Jang 18

Bơta jê sồt, bơta chơt mơ bơta kis wơl Yàng Jesu dê

(18:1 – 21:25)

Suơn Getsemane cau kup Yàng Jesu

(Mathiơ 26:47-56; Mak 14:43-50; Luka 22:47-53)

1Tơnơ̆ mơ tŭ hòi dan rau, Yàng Jesu mơ ală cau bơtê tiă đah ne croh Ketrôn, tềng hơ̆ gơs dô nơm suơn, Kơnràñ mơ ală cau bơtê mut tòm hơ̆. 2Juda la cau pơrlơ̆ dră di Kơnràñ, kung git tiah hơ̆ sơl, bơh Yàng Jesu mơ ală cau bơtê òs pơjum tềng hơ̆. 3Behơ̆ Juda lam dô mpồl ling bal mơ ală cau duh broă bơh ală cau gơnoar lam bồ ơn phan duh khoai mơ ală cau Pharisi dê, lòt tus tềng hơ̆, at ồs đèng, ồs sơmpòl mơ pềs tà. 4Yàng Jesu git jơh ală bơta rơp gơlik gơs di Kơnràñ, gen lòt tus mơ lùp lah: “Ñcau bol mê jòi taih?”

5Bol khai ho lah: “Jesu Cau Nasaret.” Yàng Jesu đơs lah: “Să tòm Añ do!” Juda la cau pơrlơ̆ dră di Kơnràñ kung ntào bal mơ bol khai sơl. 6Tòm tŭ Kơnràñ đơs mơ bol khai lah: “Să tòm Añ do!” Gen bol khai ruc wơl mơ gơplơ̆ tòm ù. 7Kơnràñ lùp dô dơ̆ tai lah: “Ñcau bol mê jòi taih?” Bol khai đơs lah: “Jesu Cau Nasaret.”

8Yàng Jesu đơs lah: “Añ neh đơs mơ bol mê, să tòm Añ do; behơ̆ dilah bol mê jòi kup Añ, gen lòi tĕ ală cau do in lòt.” 9Bơta do gơlik di ngan be jơnau Kơnràñ neh đơs: “Añ ò lơh roh dô nă cau lơi tòm ală cau mơ Bèp neh ai Añ in.”

10Simôn Pier gơs dô ngkơr đào, khai tă tơlik mo mơ lơh cau dĭ cau gơnoar dờng lam bồ ơn phan duh khoai dê, sreh tac tồr đah ma. Cau dĭ hơ̆ sơnđan la Malcu. 11#Mat 26:39; Mak 14:36; Luk 22:42.Behơ̆ Yàng Jesu đơs mơ Pier lah: “Srồm tĕ đào mê tòm sơmprồm; mơngàn mơ Bèp neh ai Añ in, Añ ò di ñô ò ơ?”

Yàng Jesu di đap Anne mơ Kaiphe. Pier pơndang sang Yàng Jesu

(Mathiơ 26:59-75; Mak 14:55-72; Luka 22:55-71)

12Tŭ hơ̆ mpồl ling, cau kwang ling, mơ ală cau bal mơ làng bol Juda dê kup cap Yàng Jesu, 13lam Kơnràñ tus hơ Anne lài ngan; bơh khai la po bèp Kaiphe la cau gơnoar dờng lam bồ ơn phan duh khoai tòm nam hơ̆. 14#Jang 11:49-50.Mơ tai, Kaiphe la cau neh bơyai bal mơ làng bol Juda lah: “Chan gơs dô nă cau kong chơt bơh làng bol la niam rlau.”

15Simôn Pier mơ dô nă cau bơtê ndai jat Yàng Jesu bơh tơnơ̆. Cau gơnoar dờng lam bồ ơn phan duh khoai, mòng mơ cau bơtê hơ̆, gen cau bơtê mut bal mơ Yàng Jesu tòm ƀlàng hìu cau gơnoar dờng lam bồ ơn phan duh khoai. 16Ai Pier ntào đah bơdìh mpồng. Cau bơtê mòng mơ cau gơnoar dờng lam bồ ơn phan duh khoai, lik đơs mơ cau ùr kơp mpồng mơ lam Pier mut. 17Behơ̆ cau ùr kơp mpồng đơs mơ Pier lah: “Mê ò di kung la dô nă tòm ală cau bơtê cau ne dê ò ơ?” Khai đơs lah: “Añ ò di.” 18Tài bơh noat gen tàng ală cau dĭ mơ cau duh broă ai chah sing ồs mơ ntào njơr; Pier kung ntào njơr ồs bal mơ bol khai sơl.

