Genesis 16
16
Sahrennákerate Ne Ishmael
1Nón꞉wa ne Sarai, né꞉ne Abram ró꞉ne, iáh teiowiraién꞉tahkwe. Iohnhaʼtsheraién꞉tahkwe Egyptró꞉non naʼkanekwenhsó꞉ten Hagar konwá꞉iatskwe, 2tánon ne Sarai wahawénhahse ne Abram, “Satkáhthohs, ne Roiá꞉ner iáh tehakerihwá꞉wis naonkewiraién꞉taʼne; wás akehnhá꞉tshera skátne tsá꞉rat; nontié꞉renk ne enkakwé꞉ni naonkewiraién꞉taʼne nahonhá꞉ke naontá꞉we.” Ne Abram waharihwanón꞉weʼne tsi nahó꞉ten waʼkén꞉ron ne Sarai. 3Ká꞉ti, Abram ó꞉nen oié꞉ri niioserá꞉ke Canaan aotonhontsá꞉ke shiehanákerehkwe, né Sarai, né꞉ne Abram ró꞉ne í꞉ken, iaʼoiaʼténhawe ne Hagar ne Egyptró꞉non aohná꞉tshera, tánon Abram iahaʼonkwé꞉ton tsi ní꞉ioht ne ró꞉ne akénhake. 4Katíʼ skátne wahiá꞉rate nʼAbram tánon ne Hagar, tánon ʼontháwa nowirá꞉ʼa. Nó꞉nen shónttoke tsi iowiraientá꞉sere, Sók waʼokèn꞉ron ne Sarai.
5Eʼthó꞉ne ne Sarai sahawènhahse ne Abram, “Tiorí꞉wa tsi niwahétken tsi nonkatié꞉rase í꞉se kíʼ entsisà꞉raʼne! Í꞉i iekát꞉kawenh nakehnhá꞉tshera né senentshà꞉ke né꞉ne tahsahrhó꞉ton, tánon shaʼkarihwatshén꞉ri tsi iowiraientá꞉sere, waʼtewakatkenʼhkerènhthen. Aiá꞉wens ne Roiá꞉ner ahshonkenirihwènhten ónhka ne teteniiáhse tieié꞉rits; í꞉se káton í꞉ʼi!”
6Ók nʼAbram washakawènhase ne Sarai, “Í꞉se tehseniarotárhon ne sahnhátshera; thóh naʼtié꞉raʼs tsi nitehsahská꞉neks.” Eʼthó꞉ne ne Sarai tsi naoteʼniakátstattshe ne Hagar, ne waʼkarihón꞉ni ne Hagar saioté꞉kwaʼse.
7Ne Roiá꞉ner raoronhiaʼkeró꞉non waʼthiatátken ne Hagar tsi tiohné꞉kote ne iawentsathenhá꞉ke né꞉ne tsi nieiothahí꞉non ne Shur 8tánon ne raoronhiaʼkehró꞉non wahén꞉ron, “Hagar, í꞉se ne Sarai aohnhá꞉tshera í꞉ken, kaʼnontáhse kaʼó꞉ni nón꞉we niahesenonhátie?” Waʼkén꞉ron, “Takaté꞉kwaʼse ne wakéhnhaʼs Sarai.” 9Ne Roiá꞉ner raoronhiaʼkehró꞉non sahrènhahse, “Thóh ionsá꞉se tsi tkènteron ne sánhas, tánon sewén꞉narak.” 10Eʼthó꞉ne ne Roiá꞉ner raoronhiaʼkehró꞉non sahrènhahse, “Kwáh enkonhiónhnien ne tsi nienhsathwatsí꞉rine ne kwáh aesewatiohkowáhnha né꞉ne iáh thaón꞉ton nahonwanáhshehte. 11Tánon ne Roiá꞉ner raoronhiaʼkehró꞉non sahrènhahse, satahónhsatat, ó꞉nen sawiraientá꞉sere, tánon ensanekenhteronʼtsheraièn꞉taʼne; ó꞉nenk tsi Ishmael enhtsenà꞉tonhkwe; aseʼkénh ne Roiá꞉ner wahothón꞉teʼne tsi niió꞉re tsi saronhiá꞉ken. 12Ók kiʼ ne tshièn꞉ʼa tho ní꞉ioht tsi enhrónhnheke tsi ní꞉ioht ne iáh tekarihonnién꞉ni tewahònhtes; kwáh onkweʼtakwé꞉kon enhshakotkón꞉ten, tánon kwáh onkweʼtakwé꞉kon tsi enhonwatkón꞉ten, tánon kwáh iáh shaʼhotirí꞉wa thakénhake tsi nokwá ne rontátenonhkweʼ.”
13Hagar ʼontateriʼwanón꞉tonhse kí꞉ken kariʼwanontónhtshera, “Kwáh ónhte kenh rí꞉ken ne Ni꞉io tánon shé꞉kon nikónhnhe?” Iaʼtiorihwaién꞉taʼse niahoná꞉ton ne Roiá꞉ner né tsi ráonha rahthará꞉nihkwe ken kíʼ nikahsennó꞉ten “I꞉se né Sewenní꞉io né teská꞉nere.”#16.13 Ne Hebrew né El-roi né꞉ne kén꞉tons “I꞉se ne Ní꞉io ne teská꞉nere.” 14Ne káti aorí꞉wa nonkwehshón꞉ʼa ne konwanáʼtónhkhwa ne iohnáwerote tsi naʼtetsátere ne Kadesh tánon ne Bered. “Né Iohnáwerote ne Ronhnheʼón꞉we né Tehakká꞉nere.”
15Ne Hagar wahonákeratste ne Abram raonekenhterón꞉tshera; tánon ne Abram Ishmael wahoná꞉tonhkwe ne raonekenhterón꞉tshera, tsi niká꞉ien ne Hagar wahawennákeratste. 16NʼAbram shaʼté꞉kon-niwáhsenʼ iá꞉iaʼk shaʼtehaohseriiá꞉kon nó꞉nen né Hagar shahawennákeratste né Ishmael.
Currently Selected:
Genesis 16: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
