Broă 20

Pol ơm tòm lơgar Masedoan mơ lơgar Grek

1Tòm tŭ bơta sơlồng sơlàng neh jơh rau, Pol hòi jà ală cau dòn tus nàng bơto pơndòm gen tơngac bol khai mơ lòt tus hơ lơgar Masedoan. 2Khai lòt làm jơh kơnhwàl hơ̆, ngui oă jơnau bơto pơndòm ală cau dòn, lồc behơ̆ lòt tus hơ lơgar Grek, 3mơ ơm tềng hơ̆ pe kơnhai. Tòm tŭ khai mòr hào ơhò nàng tiă hơ lơgar Siri, gen cau Juda jòi kai nàng lơh iơh di khai, gen tàng khai lơh nền lòt gan di lơgar Masedoan nàng rê wơl. 4Gơs ală cau lòt bal mơ khai la Sôpate kòn Pirus, cau ƀòn Bere; Aritak mơ Sekundus cau Tesalônika; Gaius cau Derbơ; mơ Timôthe, Ticikơ mơ Trôphim la cau kơnhwàl Asia. 5Ală cau do lòt lài, gơn bol hi tòm Trôas. 6Ai bol hi tơnơ̆ mơ ală ngai sa Piang Lă Ò Gơs Kañ, gen hào ơhò lòt bơh Philip, tòm pram ngai tơnơ̆ tìp wơl bol khai tòm Trôas, lồc behơ̆ bol hi ơm tềng hơ̆ poh ngai.

Pol tòm ƀòn dờng Trôas

7Ngai sơnròp tòm dô poh,#20:7 Hala ngai rlô. bol hi ơm pơjum sa tòmklac bal. Tài bơh Pol pal lòt ngai hìng, gen tàng khai bơto yal ală cau bơtê in mơ kư̆ bơto tơn jơl tus digùl mơnang. 8Gơs oă ồs đèng tòm ơdŭ tap hơđang la tiah bol hi ơm pơjum bal. 9Gơs dô nă cau pơnu sơnđan la Ơtikus, nggui di mpồng dềt, khai gơdan bic mơ bic lơhă tơn, tòm tŭ Pol ơm bơto yal jŏ ngan; behơ̆ tàng bơh tap pe dùh di tiah, tòm tŭ cau yò gen gŏ khai neh chơt rau. 10Mơya Pol mù di tiah, sơrkềng să hơđang khai, kơnđu mơ đơs lah: “Bañ dơrcul nùs, bơh khai gam kis.” 11Pol guh wơl hơ tap hơđang, dơrkă piang lă sa, mơ tòmbơhbơr jŏ ngan jơl àng sồng lòt. 12Bol khai cèng cau pơnu rê hìu mơ khai gam kis, gen tàng kòp nă cau geh pơndòm pơniang oă ngan.

Pol tòm Miletus

13Bol hi lòt lài mơ ơhò tus hơ Asôs la tiah bol hi rơp rò Pol; khai neh tòm pơgon behơ̆, bơh khai kòñ lòt gùng jơng. 14Tŭ bol hi tìp mơ khai tòm Asôs gen cèng khai lòt bal tòm ơhò tus hơ Mitilen.

15Lồc behơ̆, bơh tềng hơ̆ bol hi hào ơhò, be ngai hìng tus rềp hơ bồt pơlào Kiôs. Tus di ngai tơnơ̆, bol hi mut tòm Samôs, mơ ngai tơnơ̆ tai gen tus hơ Miletus. 16Bơh Pol neh lơh nền lòt gan dê Ephesô nàng ò roh tŭ tòm kơnhwàl Asia, khai lòt sơrbac sơrbang nàng dilah rgơi, gen gơs mat tòm Jerusalem tồ bàn bơta pơjum sa Ngai Pram Jơt.

