Sơnròp Gơlik Gơs 39
39
Jôsep ơm tòp tòm lơgar Ejiptơ
1Cau cèng Jôsep tus hơ lơgar Ejiptơ, gen Pôtiphar cau kwang Pharaôn dê, cau kwang ling, la cau Ejiptơ, blơi khai bơh di ală cau Ismael#39:1 Ismael: kung geh sơnđan la cau kă bro Midian. neh lam khai tus. 2#Broă 7:9.Jôsep ơm tòm hìu cau tòm khai dê la cau Ejiptơ. Yàng Jehôwa ơm bal mơ khai, gen khai gơlik gơs cồng nha sùm. 3Cau tòm khai dê gŏ Yàng Jehôwa ơm bal mơ khai mơ Kơnràñ lơh jơh ală broă bơh tê Jôsep di gơlik cồng nha. 4Behơ̆, Jôsep geh bơta nđàc di đap cau tòm khai dê; khai lơh broă cau tòm in. Cau tòm ai khai in gơnoar at bồ hìu, mơ jơh ală phan cau tòm ai khai in sền gàr. 5Behơ̆, di tŭ khai ai Jôsep in at bồ hìu mơ jơh ală phan khai dê rau, gen Yàng Jehôwa ai lơngai lơngò hìu nhă khai in tài bơh Jôsep; bơta lơngai lơngò Yàng Jehôwa ơm hơđang jơh ală phan khai dê, bulah tòm hìu hala tòm ƀlàng. 6Khai jào jơh ală phan mơna Jôsep in sền gàr; khai ò kơlôi broă lơi tai, mìng ală phan sa khai dê lơm. Mơ Jôsep la hàng mơnĕ, mơ sền khai mơnĕ mơnài.#39:6 Cil: hèr.
Jôsep kong jàm
7Tơnơ̆ mơ ală broă do, bau ùr cau tòm sền Jôsep mơ đơs lah: “Lòt tĕ bic mơ añ.” 8Jôsep ò bài mơ đơs lah: “Cau tòm añ neh ai jơh ală phan khai dê añ in sền gàr, mơ do khai ò git broă lơi tòm hìu tai. 9Tòm hìu do ò gơs cau lơi dờng rlau mơ añ, mơ khai kung ò bơkơ̆u añ bơta lơi, mìng dô nă ai bơh ai la bau cau tòm añ jê. Mbe lơh añ khin lơh bơta iơh bơsak behơ̆, mơ gơs glài mơ Yàng Jehôwa taih?” 10Khai ơniai Jôsep kòp ngai, mơ Jôsep ò bài jat jơnau khai dê nàng bic hala ơm bal mơ khai dô êt lơi.
11Gơs dô ngai, Jôsep mut tòm hìu nàng lơh broă mơ tŭ hơ̆ ò gơs dô nă cau lơi ơm tòm hìu hơ̆, 12gen khai sơmbat di ào Jôsep mơ đơs lah: “Bic tĕ mơ añ!” Mơya Jôsep lòi ào tòm tê cau ùr hơ̆ mơ dô lik di tiah. 13Tòm tŭ cau ùr gŏ ào gam di tê khai, mơ Jôsep neh dô lik di tiah, 14gen khai hòi ală cau tòm hìu nhă khai dê mơ đơs lah: “Sền do! Bau klau añ neh cèng tòm hìu dô nă cau Hebrơ nàng khai bơrcek añ. Khai lòt rềp kòñ bic mơ añ, mơya añ driau dờng. 15Dơ̆ khai kơno añ nggà driau, gen khai lòi ào di añ, mơ dô lik hơ bơdìh.” 16Gen khai lòi ào Jôsep di gah khai mơ gơn tus di tŭ cau tòm rê. 17Khai yal wơl mơ cau tòm be jơnau lài lah: “Cau dĭ Hebrơ mơ mê neh cèng tòm hìu, neh tus rềp nàng bơrcek añ, 18mơya dơ̆ añ nggà driau, khai lòi ào khai di añ mơ dô lik hơ bơdìh.” 19Dơ̆ cau tòm Jôsep dê kơno jơnau bau he neh yal lah: “Hơ̆ la cau dĭ mê lơh bơta hơ̆,” gen khai gơhào gơjrañ, 20mơ khai kup Jôsep tơmut tòm hìu jàm, la tiah jàm ală cau tìs glài mơ cau bơtau. Behơ̆, khai ơm jàm tềng hơ̆. 21#Broă 7:9.Mơya Yàng Jehôwa ơm bal mơ Jôsep, mơ Kơnràñ yal tơlik bơta kòñ gơboh kơ̆ dơn Kơnràñ dê, mơ ai khai in geh bơta nđàc di đap cau at bồ hìu jàm. 22Cau at bồ hìu jàm jào jơh ală cau jàm tòm tê Jôsep, ală broă lơi lơh la Jôsep lam lơh. 23Cau gơnoar at bồ hìu jàm ò sền sơwì tai ală broă lơh neh jào tòm tê Jôsep, tài bơh Yàng Jehôwa ơm bal mơ khai, mơ ai broă lơi khai in lơh gen gơlik gơs cồng nha.
Currently Selected:
Sơnròp Gơlik Gơs 39: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
