Lebi 1
1
Phan ơn duh khoai chu pơrguc
1Yàng Jehôwa hòi Môise mơ đơs mơ khai bơh di Sàl Tòm Mat. Kơnràñ đơs lah: 2“Đơs tĕ mơ cau Israel lah: ‘Tòm tŭ cau lơi tòm bol mê cèng ơn dô nơm phan ơn duh khoai Yàng Jehôwa in gen cèng tĕ dô nơm phan poan jơng bơh tòm mpồl kơnrồ hala mpồl belàt.
3Dilah phan ơn duh khoai la dô nơm phan ơn duh khoai chu pơrguc bơh di mpồl kơnrồ, khai pal ơn dô nơm kơnrồ dam ò gơs tềl sồt rmàñ; khai pal cèng gơ tus di mpồng mut tòm Sàl Tòm Mat nàng geh dòp di đap Yàng Jehôwa. 4Khai pal ơn tê khai dê di bồ phan ơn chu pơrguc hơ̆, gen gơ rơp geh dòp ala khai nàng tơwài glài khai in. 5Khai pal tơnchơt kơnrồ dam hơ̆ di đap Yàng Jehôwa, lồc behơ̆ ală kòn klau Arôn dê la ală cau gơnoar ơn phan duh khoai ai mhàm mơ rsìh gơ di jơh ală gah cơnòng duh khoai di tiah mut lik Sàl Tòm Mat dê. 6Khai pal klò gơltau phan ơn chu pơrguc hơ̆ mơ koh rpot rpet. 7Ală kòn klau cau gơnoar ơn phan duh khoai Arôn dê pal sing ồs hơđang cơnòng duh khoai mơ dap lòng hơđang ồs. 8Gen ală kòn klau Arôn dê la ală cau gơnoar ơn phan duh khoai rơp dap ală pet poac neh koh, bal mơ bồ mơ dơngi gơ hơđang lòng ồs sa hơđang cơnòng duh khoai. 9Khai pal ai dà mơ rào ală pơnah tòm dơlam kơnrồ bal mơ ală jơng gơ dê, mơ cau gơnoar ơn phan duh khoai pal chu jơh ală phan hơđang cơnòng duh khoai. Hơ̆ la dô nơm phan ơn chu pơrguc, dô nơm phan ơn chu tòm ồs, gơs ƀô bơlhu niam nùs Yàng Jehôwa.
10Dilah phan ơn duh khoai la dô nơm phan ơn chu pơrguc bơh di mpồl belàt, la belàt hala ală be, gen khai pal ơn dô nơm belàt hala be dam ò gơs tềl sồt rmàñ. 11Khai pal tơnchơt gơ di đah đang cơnòng duh khoai di đap Yàng Jehôwa, mơ ală kòn klau Arôn dê la ală cau gơnoar ơn phan duh khoai rơp rsìh mhàm gơ di jơh ală gah cơnòng duh khoai dê, 12Khai pal koh rpot rpet gơ mơ cau gơnoar ơn phan duh khoai rơp dap ală pet hơ̆ bal mơ bồ mơ dơngi gơ hơđang lòng ồs sa hơđang cơnòng duh khoai. 13Khai pal ai dà mơ rào jơh ală phan tòm dơlam bal mơ jơng gơ, mơ cau gơnoar ơn phan duh khoai pal cèng jơh ală phan hơ̆ mơ chu hơđang cơnòng duh khoai. Hơ̆ la dô nơm phan ơn chu pơrguc, dô nơm phan chu mơ ồs, gơs ƀô bơlhu niam nùs Yàng Jehôwa.
14Dilah phan ơn duh khoai Yàng Jehôwa la dô nơm phan ơn chu pơrguc mơ ală sềm gen khai pal ơn dô nơm ntòp hala dô nơm kòn ntòp hui. 15Cau gơnoar ơn phan duh khoai rơp cèng gơ tus hơ cơnòng duh khoai, tơryoat tac ngko gơ mơ chu gơ hơđang cơnòng duh khoai; mhàm gơ pal lòi gơhòr lik jơh di gah cơnòng duh khoai. 16Khai pal tă klung gơ bal mơ ală phan tòm dơlam klung gơ mơ sang jơh hơ đah mattơngai lik cơnòng duh khoai dê la tiah gơs bùh. 17Khai pal at di ală pơnđar mơ crè gơ gơs bàr pơnah mơya ò di gơltac is gơ dê, lồc behơ̆ cau gơnoar ơn phan duh khoai rơp chu gơ hơđang lòng ồs sa hơđang cơnòng duh khoai. Hơ̆ la dô nơm phan ơn chu pơrguc, dô nơm phan ơn chu mơ ồs gơs ƀô bơlhu niam nùs Yàng Jehôwa.’”
Currently Selected:
Lebi 1: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.