Genesis 38
38
Judah Tánon Ne Tamar
1Kwáh tókaʼ tho sikahá꞉wi nétho Judah wahshakotiaʼtontakwahse ne rontateʼkoʼokón꞉ʼahs tánon thóh nón꞉we niahá꞉re skátne ionsahiátsien ne rón꞉kwe Hirah ronwá꞉iats, ne nenʼne tsi kanà꞉taien ne Adullam nón꞉we nihanákerehkwe. 2Thóh nón꞉we ne Judah waʼthiaʼtátken ne nitioión꞉ha tsonthonwí꞉sen ne ne Canaanró꞉non naʼkaiaʼtó꞉ten tánon ne roʼnihkénhen ne ne Shua ronwá꞉iatskwe. Wahotíniake. 3Ontháwa tánon wahonákeratste naonekenhterón꞉tshera Er wahoná꞉tonhkwe. 4Sók shé꞉kon sontháwa tánon wahonákeratsteʼ ne aonekenhterón꞉tshera ne ne wahoná꞉tonhkwe Onan. 5Sók shé꞉kon sontháwa sahonákeratste naonekenhterón꞉tshera, tánon Shelah wahoná꞉tonhkwe. Chezib nón꞉we ié꞉weʼskwe nó꞉nen saonákeratste. 6Ne Judah waonahkwatshénráʼse ne thakowá꞉nen roién꞉ʼa Er, Tamar konwá꞉iats. 7Ók ne Er, ne ne Judah thakowá꞉nen roién꞉ʼa kwáh í꞉ken tsi ionkweʼtahetkén꞉tahkwe raohén꞉ton ne Roiá꞉ner; tánon ne Roiá꞉ner wahononwariá꞉kon. 8Eʼthó꞉ne ne Judah wahawènhahse ne Onan, “Wáhs skátne tsá꞉rat ne tsatateʼkenʼkénhen ró꞉nehkwe, tánon ne saterihwahténtiaʼt tsi nihoterihwaièn꞉ni ne shakaonháhfha naonhá꞉ke; tánon sheiehiá꞉ron ne ratiksaʼokón꞉ʼahs ne tsatateʼkén꞉ʼa raorihwá꞉ke.” 9Nok ne Onan sihoterienʼtaraʼstsíhon ne ratiksaʼokón꞉ʼahs tsi iáh ráonha thahshakohioʼokón꞉ʼake, katiʼ tsi níiorí꞉wake skátne enhiá꞉rate ne iatateʼkenʼkénhen ró꞉nehkwe ne ká꞉nen ohontsà꞉ke nienhastaraié꞉raʼte, ne katíʼ ne tóhsa ahowiraièn꞉taʼne ne iatateʼkenʼkén꞉ʼa raorihwá꞉ke. 10Tsi nahá꞉iere kwáh í꞉ken tsi karihwáksen í꞉ken raohén꞉ton ne Roiá꞉ner, sók kíʼ nenʼ ne ʼeh né Roiá꞉ner wahononhwariá꞉kon. 11Eʼthó꞉ne ne Judah wahshakawènhahse ne shakosá꞉fha Tamar, “Iaʼnihnéha nionsá꞉se tánon iaʼskón꞉tahk tsi satehréʼons tsi niió꞉re ne riién꞉a Shelah ienhatehiá꞉ron”—aseʼkénh ráonha ó꞉ni wahanonhtónnionhwe nontié꞉renʼk nón꞉neʼeh enhrénheie, tsi kíʼ nihotiiaʼtawén꞉ʼen ne shakohtsiʼokón꞉ʼahs. Sók kiʼ ne Tamar saionhtén꞉ti ronwaʼnihneha tsi thonónhsote nionsá꞉ien.