Pol bơto yal ală cau kwang kra in tòm Ephesô

17Bơh Miletus Pol sồr cau lòt hơ Ephesô, jà ală cau kwang kra Hìu Jum Goh dê tus tìp khai. 18Tòm tŭ bol khai neh tus, gen khai đơs lah: “Oh mi neh git mbe lơi añ neh ơn jơh tŭ tơngai gơwèt mơ oh mi bơh ngai sơnròp añ tus tòm kơnhwàl Asia. 19Añ duh broă dô bă pơndêt să, gơhòr oă dà mat, be dĭ gơna Yàng dê tòm bơta gơlòng bòl glar bơh kai gơrmơ̆i cau Juda. 20Añ bơto yal ală bơta gơs kwơ oh mi in, mơ bơto oh mi di đap ƀòn lơgar hala bơh hìu do tus hơ hìu ne. 21Bơto tơnggit cau Juda kung be cau Grek in bơh bơta gơjrañ sang glài gơwèt hơ Yàng Tom Trồ mơ bơta dòn di Yàng Jesu Krist la Yàng bol he dê.

22Mơ do, añ geh Yàng Hwềng chồl lòt hơ Jerusalem, ò git bơta lơi rơp gơlik tus di añ tềng hơ̆. 23Mìng Yàng Hwềng Goh neh yal lài añ in git lah tòm kòp nơm ƀòn dờng, che sreng mơ bơta bòl glar ơm gơn añ. 24#II Tim 4:7.Mơya añ ò kòp bơta kis añ la kwơ, mìng kòñ lơh sir bơta ntoat pơrlòng añ jê mơ gơnoar broă añ neh dòp leng bơh di Yàng Jesu, nàng lơh cơng bơh Jơnau Niam bơta nđàc Yàng Tom Trồ dê.

25Mơ tŭ do, añ git lah jơh ală oh mi la cau mơ añ neh bơto yal bơh lơgar Yàng Tom Trồ, gen ò gơs dô nă lơi rơp gŏ mat añ tai. 26Behơ̆ tàng ngai do añ đơs nền cê oh mi in lah, dilah cau lơi tòm oh mi gơkòl roh rui, gen añ ò kong bơh mhàm bol khai. 27Bơh añ bơto yal oh mi in git jơh nùs kòñ#20:27 Rct: nùs kòñ lơh nền. Yàng Tom Trồ dê ò prap lòi bơta lơi. 28Oh mi kơrmap gàr tĕ să he bal mơ mpồl belàt mơ Yàng Hwềng Goh neh bơtào oh mi lơh gơs cau sền gàr, nàng ê gàr Hìu Jum Goh Yàng Tom Trồ dê mơ Kơnràñ neh rwat mơ mhàm Kòn Kơnràñ dê. 29Añ git lah tơnơ̆ mơ tŭ añ lòt, gen rơp gơs so rhau jàñ bơsak mut tòm oh mi, gơ ò pơlai mpồl belàt ò. 30Bơh digùl oh mi kung rơp gơs ală cau bơtào tơngguh mơ bơto jơnau tìs nrah nàng pơndòm pơrlồm cau dòn lòt jat bol khai. 31Behơ̆, drơng kơp tĕ mơ kah wơl lah tòm pe nam, ngai mơ mang, añ hòr dà mat mơ bơto sồr tơl nă cau in ò dơh. 32Tŭ do, añ jào oh mi Yàng Tom Trồ in mơ tòm jơnau bơta nđàc Kơnràñ dê sơl, la jơnau rgơi bơt bơtào mơ ai sre brê oh mi in bal mơ jơh ală cau neh gơlik gơs sàng goh. 33Añ ò hàm hà priă, màh hala ồi ào cau lơi dê ò. 34Să tòm oh mi git lah bàr nơm mpàng tê do neh lơh gơlik gơs phan ngui sa añ in mơ oh mi lơh broă bal mơ añ in sơl. 35Tòm jơh ală bơta añ neh bơto oh mi in git, mbe lơi oh mi pal kong bòl glar lơh broă nàng dong kòl cau lơbơn lơño, mơ kah wơl jơnau să tòm Yàng Jesu neh đơs lah: ‘Pà ai gen geh lơngai rlau mơ dòp leng.’”

36Lồc Pol đơs jơnau hơ̆ rau gen cùn gơltang hòi dan bal mơ jơh ală cau hơ̆. 37Jơh tơl nă bol hơ̆ ñìm oă ngan, koar di ngko Pol mơ cum tơngac khai. 38Bol khai moat jrùng ngan bơh kơno jơnau khai đơs lah rơp ò gŏ tai mat khai. Gen lòt jun khai mut tòm ơhò.

Currently Selected:

Broă 20: KPM2018

Highlight

Copy