Jenesisi 11
11
Gota la Baberi
1Mudziko lentse mukhana cirewedwe cibodzi basi, na kalewerewedwe kabodzi. 2Wanthu watacoka kumabvadzuwa, adakafika kucigowa ca dziko la Sinara acikakhala kumweko. 3Pamwepo adayamba kuuzana kuti: “Mbatiumbe njedwa tizitenthe bwino”. Njedwa adaziphatisira basa la minyala ndipo matope adayaphatisa basa pa mbuto ya argamassa. 4Patsogolo pace adati: “Bwerani timange mzinda wathu, na gota lakufika kudzulu. Tikacita tenepo tin'dzakhala na mbiri, ndipo tin'dzabalalika lini padziko lapantsi”. 5Tsono Mbuya adabuluka kudzawona mzinda na gota lomwe wanthu akhamanga. 6Ndipo Mbuya adati: “Iwo ni mbumba ibodzi ndipo ambalewa cirewedwe cibodzi. Ayamba kumanga ici. Tsapanopa palibe comwe cingadzawaletse bzomwe angatale kuti acite. 7Bwerani tibuluke tikasiyanise cirewedwe cawo kuti waleke kubverana m'bodzi na m'bodzi”. 8Tenepoyo Mbuya adabalalisa wanthuwo padziko lentse la pantsi, ndipo iwo adaleka kumanga mzinda ule. 9Ndipopo mzindayo adaucemera kuti Babele, thangwe lakuti kumweko Mbuya adasiyanisa cirewedwe ca dziko lentse. Kuyambira pamwepo Mbuya adawabalalisa padziko lentse.
Dzindza la Semu
10Iyi ndiyo mibadwo yakucokera kwa Semu: Patapita magole mawiri catamala cigumula, Semu akhana magole 100, adabereka mwana dzina lace Aripakisadi. 11Ndipo atabereka Arpakisadi, Semu adakhala na moyo magole 500, acibereka wana anango amuna na akazi.
12Aripakisadi pomwe adakwanisa magole 35, adabereka Sera. 13Atabereka Sera, Arpakisadi adakhala na moyo magole 403, acibereka wana anango amuna na akazi.
14Sera pomwe adakwanisa magole 30, adabereka Eberi. 15Atabereka Eberi, Sera adakhala na moyo magole 403, acibereka wana anango amuna na akazi.
16Eberi pomwe adakwanisa magole 34, adabereka Pelegi. 17Atabereka Pelegi adakhala na moyo magole 430, acibereka wana anango amuna na akazi.
18Pelegi pomwe adakwanisa magole 30, adabereka Reu. 19Atabereka Reu, adakhala na moyo magole 209, acibereka wana anango amuna na akazi.
20Reu pomwe adakwanisa magole 32, adabereka Serugi. 21Atabereka Serudi, adakhala na moyo magole 207, acibereka wana anango amuna na akazi.
22Serugi pomwe adakwanisa magole 30, adabereka Nahori. 23Atabereka Nahori, adakhala na moyo magole 200, acibereka wana anango amuna na akazi.
24Nahori pomwe adakwanisa magole 29, adabereka Tera. 25Atabereka Tera, adakhala na moyo magole 119, acibereka wana anango amuna na akazi.
26Tera pomwe adakwanisa magole 70, adabereka Abrahamu, Nahori na Harani.
Dzindza la Tera
27Uyu ni m'ndandanda wa dzindza la Tera: Tera adabereka Abrahamu, Nahori na Harani. Harani adabereka Loti. 28Harani adafera komwe adabadwira kukhacemeredwa Uri, wa kuKaldeya. Pomwe iye adafa, pai wace akhana moyo. 29Abrahamu na Nahori adalowola. Abrahamu adalowola Sarai, ndipo Nahori adalowola Milika, mwana wa Harani, omwe akhali baba wa Milika na Isika. 30Tsono Sarai akhalibe wana, thangwe akhabala lini. 31Ndipo Tera adatenga mwana wace Abrahamu na mzukulu wace Loti, mwana wa Harani, acitenga pomwe mulowola wace Sarai, mkazi wa mwana wace Abrahamu, ndipo adaguduka pabodzi, kucoka kumzinda wa Uri, wa kuKaldeya, kuyenda kudziko la Kenani. Tsono pomwe adafika kuHarani, adakhala kumweko. 32Tera adakwanisa magole madzana mawiri na maxanu (205), adafa kuHarani.
Currently Selected:
Jenesisi 11: NYNT
Highlight
Share
Copy
Want to have your highlights saved across all your devices? Sign up or sign in
© 2019 Wycliffe Bible Translators, Inc.
