Jang 9

Yàng Jesu sơmbòi cau jơngo. Bơta kơldang nùs ală cau Pharisi dê

1Tòm tŭ lòt gùng, Yàng Jesu gŏ dô nă cau jơngo bơh tòm tŭ pa deh. 2Ală cau bơtê lùp Kơnràñ lah: “Ơ Rabi, ñcau neh tìs glài, cau do hala mè bèp khai, gen tàng bơh tŭ pa deh khai neh jơngo behơ̆ taih?” 3Yàng Jesu ho lah: “Hơ̆ ò di tài bơh cau do hala mè bèp khai neh tìs glài ò, mơya nàng ală broă Yàng Tom Trồ dê geh yal tơlik tòm khai. 4Tòm tŭ gam trồ ngai, bol he pal lơh ală broă Bơtau neh sồr Añ lòt tus, mang tus gen ò gơs cau lơi rgơi lơh broă ò. 5#Mat 5:14; Jang 8:12.Tòm tŭ Añ gam ơm tòm dunnia, Añ la bơta àng dunnia dê.”

6Đơs rau, Kơnràñ choh tòm ù, ai dà diau bơcă gơs bŏ, bong di mat cau jơngo, 7mơ sồr khai lah: “Lòt tĕ mơ rào tòm tơnau Silôe,” (Jơnau do gơtha la “Geh sồr lòt.” Behơ̆, khai lòt rào mơ rê wơl gen geh gŏ.)

8Ală cau ơm rềp mơ ală cau lài òr neh gŏ khai kanadàn, đơs lah: “Do ò di la cau neh nggui kanadàn ò ơ?” 9Cau ƀà đơs lah: “Ngan la khai;” cau ƀà tai đơs lah: “Ò di, mơya dô nă cau ndai bơsùt be khai gơ dê.” Ai cau jơngo đơs lah: “Să tòm añ do.”

10Bol khai lùp cau jơngo lah: “Behơ̆ gen, mbe mat mê geh gơ pò wơl taih?” 11Khai ho lah: “Dô nă cau sơnđan la Jesu neh bơcă bŏ, bong di mat añ, mơ sồr añ lòt tĕ hơ tơnau Silôe mơ rào. Behơ̆ añ neh lòt, rào mơ geh àng mat.” 12Bol khai lùp lah: “Ntềng đah cau hơ̆ taih?” Khai ho lah: “Añ ò git.”

13Bol khai lam cau lài neh jơngo tus hơ ală cau Pharisi. 14Hơ̆ la tòm ngai Saƀat Yàng Jesu neh bơcă bŏ mơ pò mat cau jơngo in. 15Ală cau Pharisi lùp tai khai mbe lơh gơs àng mat. Khai đơs lah: “Cau hơ̆ bong bŏ di mat añ, añ rào gen gơs gŏ.” 16Gơs cau ƀà tòm mpồl cau Pharisi đơs lah: “Cau hơ̆ ò di tus bơh Yàng Tom Trồ, bơh khai ò prap gàr ngai Saƀat.” Cau ndai đơs lah: “Dô nă cau glài mbe rgơi lơh ală tềl krơi behơ̆ taih?” Mơ digùl bol khai gơs bơta cah mpồl. 17Tài behơ̆, bol khai lùp cau jơngo tai lah: “Ai mê, mê đơs mbe lơi bơh cau neh lơh mê in àng mat taih?” Khai đơs lah: “Hơ̆ la dô nă cau gơnoar hwơr.”

18Bulah behơ̆ cau Juda ò dòn lah cau hơ̆ lài neh jơngo mơ tŭ do gơs àng mat, jơl tus di tŭ bol khai hòi mè bèp khai tus, 19mơ lùp lah: “Do ngan la kòn klau bol mê dê mơ bol mê đơs lah khai neh jơngo bơh tòm tŭ deh sơl? Behơ̆ mbe tŭ do khai gơs àng mat taih?” 20Mè bèp khai ho lah: “Bol hi git khai la kòn klau bol hi dê mơ khai neh jơngo bơh tòm tŭ deh; 21mơya tŭ do lơh mbe lơi khai gơs àng mat gen bol hi ò git. Bol hi kung ò git ñcau neh pò mat khai in. Lùp tĕ khai, khai neh tơl sơnam rau; să tòm khai rơp yal.” 22Mè bèp cau jơngo đơs behơ̆ tài bơh rngòt di cau Juda: bơh cau Juda neh ho lah cau lơi yal tơlik Yàng Jesu la Bơtau Krist, gen pal kong bơtrơh tơlik bơh di hìu jơnum. 23Tài bơh hơ̆ tàng mè bèp cau jơngo đơs lah: “Khai neh tơl sơnam rau, lùp tĕ khai.”

