Leviticus 20
20
Ne Karewathátsheras Ne Iáh Tehiontewenhnarákwa
1Ne Roiá꞉ner wahoró꞉ri ne Mahís 2nashakawénhaʼse nonhkweshón꞉as Nisraerʼró꞉nonhke, “Ónhka tsi nítsion akénhake tó꞉ka ó꞉ni ne tihononhontsátes ne skát꞉ke sewaná꞉kere ne niahonwanát꞉kaʼwe ratitsahokónhas nahonwánatsʼte nakonhwasénhnaien ne ní꞉io Molech tsi kwáh kanenhrakwékon enhonwanenhióiaʼke tsi nióre ienhrénheʼie. 3Tó꞉ka ónhka tsi nítsion iaietʼtsihiátkaʼwe kakʼnikáien ne ietsiʼienhokónhas ahonháke ne Molech tánon enhiónhni ne takenhtiónste nakatóhsera tánon enwatéhate natsenhnatokénti, kwáh kíʼ enkwatónhten tánon iáh shé꞉kon ne tahonsehsewatenathónkwen Í꞉i akonhkwéta íken. 4Ók tó꞉ka ne ienákere iáh othènen kén tsiahatí꞉iere tsi nesewátiere tánon iáh teietʼtsinonhwariákon, 5Kwáh kíʼ Iatetiáti tsi enkwatkónhten tánon sewahwatsirakwékon ó꞉ni enhkheiatkónhten ratikwékon ne waheshaʼtsatárahse tsi iáh teshaterihwatokénston nakonháke tánon wesewasénhnaien ne Molech. Iáh kíʼ ónenh thóh nahonsonhkerikonhroténhake níse Í꞉i akonkwéta akénhake.
6“Tó꞉ka ónhka tsi nítsion thóh iénsewe naietʼtsinikonhrihshákha nonhkweshón꞉a né꞉ne konhwatiʼnikonhríhsaks ne ronenhéions, kwáh kíʼ enhkonhiatʼkónhten tánon iáh kíʼ ské꞉kon ne tahonsehshatená꞉thonkwe Í꞉i akonkwéta akénhake. 7Sewahiathatokentíhak, tsioríhwa tsi Í꞉i ne Watiá꞉ner Sewaní꞉io íken. 8Sewatewénhnarak naʼtianerénhseras, tsioríhwa tsi Í꞉i ne Watiá꞉ner tánon kwahiathatokentíston.”
9Ne Roiá꞉ner tahátkaʼwe kí꞉ken tehioterihwasónhteres. Ónhka tsi nítsion naʼietʼtsinikonhrakaréwaʼte ne ianíha tó꞉ka ó꞉ni sanisténha tsi enhonwanonhwariákon; Kwáh kíʼ í꞉se iensewatátkwahse tsi enhhietsiʼnonhwariákon.
10Tó꞉ka ne rónhkwe enhatenakwahiésaʼte né꞉ne Israerʼró꞉non ró꞉ne, rahónha ó꞉ni ne iónhkwe tsi enhonwatinonhwariákon. 11Ne rónhkwe nenhiáraʼte skahiáta ne roʼníha ró꞉ne enhotéhaʼte kíʼ ne roʼníha, tánon rahónha ó꞉ni ne iónkwe tsi enhonwatiʼnonhwariákon. Kwáh kíʼ ronónha rahotiʼríhwa tsi enhonwatiʼnonhwariákon. 12Tó꞉ka ne rónhkwe wahiáraʼte ne sakawenónhsa, tenitsáron kíʼ enhonwatiʼnonhwariákon. Né kíʼ wanirihwánerake ne kanikonhrahetkénton aorihwáke tánon ronónha kíʼ rahotiríhwa tsi enhonwatinonhwariákon. 13Tó꞉ka ne tenónhkwe ne wahiaterihwaténtiaʼte ne kenhtèsera, thóh naní꞉iere ne kwáh hioterihwatéhat, tánon tenitsáron ónenk tsi enhonwatiʼnonhwariákon. Ronónha kíʼ rahotiríhwa tsi enhonwatinonhwariákon. 14Tó꞉ka ne rónhkwe wahathateniákʼthen iónhkwe tánon nonisténha, ratiʼkwékon kíʼ náhsen niháti ónenk tsi enhonwanatsatátʼtsahaʼte tsioríhwa tsi ioterihwatéhat tsi nahóntiere; né nikarihó꞉ten iáh tehiówenk né nahisewáiere tsi naʼtesewátere. 15Tó꞉ka ne rónhkwe kentèsera wahateriwaténhtsiáte tsi nòkwah ne katshénen, rahónha ó꞉ni ne katshénen ónenk tsi enhonwatinonhwariákon. 16Tó꞉ka ne iónhkwe enwateniénten ne kentèsera tsi nakáiere tsi nòkwah ne katshénen, ahónha tánon ne katshénen ónenk tsi enkonhwatiʼnonhwariákon. Ohnónha ahotiʼríhwa tsi enkonhwatinonhwariákon.