12Ó꞉nen kwáh kenʼ niió꞉re sitiotohétston ne Judah shakokstén꞉ha, ne ne Shua shakoienʼkénhen, waʼkénheie; nó꞉nen ne Judah iáh shihshotshonhniónhkwen, ráonha tánon ne ronatén꞉ro Hirah ne ne Adullamró꞉non Timnah nón꞉we niahá꞉ne, thóh nón꞉we tkonwatinonhwé꞉riaʼkskwe ne raotshenenʼó꞉konʼs teiotinaʼkarontón꞉ʼa. 13Saiontatró꞉ri ne Tamar, “Ne iasá꞉fha Timnah nón꞉we wá꞉reh nahshakononhwé꞉riaʼke ne raotshenenʼó꞉kon teiotinaʼkarontón꞉ʼa,” 14waʼkaríhsi ne iakotehreʼónhskon akotsherónnia, tánon ontaʼaró꞉roke, waʼtewatatʼwawenʼékhon, tánon tho ohwahákta óntien ne tsi iotenʼenhraká꞉ronte ne Enaim, ne ne tsi nieiothahí꞉non ne Timnah. Aseʼkénh ontkáhtho nétho Shelah tsi ó꞉nen rotehiá꞉ron, ók iáh kíʼ á꞉reʼkho tekonwarihwá꞉wi ne ráonha ahotíniake. 15Nó꞉nen ne Judah shahá꞉ken, tsi waʼhanonhtónnionʼse wathonwisenʼtsheráksen nenʼneʼeh naʼkaiaʼtó꞉ten, aseʼkénh iotaʼaró꞉ronhkwe. 16Kaiaʼtákta niahá꞉re tsi nón꞉we nikentskwá꞉rahkwe ohwahákta, tánon wahén꞉ron, “Káts, takeríhon ne skátne aetiá꞉rate,” aseʼkénh iáh tehoterién꞉tarahkwe tsi ne ne shakosá꞉fha í꞉ken. Waʼkén꞉ron, “Nahó꞉ten énhskon, tsi aón꞉ton skátne aetiá꞉rate?” 17Waʼtharihwaʼserá꞉ko, “Kaiaʼtákeras owí꞉ra entkoniatenahskwateniéhten.” Tánon waʼkén꞉ron, “Thó꞉ne ók tsik nahó꞉tenʼk enhsatkaraièn꞉tahkwe, tsi niió꞉re entehtshaténiehte ne kaiaʼtákeras.” 18Wahén꞉ron, “Nahó꞉ten akatkaraièn꞉tahkwe naontakón꞉ion?” Tánon waʼtkarihwaʼserá꞉ko, “Ne thí꞉ken katsihkwénhton tshèn꞉nare tánon ne sahserí꞉ie, saníhtshien, tánon ne satèn꞉nits ne íhshawe.” Sók kíʼ ne tahawíhon, tánon skátne wahiá꞉rate, tánon ontháwa naiowiraièn꞉taʼne ne ne ráonha tho naháhsa. 19Eʼthó꞉ne tonsaká꞉taʼne tánon tsi tionónhsote nionsá꞉we, ontaʼarohróksi ne sontsherónniaʼte né watshonʼnionhkwá꞉tha.
20Nó꞉nen ne Judah shiahoténiehte ne kaiaʼtákeras owí꞉ra, ne ne Adullamró꞉non iahoiaʼténhawe tánon taontaháhawe tsi nahó꞉ten ne ratkaraientahkwén꞉ni ne ión꞉kwe, iáh teshaiaʼtatshenrion. 21Wahshakoriʼwanontonniónhahse ne kanatakonhró꞉nonʼs, “Kaʼnieiawé꞉non thí꞉ken kaiaʼtón꞉ni iakohsèn꞉naiens wathonwisenʼtsheráksen naʼkaiaʼtó꞉ten tsi áonha ne Enaim ohwahákta kenskwá꞉rahkwe?” Ók wahonní꞉ron, “Iáh ónhka ne kaiaʼtón꞉ni iakohsèn꞉naienʼs ne wathonwisenʼtsheráksen naʼkaiaʼtó꞉ten kén꞉ʼen té꞉weʼskwe.” 22Sók kíʼ tsi thén꞉teron ne Judah nionsá꞉re, tánon wahén꞉ron, “Iáh tewakkwénion natiaʼtatshénrion; sénha ísiʼ nón꞉we ne kanatakonhró꞉nonʼs wahonní꞉ron, ‘Iáh ónhka ne kaiaʼtón꞉ni konwatihsèn꞉naienʼs ne wathonwisenʼtsheráksen naʼkaiaʼtó꞉ten kén꞉ʼen té꞉weʼskwe.’” 23Ne Judah waʼtharihwaʼserá꞉ko, “Kahá꞉wak tsi nahó꞉tensons kahawánion, ne ká꞉ti né tóhsa nonhkwehshón꞉ʼahs aionkhihsté꞉rihste. Waʼkateʼnién꞉ten nakkáriaʼkse, ók iáh kiʼ tesakwénion nahshiaʼtatshénrion.”