19Cau gơnoar dờng lam bồ ơn phan duh khoai lùp Yàng Jesu bơh ală cau bơtê Kơnràñ dê, mơ bơh bơta bơto sồr Kơnràñ dê. 20Yàng Jesu ho lah: “Añ neh đơs loh làng mơ dunnia, Añ òs bơto sồr sùm tòm hìu jum mơ tòm hìu duh khoai, la tiah jơh ală cau Juda pơjum, Añ ò đơs bơta lơi ndơp ndơr ò. 21Ñchi bơh tài ồng lùp Añ taih? Lùp tĕ ală cau neh kơno Añ, Añ neh đơs bơta lơi mơ bol khai; ală cau hơ̆ git bơta Añ neh đơs.” 22Neh Kơnràñ đơs behơ̆ gen dô nă cau ling ơm tềng hơ̆ pah Yàng Jesu mơ đơs lah: “Mê ho behơ̆ mơ cau gơnoar dờng lam bồ ơn phan duh khoai ơ?” 23Yàng Jesu ho lah: “Dilah Añ đơs tìs, gen sơnio tĕ bơta tìs hơ̆; dilah Añ đơs di, gen ñchi bơh tài mê lơh Añ taih?” 24Anne sồr lam Yàng Jesu gam kòl cap tus hơ Kaiphe la cau gơnoar dờng lam bồ ơn phan duh khoai.

25Tòm tŭ Simôn Pier ntào ñjơr ồs, gen gơs cau lùp khai lah: “Mê ò di kung la dô nă cau bơtê khai dê ò ơ?” Gen khai pơndang mơ đơs lah: “Añ ò di.” 26Dô nă cau dĭ cau gơnoar dờng lam bồ ơn phan duh khoai dê, gơp bơtiàn mơ cau Pier sreh tac tồr, đơs lah: “Añ ò di neh gŏ mê ơm tòm suơn bal mơ khai ò ơ?” 27Behơ̆ Pier pơndang dô dơ̆ tai, gen iar nrau mo.

Yàng Jesu di đap Pilat

(Mathiơ 27:1-2,11-14; Mak 15:1-5; Luka 23:1-5)

28Behơ̆ bol khai lam Yàng Jesu bơh hìu Kaiphe lòt tus hơ hìu cahrña. Tŭ hơ̆ la àng drim. Să tòm bol khai ò mut tòm hìu cahrña, rngòt kòl bơta ƀơ̆ ƀơl mơ ò geh pơjum tòm bơta pơjum sa lòt gan. 29Behơ̆ Pilat lik, lòt tus hơ bol khai mơ đơs lah: “Bol mê yă cau do bơh bơta lơi taih?” 30Bol khai ho lah: “Dilah cau do ò di la cau lơh iơh bơsak, gen bol hi ò bơtào khai ồng in.” 31Behơ̆ Pilat đơs mơ bol khai lah: “Să tòm bol mê cèng tĕ khai mơ cahrña jat be bơta boh lam bol mê dê.” Cau Juda đơs lah: “Bol hi ò gơs gơnoar tơnchơt cau lơi ò.” 32#Jang 3:14; 12:32.Bơta do gơlik di ngan be jơnau Yàng Jesu neh đơs, nàng sơnio Kơnràñ pal kong chơt be lơi.

33Pilat mut wơl tòm hìu cahrña, hòi Yàng Jesu mơ đơs lah: “Mê la Bơtau làng bol Juda ngan sơl?” 34Yàng Jesu ho lah: “Ồng đơs is ồng dê bơh bơta hơ̆, hala neh gơs cau ndai đơs bơh Añ behơ̆ mơ ồng taih?” 35Pilat ho lah: “Añ la cau Juda ơ? Làng bol mê dê mơ ală cau gơnoar lam bồ ơn phan duh khoai neh bơtào mê añ in; behơ̆ ñchi bơta mê neh lơh taih?” 36Yàng Jesu ho lah: “Lơgar Añ ò di bal mơ dunnia do. Dilah lơgar Añ bal mơ dunnia do, gen ală cau jat Añ neh tòmlơh, nàng Añ ò kong bơtào tòm tê cau kwang Juda dê mơya tŭ do lơgar Añ ò di bal mơ dunnia do.” 37Gen Pilat đơs lah: “Behơ̆ gen mê la Bơtau ơ?” Yàng Jesu ho lah: “Be jơnau ồng đơs, Añ la Bơtau. Tài bơh hơ̆ mơ Añ neh lik lìng mơ kung tài bơh hơ̆ mơ Añ neh lòt tus tòm dunnia nàng lơh cơng bơh jơnau song. Kòp nă cau lơi bal mơ jơnau song gen iat jơnau đơs Añ jê.” 38Pilat lùp lah: “Jơnau song la ñchi taih?”

Neh đơs behơ̆ rau, gen Pilat lik wơl tai, lòt tus hơ ală cau kwang cau Juda mơ đơs lah: “Añ ò bàn dô êt lơi glài tòm cau do. 39Mơya bol mê gơs bơta òs mòng la tòm bơta pơjum sa Lòt Gan, gen añ hồ bol mê in dô nă cau glài jàm, behơ̆ bol mê kòñ añ hồ bơtau làng bol Juda bol mê in sơl?” 40Behơ̆ bol khai driau dờng tai lah: “Bañ hồ cau do, hồ tĕ Baraba!” Baraba la dô nă cau phà kơñau.

Currently Selected:

Jang 18: KPM2018

Highlight

Copy