Genesis 33
33
Jacob Tánon Ne Esau Wahthiatát꞉ken
1Nón꞉wa ne Jacob wahataráh꞉ketsko tánon wahóken ne Esau tá꞉re, tánon kaié꞉ri tewenʼniawe niháti rón꞉nonhkwe tahón꞉ne, sók kiʼ watesakhokhashiónko ne ratikʼsahokonhas tsi natetiáʼtere ne Leah tánon ne Rachel, tánon ne tekenihiase keninhá꞉tshera. 2Né kenihnhá꞉tshera tánon nakó꞉tihiohokonhas ohénton wakonwenhnón꞉niate, eʼthó꞉ne ó꞉nenh ne Leah tánon nakohiohó꞉konha, tánon ne Rachel tánon ne Só꞉se kwáh oná꞉ken wahonónh꞉niate. 3Rahonhatsíwa Jacob raothihénton niaháre, tsiáta niaká꞉ienhte ohontsàke watatʼtsakete, tsi niió꞉re iahá꞉rahwe rahiaʼták꞉ta ne iathatekénha. 4Ók ne Esau hiatarahtate Niatahoterate, tánon tahohiéna, tánon iahoniása tánon wathonoronhkwahniónton, tánon wathasénhtho. 5Nó꞉nen ne Esau sonsahatarahkétsko tánon washakóken ne konhnónkwe tánon ne ratiksahokónhas, wahén꞉ron, “Ónhka kiʼ ken sewathorohsenthatie?” Jacob wahén꞉ron, “Né꞉ne ratitsaokonhas ne rahónha Rawenni꞉io tsi nithoriwaieri tsi thó꞉wi ne sanhá꞉tshera.” 6Eʼthó꞉ne ne raonhatsherashón꞉as ákta waʼkené꞉we, nó꞉nonha tánon nakotihiohokónha, tánon wathontsiakete; 7eʼthó꞉ne Leah nón꞉wa tánon nakoiohokónha ákta sahonhné꞉te tánon watthontsiakete; tánon nó꞉nakenkha Só꞉se tánon ne Rachel ákta sahné꞉te, tánon wáthiatsiakete. 8Ne Esau wahén꞉ron, “Onh nahó꞉ten tsí꞉tons kíʼ ken tsi nihonahtiókwah watiakwahtátken?” Ne Jacob watharihwasehrahko, “Ne nahkhetshénhri nahtsianer nahontahakerihwá꞉wahse.” 9Ók né Esau wahén꞉ron, “Ó꞉nen iatewatiérise, tiathatéken; satewé꞉ienton tsi nahó꞉ten saien ne iateshiá꞉ti.”
10Ne Jacob wahén꞉ron, “Iáh, konhianithénthase; thoʼka waketsénhri nahonkerientí꞉io tsi nó꞉kwah ní꞉se, eʼthó ká꞉ti tséna tsi nitkákʼkhawas ne katsanà꞉ke; asèken orihwihiohónwe nahiontkátho ne skonsàke kwáh né꞉ne iontkáthos tsi rahkón꞉sonhte né Rawenni꞉io, tsik sénhak wastiéna tsi nihiawehrientí꞉iot. 11Ahsatʼthonʼtátsheke tsénah nahkatathawí꞉tshera tsi tsesahawitenhni, tsioríhwa ne Rawenni꞉io tsi nithoriwaieri nakónhake, tánon thá꞉kawi akwé꞉kon tsi natewakatón꞉hontsoni.” Jacob wahó꞉rehke tánon wahá꞉iena.
12Ethó꞉ne ne Esau wahén꞉ron, “Ah꞉nion iétene, tánon kwáh tsatákta enkaténhti.”
13Ók ne Jacob wahá꞉wenhase, “Né ratsianer roteriénhtareh nétho ratitsaokónhas iáh tehatishátstes tánon nétho teiotinakaronhtónhas ó꞉ni ne kaiatákeras tánon ne tionhnónskwahrons, tanon ne kontitshénens ne kontstarónhtha, tsi Í꞉i khenikón꞉rahre; tó꞉ka sóhtsi ahietihiatót꞉thakwen ne ahí꞉nonh niió꞉re niakón꞉ne ne sewenhnísehra, konhtikwé꞉kon ne teiotinakaronhtónhas tánon ne kaiatákeras enkonníheie. 14Áhʼnion Natsiáner ohénton rotohestáhkwen ne raonhátshera, tánon kwáh skenenhashónha tsi onà꞉ken enkéh, né entewanónh꞉ton tsi ní꞉ioht ne katshénens tsi rónh꞉ne nakkhénton tánon ne ratitsaokónhas, tsi nió꞉re ienhinonhterahne natsiáner ne Seir nónh꞉we.”
15Eʼthó꞉ne ne Esau wahén꞉ron, “Tó꞉kati thoʼkàrah niháti nonhkweshónha né iakwahkwekonhátie í꞉seh konhionhkwé꞉ton.” Ók ne Jacob wahén꞉ron, “Onh nahó꞉ten aoríhwa natsiáner thóh niió꞉re tsi ahontahorihwaiérihke nakonhá꞉ke?” 16Sók ne Esau kwáh né sahenhnísera Seir nón꞉we nionhsáre. 17Ók ne Jacob Sukkoth ne nón꞉we niaháre, thoʼnónwe iahathatenonshion꞉nien, tánon wahsakoskwahérase ne tionhnónskwahrons; ne ká꞉ti aoríhwa ne nón꞉we ne konwanatónkwa Sukkoth.#33.17 Né Sukkoth né Hebrew né꞉ne kentons “Waskwahká꞉renhre nikanonsaha.”
Né Jacob Iahará꞉we Ne Shechem Nón꞉we
18Ne Jacob kwáh skenʼnenk tsiaharawe ne tsik kanátaien ne Shechem né ahotonhonsiake ne Canaan, né tsi nathontareh ne Paddan-aram; tánon kanatákta nón꞉we nahathatosehróten.
19Tánon né tsi tahawatsirahtátie ne Hamor, né꞉ne Shechem roʼníha, né wahaʼhontsanínon tsi nón꞉we nihothatosehrothakwe nenskat tewenʼniawe kawistarákens wahakáriake.
20Thoʼnónwe warón꞉ni ne ietsenharáhkwa tánon né꞉ne El-Elohe-Israel wahanátonkwe.#33.20 El-Elohe-Israel: né꞉ne kentons “Israerʼró꞉non Raoti-Ní꞉io.”
Currently Selected:
Genesis 33: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