24Kaʼk non ne tókaʼ áhsen niwenhní꞉take ohnaʼkèn꞉ke ónhkaʼk wahonwahró꞉ri ne Judah, “Ne sesá꞉fha Tamar wathonwisenʼtsheráksen waʼontatón꞉ni; sénha í꞉siʼ nón꞉we iowiraientá꞉sere ne wakarihón꞉ni tsi niwathonwisenʼtsheráksen naʼkaiaʼtó꞉ten.” Tánon ne Judah wahén꞉ron, “Tatsaʼtínekenhf, tánon konwatiaʼtén꞉tahf.” 25Tsi nontakonwaiaʼtinekenhwe, iahoteriʼwaniéhten ne shakosá꞉fha, “Ne ne rón꞉kwe ne raowenhshón꞉ʼahs kí: kenʼs waharihón꞉ni tsi wakehrhá꞉re naonkewiraièn꞉taʼne.” Tánon waʼkén꞉ron, “Sewakaʼén꞉ion, naesewathontá꞉ton, ónhka kí꞉ken akowenhshón꞉ʼahs í꞉ken, ne kahsèn꞉nare tánon nahserí꞉ie tánon natèn꞉nits.” 26Eʼthó꞉ne ó꞉nen ne Judah sahshakoièn꞉tereʼne tánon wahén꞉ron, “Kwáh sénha í꞉siʼ nón꞉we tsi nitkaié꞉rits tsi ní꞉i ní꞉ioht, tiorí꞉wa tsi onkerihwanó꞉ron tsi niwakaterihwaièn꞉ni tsi nokwá náonha, aowenhkénhen iahiiatká꞉wen ne riién꞉ʼa Shelah ahotiniá꞉kon.” Tánon iáh kíʼ shé꞉kon skátne teshonará꞉ton.
27Nó꞉nen shiaʼkáhewe naiowiraièn꞉taʼne, tehníkhen niiá꞉ti ne tsi watewiraráhkhwa. 28Tsi nikarí꞉wes ioronhiá꞉kenhkweʼ, shaiá꞉taʼk ne raksá꞉ʼa rahtsaʼnà꞉ke takaià꞉kenʼne; ne watshnié꞉nonʼs waʼkaié꞉na tánon onekwènhtara niwahseriieʼtó꞉ten waʼkahwatá꞉se ne rahtsaʼnà꞉ke, watónnions, “Ne kí꞉ken tahatié꞉renhte tahaiá꞉kenʼne.” 29Ók kwáh eʼthó꞉ne tontahanentshatihénthoh, tánon tahaiá꞉kenʼne ne iatateʼkén꞉ʼa; tánon waʼkén꞉ron, “Keniéntshia tsi naʼtontahsohtkaʼwe sonháʼak!”#38.29 Ne Perez né Hebrew ne nenʼneʼeh kén꞉tons “Thoiakenhstáhkwen.” Sók kíʼ Perez wahonwahsèn꞉non. 30Ohnaʼkèn꞉ke ne iatateʼkén꞉ʼa tahaiá꞉kenʼne onekwènhtara ahserí꞉ie tehanentsháhnhen; tánon Zerah nenʼne wahonwanà꞉tonhkwe.#38.30 Ne Zerah ne Hebrew ne nen; ne ʼeh kén꞉tons “Onekwènhtara teióhtsate nohrhonʼkéhstsi.”
Currently Selected:
Genesis 38: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.