew, otanisa e ki pitciteheckakotc matci manitowa. Ki petakew e arimomakaniwiritci Cecoca. Ki tca natawapamew e nipiskoctawatc. 26Neta Phénicie askik otciwikopan anahwe iskwew, Syrie askik itekera. Aci ki pakoserimew Cecoca kitci orowiticohwaritci anihi matci manitowa, otanisa ka ki pitcickakoritci. 27Aci itew Cecoc: “Pakitinik awacak wirctamiwaw kitci mitcisotcik kitci tipiparitcik. Nama meka mirwaciniw e maskamakaniwitcik omitcimimiwaw, atimwa tca kitci iciwepinamowakaniwiritci.”#7.27 Arimotamotake ota Cecoc e ki mirakaniwitc wirctam cota iriniwa kitci witcihatc.
28Aci itiko anihi iskwewa: “Tapwe anihe ka itein, Teperitcikein, aric wawatc atimok kaie wirawaw mitciwok cipa mitcisowakanatikok mitcimiriw, awaca ka ki panitcikeritci.”
29Aci itiko Cecoca: “Ekoni ici kiwe. Osam ani e ki ici naskamoin, aci ickwa orowickako matci manitowa kitanis.”
30Ekoni ka ici kiwetc. Ki tca wapamew onitcanica e miciniritci nipakanatikok. Aci tapwe ki ickwa orowickakopan anihi matci manitowa.
Iriniw ka kipitetc kaie aka e arimwetc e kikehakaniwitc
31Aci matcaw Cecoc nta Tyr otenak. Nte ki icaw Sidon otenak. Minawatc nte ki ici pe kiwew Galilée sakihikanik, e capotoweckak aniheriw askiriw, Mitato Otenaw ka icinikaterik. 32Ki pe iciwitowakaniwiw peikw iriniwa ka kipiteritci, aka kaie tapwe e nitaweritci. Ki tca pakoserimakaniwiw Cecoc kitci takinatc kitci kikeritci. 33Aci iciwirew Cecoc anihi iriniwa, wircikewaw kitci taciketcik. Ki icitcitcectaw otokarik. Minawatc ki takitotawew osikowinapo oterinirik. 34Minawatc ki icpapiw wakwek e racitamotc kirika e itatc anihi iriniwa: “Effata.” Aniheriw ka itetc, wi itemakaniw araméenarimwewinik: Cena.
35Tecikotc ki iti miro petam anahwe iriniw kaie wewerita ki iti kackitaw e arimwetc. Aci miro nisitotakosiw. 36Ki itikowok Cecoca aniki iriniwok nta ka tacikewaspan aka kitci pamatisoketcik. Aric kirawe e otcinehikotcik, kirawe kiapatc pamatisokewok. 37Micta kice mamiskateritamok. Itewok: “Kaskina ka aitotak, kaskina micta mirwaciniw! Wawatc totam kitci petamiritci ka kipiteritci kaie aka ka kackitaritci ka arimweritci kitci miro nisitotakosiritci!”
Currently Selected:
Mark 7: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