17Tó꞉ka ne rónhkwe iatenosénha wahotíniake tó꞉ka ó꞉ni nasénhnon nihiatenosénha akénhake, kwáh kíʼ onhkwéne nónhwe nenhonwanatéhaʼte tánon enhonwatiʼhiatínekenhwe ne kanakeraserákon. Skát꞉ke wahiáraʼte ne iatenosénha tánon ónenk kíʼ tsi tenharihwaseráko tsi naháwenhne. 18Tó꞉ka ne rónhkwe enhiáraʼte ne iónhkwe tsi náhe iotenhnitaráni, tenitsáronh kíʼ enhonwatirékwahthe ne kanakeraserákon, tsioríhwa tsi watʼníhiaʼke ne kaianerénhsera tsi nòkwah norihwakáion ne iáh tehiakotkwéniens.
19Tó꞉ka ne rónhkwe skát꞉ke enhiáraʼte ne rahoʼmaténht, tenitsáronh kíʼ ónenk tsi enhnironhiáken tsi nienhiáwenhne ne kanikonhrahetkénton. 20Tó꞉ka ne rónhkwe skát꞉ke enhiáraʼte ne roʼnonhwáha ró꞉ne, wahotéhaʼte kíʼ ne roʼnonhwáha, rahónha tánon ne iónhkwe kwáh enhnikáriaʼke ne karewatátshera; iáh ónhka ne tenihiáse nonhwénhton tahotiwiraiénhtaʼne. 21Tó꞉ka ne rónhkwe ienhsakohiaténhaʼwe ne iathatekénha ró꞉ne, tsatenhníheʼie tsi iáh tahotiʼwiraiénhtaʼne. Thóh nahá꞉iere ne kwáh iáh tehiotkwéniens tánon wahotéhaʼte ne iathatekénha.
22Ne Roiá꞉ner wahénron, “Sewatiénawast akwékon naʼtianerénhseras ó꞉ni nakerihwatátʼtsheras, né káti ne tó꞉sa ahitionhontsaiésha ne Canaan nónhwe, né꞉ne tsi nónhwe wakwahiatenháwi. 23Tó꞉sa tehetʼtsihiateweʼiénhnak nonhkweshón꞉a né nónhwe; Kheʼhiatinekénhsere nètho ronhnonhkwetahétkens né kíʼ nahóntonh niaʼhisewatáwehiaʼte né tsionhontsáien. Wahonkatéhaʼte akwékon tsi nihatiweienhnó꞉tens ne karihwahétkens tsi nihontserá꞉nions. 24Ók kíʼ wakwahrarátsʼten kí꞉ken hiókwats tánon hionhontsí꞉io né tsi ensewatiénawasʼte, tánon kwáh kíʼ éntsion. Í꞉i ne Watiá꞉ner Sewaní꞉io íken, tánon kwáh thísewaʼte tsiónhni tsi nòkwah nakorénhsons nonhkweshón꞉as. 25Káti kwáh, ónenk tsi ensewénesʼte tsi naʼtekonhtʼthíhen ne katshénens tánon ne otsiténhas né꞉ne kwáh ionatʼkwéniens tánon tsi nikáien ne iáh tehionatkwéniens. Tó꞉sa sewawárak ne iáh tehiotkwéniens ne katshénen tó꞉ka ó꞉ni notsiténhas. Kwáh kheʼienéston tsi iáh tehonatʼkwéniens, tánon naʼietʼtsiwárake kwáh kíʼ iáh thaʼhisewatʼkweniensthónhake. 26Ónenk tsi ensewahiathaʼtokenhtíke tánon Í꞉i khók akonhkwéta enhkénhake, tsioríhwa tsi Í꞉i ne Watiá꞉ner tánon watiathatokénti. Kwáh ákte nikwénhteron tsi nòkwah nakorénhson nonhkweshón꞉as ne káti né kwáh akonhatsíwa níse akonhkwéta akénhake.
27“Ónhka ne rónhkwe tó꞉ka ó꞉ni ne iónhkwe nashakotiʼnikonhríhshaʼke ne iaʼkawehéion kwáh kíʼ enhonwanenhióiaʼke tsi enhrénheʼie; ónhka tsi nítionh né kíʼ thoʼnahisewáieʼre íhseʼkiʼ sewaríhwa tsi enhsewénheʼie.”
Currently Selected:
Leviticus 20: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.