Broă 26

Pol tò să di đap bơtau Agrippa

1Tŭ do, bơtau Agrippa đơs mơ Pol lah: “Mê geh gơnoar đơs nàng tò să mê.” Gen Pol pò tê nàng tò să khai be do: 2“Ơ bơtau Agrippa, tòm ngai do añ chò hòp ngan geh bơtoah tò să añ di đap bơtau bơh jơh ală bơta cau Juda yă añ, 3tài bơh bơtau neh git loh làng jơh ală bơta òs mòng kung be bơta tòm pơndang digùl cau Juda. Behơ̆, dan bơtau ơt ơl nàng iat añ.

4Jơh ală cau Juda làm git lơm añ neh kis mbe lơi bơh tòm tŭ gam kơnòm, digùl làng bol añ mơ tòm Jerusalem. 5#Broă 23:6; Phil 3:5.Mơ dilah bol khai kòñ lơh cơng, gen bol khai neh git bơh lài mbe lơi añ jat bơnòr Pharisi, la bơnòr kràñ cê rlau jơh tòm gùng duh khoai bol hi dê. 6Tŭ do, añ ntào tềng do mơ kong cahrña tài bơh añ gơn kơnòm di jơnau Yàng Tom Trồ neh ho pơgon mơ ồng pàng bol hi. 7Bơh bơta ho pơgon hơ̆, mơ jơt bàr jơi bơtiàn bol hi dê kơp kòñ dòp geh, gen tàng duh khoai Yàng Tom Trồ sùm ngai mơ mang. Ơ bơtau, tài bơh bơta gơn kơnòm hơ̆, tàng añ kòl cau Juda yă wơn do. 8Ñchi bơh tài ală ồng ơm tềng do kơlôi ò rgơi dòn lah Yàng Tom Trồ lơh cau chơt in kis wơl taih?

9 # Broă 8:3; 22:4-5. Ngan, să tòm añ neh kơlôi lah pal ngui oă bơta nàng tòmdră di sơnđan Jesu Cau Nasaret. 10Añ kung neh lơh behơ̆ tòm Jerusalem. Añ neh dòp gơnoar bơh cau gơnoar lam bồ ơn phan duh khoai, mơ jàm oă cau sàng goh, mơ tòm tŭ cau tơnchơt bol khai gen añ kung tĕ khà dô nùs bal sơl. 11Añ òs lòt làm ală hìu jum cau Juda, lơh glài mơ bơklơn bol khai sang lòi bơta dòn, bơh añ gơjrañ oă ngan, tian gơs añ lòt tus tòm ală ƀòn dờng lơgar bơdìh nàng kup kơryan bol khai.

12Behơ̆, añ lòt hơ Damas, geh tơl gơnoar mơ jơnau gơnoar sồr bơh ală cau gơnoar lam bồ ơn phan duh khoai. 13Ơ bơtau, tòm gùng añ lòt di digùl ngai, añ gŏ bơta àng dờng bơh đang trồ, gơcrà rlau mơ mattơngai, sòl gùt dar añ bal mơ ală cau lòt bal mơ añ sơl. 14Jơh tơl nă bol hi gơplơ̆ tòm ù, añ kơno jơnau đơs mơ añ tòm jơnau Hebrơ lah: ‘Ơ Sol, Sol, ñchi bơh tài mê kup kơryan Añ taih? Mê coh dê cồng srồng gen bòl glar mê in.’ 15Añ lùp lah: ‘Ơ Yàng, Kơnràñ la ñcau taih?’ Yàng ho lah: ‘Añ la Jesu mơ mê kup kơryan. 16Mơya guh tĕ, ñă ntào, bơh Añ neh tơlik să mơ mê nàng bơtào mê lơh gơs cau duh broă Añ jê, mơ lơh cơng bơh broă mê neh gŏ mơ lơh ală broă Añ rơp yal tơlik mê in tai. 17Añ rơp dong tă mê bơh di làng bol Israel mơ bơh di làng bol bơdìh mơ Añ sồr mê lòt tus, 18nàng pò mat bol khai, tơrwơl bol khai bơh di klam jơngo tus hơ bơta àng, mơ bơh di gơnap gơnoar cà Satan dê tus hơ Yàng Tom Trồ, behơ̆ kơnòm di bơta dòn di Añ, tồi glài bol khai dê geh toh, mơ dòp geh sre brê bal mơ ală cau geh sac rwah Yàng Tom Trồ dê.’

19Ơ bơtau Agrippa, tài bơh hơ̆ gen tàng añ ò khin tòmdră mơ bơta gơtơnggŏ bơh đang trồ. 20#Broă 9:20,28,29.Mơya sơnròp ngan tòm Damas, tòm Jerusalem mơ làm jơh lơgar Jude, lồc behơ̆ tus di ală làng bol bơdìh, añ neh bơto yal lah pal gơjrañ sang glài mơ rê wơl hơ Yàng Tom Trồ, mơ lơh broă di pal mơ bơta gơjrañ sang glài. 21Tài bơh hơ̆ tàng cau Juda kup añ tòm hìu duh khoai mơ mong tơnchơt añ. 22Mơya geh Yàng Tom Trồ dong kòl jơl tus ngai do, tài bơh hơ̆ añ ntào tềng do lơh cơng ală cau dềt mơ cau dờng in, ò đơs bơta lơi ndai rlau mơ bơta ală cau gơnoar hwơr mơ Môise neh yal lài pal gơlik gơs, 23#I Kô 15:20; Esai 42:6; 49:6.hơ̆ la Bơtau Krist pal kong jê sồt, mơ la cau sơnròp ngan kis wơl bơh bơta chơt nàng bơto yal bơta àng, bơta dong klàs cau Juda mơ cau làng bol bơdìh in sơl.”

24Khai ơm đơs behơ̆ nàng tò să khai, gen Phestus đơs dờng jơnau lah: “Ơ Pol, mê neh roh dơngoh rau, mê bơtê git oă ir tian gơs gơlik sơnrang!” 25Pol ho lah: “Ơ ồng dờng Phestus ryŭ ryơm ngan, añ ò di sơnrang ò, mơya añ đơs hơ̆ la jơnau song mơ dơngoh àng loh. 26Bơtau git loh ală bơta do gen añ khin cha đơs; bơh añ dòn nền ngan lah ò gơs bơta lơi mơ bơtau ò git, tài bơh ală broă do ò di lơh tòm tiah ndơp ò. 27Ơ bơtau Agrippa, bơtau dòn ală cau gơnoar hwơr sơl? Añ git ngan lah bơtau dòn sơl.” 28Bơtau Agrippa đơs mơ Pol lah: “Mê bơto pơndòm dô êt hơ̆ mơ tồnlah lơh añ in gơlik Cau Krist dê ơ?” 29Pol ho lah: “Ò git dô êt hala oă, añ hòi dan mơ Yàng Tom Trồ ò di mìng dô nă bơtau lơm ò, mơya jơh tơl nă cau iat jơnau añ tòm ngai do, gen gơlik gơs be añ, mìng ò gơs che sreng do lơm.”

30Tŭ hơ̆ cau bơtau, cau kwang đơng lơgar mơ mò Berenis, bal mơ ală cau nggui tềng hơ̆ kung ñă ntào sơl. 31Tòm tŭ lik rê gen bol khai đơs bal lah: “Cau do ò lơh bơta lơi pal chơt hala pal jàm ò.” 32Bơtau Agrippa đơs mơ Phestus lah: “Dilah cau do òhềt dan cèng tus hơ Sesa gen rgơi hồ khai.”

Currently Selected:

Broă 26: KPM2018

Highlight

Copy