24Dô dơ̆ tai, ală cau Pharisi hòi wơl cau lài neh jơngo mơ đơs lah: “Jòng ro tĕ Yàng Tom Trồ, bol he git cau hơ̆ la cau gơs glài.” 25Khai ho lah: “Añ ò git cau hơ̆ la cau glài hala ò; mơya añ mìng git dô bơta, hơ̆ la añ neh jơngo mơ tŭ do añ gơs gŏ.” 26Bol khai lùp tai lah: “Ñchi bơta khai neh lơh mê in taih? Mbe khai neh pò mat mê in taih?” 27Khai ho lah: “Añ neh đơs mơ ală ồng rau, mơ ală ồng ò iat añ. Ñchi bơh tài ală ồng kòñ kơno tai taih? Ngan sơl, ală ồng kung kòñ lơh gơs cau bơtê khai dê ơ?” 28Gen bol hơ̆ lah sơrpah khai mơ đơs lah: “Mê la cau bơtê ồng hơ̆ dê, ai bol hi la cau bơtê Môise dê. 29Bol hi git Yàng Tom Trồ neh đơs mơ Môise, ai cau do gen bol hi ò git bơh lơi mơ tus.” 30Cau jơngo ho lah: “Hĕ, krơi ngan! Cau neh pò mat añ in, mơ ală ồng ò git khai bơh lơi mơ tus! 31Bol he git lah Yàng Tom Trồ ò dòp jơnau cau glài dê, mơya dilah cau lơi duh rngòt di Kơnràñ mơ lơh jat nùs kòñ Kơnràñ dê, gen Kơnràñ iat jơnau khai dê. 32Bơh rài yau tus rài do òhềt tŭ lơi kơno đơs gơs cau lơi pò mat cau jơngo bơh tŭ pa deh. 33Dilah cau do ò tus bơh Yàng Tom Trồ, gen ò rgơi lơh bơta lơi ò.” 34Bol khai ho lah: “Jơh să jan mê deh tòm tồi glài, mơ kòñ bơto bol hi ơ?” Gen bol khai bơtrơh tơlik khai di tiah.

35Yàng Jesu kơno bol hơ̆ neh bơtrơh tơlik khai, gen tàng tŭ tìp khai Kơnràñ lùp lah: “Mê dòn Kòn#9:35 Gsc: Kòn Mơnus. Yàng Tom Trồ sơl?” 36Khai ho lah: “Ơ Yàng, cau hơ̆ la ñcau, tồ añ in dòn khai, taih?” 37Yàng Jesu ho lah: “Mê neh gŏ khai, mơ hơ̆ la cau ơm đơs mơ mê do.” 38Khai ho lah: “Ơ Yàng, añ dòn; gen khai cùn khoai Kơnràñ.”

39Yàng Jesu đơs lah: “Añ neh lòt tus tòm dunnia do nàng cahrña, lơh cau jơngo in gơs gŏ; ai cau gŏ, gen gơlik jơngo.” 40Ală cau Pharisi ơm rềp tềng hơ̆ kơno ală jơnau hơ̆, gen đơs mơ Kơnràñ lah: “Bol hi kung la cau jơngo sơl ơ?” 41Yàng Jesu ho lah: “Dilah bol mê la cau jơngo, gen ò gơs tồi glài ò; mơya tài bơh bol mê đơs: ‘Bol hi gŏ,’ gen tàng tồi glài bol mê dê gam wơl.”

Currently Selected:

Jang 9: KPM2018

Highlight

Copy